1 Corintios 2

1- 2Neajta inee, ne'ihuaamua'a, netɨ́'ɨj amuacaí á mú ja'uvé'emuaareca'a nej ni tejámuaatá'ixaate'en ɨ́ niuucari tɨ jɨ́n Dios te'ataújratziiri'i, canu cui'i niyen ne'ɨ́jna jɨ́n tejamuá'ixaa ne'ɨ́jna jɨme'e ɨ́ niuucari tɨ huápɨ'ɨ jɨ́n naa namuajre'e, canu neajta ne'ɨ́jna jɨme'e ɨ́ huá'amua'atziira'a ɨ́ teteca sino ayée nu tiraaxɨ́'epɨ'ɨntare nej a'ɨ́ɨ na'a yaú'itɨée ná'ara'ani mú'ejmi jemi ne'ɨ́jna ɨ́ Jesús tɨ ajta Cɨríistu'u pú'een, ɨ́ mej rá'utatai ɨ́ cúruu jetze. 3Neajta, netɨ́'ɨj ne'uun a'utéveeca'a mú'ejmi jemi, ayée nu amua'aséijrate'ecaa tɨ nu'u caí nú'uca'anisti'i. Cu xɨee nej tí'itziɨɨne'eca'a. Jee xaa, jeíhua nu névivejca'a. 4Ajta a'ɨ́ɨn ɨ́ niuucari, ɨ́ nej jɨ́n tejamuá'ixaa, capu ayén éene'e tɨ́j a'ɨ́jna tɨ huápɨ'ɨ naa namuajre'e, tɨ ajta huá'amua'atziira'a jetze airánineica ɨ́ mej jɨ́n huá'amua'itɨcɨ ɨ́ teɨte. Capu xaa ne'u, sino ayée nu ne'ɨ́jna jɨ́n tejámuaatá'ixaa sej si ráamua'aree nej ne'ɨ́jna jetze aránca'ane ɨ́ xɨéjniu'ucare'ara'an ɨ́ Dios, ajta a'ɨ́ɨ pu jemin me'ecan ɨ́ muárɨ'eri'ira'a ɨ́ nej jɨ́n niyen rɨcɨ. 5Ayee nu ne'ɨ́jna jɨ́n huarɨ́j, sej si caí se'ɨ́jna jetze araújca'anen ɨ́ huá'amua'atziira'a ɨ́ teteca sino sej si se'ɨ́jna jetze araújca'anen ɨ́ muárɨ'eri'ire'ara'an ɨ́ Dios se'ɨ́jna jɨme'e ɨ́ sej té'atzaahuate'e. 6Mɨ teajta iteen, teen tu xaa te'ɨ́jna jɨ́n tejamuá'ixaa seɨ́j jɨme'e ɨ́ mua'atzíira'a a'ɨ́mej tzajta'a ɨ́ mej meri tiu'unáijmi'ire. Ajta a'ɨ́ɨn ɨ́ mua'atzíira'a, capu huá'a jetze huanéj a'ɨ́mej ɨ́ mej yen japuan seijre'e ɨ́ chaanaca. Capu ajta huá'a tzajta'a me'ecan a'ɨ́mej ɨ́ mej tí'aijta íiyen chaanaca japua, ɨ́ mej majta a'uvá'ɨtzɨ. 7Jee xaa ne'u, teen tu tiyen raxa ɨ́ Dios mua'atzíira'a jɨme'e tɨ caí rɨ'ɨrí tɨ ja'atɨ ayén ruseɨ́j a'ij tirájteuni, ɨ́ mua'atzíira'a tɨ rú'avaataca'a tɨ jɨ́me'en ajmí'i ɨmuá tɨ́'ɨj caí xɨ huataseíjre ɨ́ chaanaca. Dios pu ayén tiraaxɨ́'epɨ'ɨntare tɨ ayén tí'itacɨ'ɨti itejmi a'ɨ́jna tɨ huápɨ'ɨ naa seíire'e á'ara'ani. 8Mɨ majta a'ɨ́ɨme, ɨ́ mej yen tí'aijta íiyen chaanaca japua, capu a'atzu a'ij tihuá'amitɨejte'eca'a a'ɨ́jna tɨ rú'avaataca'a, a'iné tɨ pua'a miyen ramua'aréerecajche'e, camu miyen tirá'atatánche'e ɨ́ tavástara'a, ɨ́ tɨ ajta huápɨ'ɨ naa tí'iseijre'e á'ara'ani tɨ́j na'a rusén jɨme'e. 9Mɨ ajta, ayée pu té'eyu'usi'i tɨjɨ́n: A'ɨjna tɨ yee Dios rɨ́'ɨ ráaruu a'ɨ́mej jɨme'e ɨ́ mej raxɨ́'eve'e, capu ja'atɨ ayén raaseíj, capu ajta a'ij tihuá'amitɨejte'eca'a a'ij tɨ té'eme'enche'e. 10Mɨ ajta a'ɨ́ɨn, Dios pu taataseíjrate a'ɨ́jna jɨme'e tɨ téjmi jemi raateájtuaa a'ɨ́jna ɨ́ ruxɨ́ejniu'uca tɨ ij a'ɨ́ɨn ayén titaata'ítɨi. Ajta a'ɨ́ɨn xɨéjniu'ucare'ara'an, nain pu jɨ́n ayén tirá'amitɨejte'e, ajta nain pu tirú'umua'aree a'ij tɨ tirá'amitɨejte'e ɨ́ Dios. 11Ayee pu'u, a'iné huá'a jɨme'e ɨ́ teteca, a'ɨ́ɨn xɨéjniu'ucare'ara'an ɨ́ teáata'a, a'ɨ́ɨ pu'u tirú'umua'aree a'ij tɨ tirá'amitɨejte'e a'ɨ́jna ɨ́ ja'atɨ. Ayee pu che'atá na'a 'een ɨ́ Dios jemi. Capu ja'atɨ tirú'umua'aree a'ij tɨ tirá'amitɨejte'e ɨ́ Dios sino a'ɨ́ɨ pu'u ɨ́ xɨéjniu'ucare'ara'an ɨ́ Dios. 12Mɨ teajta iteen, catu te'ɨ́jna ancuré'a ɨ́ huá'amua'atziira'a a'ɨ́mej ɨ́ mej yen japuan huachéjme ɨ́ chaanaca sino a'ɨ́ɨ pu téjmi jemi huateájturaa a'ɨ́jna ɨ́ xɨéjniu'ucare'ara'an ɨ́ Dios tej ti yaú'itɨée tá'ara'ani a'ij tɨ Dios ari ruxɨ́'evi'ira'a jɨ́n rɨ́'ɨ titaatá'a. 13A'ii pu a'ɨ́ɨn pú'een ɨ́ tej amuá'ixaa. Capu a'ɨ́ɨn na'a pú'een ɨ́ huá'amua'atziira'a ɨ́ mej jɨ́n tá'itɨiri'i ɨ́ teteca sino a'ii pu a'ɨ́ɨn pú'een ɨ́ niuucari tɨ ayén jɨ́n tá'itɨiri'i ɨ́ xɨéjniu'ucare'ara'an ɨ́ Dios. Ayee tu rɨcɨ tej huaú'ixaa a'ij tɨ huataújmua'a ɨ́ mua'atzíira'a tɨ Dios jemi é'eme'ecan te'ɨ́jna jɨme'e ɨ́ niuucari tɨ a'ɨ́ɨn xɨéjniu'ucare'ara'an ɨ́ Dios ca'aníjra'a taatá'a tej tiyen tiu'utaxáj. 14Ajta a'ɨ́jna tɨ caí jemin huateájturaa ɨ́ xɨéjniu'ucare'ara'an ɨ́ Dios, a'ɨ́ɨ pu caí ra'ancuré'asin a'ɨ́jna tɨ jemin é'eme'ecan ɨ́ xɨéjniu'ucare'ara'an ɨ́ Dios, a'iné capu ti'itɨ a'ij huataújmua'a a'ɨ́jna jemi ɨ́ ja'atɨ. Capu rɨ'ɨrí tɨ a'ɨ́ɨn yaú'itɨée á'ara'ani a'iné ayée pu ruxe'eve'e tɨ ja'atɨ ayén jetzen araújca'anen ɨ́ xɨéjniu'ucare'ara'an ɨ́ Dios, tɨ ij ayén tirá'amitɨejte'e a'ij tɨ huataújmua'a. 15Ajta a'ɨ́ɨn tɨ jetzen araújca'ane ɨ́ xɨéjniu'ucare'ara'an ɨ́ Dios, nain pu ayén tirá'amitɨejte'e a'ame tɨ pua'a ayén tí'ivaɨre'e nusu caí. Mɨ ajta, capu rɨ'ɨrí tɨ seɨj ayén rá'axɨjte'en a'ɨ́jna ɨ́ ja'atɨ, tɨ pua'a tí'ivaɨre'e nusu caí. 16Ayen tɨjɨ́n: “¿A'ataani yee tirú'umua'aree a'ij tɨ tirá'amitɨejte'e ɨ́ tavástara'a tɨ ij a'ɨ́ɨn ja'atɨ ayén tirá'itɨii?” Mɨ teajta iteen, ayée pu ayén titá'amitɨejte'e a'ij tɨ ajta tirá'amitɨejte'e ɨ́ Cɨríistu'u.

will be added

X\