1 Corintios 16

1Jɨ́me'en ɨ́ tumin sej raseɨre'e sej si jɨ́n hua'utévaɨre'en a'ɨ́mej ɨ́ mej Dios jemi seijre'e, ayée nu che'atá nena'a tejá'amua'íjcate'e a'ij nej neri tihua'u'íjca a'ɨ́mej ɨ́ mej e'etiújse'ɨri nainjapua u Galacia. 2Ayee xu huárɨni seɨj seajta seɨj, a'ɨ́jna xɨcáara'a tɨ jetzen te'ute'itɨén ɨ́ itɨeeri. Ché'e seɨ́j ayén ra'ajtá'an ɨ́ ruche a'achú tɨ caj tí'ixe'evi'ira'a, tɨ pua'a Dios raatá'a jeíhua nusu cɨ́j na'a. Ché'e a'ɨ́ɨn rájseɨre'en tɨ́j na'a seɨ́j itɨeeri tɨ ij caí ché'e ayén ruxe'eve'e sej rajsé'ɨrihua'an a'ájna netɨ́'ɨj ne'uun a'atanén. 3Netɨ́'ɨj ne'uun e'ará'asti, aj nu ni niyen hua'uré'epijte'esin ɨ́ yu'uxari a'ɨ́mej ɨ́ sej hua'antíhuau mej mi me'ɨ́jna jɨ́n majta ra'anú'an a'ujna u Jerusalén ɨ́ sej seri rájseɨj sej hua'utapuaíjve'esin. 4Tɨ pua'a ajta ayén tiná'amitɨejte'e tɨ ayén titaatéva'ɨri nej neajta ne'uun á'ume'en, a'ɨ́ɨ mú majta á'uju'u muá'aju'u neetzi jamuan. 5Netɨ́'ɨj ne'uun amuacaí a'atanén u Macedonia, aj nu ni amúumuaarin. Mɨ neajta inee, nauj mi'i ne'uun u a'atanén u Macedonia. 6Tij necaí a'atzu mú'ejmi jemi á'ateeri, na'ari niyen á'ateevi'in tɨ́j na'a tɨ huáseevi'i a'ame sej si siyen naatévaɨre'e se'ɨ́jna jɨme'e a'u tɨ na'a nej á'ume. 7Canu niyen raxɨ́'eve'e nej íjii nena'a amuaaséij nej ni a'atzu nena'a amuáamuaare, sino ayée nu raxɨ́'eve'e nej ni á'ateevi'in nej ne'uun á'ucatii mú'ejmi jemi, tɨ pua'a ayén tinetá'acare'en ɨ́ tavástara'a. 8- 9Mɨ neajta inee, a'úu nu a'utevée na'ame ne'újna u Éfeso ajta na'a caí teja'uré'enen a'ájna matɨ́'ɨj tí'iyeste me'ɨ́jna jɨme'e ta'aráahua'apua tɨ ará'ase i itɨeeri. Jee xaa, ayée nu huárɨni a'iné naa pu tináavaɨ a'ɨ́jna jɨme'e ɨ́ nej tí'imuarɨ'e nej ni jeíhua huápɨ'ɨ raatévaɨre'en ɨ́ tavástara'a. Capu amɨ́n a'ij mej jeíhua néjcha'ɨɨre'e. 10Ajta, tɨ́'ɨj a'uun a'atanén a'ɨ́jna ɨ́ Timoteo, setá'aj rɨ́'ɨ tirájcha'ɨɨca temua'a naa, a'iné a'ɨ́ɨ pu ayén che'atá na'a tí'ivaɨre'e ɨ́ tavástara'a jemi netɨ́j inee. 11Ché'e caí ja'atɨ raxɨéehuata. Tɨ́'ɨj ajtahua'a u a'arájra'ani, setá'aj raatá'an tɨ́j na'a tɨ ayén ruxe'eve'e tɨ ij ajtahua'a yé ra'asti neetzi jemi. Ayee nu rachú'eve'e tɨ a'ɨ́ɨn yé huácatii huá'a jamuan ɨ́ seica ɨ́ ta'ihuaamua'a. 12Ajta a'ɨ́jna ɨ́ ta'ihuaara'a, a'ɨ́jna ɨ́ Apolos, jé'ecan nu ca'aníjra'a raatá'acare'e ná'aye'i tɨ mú'ejmi jemi a'atanén huá'a jamuan ɨ́ seica ɨ́ ta'ihuaamua'a. Mɨ ajta a'ɨ́ɨn, capu á'uye'imɨ'ɨ já'araa. Aj pu nu'u a'uun a'atanéjsin mú'ejmi jemi tɨ́'ɨj huatácɨ'ɨpéeca. 13Rɨ́'ɨ xu'u mú'een. Setá'aj rɨ́'ɨ tí'iteseijre'e se'ɨ́jna jɨme'e sej rá'astijre'e ɨ́ tavástara'a. Setá'aj seajta huateújca'anen ɨ́ ru tzajta'a. Setá'aj seajta araújca'anen se'ɨ́jna jetze ɨ́ xɨéjniu'ucare'ara'an ɨ́ Dios sej si te'utáviicua'i. 14Setɨ́j sena'a sej siyen rɨcɨ, setá'aj siyen rɨjca se'ɨ́jna jɨme'e sej huaújxe'eve'en. 15- 16Xu'uri ramua'aree a'ii mú a'ɨ́ɨn pú'een ɨ́ mej amuacaí huataújtuiiri'i ɨ́ tavástara'a jemi ayujna Acaya a'ɨ́ɨme ɨ́ teɨtestemua'ame'en a'ɨ́jna ɨ́ Estéfanas. A'ɨ́ɨ mú majta meri me'ɨ́jna jɨ́n autéjhuii mej hua'utévaɨre'en a'ɨ́mej ɨ́ mej Dios jetze ajtéme'ecan. Ayee nu ca'aníjra'a amuaatá'aca, ne'ihuaamua'a, sej si huá'atzaahuate'e a'ɨ́mej, seajta naíjmi'ica ɨ́ teɨte ɨ́ mej miyen che'atá mena'a tí'imuarɨ'e tetɨ́j iteen, ɨ́ mej majta tzáahuati'ira'a jɨ́n tí'ivaɨre'e ɨ́ tavástara'a jetze me'ecan. 17Nee nu xaa huatántemua'ave matɨ́'ɨj yé ra'áa, a'ɨ́jna ɨ́ Estéfanas jamuan a'ɨ́jna ɨ́ Fortunato, ajta a'ɨ́jna ɨ́ Acaico. A'ɨ́ɨ mú xaa rɨ́'ɨ tinaatá'a me'ɨ́jna jɨme'e mej yé náamuaareca'a mú'ejmi jetze me'ecan tɨ ij caí ti'itɨ ná'aturaate'e. 18A'ɨ́ɨ mú rɨ́'ɨ tinaatá'a yú ne tzajta'a. Majta mú rɨ́'ɨ amuaatá'asin mú'ejmi ɨ́ a'amua tzajta'a. Ayee pu tiú'ujxe'eve'e sej rɨ́'ɨ tihua'utá'an naíjmi'ica ɨ́ teteca mej miyen 'een matɨ́j a'ɨ́ɨme ɨ́ mej huaíca. 19Yé mú á'amuateujte'e a'ɨ́ɨme ɨ́ mej e'etiújse'ɨri hua'atéyujta'a tɨ a'u tɨ seijre'e tɨ́j na'a tɨ a'u tɨ huatacá'a íiye Asia. Ajta a'ɨ́jna ɨ́ Aquila, ajta a'ɨ́jna ɨ́ Priscila, a'ɨ́ɨ mú temua'a naa á'amuateujte'e niuucajtze'en ɨ́ tavástara'a. Ayee mú che'atá mena'a yé á'amuateujte'e naíjmi'i ɨ́ mej e'etiújse'ɨri a'u mej é'eche a'ɨ́jna ɨ́ Aquila, ajta a'ɨ́jna ɨ́ Priscila. 20Naími'i ɨ́ ta'ihuaamua'a ɨ́ mej yé huateí, a'ɨ́ɨ mú majta á'amuateujte'e. Setá'aj huaújteujte'en temua'a naa, xu'iteújpɨ'ɨtze'axɨ'ɨ niuucajtze'en ɨ́ tavástara'a. 21Neajta inee, i nej Pablo pú'een, nemuajca'a nu jɨ́n tejá'amuayu'use'e nej ni neajta amuaatateujte'en. 22Tɨ pua'a ja'atɨ caí raxɨ́'eve'e ɨ́ tavástara'a, ché'e ayén puaíjtzi ráacɨ'ɨti. Ché'e yé uvé'enen ɨ́ tavástara'a. 23Ché'e a'ɨ́ɨn tavástara'a, a'ɨ́jna ɨ́ Jesús, ché'e a'ɨ́ɨn rɨ́'ɨ tejamuatá'acare'en. 24Jéihua nu neajta já'amuaxe'eve'e ne'ɨ́jna jɨme'e sej seajta se'ɨ́jna jetze ajtéme'ecan ɨ́ tavástara'a, a'ɨ́jna ɨ́ Jesús. Yee pu'u, ché'e ayén teja'uré'enen.

will be added

X\