1 Corintios 15

1Neajta nu niyen tejá'amua'ixaate'e, ne'ihuaamua'a, sej si ra'utámua'aree a'ij nej éene'en jɨ́n tejamuá'ixaa ne'ɨ́jna ɨ́ niuucari tɨ jɨ́n Dios jamua'irátuaasin, ɨ́ sej seajta ra'ancuré'a, ɨ́ sej seajta seuj siyen jemin seijre'e. 2A'ii pu a'ɨ́ɨn pú'een ɨ́ niuucari tɨ jɨ́n Dios amua'irátuaasin tɨ pua'a seuj siyen rá'astijre'e a'ij nej neri tejámuaatá'ixaa. Na'ari caí, capu ti'itɨj a'ij tejá'amuavaɨre'e tɨ pua'a seɨcɨé sena'a tirá'antzaahua. 3Ayee na'a, a'iné ayée nu che'atá nena'a a'amua jemi raateájtuaa ne'ɨ́jna ɨ́ nej neajta ra'ancuré'a ɨ́ tɨ jaítze'e ruxe'eve'e tej ráamua'aree tɨ a'ɨ́ɨn Cɨríistu'u huamɨ́'ɨ ta jetze me'ecan tɨ ij titaatá'uuni'i ɨ́ tej jɨ́n auteájturaa ɨ́ Dios jemi. Ayee pu té'eyu'usi'i ɨ́ yu'uxari jetze. 4Matɨ́'ɨj nu'u ra'avá'ana, ajta, tɨ́'ɨj ayén teuumé'eca huaíca xɨcaj tzajta'a, Dios pu ayén ra'ajjáj huá'a tzajta'a ɨ́ mɨ'ɨchite a'ij tɨ té'eyu'usi'i ɨ́ yu'uxari jetze. 5Aj pu 'i a'ɨ́jna jemi huataseíjre ɨ́ Pedro, ajta á'iyen huá'a jemi ɨ́ mej tamuáamuata'a japuan seɨj ará'ase. 6Ajta á'iyen a'ɨ́mej jemi huataseíjre ɨ́ mej miyen a'ará'ase a'achú cumu anxɨ́j ciento japuan cɨ́j caj matɨ́'ɨj naíjmi'i u e'etiújseɨre'eca'a. Maúche'e mú mu'íi ruuri, majta seica, meri huácuii. 7Tɨ'ɨquí ajta a'ɨ́jna jemi huataseíjre ɨ́ Jacobo, ajta á'iyen naíjmi'ica jemi ɨ́ tɨ hua'antíhuau. 8- 9Ajta, neetzi jemi pu'uqui te'entipuá'ajte tɨ ayén huataseíjre. Tij ayée nu huanú'ihuaca'a matɨ́'ɨj caí xɨ nechú'eve'eca'a, a'iné nee nu ne'ɨ́n pú'een ɨ́ tɨ jaítze'e cɨ́lieene'en jɨ́n ti'itéjvee huá'a jemi tɨ Dios hua'antíhuau. Jee xaa ne'u, capu ayén tiraavíjte'e nej niyen raataxáj yee nee nu huá'a jetze ajtéme'ecan a'ɨ́mej ɨ́ tɨ Dios hua'antíhuau, a'iné nee nu huápɨ'ɨ a'ij pua'a huá'uruu a'ɨ́mej ɨ́ mej e'etiújse'ɨrihua'a mej mi raaténajche ɨ́ Dios. 10Mɨ ajta Dios, a'ɨ́ɨ pu rɨ́'ɨ tinaatá'a. A'ɨ́j nu jɨ́n nee nu ne'ɨ́n pú'een seɨ́j tɨ Dios na'antíhuau. Ajta jé'ecan pu huápɨ'ɨ tiu'utévaɨ tɨ a'ɨ́ɨn ayén rɨ́'ɨ tinaatá'a a'iné jaítze'e nu ca'anín jɨ́n tiu'umuárɨej mecaí ɨ́ seica. Mɨ ajta, Dios pu a'ɨ́ɨn pú'eene'e tɨ ca'aníjra'a naatá'a. Canu neseɨ́j nena'a tiu'umuárɨej. 11Capu amɨ́n a'ij. Capu jetzen ruxe'eve'e tɨ pua'a a'ɨ́ɨme mé tiu'umuárɨej nusu inee. Naími'i tu tiyen che'atá tena'a tihuá'ixaate'e. Seajta mú'een, ayée xu che'atá sena'a té'antzaahua. 12Ajta, tɨ pua'a teri tiyen tejamuá'ixaa tɨ Dios ra'ajjáj ɨ́ Cɨríistu'u huá'a tzajta'a ɨ́ mɨ'ɨchite, ¿a'iné 'een jɨme'e miyen ti'ixáata muá'aye'i seica, ɨ́ mej a'amua jetze ajtéme'ecan a'ɨ́jna jɨme'e mej nu'u caí ché'e huatarújsin a'ɨ́ɨme ɨ́ mej meri huácuii? 13Ayee nu tejá'amua'ixaate'e. Tɨ pua'a ayén mecaí ché'e huatarún a'ɨ́ɨme ɨ́ mej meri huácuii, capu ajta Dios ra'ajjáj ɨ́ Cɨríistu'u huá'a tzajta'a ɨ́ mɨ'ɨchite. 14Ajta, tɨ pua'a Dios caí ra'ajjáj ɨ́ Cɨríistu'u, capu ti'itɨ vaɨre'e ɨ́ tej teri tejamuá'ixaa, ajta capu ti'itɨj vaɨre'e sej siyen té'atzaahuate'e. 15Ajta, ayée pu té'eme tej tí'ihua'itaca tena'a te'ɨ́jna jɨme'e ɨ́ tej jɨ́n tiu'utaxájtaca'a te'ɨ́jna jɨme'e ɨ́ Dios, a'iné tu'uri tiyen raataxájtaca'a yee: “A'ɨ́ɨ pu ra'ajjáj ɨ́ Cɨríistu'u huá'a tzajta'a ɨ́ mɨ'ɨchite.” Mɨ ajta caí capu, tɨ pua'a mecaí ché'e huatarún ɨ́ mej meri huácuii. Jee xaa ne'u, tɨ pua'a ayén 'een matɨ́j seica tí'ixaxa'a, capu Dios ayén ra'ajjáj. 16Ayee pu'u, tɨ pua'a Dios caí hua'ajájpuaxɨ'ɨ a'ɨ́mej ɨ́ mej meri huácuii, ayée pu huataújmua'a tɨ caí Dios ajta ra'ajjáj ɨ́ Cɨríistu'u. 17Tɨ pua'a caí ra'ajjáj a'ɨ́jna ɨ́ Cɨríistu'u, capu ti'itɨj vaɨre'e sej siyen té'atzaahuate'e. Ajta, tɨ pua'a caí ra'ajjáj, capu ayén a'amua japua huaniú ɨ́ sej jɨ́n auteájturaa ɨ́ Dios jemi. 18Ajta a'ɨ́ɨme ɨ́ mej miyen té'atzaahuate'e ɨ́ Cɨríistu'u jemi muáacuii, mu'uri á'uvej. 19Tɨ pua'a ayée na'a auj titaatéva'ɨri tej teuj i'irúuri tej tiyen rá'atzaahuate'e ɨ́ Cɨríistu'u, jaítze'e pu a'ij pua'a tí'itaruure tɨ caí a'ij tihuá'aruure naíjmi'ica a'ɨ́mej ɨ́ seica ɨ́ mej yen japuan seijre'e ɨ́ chaanaca. 20Mɨ ajta xaa, ayée pu ti'ayajna tɨ Cɨríistu'u a'itáraa huá'a tzajta'a ɨ́ mɨ'ɨchite. A'ii pu a'ɨ́ɨn pú'een ɨ́ ta'anáayeijxɨ ɨ́ tej jɨ́n ramua'aree mej majta huatarújsin a'ɨ́ɨme ɨ́ mej meri huácuii. 21Ayee pu'u na'a, a'iné ayée pu tihuá'acɨ'ɨti ɨ́ teɨte mej miyen huácui'ini me'ɨ́jna jɨme'e tɨ seɨ́j na'a ɨ́ teáata'a ayén auteájturaa ɨ́ Dios jemi, ayée pu che'atá na'a tihuá'acɨ'ɨti mej huatarún me'ɨ́jna jɨme'e tɨ ajta seɨ́j na'a ɨ́ teáata'a huatarúj huá'a tzajta'a ɨ́ mɨ'ɨchite. 22A'iné naími'i mú miyen cui'ica me'ɨ́jna jɨme'e tɨ a'ɨ́ɨn Adán auteájturaa ɨ́ Dios jemi, ayée mú che'atá mena'a huatarújsin me'ɨ́jna jɨme'e mej me'ɨ́jna jetze ajtéme'ecan a'ɨ́jna ɨ́ Cɨríistu'u. 23Mɨ ajta, ayée pu tihuá'acɨ'ɨti a'ij tɨ tíhua'uxɨ́'epɨ'ɨntari'iri'i ɨ́ xɨcáara'an jetze tɨ ayén tiraavíjte'e. Amuacaí pu huatarúj a'ɨ́jna ɨ́ Cɨríistu'u. Ajta á'iyen, tɨ́'ɨj yé uvé'enen, a'ɨ́ɨme mú huatarújsin a'ɨ́ɨme ɨ́ mej Cɨríistu'u jetze ajtéme'ecan. 24Aj pu 'i nain te'entipuá'ajte. Amuacaí pu Cɨríistu'u a'ɨ́mej antipuá'ajte'esin matɨ́j mena'a títeté'u'upu'u, ajta a'ɨ́mej ɨ́ mej ti'itɨj jɨ́n antiújmua'aree. Aj pu'i xaa tiu'utátuiire'esin ɨ́ Dios jemi tɨ́j na'a a'ɨ́ɨn tɨ jɨ́n antiújmua'areereca'a. 25Ayee pu'u, a'iné ayée pu ruxe'eve'e tɨ a'ɨ́ɨn Cɨríistu'u ayén tiu'ita'áijta ajta na'a caí hua'utémua'itɨn matɨ́j mena'a pua'amé mej rájcha'ɨɨre'e. 26Ajta ɨ́ tɨ jɨ́n te'entipuá'ajte tɨ raatémua'itɨn ɨ́ tɨ rájcha'ɨɨre'e, a'ii pu a'ɨ́ɨn pú'een ɨ́ tɨ jɨ́n ú'umɨ'ɨni. 27Ajta, tɨ́'ɨj ayén ti'ixa tɨ nu'u a'ɨ́ɨn nain tiu'utéemua'itɨ, capu xaa ne'u ayén huataújmua'a tɨ a'ɨ́ɨn ajta raatémua'itɨ a'ɨ́jna ɨ́ Dios tɨ ayén raatá'a tɨ nain jɨ́n antiújmua'areere. 28Tɨ́'ɨj tiu'utémua'itɨn nain tɨ́j na'a tɨ íiyen tí'iseijre'e, ajta júte'e tɨ tejé'eseijre'e, a'ɨ́jna tɨ i'i yaujra'an pú'een ɨ́ Dios, a'ɨ́ɨ pu ruseɨ́j huataújtuaasin a'ɨ́jna jemi ɨ́ Dios tɨ nain jɨ́n antiújmua'aree, matɨ́j mena'a pua'amé ɨ́ mej íiyen seijre'e chaanaca japua, ajta u ta japua. 29Tɨ pua'a pɨ́ na'a ayén seɨcɨé éene'en, ¿a'ij tɨ huateújmua'atiiche'e mej miyen tí'ijrɨ'ɨre ɨ́ teɨte mej huámuaɨ'ɨvijhua a'ɨ́mej jetze me'ecan ɨ́ mej meri huácuii? Tɨ pua'a mecaí ché'e miyen huatarún ɨ́ mej meri huácuii, ¿a'iné 'een jɨme'e miyen huá'aniuucajtze'e rumuaɨ'ɨhuaca? 30Teajta iteen, ¿a'iné 'een jɨme'e tiyen á'ataca'ane tɨ́j na'a tej tiyen huácui'ini puaíjtzi jɨme'e? 31Ayee nu tejá'amua'ixaate'e tzáahuati'ira'a jɨme'e ne'ɨ́jna jɨme'e nej ahuántzaahuate'en mú'ejmi jɨme'e ɨ́ Cɨríistu'u jemi, a'ɨ́jna ɨ́ Jesús tɨ ajta tavástara'a pú'een. Tɨ́'ɨj pɨ́ na'a nain xɨcaj tzajta'a, ayée pu tiná'amitɨejte'e ineetzi nej neri mɨ'ɨmɨca. 32Tɨ pua'a mecaí huatarún ɨ́ mej meri huácuii, ¿a'iné ti'itɨj tineetéva'ɨri nej niyen teáata'a pú'een, tɨ pua'a niyen huaténe'use'en huá'a jamuan ɨ́ ti'itén a'ujna já'ahua'a u Éfeso? Ayee mú xaa tí'ixaxa'a tɨjɨ́n: “Tiché'e yee tiú'ucua'ani, teajta ti'itɨ antiyé'en, a'iné ruijmua'a tu cui'ini.” 33Caxu ratá'acare'en tɨ ja'atɨ á'amuacuanamua ti'itɨj jɨme'e. Casi'i, a'ɨ́ɨme ɨ́ mej a'ij pua'a titetiújcha'ɨɨ, ayée mú nu'u a'ij pua'a ca'aníjra'a hua'atá'aca ɨ́ mej rɨ́'ɨ titetiújcha'ɨɨ mej mi majta miyen che'atá mena'a a'ij pua'a huárɨni. 34Setá'aj seajtáhua'a rɨ́'ɨ mé titeumuámua'are'en, setá'aj seajta raatapuá'ajta ɨ́ sej jɨ́n até'ɨtzeaara ɨ́ Dios jemi. Camu tzáahuati'ira'a jɨ́n ramua'ate ɨ́ Dios seica ɨ́ mej a'amua jetze ajtéme'ecan. Ayee nu 'een jɨ́n tejá'amua'ixaate'e nej ni amuaatatévi'iraste'en. 35Mɨ ajta, tɨ pua'a ja'atɨ ayén tiu'uta'íhua'u tɨjɨ́n: “¿A'iné ye'í tí'irɨ'ɨri mej huatarún ɨ́ mɨ'ɨchite? ¿Ti'itájni tévira'an jɨ́n miyen seíire'e muá'aju'u?” 36Mɨ neajta inee, ayée nu tiraatá'ixaate'esin yee, mɨ pej caí mé úumua'aree. A'ɨjna ɨ́ jatzi pej raahuáste, capu ajnéjsin tɨ pua'a caí amuacaí a'utátzi'ite. 37Patɨ́'ɨj tí'ihuaste'e, capej pe'ɨ́jna huaste'e ɨ́ cɨyej tɨ ajnéjsin sino a'ɨ́j pej huaste'en ɨ́ jatzi tɨ pua'a ti'itɨ triigu nusu ti'itɨ seica. 38Ajta a'ɨ́ɨn ɨ́ Dios, a'ɨ́ɨ pu ayén ratá'aca ɨ́ cɨ́ye'ara'an a'ij tɨ ari tiraaxɨ́'epɨ'ɨntari'iri'i, seɨj ajta seɨj ɨ́ jatzi. 39Ajta, capu ruxɨ́'ej na'a 'een ɨ́ hua'ira'a. Seɨ́j pu seɨcɨé éene'e téhua'ira'a ɨ́ teáata'a. Ajta seɨcɨé mú éene'en téhua'ira'a ɨ́ ye'emuaate. Majta a'ɨ́ɨme ɨ́ pina'ase, a'ɨ́ɨ mú majta seɨcɨé éene'en téhua'ira'a. A'ɨ́ɨ mú majta ɨ́ hua'ité, seɨcɨé mú majta éene'en téhua'ira'a. 40Ajta tɨ júte'e tí'iseijre'e, ajta tɨ íiyen tí'iseijre'e chaanaca japua, capu ruxɨ́'ej na'a tí'een. Ajta, seɨ́j pu a'ɨ́ɨn pú'een ɨ́ tɨ naa tihuá'aseijrate'e a'ɨ́jna tɨ júte'e tí'iseijre'e. Ajta seɨ́j pu ajta a'ɨ́ɨn pú'een ɨ́ tɨ naa tihuá'aseijrate'e a'ɨ́jna tɨ tí'iseijre'e íiyen chaanaca japua. 41A'ɨjna ɨ́ xɨcaj, a'ɨ́ɨ pu seɨ́j a'ɨ́ɨn pú'een tɨ naa tihuá'aseijrate'e. Ajta ɨ́ máxcɨra'i, capu ruxɨ́'ej na'a ayén tihuá'aseijrate'e. Majta a'ɨ́ɨme ɨ́ xu'ura'ave, camu majta ruxɨ́'ej mena'a miyen 'een. 42Ayee pu che'atá na'a éene'en tí'iseijre'e a'ɨ́jna jɨme'e ɨ́ mej huatarújsin a'ɨ́ɨme ɨ́ mej meri huácuii. A'ɨjna ɨ́ tévira'an tɨ huanú'ihuaca'a, a'ɨ́ɨ pu á'apua'aren. Ajta a'ɨ́ɨn tɨ Dios ra'ajjájsin, capu ché'e ja'anáj á'apua'aren a'ɨ́jna. 43A'ɨjna tévira'an, ayée pu huanú'ihuaca'a mej caí rɨ́'ɨ tiratá'acare'en. Ajta, tɨ́'ɨj Dios ra'ajján, a'ɨ́ɨ pu temua'a naa rɨ́'ɨ tiraatá'asin. Tɨ́'ɨj huanú'ihua a'ɨ́jna ɨ́ tévira'an, capu a'atzu ruca'ané. Ajta, tɨ́'ɨj Dios ra'ajján, a'ɨ́ɨ pu rumuárɨ'eri'ire'ara'an jɨ́n ra'ajjájsin. 44Ayee pu éene'en nu'ihuan tɨ ij te'utáviicua'i íiyen chaanaca japua. Ajta, ayée pu éene'en ra'ajjájsin tɨ ij ayén jetzen araújca'anen ɨ́ xɨéjniu'ucare'ara'an ɨ́ Dios. Tɨ pua'a ayén seijre'e ɨ́ tévira'an tɨ ayén te'utáviicua'i íiyen chaanaca japua, ajta pu ayén che'atá na'a seijre'e ɨ́ tévira'an tɨ jetzen araújca'anen ɨ́ xɨéjniu'ucare'ara'an ɨ́ Dios. 45Jee xaa ne'u, ayée pu té'eyu'usi'i tɨjɨ́n: “A'ɨjna ɨ́ tevi, a'ɨ́jna ɨ́ Adán tɨ amuacaí huataseíjre, a'ɨ́ɨ pu ayén éene'en ruuri huateájturaa.” Ajta a'ɨ́jna ɨ́ tevi, a'ɨ́jna tɨ ajta Adán pɨ́rɨcɨ ɨ́ tu'uvé'eteajtɨ, ayée pu éene'en huateájturaa xɨéjniu'ucari tɨ ayej a'uj tihua'atá'aca mej miyen ruuri muá'ara'ani. 46Capu amuacaí huataseíjre a'ɨ́jna tɨ jetzen araújca'anen ɨ́ xɨéjniu'ucare'ara'an ɨ́ Dios, sino a'ɨ́jna tɨ ruseɨ́j te'utáviicua'i íiyen chaanaca japua. Tɨ́'ɨj a'ɨ́ɨn ayén huataseíjre'en, aj pu xaa huataseíjre'esin a'ɨ́jna tɨ a'ɨ́ɨn xɨéjniu'ucare'ara'an jetze araújca'anen. 47Ajta, a'ɨ́ɨn ɨ́ teáata'a, ɨ́ tɨ amuacaí huataseíjre, a'ɨ́ɨ pu chuej jɨ́n huatétaavijhuaca'a. A'ɨ́j pu jɨ́n, íiyen mej chuej japua me'ecan. Ajta ɨ́ teáata'a, ɨ́ tɨ hua'apua tɨ huanéj, a'ɨ́ɨ pu júte'e é'eme'ecan. 48Majta a'ɨ́ɨme ɨ́ mej yen japuan huachéjme íiyen chaanaca japua, ayée mú 'een tɨ́j ajta 'een ɨ́ tevi tɨ chuej japua me'ecan. Majta a'ɨ́ɨme ɨ́ mej jetzen ajtéme'ecan a'ɨ́jna tɨ júte'e é'eme'ecan, ayée mú majta 'een tɨ́j 'een a'ɨ́jna ɨ́ ja'atɨ. 49A'ij tej teri tiyen 'een tévira'an jɨme'e a'ɨ́jna ɨ́ tevi tɨ chuej japua me'ecan, ayée tu che'atá tena'a éene'e tá'aju'un tévira'an jɨme'e a'ɨ́jna ɨ́ tevi tɨ júte'e é'eme'ecan. 50Ayee nu tejá'amua'ixaate'e, ne'ihuaamua'a. Capu rɨ'ɨrí tɨ a'uun a'uteárute a'u tɨ Dios tejé'aijta ja'atɨ tɨ na'a tɨ auj ayén seijre'e tévira'an jɨme'e a'ɨ́jna ɨ́ tevi tɨ chuej japua me'ecan. Ajta, a'ɨ́jna ɨ́ ja'atɨ tɨ á'apua'aren, capu rɨ'ɨrí tɨ ayén tiráacɨ'ɨti a'ɨ́jna tɨ caí ja'anáj á'apua'aren. 51Xáanamuajri'i mú'een, a'iné ayée nu tejámuaatá'ixaate'esin ti'itɨj jɨme'e tɨ rú'avaataca'a ɨ́ Dios jemi. Catu naími'i cui'ini, sino Dios pu naíjmi'ica seɨcɨé taruuren itejmi. 52- 53Ayee pu té'eme a'ɨ́jna xɨcáara'a tɨ jetzen huatánamuajre'en ɨ́ trompeeta tɨ jɨ́me'en nain te'entipuá'ajte. Tɨ́'ɨj a'ɨ́ɨn tɨ ta japua tí'ivaɨre'e ucáajijhua ɨ́ trompeeta jetze, aj pu'i ayén seíire'e a'ame tɨ́'ɨj mej huatémaxcava'axɨ'ɨn jíye'itzi jɨme'e. Aj pu'i Dios hua'ajjájpuaxɨ'ɨsin a'ɨ́mej ɨ́ mej meri huácuii mej mi caí ché'e ja'anáj auupuá'are. Teajta iteen, seɨcɨé tu huatétaruurejsin, a'iné ayée pu ruxe'eve'e tɨ a'ɨ́ɨn tɨ á'apua'aren ayén seɨcɨé huaújruuren tɨ ij caí ché'e auupuá'are. Ajta ayén ruxe'eve'e tɨ a'ɨ́ɨn tɨ mɨ'ɨni, ajta ayén seɨcɨé huaújruuren tɨ ij caí ché'e huámɨ'ɨni. 54Tɨ́'ɨj seɨcɨé huaújruuren a'ɨ́jna tɨ á'apua'aren tɨ ij caí ché'e auupuá'are, ajta tɨ́'ɨj ari seɨcɨé huaújruu a'ɨ́jna tɨ mɨ'ɨníiche'e tɨ ij caí ché'e huámɨ'ɨni, aj pu xaa ayén teja'uré'enejsin a'ij tɨ amuacaí té'eyu'usi'ihuaca'a, a'ɨ́jna ɨ́ niuucari tɨ jɨ́me'en raxa yee: “Nain pu hui jɨ́n raatéemua'itɨ a'ɨ́jna ɨ́ tɨ huá'acui'ica. 55Mɨ pej huá'acui'ica, ¿a'uné a'ij 'een ɨ́ pej jɨ́n hua'utéemua'itɨ? Capu mé'e é'eseijre'e xaa ne'u.” Ajta ayén tɨjɨ́n: “Mɨ pej jɨ́n tihua'upuaíj, ¿a'uné a'ij 'een? Capu xaa ne'u mé'e já'ahua'a.” 56Ajta a'ɨ́jna tɨ jɨ́n tihuá'apuaijte'e a'ɨ́jna tɨ ajta huá'acui'ica, a'ii pu a'ɨ́jna jetze araújca'anen ɨ́ mej jɨ́n até'ɨtzeaara ɨ́ Dios jemi. Ajta a'ɨ́jna ɨ́ niuucari ɨ́ mej jɨ́n tí'aijta, a'ii pu a'ɨ́ɨn pú'een tɨ ca'aníjra'a hua'atá'aca mej mi miyen auté'ɨtze'ara'an ɨ́ Dios jemi. 57Mɨ ajta, tiché'e tiyen rɨ́'ɨ tiratá'acare'en te'ɨ́jna ɨ́ Dios tɨ ayén titatá'aca tej tiyen tiu'utémua'itɨn te'ɨ́jna jɨme'e tej jetzen ajtéme'ecan ɨ́ tavástara'a, a'ɨ́jna ɨ́ Jesús tɨ ajta Cɨríistu'u pú'een. 58A'ɨ́j xu jɨ́n siyen huárɨni, ne'ihuaamua'a, mɨ nej já'amuaxe'eve'e huápɨ'ɨ. Setá'aj rɨ́'ɨ tí'iteseijre'e ja'anáj tɨ na'a, setá'aj seajta te'utáviicua'i tɨ ij caí ja'atɨ amuá'ari'i ɨ́ á'amuamua'atziira'a. Setá'aj seajta a'ujca'anéecan jɨ́n tiu'umuárɨ'en ɨ́ tavástara'a jemi ja'anáj tɨ na'a, a'iné xu'uri ramua'aree tɨ jé'ecan huápɨ'ɨ tejámuatéva'ɨri. Caxu huáapua'a sena'a tí'imuarɨ'e tavástara'a jetze me'ecan.

will be added

X\