1 Corintios 13

1Tɨ pua'a necaí raxɨ́'eve'e ɨ́ nexɨ́'ej tevi nej niyen tí'ira'ixaate'e, capu ti'itɨj vaɨre'e. Ayee nu éene'e na'ame ɨ́ jemin tɨ́j ɨ́ tepúusti'i tɨ ayén 'een tɨ́j taampu ɨ́ tɨ jɨ́n ja'atɨ ché'e na'a tí'iruajte'e na'ari tɨ́j tuxa'a ɨ́ tɨ ru jetze rájvitze. Capu amɨ́n a'ij tɨ pua'a niyen seica niuucari jɨ́n tirá'ixaate'en nusu ne'ɨ́jna jɨme'e ɨ́ hua'aniuuca ɨ́ mej tí'ivaɨre'e u ta japua. 2Tɨ pua'a necaí raxɨ́'eve'e ɨ́ nexɨ́'ej tevi, capu ajta ti'itɨ vaɨre'e nej raayɨ́'ɨtɨ nej tiu'utaxáj Dios jetze me'ecan. Tɨ pua'a neyaú'itɨee nain tɨ́j na'a tɨ rú'avaa ɨ́ Dios jemi, nusu nej nain ú'umua'aree na'ari niyen té'atzaahuate'e nej ni niyen tiraata'aíjte'en ɨ́ jɨrí tɨ a'uun tícheni a'u tɨ a'utáca. Tɨ pua'a niyen raayɨ́'ɨtɨ, canu ti'itɨj jɨ́n tí'ivaɨre'e tɨ pua'a necaí neajta raxɨ́'eve'e ɨ́ nexɨ́'ej tevi. 3Ayee pu che'atá na'a 'een tɨ pua'a niyen tihua'uré'e'a'ate'en nain tɨ́j na'a nej tí'ijcha'ɨɨ na'ari tɨ pua'a neajta niyen huatánne'an ɨ́ ne jɨme'e mej mi naateátaira, canu neajta ti'itɨ mua'itɨn tɨ pua'a necaí raxɨ́'eve'e ɨ́ nexɨ́'ej tevi. 4Tɨ pua'a ja'atɨ ayén raxɨ́'eve'e ɨ́ ruxɨ́'ej tevi, ayée pu 'eene'e a'ame. A'ɨ́ɨ pu a'ateevi'i tɨ te'utáviicua'i a'ame, ajta rɨ́'ɨ tirá'ancu'uvajxɨ'ɨsin ɨ́ seɨj. Capu ajta chueere'e, ajta capu á'ujtzaahuate'e. 5Ajta a'ɨ́ɨn tɨ raxɨ́'eve'e ɨ́ ruxɨ́'ej tevi, capu jíye'itzi jɨme'e runeeste tɨ huataniú'ucan, ajta capu rájcha'ɨɨre'e ɨ́ seɨj. Capu ajta te'entiú'uunaca, ajta caí rahuauca ɨ́ tɨ jetzen ruxe'eve'e. Capu ajta ra'utámua'areeri'i tɨ pua'a ja'atɨ ayén a'ij pua'a ráaruuren. 6Ayee pu ajta 'een ɨ́ ja'atɨ tɨ ayén raxɨ́'eve'e ɨ́ ruxɨ́'ej tevi. Capu a'ɨ́jna jɨ́n huataújtemua'ave'esin a'ɨ́jna jɨme'e tɨ a'ij pua'a een sino a'ɨ́j pu jɨ́n huataújtemua'ave'esin a'ɨ́jna jɨme'e tɨ tzáahuati'ira'a jɨ́n ayén huarɨ́j. 7Tɨ pua'a ja'atɨ ayén raxɨ́'eve'e ɨ́ ruxɨ́'ej tevi, a'ɨ́ɨ pu nain jɨ́n tiraatá'uuni'ira. Nain pu ajta jɨ́n té'atzaahuate'e tɨ a'ɨ́ɨn Dios rɨ́'ɨ tiraatá'asin. A'ɨ́ɨ pu ajta nain jɨ́n ti'ijchú'eve'e tɨ Dios nain jɨ́n araúrastejsin. Nain pu ajta jɨ́n té'eviicua'i ɨ́ tɨ jɨ́n tirajpuaíjtzi. 8Capu ja'anáj huatépua'ari tej ti tiyen tí'itaxe'eve'e. Mɨ ajta, a'ɨ́ɨ pu xaa huatépua'ari tej tiyen tí'ixaxa'a ɨ́ Dios jetze me'ecan. Ajta, tej tiyen seica niuucari jɨ́n tí'ixaxa'a, a'ɨ́ɨ pu ajta huatépua'ari. Ajta, a'ɨ́jna tɨ téjmi jemi huateájturaa tej ti temua'a naa tirú'umua'areere, a'ɨ́ɨ pu ajta huatépua'ari. 9Ayee pu'u xaa, catu nain jɨ́n tirú'umua'aree. Catu teajta nain jɨ́n tí'ixaxa'a ɨ́ Dios jetze me'ecan. 10Mɨ ajta, tɨ́'ɨj ayén huataseíjre'en ɨ́ tɨ ari huaújnaijmire, aj pu xaa huatépua'ari ɨ́ tɨ á'aturaacaj. 11Netɨ́'ɨj nauj pá'arɨ'ɨstaca'a, ayée nu che'atá nena'a tí'ixaxa'ata'a tɨ́j pa'arɨ'ɨ, neajta niyen tí'imua'atzejca'a tɨ́j pa'arɨ'ɨ. Ajta íjii, ɨ́ nej neri vásta'a, ayée nu neri mé rúurɨe nej niyen mé teúumua'arejca'a tɨ́j pa'arɨ'ɨ. 12Ajta íjii, ayée tu che'atá tena'a rasise'i ɨ́ Dios tetɨ́j tacɨéenime'e tí'isise'ij 'ájte'ehua jetze, ɨ́ tej caí temua'a raseíj. Mɨ ajta, a'ɨ́jna xɨcáara'a tɨ mé'e vé'eme, aj tu xaa raseijran ɨ́ jetzen, temua'a naa. Ijii, je'icáj nu caj té'umua'aree. Mɨ ajta, a'ɨ́jna xɨcáara'a jetze, nain nu jɨ́n yaú'itɨée na'ame tɨ́j ajta Dios tí'inemua'ate. 13A'ɨ́j pu jɨ́n, tí'ihuaica tɨ íjii ayén seijre'e itejmi jemi. A'ii pu'u a'ɨ́ɨn pú'een: tej té'atzaahuate'e, tej rachú'eve'e tɨ Dios nain jɨ́n raanaíjmire'en, tej huátaxe'eve'en. Ajta a'ii pu a'ɨ́ɨn pú'een ɨ́ tɨ jaítze'e ruxe'eve'e, tej huátaxe'eve'en seɨj teajta seɨj.

will be added

X\