1 Corintios 11

1Neajta inee, ayée nu tiu'umé tɨ́j ajta Cɨríistu'u tiu'umé. Setá'aj seajta mú'een siyen che'atá sena'a huárɨni netɨ́j inee. 2Mɨ seajta mú'een, xɨ́'epɨ'ɨn xu huarɨ́j se'ɨ́jna jɨme'e sej nain jɨ́n néjmua'aree, seajta seuj rá'astijre'e ɨ́ ye'irá ɨ́ nej jamuaatá'itɨiri'i. 3Mɨ neajta inee, ayée nu tí'ijxe'eve'e sej siyen ráamua'ati tɨ Cɨríistu'u ayén antiújmua'aree a'ɨ́mej jemi, matɨ́j mena'a pua'amé seijre'e ɨ́ teteca. Ayee mú che'atá mena'a ɨ́ teteca tite'entiújmua'aree a'ɨ́mej jemi ɨ́ ru'ɨ́jta'amua'a. Ajta Dios pu ayén antiújmua'aree ɨ́ Cɨríistu'u jemi. 4A'ɨ́j nu jɨ́n, ayée nu tejá'amua'ixaate'e. A'atɨ pu ayén raatéxɨeehuata a'ɨ́jna tɨ jɨ́n antiújmua'aree tɨ pua'a utemúucu'utzi huatéjniuuni. 5Ajta, tɨ pua'a 'ɨ́ita'a ayén antimuá'avi'i huatéjniuuni, nusu antimuá'avi'i tí'ixajta ɨ́ Dios jetze me'ecan, a'ɨ́ɨ pu ajta raatéxɨeehuata a'ɨ́jna ɨ́ tɨ tí'ira'aijte'e. Ayee pu che'atá na'a tiu'utévi'iraste'e tɨ́j 'ɨ́ita'a tɨ ayén caújyen rumu'úu jetze. 6Ayee pu'u xaa ti'ayajna, a'iné tɨ pua'a 'ɨ́ita'a caí ayén á'ujca'ane tɨ ra'avá'anan ɨ́ rumu'úu, ayén tiraavíjte'e tɨ a'ɨ́ɨn 'ɨ́ita'a caújsiseaaxɨ'ɨn ɨ́ rumu'úu jetze. Mɨ ajta, tɨ pua'a ayén tirá'amitɨejte'e tɨ tiu'utévi'iraste'e tɨ ayén caújsiseaaxɨ'ɨn, ché'e a'ɨ́ɨn ayén ra'avá'anan ɨ́ rumu'úu. 7Jee xaa ne'u, ayée pu ruxe'eve'e tɨ antimuá'avi'i seijre'e ɨ́ teáata'a a'iné a'ɨ́ɨ pu a'ɨ́ɨn taavíjra'ara'an pú'een ɨ́ Dios, ajta a'ɨ́ɨ pu a'ɨ́ɨn pú'een ɨ́ tɨ rɨ́'ɨ tiratá'aca. Mɨ ajta a'ɨ́ɨn 'ɨ́ita'a, a'ɨ́ɨ pu a'ɨ́ɨn pú'een ɨ́ tɨ rɨ́'ɨ tiratá'aca ɨ́ teáata'a. 8A'iné a'ɨ́jna ɨ́ teáata'a, capu ayén a'ɨ́jna jetze huatétaavijhuaca'a ɨ́ 'ɨ́ita'a jetze sino a'ɨ́ɨn 'ɨ́ita'a, a'ɨ́ɨ pu xaa a'ɨ́jna jetze huatétaavijhuaca'a ɨ́ teáata'a jetze. 9Capu ajta ayén huatétaavijhuaca'a ɨ́ teáata'a a'ɨ́jna jɨme'e tɨ́'ij raatévaɨre'en ɨ́ 'ɨ́ita'a sino a'ɨ́ɨn 'ɨ́ita'a, ayée pu huatétaavijhuaca'a a'ɨ́jna jɨme'e tɨ́'ij raatévaɨre'en ɨ́ teáata'a. 10A'ɨ́j pu jɨ́n ayén ruxe'eve'e tɨ a'ɨ́ɨn 'ɨ́ita'a ayén ra'avá'anan ɨ́ rumu'úu tɨ ij ayén seijre'e tɨ a'ɨ́ɨn rá'astijre'e a'ɨ́jna tɨ tí'ira'aijte'e. Ayee pu ajta ruxe'eve'e tɨ ij caí a'ij pua'a hua'atá'acare'en a'ɨ́mej ɨ́ mej tí'ivaɨre'e ɨ́ ta japua. 11Mɨ ajta, camu rujɨ́ɨmua'a seijre'e ɨ́ 'uuca ɨ́ tavástara'a jemi. Camu majta rujɨ́ɨmua'a seijre'e ɨ́ teteca jemi. 12Ayee pu'u na'a a'ɨ́jna jɨme'e tɨ a'ɨ́ɨn 'ɨ́ita'a a'ɨ́jna jetze huatétaavijhuaca'a ɨ́ teáata'a, ajta a'ɨ́ɨn teáata'a, ayée pu a'ɨ́jna jetze airaújneijte ɨ́ 'ɨ́ita'a. Ajta nain pu Dios jemi teja'uvé'eme. 13Setá'aj siyen rujɨ́ɨmua'a sena'a tiraaxɨ́'epɨ'ɨntare'en tɨ pua'a ayén tiraavíjte'e tɨ pua'a 'ɨ́ita'a ayén antimuá'avi'i huatéjniuuni ɨ́ Dios jemi. 14¿Ni caí ayén tejamuá'amitɨejte'e a'ɨ́jna jɨme'e ɨ́ tej ratéhua'ira'a tɨ ayén tiu'utévi'iraste'e tɨ pua'a teáata'a ayén cáatɨ'ɨre? 15Mɨ ajta, tɨ pua'a 'ɨ́ita'a ayén cáatɨ'ɨre, a'ii pu a'ɨ́ɨn pú'een ɨ́ tɨ jɨ́n rɨ́'ɨ tiratá'aca ɨ́ Dios a'iné ayée pu raateájtuaa ɨ́ cɨpua ɨ́ jemin tɨ ij ayén ra'avá'anan. 16Tɨ pua'a ja'atɨ ayén huárɨni tɨ tájaaxɨejvi'i a'ɨ́jna jɨme'e, setá'aj siyen tiraata'ixaate'en yee catu seɨcɨé tiyen ti'itítacha'ɨɨ, majta a'ɨ́ɨme ɨ́ mej pua'amecɨé e'etiújse'ɨri ɨ́ Dios jemi, camu yee majta seɨcɨé miyen ti'itiújcha'ɨɨ. 17Ajta ɨ́ nej neri jamuaatá'ixaate'esin, canu rɨ́'ɨ tejámuaatá'asin a'iné setɨ́'ɨj mú'een e'etiújseɨre'en, caxu rɨ́'en jɨ́n e'etiújseɨre'en sino a'ij pua'a xu'u rɨjca. 18- 19Amuacaícan, ayée nu yé ráamua'areeri'i sej já'ita'a a'utacɨ́'ɨca setɨ́'ɨj se'uun e'etiújseɨre'en. Mɨ neajta inee, tɨ́mua'a nu tɨ́n té'atzaahuate'e a'iné ayée pu ruxe'eve'e mej seica airáaju'un mú'ejmi jemi ɨ́ mej seɨcɨé tí'imua'atze sej si siyen hua'utámua'ati a'ɨ́mej ɨ́ mej mú'ejmi jemi seijre'e, ɨ́ mej majta tzáahuati'ira'a jɨ́n miyen rɨcɨ. 20Mú'een xu seajta siyen huárɨni. Setɨ́'ɨj e'etiújseɨre'en, caxu se'ɨ́jna jɨ́n tí'icua'ani ɨ́ sej jɨ́n ra'utámua'aree tɨ tavástara'a ta japua huaniú. 21Caxu xaa ne'u, sino tɨ́'ɨj a'ájna teja'uré'enen sej siyen tiú'ucua'ani, setɨ́j sena'a pua'amé siyen rɨcɨ seɨj seajta seɨj. Ayee xu anáaté'ee tí'icua'ani ɨ́ sej te'ucá'inɨ'eme'ecaa. Ajta ɨ́ seica ɨ́ mej caí miyen te'ucá'inɨ'eme'ecaa, capu ché'e tihuá'acɨ'ɨti, sino metɨéecuj mú muá'aju'u. Majta seica miyen huápɨ'ɨ huatétea'aruaijsin. 22¿A'ii tá'uj na'a? ¿Ni tzaa secaí huachéjme a'u sej tejá'ucua'ani, a'u sej seajta a'uyé'en, na'ari seri huá'axɨeehua a'ɨ́mej ɨ́ mej e'etiújse'ɨri ɨ́ Dios jemi, nusu sej siyen raxɨ́'eve'e sej a'ij pua'a tihua'utá'an a'ɨ́mej ɨ́ mej caí ti'itɨ tícha'ɨɨ? ¿A'iné na'a ɨ́ nej jɨ́n tejá'amua'ixaate'e? ¿Ni qui niyen rɨ́'ɨ tejamuá'ixaate'en ne'ɨ́jna jɨme'e sej siyen ti'itiújcha'ɨɨ? Canu xaa ne'u. 23Ayee pu'u na'a, ɨ́ tɨ nevástara'a raateájtuaa ineetzi jemi, a'ij nu'u neajta mú'ejmi jemi huateájtuaa. A'ajná'ɨmua tɨ́ca'ari tzajta'a tɨ́'ɨj avíitzi'i jɨ́n huatátuiri'ihuaca'a ɨ́ tavástara'a, a'ɨ́jna ɨ́ Jesús, a'ɨ́ɨ pu raatiɨ́'ɨpɨi ɨ́ pan. 24Tɨ́'ɨj rɨ́'ɨ tiraatá'a ɨ́ Dios, aj pu'i ra'antítaaraxɨ, ajta ayén tihua'utá'ixaa tɨjɨ́n: “A'ii pu a'ɨ́ɨn pú'een ɨ́ nej ratéhua'ira'a ɨ́ nej jɨ́n mú'ejmi japua niuuni. Setá'aj siyen ráacua'ani sej si se'ɨ́jna jɨ́n na'utámua'aree.” 25Matɨ́'ɨj tiú'ucuaa, ayée pu che'atá na'a huarɨ́j a'ɨ́jna jɨme'e ɨ́ vaasu ɨ́ mej jetzen huayé'en. Ayee pu tihuá'ixaate'e tɨjɨ́n: “Ayee pu huataújmua'a a'íjna i vaasu. A'ii pu a'ɨ́ɨn pú'een ɨ́ niuucari tɨ jéjcua ɨ́ tɨ jɨ́n Dios ti'itɨj jɨ́n te'ataújratziiri'i a'ɨ́jna jɨme'e nej ra'iráxɨre'esin i nexuure'e. Ajta, a'íjna i ye'irá i sej jɨ́n huayé'en se'íjna jetze i vaasu, setɨ́j sena'a sej siyen rɨcɨ, sej siyen se'íjna jɨ́n na'utámua'aree.” Ayee pu'u tihua'utá'ixaa. 26A'ɨ́j pu jɨ́n, setɨ́j sena'a sej racua'ani se'ɨ́jna ɨ́ pan, seajta sej huayé'en se'ɨ́jna jetze ɨ́ vaasu, ayée xu se'ɨ́jna jɨ́n tihua'utá'ixaate'en a'ij tɨ huataújmua'a tɨ a'ɨ́ɨn tavástara'a huamɨ́'ɨ. Mú'een xu siyen tihua'utá'ixaate'esin tɨ́j na'a tɨ yú auca'itɨ́ a'ame ajta na'a caí uvé'enen ɨ́ tavástara'a. 27A'ɨ́j pu jɨ́n, ja'atɨ tɨ na'a tɨ ayén ché'e na'a ráacua'ani a'ɨ́jna ɨ́ pan, nusu cha'a na'a na'a huayé'en a'ɨ́jna jetze ɨ́ vaasu a'ij tɨ caí tiraavíjte'e, ayée pu jetzen ujpuá'ari tɨ raatéxɨeehuataca'a ɨ́ Cɨríistu'u tɨ ayén rajpuaíjtzica'a ɨ́ rutevij jɨme'e, tɨ ajta ra'iráaxɨre ɨ́ ruxuure'e. 28A'ɨ́j pu jɨ́n, ché'e ayén huárɨni ja'atɨ tɨ na'a tɨ ayén amuacaí rá'amitɨejte'e a'ij tɨ 'een ɨ́ ru tzajta'a ɨ́ Dios jemi tɨ ij ayén ráamua'aree tɨ ari ayén tiraavíjte'e. Aj pu xaa, rɨ'ɨríista a'ame tɨ ayén ráacua'ani ɨ́ pan, ajta tɨ huayé'en ɨ́ vaasu jetze. 29Ayee pu 'een jɨ́n ayén ruxe'eve'e tɨ ja'atɨ ayén rá'amitɨejte'e a'ij tɨ huataújmua'a a'ɨ́jna tɨ ratéhua'ira'a ɨ́ tavástara'a. Tɨ pua'a ja'atɨ caí ayén rá'amitɨejte'e a'ij tɨ huataújmua'a ɨ́ ye'irá, ajta cha'a na'a na'a ráacua'ani ɨ́ pan, ajta cha'a na'a na'a huayé'en ɨ́ vaasu jetze, Dios pu ayén puaíjtzi raatá'asin a'ɨ́jna jɨme'e tɨ caí rɨ́'ɨ huaújruu a'ij tɨ tiraavíjte'e. 30A'ɨ́j mú jɨ́n mu'iitɨ́ caí ché'e huá'aca'anisti'i ɨ́ mej a'amua jetze ajtéme'ecan, majta tí'icucui'i. Majta seica meri huácuii. 31A'ɨ́j pu jɨ́n, tɨ pua'a ayén amuacaí tá'amitɨejte'e a'ij tɨ 'een ɨ́ tatzajta'a ɨ́ Dios jemi, capu ayén puaíjtzi táacɨ'ɨti. 32Ajta, tɨ́j na'a tɨ tavástara'a ayén tá'axɨjte'en, a'ɨ́ɨ pu a'ɨ́jna jɨ́n puaíjtzi taatá'asin tɨ ij caí puaíjtzi táacɨ'ɨti naíjmi'ica jamuan ɨ́ mej yen huachéjme, íiyen chaanaca japua. 33A'ɨ́j xu jɨ́n, mú'een, ne'ihuaamua'a, ayée xu huárɨni. Setɨ́'ɨj u e'etiújseɨre'en, setá'aj huaújxe'eve'en seɨj seajta seɨj sej si naími'i tiú'ucua'ani. 34Tɨ pua'a ja'atɨ ayén jeíhua tí'icuata, ché'e a'ɨ́ɨn a'uun tejá'ucua'ani u ruche. Na'ari caí, Dios pu amuá'axɨjte'en setɨ́'ɨj u e'etiújseɨre'en. Neajta inee, netɨ́'ɨj ne'uun a'atanén mú'ejmi jemi, aj nu ni jaítze'e rɨ́'ɨ á'amuaruuren.

will be added

X\