1 Corintios 10

1Ayee nu tí'ijxe'eve'e inee, sej ra'utámua'aree tɨ jaitɨri e'ecáave'e huá'uvi'itɨjme'e ɨ́ tavaújsimua'acɨ'ɨ. Majta á'iyen jaata'a antacɨ́j. 2A'ɨ́ɨ mú huámuaɨ'ɨvijhuaca'a jamuan a'ɨ́jna ɨ́ Moisés teecan tɨ́'ɨj auj e'ecáve'eca'a a'ɨ́jna ɨ́ jaitɨri, majta matɨ́'ɨj antajú'ucaa jaata'a. 3Naími'i mú majta ráacua me'ɨ́jna ɨ́ cua'ira tɨ a'uun a'uvé'emej Dios tɨ é'eseijre'e. 4Majta me'ɨ́jna anti'í ɨ́ jaj tɨ ajta a'uun a'uvé'emej ɨ́ Dios jemi, a'iné a'ɨ́ɨ mú jetze ra'anti'í me'ɨ́jna jetze ɨ́ tetej tɨ huá'a jamuan huamé'ecaa. Ajta a'ɨ́ɨn ɨ́ tetej, a'ii pu a'ɨ́ɨn pú'eene'e ɨ́ Cɨríistu'u. 5Mɨ majta a'ɨ́ɨme, mu'iitɨ́ mú caí rɨ́'ɨ tiraatá'a ɨ́ Dios. A'ɨ́j pu jɨ́n Dios ayén hua'antipuá'ajte a'ujna a'u tɨ caí é'eti'itɨjca'a. 6Ajta, ayée pu 'een jɨ́n té'uyu'usi'ihuaca'a tɨ ij ayén titaatá'itɨii itejmi tej ti caí tiyen te'ɨ́jna jetze tiyen titeejú'un a'ɨ́jna jetze tɨ a'ij pua'a een matɨ́j a'ɨ́ɨme huarɨ́j. 7Caxu huá'anajche ɨ́ mej caí dios pú'een, matɨ́j seica a'ɨ́ɨme huarɨ́j. Caxu huá'anajche xaa ne'u, a'iné ayée pu té'eyu'usi'i tɨjɨ́n: “A'ɨ́ɨme mú teɨte miyen a'ujrá'aseca'a mej mi tiú'ucua'ani, mej mi majta huayé'en. Matɨ́'ɨj mi miyen ájhuiixɨ mej tiu'utéene'en.” 8Jé'ecan pu ruxe'eve'e sej caí siyen che'atá sena'a tiú'ujxana'acɨra'aten matɨ́j seica a'ɨ́ɨme huarɨ́j. Majta, ayée mú huácuii seɨ́j xɨcaj tzajta'a a'achú cumu seité japuan huaíca vi'ira'a ɨ́ teɨte. 9Tiché'e caí ti'itɨ jɨ́n ra'íhua'ura ɨ́ tavástara'a matɨ́j seica a'ɨ́ɨme miyen huarɨ́j. Matɨ́'ɨj mi á'upua'areca'a, matɨ́'ɨj cu'ucu'use hua'ucheí. 10Teta'aj teajta caí a'ij tena'a ti'iteniuuca'an matɨ́j majta seica miyen huarɨ́j. Ajta a'ɨ́ɨn tɨ te'entípuaapua'ate, a'ɨ́ɨ pu hua'antipuá'ajte a'ɨ́mej. 11Jee xaa ne'u, ayée pu 'een jɨ́n tihuá'uruu tɨ ij Dios ayén titaatá'itɨii. Mɨ ajta, ayée pu té'eyu'usi'ihuaca'a a'ɨ́jna jɨme'e tɨ́'ij rɨ́'ɨ táaruuren itejmi, a'iné pu'uri a'ájna teja'uré'enejsin ɨ́ xɨcaj tɨ jetzen te'entipuá'ari ɨ́ chaanaca i tej japuan yen seijre'e. 12A'ɨ́j pu jɨ́n, tɨ pua'a ayén ja'atɨ seɨ́j tirá'amitɨejte'e tɨ caí rɨ'ɨriistan tɨ ti'itɨj jɨ́n até'ɨtze'ara'an ɨ́ tavástara'a jemi, ché'e a'ɨ́ɨn rɨ́'ɨ tiu'umé'en tɨ ij caí auteáturan. 13Tɨ́j na'a tɨ ayén a'amua japua rájve tɨ ij ca'aníjra'a amuaatá'an sej si ti'itɨj jɨ́n auteáturan ɨ́ Dios jemi, ayée pu che'atá na'a huá'a japua rájve matɨ́j mena'a pua'amé íiyen seijre'e chaanaca japua. Ajta a'ɨ́ɨn Dios, capu ja'anáj até'ɨtzea'ara mú'ejmi jemi. A'ɨ́j pu jɨ́n, Dios caí ja'anáj raatá'asin tɨ ti'itɨj ayén huápɨ'ɨ ca'aníjra'a jamuaatá'an sej si auteáturan ɨ́ Dios jemi se'ɨ́jna jɨme'e sej caí ché'e te'utáviicua'i. Mɨ ajta a'ɨ́ɨn, tɨ́'ɨj auj ayén ca'aníjra'a amuaatá'an sej si ti'itɨj jɨ́n auteáturan, Dios pu ajta amuaatá'asin a'ij sej ye'í huárɨni sej si ajtácɨɨne, sej si seajta te'utáviicua'i. 14A'ɨ́j xu jɨ́n, ayée xu huárɨni, mɨ nej já'amuaxe'eve'e. Rɨ́'ɨ xu'u mú'een, sej si caí ja'anáj huá'ana'amiche'en a'ɨ́mej ɨ́ mej caí dioosi pú'een. 15Ayee nu tejá'amua'ixaate'e tɨ́j teɨte ɨ́ mej rɨ́'ɨ meteuumuámua'are. Setá'aj rujɨ́ɨmua'a siyen tiraaxɨ́'epɨ'ɨntare'en tɨ pua'a xɨ́'epɨ'ɨn netí'ixa na'ari necaí. 16A'ɨjna ɨ́ vaasu ɨ́ tej jetzen ye'eca tej ti tiyen rɨ́'ɨ tiraatá'an ɨ́ Dios, a'ɨ́ɨ pu ajta ayén huataújmua'a tej naími'i huatétavaɨre'en te'ɨ́jna jɨme'e Cɨríistu'u tɨ raxuure'e. Ajta a'ɨ́jna ɨ́ pan tej ra'antitá'ara'a tá'aye'i, teen tu teajta naími'i huatétavaɨre'en te'ɨ́jna jɨme'e tɨ Cɨríistu'u ta japua huaniú ɨ́ rutevij jɨme'e. 17Ajta, a'iné seɨj pu'u ɨ́ pan, ayée pu huataújmua'a i tej i'i mu'íi, tu'uri seɨ́j tena'a teɨtejra'an pú'een tej seɨ́j tena'a jetzen ajtéme'ecan, a'iné naími'i tu seɨ́j tena'a cua'aca ɨ́ pan. 18Casi'i, xu'uhuaújmua'atzɨ se'ɨ́jna jetze a'ij mej tí'ijrɨ'ɨre a'ɨ́ɨme ɨ́ mej Israél jetze ajtéme'ecan. A'ɨ́ɨme ɨ́ mej racua'aca ɨ́ mej tí'imuaɨ'ɨvajtaca, a'ɨ́ɨ mú majta naími'i tí'ivaɨre'e ɨ́ Dios jemi. 19¿A'iné ne'u huataújmua'a ɨ́ nej ti'ixa? ¿Ni qui jeíhua jetzen ruxe'eve'e ɨ́ cua'ira ɨ́ mej tí'imuaɨ'ɨvajta huá'a jemi ɨ́ mej caí dioosi pú'een? Capu xaa ne'u. Ari a'ɨ́jna tɨ caí dios pú'een, ¿ni qui jeíhua jetzen ruxe'eve'e a'ɨ́jna? 20Capu xaa ne'u, sein. Ayee pu huataújmua'a ɨ́ nej tejá'amua'ixaate'e. A'ɨjna ɨ́ mej tí'imuaɨ'ɨvajta ɨ́ mej seɨj chuéjra'a japua é'eme'ecan, camu raatámuaɨ'ɨvajta ɨ́ Dios jemi sino a'ɨ́mej jemi mu'u ɨ́ tiyáaru'use. Canu raxɨ́'eve'e sej hua'utévaɨre'en a'ɨ́mej ɨ́ tiyáaru'use. 21Capu rɨ'ɨrí sej siyen jetzen ye'eca ɨ́ vaasu ɨ́ mej jɨ́n rɨ́'ɨ tiraatá'aca ɨ́ tavástara'a tɨ pua'a seajta seuj se'ɨ́jna jetze ye'eca ɨ́ vaasu ɨ́ mej jɨ́n rana'amiche ɨ́ tɨ caí Dios pú'een. Capu ajta rɨ'ɨrí sej jetzen tí'icua'a ɨ́ meesa ɨ́ mej jetzen ra'utámua'aree ɨ́ tavástara'a tɨ pua'a seajta seuj se'ɨ́jna jetze tí'icua'a ɨ́ meesa mej jetzen huá'ana'amiche'e ɨ́ tiyáaru'use. 22Na'ari caí, ayée tu a'ɨ́jna jɨ́n rɨni, ca'aníjra'a tu raatá'asin ɨ́ Dios tɨ a'ɨ́ɨn chueere'e á'ara'ani a'ɨ́mej jemi ɨ́ tiyáaru'use tɨ ij ayén huataniú'ucan itejmi jemi. Ajta, a'ɨ́ɨ pu jeíhua huápɨ'ɨ jaítze'e ruca'ané tecaí iteen. 23Nain pu nu'u ayén tineetá'aca. Mɨ ajta, capu nain ayén tineetéva'ɨri. Nain pu xaa ayén tineetá'aca. Mɨ ajta, capu nain ayén rɨ́'ɨ neruure. 24Seajta, setá'aj siyen huaújruuren seɨj seajta seɨj. A'atɨ tɨ na'a, ché'e caí ayén rahuauca ɨ́ tɨ jɨ́n rɨ́'ɨ huateúvaɨre'en, sino ché'e ayén rahuauca a'ij tɨ ye'í huárɨni tɨ rɨ́'ɨ tiraatá'an ɨ́ ruxɨ́'ej tevi. 25- 26Setá'aj siyen ráacua'ani ti'itɨ tɨ na'a ɨ́ mej ratua a'ujna mej é'eseijre'e ɨ́ mej tí'itu'araca. Caxu seajta siyen tiú'urihua'ura tɨ pua'a ayén a'ij pua'a amuáaruuren ɨ́ á'amuaxɨejniu'uca jetze nusu caí, a'iné tavástara'a pu ra'áa ɨ́ chuej i tej japuan huachéjme. A'ɨ́ɨ pu ajta ra'áa tɨ́j na'a tɨ íiyen tí'iseijre'e. 27Tɨ pua'a seɨj tɨ caí té'atzaahuate'e ajta amuaata'inen sej jamuan tiú'ucua'ani, patá'aj piyen ahua'aca'anen pej pe'uun á'ume'en jamuan a'ɨ́jna ɨ́ ja'atɨ, patá'aj nain tiú'ucua'ani tɨ́j na'a tɨ án teje'etia'asin mú'eetzi jemi. Capej tí'ihua'u pena'a tɨ ij caí a'ij pua'a muáruuren ɨ́ axɨejniu'uca jetze. 28- 29Mɨ ajta, tɨ pua'a ja'atɨ ayén timuaatá'ixaate'en yee tɨ nu'u huatámuaɨ'ɨvijti'ihuaca'a, ayée pej huárɨni pej caí racua'aca pe'ɨ́jna jɨme'e pej raxɨ́'eve'e pej raatévaɨre'en pe'ɨ́jna ɨ́ ja'atɨ tɨ ayén timuaatá'ixaa, pajta pe'ɨ́jna tɨ caí a'ij pua'a raruuren ɨ́ xɨéjniu'ucare'ara'an a'ɨ́jna ɨ́ ja'atɨ. Jee xaa ne'u, capu a'ij raruuren ɨ́ á'axɨejniu'uca. ¿A'iné 'een jɨme'e ayén tiu'utá'ijmɨi neetzi jemi nej ni caí niyen huárɨni a'ij tɨ tineetá'aca nej ni caí a'ij pua'a raruuren ɨ́ xɨéjniu'ucare'ara'an ɨ́ nexɨ́'ej tevi? 30¿A'iné auj tí'irɨ'ɨri tɨ ja'atɨ ayén a'ij pua'a tí'inexajta a'ɨ́jna jɨme'e nej rɨ́'ɨ tiratá'aca ɨ́ Dios ne'ɨ́jna jɨme'e ɨ́ cua'ira nej nexɨéehua ráacua? 31Ayee pu'u na'a, setɨ́j sena'a ti'itɨj jɨ́n rɨcɨ, tɨ pua'a setí'icua'aca na'ari seye'eca nusu ti'itɨ sej a'ij ruure, setá'aj siyen huárɨni setá'aj rɨ́'ɨ tiraatá'acare'en ɨ́ Dios jemi. 32Setá'aj siyen huárɨni sej si caí a'ij pua'a tihua'atá'acare'en se'ɨ́me ɨ́ mej Israél jetze ajtéme'ecan nusu se'ɨ́me ɨ́ mej seɨj chuéjra'a japua é'eme'ecan na'ari se'ɨ́me ɨ́ mej e'etiújse'ɨri ɨ́ Dios jemi. 33Ayee nu tí'itese'e nej rɨ́'ɨ tihua'atá'acare'en naíjmi'ica nain jɨme'e tɨ ij ayén tihuá'ucɨ'ɨti ɨ́ tɨ hua'atéva'ɨri, tɨ ij ajta Dios hua'irájtuaani. A'ɨ́j nu jɨ́n caí niyen nena'a rahuauca ɨ́ tɨ neetzi téva'ɨri.

will be added

X\