Romanos 9

1Jesucristo neekʉjekʉ jorema'ñe ũcuarepare i'kamʉ chʉ'ʉ. Ũcuaja'che Dios Rekochoji chʉ'ʉ rekochona kʉakʉna ũcuarepare kʉamasimʉ chʉ'ʉ. 2Chʉ'ʉ majapãire chʉ'ʉ rekochoji judíopãire si'arʉmʉ oiʉna rʉa sʉma'mʉ chʉ'ʉre. 3Chʉ'ʉre cho'ore'oto Jesucristo'te ja'me pa'ima'ñe vati toa sani uukʉ repana cu'ache cho'osi'e ro'ikʉ pasa chiira'amʉ chʉ'ʉ, chʉ'ʉ majapãipi Ũcuaʉna'me paapʉ chini. 4Mai judíopãi aipãire Israel jojosinajejʉna Moisés pa'irʉmʉ Repaʉ chĩi paapʉ chini chẽa ja'me pa'iʉ rʉa Miakʉji ija'che i'kaasomʉ Dios: “Mʉsanʉkonapi chʉ'ʉ chʉ̃'ʉñe'te cho'oto ja'me pa'iʉ cho'okaija'mʉ chʉ'ʉ”, chiniasomʉ Dios. Repaʉ chʉ̃'ʉñe'te tochaa'kʉ chini chʉ̃'ʉasomʉ Dios Moisere, tocha paakʉ repanani che'chokʉna asa chẽa pa'imasia'jʉ chini. Repaʉ vʉ'ena chi'i Repaʉni pojoche jo'kaasomʉ. Repanare Repaʉ cho'okaijache kʉaasomʉ Repaʉ Dios mai judío aipãi. 5Israel mamachĩi chʉkʉna aipãia'me. Ũcuaja'che Cristo, pãiʉ ainee Israel jojocojñosi'kʉa'mʉ. Ũcuaʉji Cristo Dioa'mʉ. Peore chʉ̃'ʉkʉjekʉ si'arʉmʉ pojocojñokʉ'mʉ Repaʉ. Jã'aja'ñe paaʉ. 6Dios Repaʉ i'kasi'e jorema'ñe Israelpãi cho'okaimʉ. Jã'ata'ni ũcuanʉko Israel jojosina Diopi ñato repana rekoñoã Israelpãirepama'me. 7Ija'chea'me: Abraham jojosina ũcuanʉkore chẽama'mʉ Dios. Abrahamre ija'che i'kaasomʉ Dios: “Jo'e ʉ̃sʉrʉmʉ chʉ'ʉ jo'e rani ñato chĩire paaja'mo Sara”, chiniasomʉ. Dios i'kasi'kʉ jojosina Dios chẽasinachi'aa'me, Sara mamakʉ jojosina. Abraham jojosina aineesina ũcuanʉko Dios chẽasinachi'ama'me. Ũcuachi'a Dios ija'che i'kaasomʉ repaʉ'te: “Mʉ'ʉ jojosina ũcuanʉkore chẽama'ñe Isaac jojosinarechi'a chẽa paaja'mʉ chʉ'ʉ”, chiniasomʉ Dios Abrahamre. 10Jã'ata'ni Isaac jojosina ũcuanʉko Dios chẽasinama'me. Repaʉ rʉ̃jo Rebeca chĩi teana ka'chanare jñaaasomo, mai aipãiʉ Isaac chĩi, Esauna'me Jacob. 11Chuta'a repanare jñaamarʉmʉ repana cu'achejẽ'e cho'oma'ñe re'oja'chejẽ'e cho'omarʉmʉ repaʉ cho'ojache cuasama'kʉta'ni Repaʉ'te ʉache cho'ora chini Jacobni chẽaasomʉ Dios. “Repaʉ aineesirʉmʉ soija'mʉ chʉ'ʉ repaʉ'te, chʉ'ʉ neekʉ paaʉ chini”, chiniasomʉ Dios. 12Jã'aja'ñe cho'ora chini pʉka'kore Rebeca'te ija'che i'kaasomʉ Dios: “Cho'jeʉ pa'ijaʉ majaa'chʉni chʉ̃'ʉja'mʉ”, chiniasomʉ. 13Na'a pa'isirʉmʉ Diopi i'kaʉna ija'che tocha jo'kaasome pãi: “Jacobni chiiʉ Esaureta'ni chẽacuhesi'kʉa'mʉ chʉ'ʉ”, chiniasomʉ Dios. 14Jã'ajekʉna, ¿“Jã'aja'ñe cho'okʉ ũcuarepa cho'omanesi'kʉa'mʉ Dios”, chiiche mai? ¡Pãame! ¡Jã'aja'ñe i'kamanaa'me mai! 15Moisere ija'che i'kaasomʉ Dios: “Chʉ'ʉre ʉanarechi'a oija'mʉ chʉ'ʉ”, chiniasomʉ. 16Dios Repaʉ'te oiʉanarechi'a oiʉ chẽamʉ. Jã'ajekʉna pãi, “Dios chʉ̃'ʉñe'te cho'oja'mʉ chʉ'ʉ, Diopi chʉ'ʉni chẽaa'kʉ chini”, chiijʉ cuasana ũcuarepa cuasamanaa'me. 17Aperʉmʉ tochasi'e Dios chʉ'o Repaʉ chiiche cho'ora chini Repaʉ'te ʉanare chẽañe'te ija'che kʉamʉ: Egipto canare chʉ̃'ʉkʉ'te ija'che i'kaasomʉ Dios, Israelpãi cu'ache cho'okʉ'te: “Chʉ'ʉpi mʉ'ʉre pãi chʉ̃'ʉkʉ'te jo'kasi'kʉa'mʉ, mʉ'ʉpi repanare cu'ache cho'okʉna chʉ'ʉpi re'oja'che cho'okaiʉna chʉ'ʉ cho'omasiche'te pãipi masia'jʉ chini, ũcuaja'che pãi si'achejñarʉã pa'ina chʉ'ʉ pa'iche'te asa masia'jʉ chini”, chiniasomʉ Dios repaʉ'te, chiimʉ. 18Jã'ajekʉna Dios Repaʉ'te oiʉanare oimʉ. Ũcuaja'che Repaʉ'te oiʉamanare cu'ache ti'jñeñe cho'omʉ, repanare ʉache cu'ache cho'ojʉ Repaʉni na'a rʉa cuhea'jʉ chini. 19Chekʉrʉmʉ mʉ'ʉ chʉ'ʉre ija'che sẽemʉ: “Jã'aja'ñe pa'ito, ¿je'se pa'iʉna pãiʉ'te, ‘Cu'ache cho'omʉ’, chiikʉ Dios? Diopi Repaʉ'te ʉache cho'oto, ¿neepi Dios cho'oche ʉ̃sejanaa'ñe?”, chiimʉ. 20Jã'aja'ñe i'kakʉ'te ija'che i'kaja'mʉ chʉ'ʉ: ¿Jeeja'iʉjekʉ mʉ'ʉre Cho'osi'kʉre Diore ke'rekʉ mʉ'ʉ? Pãiʉ'mʉ mʉ'ʉ. Churupʉji i'kamasini repapʉ tʉ̃osi'kʉre ija'che i'kamanera'amʉ: “¿Je'se pa'iʉna mʉ'ʉ chʉ'ʉre ija'ipʉ tʉ̃oʉ?”, chiimanera'amʉ. 21Toto tʉ̃okʉ'te repaʉ'te ʉache tʉ̃ore'omʉ. Churupʉ rʉa re'oja'ipʉ tʉ̃oʉato tʉ̃ore'omʉ repaʉ'te, pãipi ña, “Masiʉ'mʉ ikʉ”, chiapʉ chini. Ũcuachi'a cu'amajñarʉãre mañara chini ũcuate'eca'repʉji cu'ara'pʉrʉ tʉ̃oʉato tʉ̃ore'omʉ repaʉ'te. 22Diore ũcuaja'che toto tʉ̃okʉ'te ũcuaʉache tʉ̃ore'ocheja'che Repaʉ'te ʉache cho'ore'omʉ. Jã'ajekʉna maire Repaʉ cho'osinajejʉna Repaʉ'te ʉache cho'okʉ pãi cu'ache cho'osi'ere pe'rukʉ ro'iche chʉ̃'ʉñena'me Repaʉ cho'omasiche cho'o ñora chini chuta'a cho'oma'ñe cha'amʉ Repaʉ, pãi Repaʉ'te pe'rucojñona sẽjoʉato, sẽjore'onare. 23Ũcuachi'a Repaʉ oiʉ chẽasinapi cu'ache cho'oche ũhaso Repaʉni cuasajʉ jovoa'jʉ chini cha'amʉ, re'oja'chechi'a pa'inare cho'oʉna pãipi ña, “Peore masimʉ Dios”, chiijʉ masia'jʉ chini. Jã'ajekʉna aperʉmʉ Repaʉ i'kasi'ere cho'ora chini Repaʉ pe'runare cu'ache cho'oma'ñe cha'amʉ. 24Jã'aja'ñe cho'ora chini Dios maire soisi'kʉa'mʉ, joopoãchi'a, judíopãina'me judío peonare. 25Diopi i'kakʉna ija'che tocha jo'kaasomʉ Oseas: “Pãi chʉ'ʉ neena pa'imanesinare, ‘Chʉ'ʉ neenaa'me ina’, chiija'mʉ chʉ'ʉ. Chʉ'ʉ cuhesivãjʉpãire, ‘Ivãjʉre chiimʉ chʉ'ʉ’, chiija'mʉ. 26‘Mʉsanʉkona icheja cana chʉ'ʉ neenama'me’, chiisicheja canare, ‘Chʉ'ʉ Si'arʉmʉ Pa'ikʉ chĩia'me mʉsanʉkona’, chiija'mʉ chʉ'ʉ”, chiisi'kʉa'mʉ Dios, chiimʉ Oseas tocha jo'kasi'e. 27Isaías Israelpãire Dios chʉ'ore chʉ'vakʉ ija'che i'kaasomʉ: Israel jojosinare chiara mejavʉ mejara'karʉãjanʉko jainʉko pa'inareta'ni te'eva'nare oiʉ chẽa paakʉ Repaʉ pa'ichejana saja'mʉ Dios. 28Repaʉ i'kasi'e jorema'ñe peore na'mi cho'oja'mʉ Repaʉ icheja pa'inare, chiniasomʉ Isaías. 29Aperʉmʉ repaʉ Isaías ija'che i'kaasomʉ: Dios, cʉnaʉmʉ pa'inare ũcuanʉkore Chʉ̃'ʉkʉ, maire Israelpãi te'eva'nare jujama'to Sodoma vʉ'ejoopo canana'me Gomorra vʉ'ejoopo cana cu'ache cho'ocojñoñeja'ñe cho'ocojñora'ame mai. Israelvãjʉpãi peora'ame, chiiche tocha jo'kaasomʉ repaʉ Isaías. 30Jã'ajekʉna ija'chea'me: Diopi Repaʉ'te cuhesinani judío peonare cho'okaiʉna chura Repaʉni cuasajʉna cu'ache cho'omanare cuasacheja'che cuasamʉ. 31Jã'ata'ni Israelpãi, Diona'me pañu chini Repaʉ chʉ̃'ʉsi'ere cho'oñu chiinata'ni cho'omapʉna repanare pojoma'mʉ Dios. 32Repana judíopãi Repaʉ chʉ̃'ʉ jo'kasi'ere cho'oñu chiime, Diopi repana cho'oche'te ña pojoa'kʉ chini. Jã'ata'ni repanani oiʉ Repaʉ rupʉ cho'okaisi'ere jachajʉ cacu'asosinaa'me repana. Pãi ma'a saijʉ catapʉna tota tãiñeja'ñe repanare rani Cho'okaisi'kʉni cuhejʉ cho'osome repana. 33Dios chʉ'o aperʉmʉ tocha jo'kasi'e ija'che jã'are kʉamʉ: Catapʉ pãipi tota tãapʉ chini ma'ana ũhañeja'ñe chʉ'ʉre cho'oche cho'okaikʉ'te Jerusalén vʉ'ejoopona raoja'mʉ chʉ'ʉ. Raoʉna Repaʉ'te cuhejʉ cacu'asojanaa'me pãi. Jã'ata'ni pãi ũcuaʉana chʉ'ʉ Raojaʉre cuasani pojojʉ pa'ijanaa'me, repanare si'arʉmʉ cho'okaiʉna, chiimʉ Dios chʉ'o.

will be added

X\