Apocalipsis 5

1Ũcuarʉmʉ chʉ'ʉ ñato Dios, ñu'isaivʉ'te ñu'iʉ Repaʉ ʉjajʉ̃tʉre utija'okorovʉ sa'navʉna'me sẽ'sevʉ chʉ'o tochasi'e pa'ikorovʉ'te cãjikʉ ñu'isi'kʉa'mʉ. Ũcuachi'a repakorovʉji koromanea'kʉ chini je'nasimajñarʉã sieterepamajñarʉã pa'isi'kʉa'mʉ. 2Ũcuarʉmʉ chʉ'ʉ ángel'te rʉa masiʉni ñasi'kʉa'mʉ. Ũcuaʉji rʉa ʉjachʉ'opi, “¿Neepi repakorovʉ je'nasimajñarʉã vato korajanaa'ñe? Rʉa Re'okʉchi'a cho'oche'me jã'a”, chiisi'kʉa'mʉ. 3Jã'ata'ni repakorovʉ je'nasimajñarʉã vato kora ñamasina te'eʉjẽ'e peosinaa'me cʉnaʉmʉna'me chejana'me jũ'isina pa'icheja. 4Repakorovʉ kora ñamasikʉni jñaamanerena rʉa oiche oisi'kʉa'mʉ chʉ'ʉ. 5Jã'ata'ni aina chʉ'ʉpi oiʉna asa te'eʉ chʉ'ʉre ija'che i'kasi'kʉa'mʉ: “Oimanejʉ̃'ʉ. Judavãjʉʉji aperʉmʉ pa'isi'kʉ David Jojosi'kʉpi león chaija'che Pa'ikʉji Repaʉ'te cuhenare Cajejaisi'kʉjekʉ repakorovʉ je'nasimajñarʉã sieterepamajñarʉã peore vato kora ñare'omʉ Repaʉ'te”, chiisi'kʉa'mʉ. 6Ũcuarʉmʉ chʉ'ʉ ñato Dios ñu'isaivʉ rʉ̃icheja vajʉpãina'me aina pa'icheja chenevʉ'te Jesucristo Dioni ĩsijʉ ovejachĩi Vanisõcojñosi'kʉja'iʉji vajʉraisi'kʉ pa'isi'kʉa'mʉ. E'chosẽ'ña sieterepasẽ'ña paakʉji ñakocaã sieterepañakocaã paasi'kʉa'mʉ Repaʉ. Repaʉ ñakocaã sieterepañakocaã Dios Rekocho re'oja'che Cho'okairekochoji cheja si'achejña saocojñosirekochoja'chea'me. 7Ũcuarʉmʉ Repaʉ Ovejachĩija'iʉ sani repasaivʉ Ñu'ikʉ Dios ʉjajʉ̃tʉ cãjikorovʉ utija'okorovʉ koosi'kʉa'mʉ. 8Jã'aja'ñe repakorovʉ'te kooʉna ña vajʉpãi ũcuaka'chapanana'me aina veinticuatrorepana Ovejachĩija'iʉ Jesucristo ti'jñeñena tãni pʉʉ ro're ñu'isinaa'me. Repana ũcuanʉko arpavʉãna'me coparo'rovaã pachokuriro'rovaãpi vi'toma'ña timusiro'rovaãre cãjisinaa'me. Repa vi'toma'ña Dios neena Repaʉ'te sẽeñeja'ñea'me. 9Ro're ñu'ijʉ uja mamare ija'che ujasinaa'me repana: Chuenisõsi'kʉa'mʉ mʉ'ʉ. Chuenisõ mʉ'ʉ chiepi pãi cu'ache cho'oche ro'ikaisi'kʉa'mʉ mʉ'ʉ, pãipi si'achejña pa'inana'me si'ache chʉ'o i'kanana'me si'avãjʉ Dios neenachi'a paapʉ chini. Jã'aja'ñe cho'osi'kʉjekʉna ikorovʉ je'nasimajñarʉã vato ñare'omʉ mʉ'ʉre. 10Ũcuachi'a mʉ'ʉpi jo'kaʉna mʉ'ʉ neena, phairipãi Diore cho'okaicheja'che cho'okaijʉ pa'ijanaa'me. Ũcuachi'a chejare pa'ijʉ pãire chekʉnani chʉ̃'ʉjʉ pa'ijanaa'me repana, chiijʉ ujasinaa'me repana. 11Jã'a cho'ocuhasirʉmʉ ñato Dios ñu'isaivʉ rʉ̃icheja vajʉpãina'me aina pa'ichejare si'acakã'jño ángeles jairepanʉkojejʉ kuẽkuecu'anʉko pa'ijʉna repana i'kache chʉ'o asasi'kʉa'mʉ chʉ'ʉ. 12Rʉa ʉjachʉ'opi ija'che i'kasinaa'me repana: Ikʉre Jesucristo'te ovejachĩiva'ʉ cho'ocojñoñeja'ñe pãi ũcuanʉko cu'ache cho'oche'te ro'ikasa chini chueni jũni ro'ikaisi'kʉjekʉna pãi ũcuanʉko Repaʉni pojojʉ ija'che i'kajanaa'me: “Peore si'ache re'oja'che chʉ̃'ʉkʉ paakʉ'mʉ mʉ'ʉ. Peore masikʉ'mʉ. Mʉ'ʉre cuasajʉ vajʉchʉnaa'me chʉkʉna. Mʉ'ʉ cho'ora chiiche peore cho'omasikʉ'mʉ mʉ'ʉ. Pãi ũcuanʉko mʉ'ʉni pojojʉ re'oja'che i'kajʉ paapʉ”, chiijanaa'me, chiisinaa'me repana. 13Jã'a cho'ocuhasirʉmʉ jo'e chekere ñakʉ Dios cho'osina ũcuanʉko, cʉnaʉmʉ pa'inana'me cheja pa'inana'me jũnisõsina pa'icheja canana'me chiacha pa'iva'na i'kachʉ'ore ija'che i'kache'te asasi'kʉa'mʉ chʉ'ʉ: Diore ñu'isaivʉ ñu'ikʉ'te pãi ũcuanʉko pojojʉ si'arʉmʉ ija'che re'oja'che i'kajʉ paapʉ, Ovejachĩija'iʉ'te Jesucristo'te ũcuachi'a: “Pãi ũcuanʉko mʉsanʉkonare cuasajʉ vajʉchʉa'jʉ. Peore masijʉ, peore chʉ̃'ʉnaa'me mʉsanʉkona”, chiijʉ paapʉ, chiisinaa'me. 14Jã'aja'ñe i'karena asa vajʉpãi, “Jã'aja'ñe paaʉ”, chiisinaa'me. Ainapi ro're pʉʉ ñu'ijʉ Diore Si'arʉmʉ Pa'ikʉni pojosinaa'me.

will be added

X\