San Mateo 19

1Jã'aja'ñe i'kacuha Jesús Galilea cheja pa'isi'kʉpi Judea chejana Jordán chiacha ʉ̃sʉʉ mʉikã'ko pa'ichejana sani tĩ'asi'kʉa'mʉ repaʉ, chʉkʉna repaʉ neenana'me. 2Pãi rʉa jainʉko ja'me tuhasinaa'me repaʉ'te. Tuharena ũcuachejana jũ'iva'nare vasosi'kʉa'mʉ repaʉ. 3Ũcuarʉmʉ fariseopãi te'ena Jesús pa'ichejana rani ija'che i'kajʉ sẽesinaa'me repaʉ'te, tĩiñe i'kaʉna repaʉni chẽa cu'ache cho'oñu chini: —¿Pãiʉ'te repaʉ rʉ̃jopi ũcuaʉache'te cho'oru cuhekʉ sẽjore'okʉ? —chiisinaa'me. 4Chitena Jesús ija'che i'kasi'kʉa'mʉ: —¿Aperʉmʉ tocha jo'kasi'e Dios chʉ'o kʉache ñamanaa'ñe mʉsanʉkona? Ija'che chiimʉ repa: Dios apereparʉmʉ pãiʉ'te cho'osi'kʉ ʉmʉʉna'me romio'te cho'osi'kʉa'mʉ. 5Jã'ajekʉna ʉmʉʉ repaʉ pʉka'kʉpãi ja'me pa'isi'e jo'kasõ rʉ̃jona'me pa'imʉ. Jã'aja'ñe cho'o ũcuate'eʉja'che pa'ime repana, chiimʉ. 6Diopi ñato ũcuate'eʉja'che pa'ijʉ ka'chanama'me repana. Jã'ajekʉna pãiʉji Dios jã'aja'ñe paapʉ chini jo'kasi'ere jachakʉ rʉ̃joni sẽjosõni cu'ache cho'omʉ —chiisi'kʉa'mʉ repaʉ. 7Chikʉna repaʉ'te ija'che sẽesinaa'me repana: —Moisés aperʉmʉ ija'che chiiche chʉ̃'ʉ jo'kaasomʉ: Pãiʉ ũcuaʉakʉji repaʉ rʉ̃jore paacuhekʉ sẽjora chiikʉ charo repao'te sẽjojañere kʉakʉ utija'ovana tocha pi'ni ũcuaoni ĩsia'kʉ, repao chekʉnare ñojaja'ova. Jã'aja'ñe cho'ocuha repaʉ sẽjore'omʉ repao'te. ¿Je'se pa'iʉna jã'aja'ñe chiiche tocha jo'kaʉ? —chiisinaa'me. 8Chitena Jesús repanare i'kasi'kʉa'mʉ. —Mʉsanʉkonapi cu'ache cho'oche'te jo'kacuhejʉ ũcuaʉache cho'oñu chiijʉna jã'aja'ñe chʉ̃'ʉ jo'kaasomʉ Moisés. Jã'ata'ni Dios mamarʉmʉ jã'aja'ñe chʉ̃'ʉ jo'kamanesi'kʉa'mʉ. 9Chʉ'ʉ mʉsanʉkonare ija'che i'kamʉ: Pãiʉ ũcuaʉakʉji repaʉ rʉ̃jore chekʉre ja'me kãima'koni rurepapʉ sẽjosõ chekoni vejani Dios ʉ̃seche'te cu'ache cho'omʉ —chiisi'kʉa'mʉ. 10Jã'aja'ñe i'kaʉna asa chʉkʉna repaʉ neena ija'che i'kasinaa'me repaʉ'te: —Jã'aja'ñejekʉna pãipi vejama'ñe pa'ito na'a re'ora'amʉ —chiisinaa'me chʉkʉna. 11Chitena Jesús jo'e i'kasi'kʉa'mʉ. —Jã'ata'ni pãi vejama'ñe te'ena pa'ina ũcuarepanʉko pa'imasima'me. Dios cho'okaicojñonachi'a pa'imasime vejama'ñe pa'ina. 12Pãi si'ache cho'ojʉ romi vejamana pa'ime. Te'ena chĩirʉmʉna teana romi paacu'ava'na aineesiva'na pa'ime. Te'ena romire cu'a cho'oche'te ʉ̃sejʉ chekʉnapi re'vasõkatena romi peome. Chekʉnata'ni Dios chʉ̃'ʉñe'te cho'ojʉ pañu chini romi vejama'me. Pãi te'ena pa'imasini vejamanejʉ̃'ʉ. Jã'ata'ni te'ena pa'ivesʉni vejajʉ̃'ʉ —chiisi'kʉa'mʉ. 13Ũcuarʉmʉ pãi repana chĩiva'nare Jesús pa'ichejana rasinaa'me, repaʉji chĩiva'nani chẽsekʉ Dioni re'oja'chere sẽekaaʉ chini. Jã'aja'ñe rajʉna ña chʉkʉna repaʉ neena ʉ̃sepi'rasinaa'me repanare. 14Jã'aja'ñe cho'ojʉna Jesús chʉkʉna'te i'kasi'kʉa'mʉ. —Chĩiva'nare raiʉ̃semanejʉ̃'ʉ mʉsanʉkona chʉ'ʉni raapʉ. Iva'na chĩiva'naja'ñe pa'ijʉ chʉ'ʉre masi cuasanapi Dios chʉ'o asa chẽajanaa'me —chiisi'kʉa'mʉ repaʉ. 15Chini Jesús repava'nare chĩiva'nare chẽsekʉ Diore sẽekani pi'ni ũcuachejapi jo'e tĩichejana sanisõsi'kʉa'mʉ chʉkʉnana'me. 16Ũcuarʉmʉ põsʉʉ Jesuni ñara chini rani ija'che sẽesi'kʉa'mʉ repaʉ'te: —Masiʉ, ¿ʉ̃quere re'oja'che cho'oni'te Dios pa'icheja saija'che chʉ'ʉ? —chiisi'kʉa'mʉ. 17Chikʉna Jesús repaʉ'te i'kasi'kʉa'mʉ. —¿Je'se pa'iʉna mʉ'ʉ Dios pa'icheja sasa chiikʉta'ni re'oja'che cho'oche'te masira chini chʉ'ʉni sẽekʉ? Diochi'aa'mʉ te'eʉ re'oja'che cho'omasikʉ. Repaʉ pa'ichejana sasa chini Repaʉ chʉ̃'ʉ jo'kasi'ere asa jachama'ñe cho'okʉ pa'ijʉ̃'ʉ —chiisi'kʉa'mʉ Jesús repaʉ'te. 18Chikʉna põsʉʉ i'kasi'kʉa'mʉ. —Maipi cho'ojʉ paapʉ chini Dios chʉ̃'ʉ jo'kasimajñarʉã rʉaa'me. Jã'ata'ni, ¿jeere Dios na'a rʉa chiimajñarʉã cho'oja'che chʉ'ʉ? —chiisi'kʉa'mʉ. Chikʉna Jesús i'kasi'kʉa'mʉ. —Ija'chea'me Dios chiirepache, Repaʉ chʉ̃'ʉ jo'kasi'e: “Pãi vanisõmanejʉ̃'ʉ. Ʉmʉpãi, romi paana chekʉnare romi ja'me kãimanejʉ̃'ʉ. Ũcuaja'che romi ʉmʉ pa'ina chekʉnare ʉmʉpãi ja'me kãimanejʉ̃'ʉ. Chekʉna nee ñaamanejʉ̃'ʉ. Chekʉna pa'iche'te kʉani joremanejʉ̃'ʉ. 19Mʉja'kʉpãi ña, kʉkʉjʉ pa'ijʉ̃'ʉ. Chekʉnare oijʉ pa'ijʉ̃'ʉ mʉsanʉkona meñe oicheja'che”, chiimʉ. Jã'are cho'okʉ pa'ijʉ̃'ʉ mʉ'ʉ —chiisi'kʉa'mʉ Jesús repaʉ'te. 20Chikʉna i'kasi'kʉa'mʉ repaʉ. —Peore jã'a jachama'ñe cho'okʉ pa'ikʉ'mʉ chʉ'ʉ. ¿Ʉ̃quepi chʉ'ʉre chuta'a re'oja'che cho'oche karakʉ? —chiisi'kʉa'mʉ repaʉ põsʉʉ. 21Chikʉna Jesús repaʉ'te i'kasi'kʉa'mʉ. —Mʉ'ʉpi karama'ñe re'oja'che cho'ora chini mʉ'ʉ paache'te cu'amajñarʉãre peore ĩsisõ, kuri koo chʉova'na pa'iva'nani rupʉ ĩsijʉ̃'ʉ. Ĩsisõjani rani chʉ'ʉna'me ku'iʉ chʉ'ʉ chʉ̃'ʉñe'te cho'okʉ pa'ijʉ̃'ʉ. Jã'aja'ñe cho'oni'te Dios pa'ichejana sani re'oja'che pa'ija'mʉ mʉ'ʉ —chiisi'kʉa'mʉ Jesús repaʉ'te. 22Jesupi jã'aja'ñe i'kaʉna asa põsʉʉ ĩsicuhekʉ sʉmava'ʉ sanisõsi'kʉa'mʉ rʉa kuriʉjekʉ. 23Ũcuarʉmʉ Jesús chʉkʉna'te repaʉ neenare ija'che i'kasi'kʉa'mʉ: —Kuriʉ'te Dios pa'icheja saiʉakʉ'teta'ni saicu'aja'mʉ, repaʉji kurire na'a rʉa cuasakʉ Dioni cuasama'to. Ũcuarepaa'me jã'a. 24Jo'e ũcuare i'kamʉ chʉ'ʉ mʉsanʉkonare. Camellova'ʉre miuñakarʉ cojerʉ kaka etajaicu'acheja'che kuriʉ'te Dios pa'icheja saicu'aja'mʉ, repaʉji kurire na'a rʉa cuasakʉ pa'ito —chiisi'kʉa'mʉ repaʉ chʉkʉna'te. 25Jesupi jã'aja'ñe i'kaʉna asa jñano repaʉ'te ija'che i'kasinaa'me chʉkʉna: —Jã'a pa'ito, ¿je'se cho'onani Dios pa'icheja saire'oja'ʉ? —chiisinaa'me. 26Chitena Jesús chʉkʉnani ñakʉ ija'che i'kasi'kʉa'mʉ: —Maichi'a te'ena cuasajʉna Dios pa'icheja saicu'amʉ maire pãi. Diopi cho'okaitota'ni Repaʉ pa'icheja saiche vesama'mʉ —chiisi'kʉa'mʉ. 27Chikʉna Pedro ija'che i'kasi'kʉa'mʉ Jesure: —Chʉkʉna mʉ'ʉna'me pañu chini chʉkʉna paasimajñarʉã peore jo'kasõ rani mʉ'ʉna'me ku'ime. Jã'aja'ñe cho'osi'e ro'i, ¿ʉ̃quere koojanaa'ñe chʉkʉna? —chiisi'kʉa'mʉ. 28Chikʉna Jesús chʉkʉna'te ija'che i'kasi'kʉa'mʉ: —Dios si'amajñarʉã peore jo'e mama cho'osirʉmʉ chʉ'ʉ pãire ja'me paaʉ chini Dios Raosi'kʉ pãi chʉ̃'ʉna ñu'isaivʉ'te ñu'iʉ chʉ̃'ʉja'mʉ. Reparʉmʉ mʉsanʉkona chʉ'ʉna'me ku'isina ũcuaja'che pãi chʉ̃'ʉna ñu'isai docerepasaire te'esaichi'a ñu'ijʉ Israelpãi docerepana jojosinani chʉ̃'ʉjʉ pa'ijanaa'me. Ũcuarepaa'me jã'a. 29Pãi chʉ'ʉni cuasajʉ Dios chʉ̃'ʉñe'te cho'ojʉ pañu chini chekʉrʉmʉ repana vʉ'ña jo'kasõme. Chekʉrʉmʉ repana majaa'chʉpãire jo'kasõme. Chekʉrʉmʉ repana majaa'choromire jo'kasõme. Chekʉrʉmʉ repana cho'jechĩire jo'kasõme. Chekʉrʉmʉ repana pʉka'kʉpãire jo'kasõme. Chekʉrʉmʉ repana mamachĩire jo'kasõme. Chekʉrʉmʉ chejña repana cho'oche cho'osichejña jo'kasõme. Jã'aja'ñe cho'osina ũcuanʉko repana aperʉmʉ paasinʉko na'a rʉa jñaajanaa'me. Ũcuachi'a jũnisõsirʉmʉ Dios pa'ichejare ai sani re'oja'che pa'ijanaa'me repana. 30Pãi te'ena põsʉʉ kuriʉ repaʉ nee jo'kacuhesi'eja'che repana neere jo'kacuhejʉ karama'ñe paajʉ chekʉnare, “Re'oja'che pa'inaa'me ina”, chiicojñome. Chʉ'ʉ chʉ̃'ʉñe'te cho'ojʉ repana paache jo'kasõnareta'ni chekʉna ña cu'ache cutume. Jã'ata'ni Dios na'a pa'isirʉmʉ repana paache'te jo'kacuhejʉ karama'ñe paajʉ chekʉnare, “Re'oja'che pa'ime ina”, chiicojñosinare, “Cu'ache pa'inaa'me ina”, chiija'mʉ. Chʉ'ʉ chʉ̃'ʉñe'te cho'ojʉ repana paache jo'kasõ chekʉnare cu'ache cutucojñosinareta'ni, “Re'oja'che pa'inaa'me ina”, chiija'mʉ Dios —chiisi'kʉa'mʉ Jesús chʉkʉna'te.

will be added

X\