San Mateo 15

1Ũcuarʉmʉ fariseopãina'me judíopãi che'chona Jerusalén vʉ'ejoopo raisina Jesús pa'ichejana rani ija'che chʉ'o sẽesinaa'me repaʉ'te: 2—¿Je'se pa'iʉna mʉ'ʉ neena mai aipãi chʉ̃'ʉ jo'kasi'e cho'oma'ñe? Repa chʉ̃'ʉ jo'kasi'e cho'oche ãu ãipi'rani jʉ̃jña masi choamanaa'me —chiisinaa'me repana. 3Chitena Jesús repanare ija'che i'kasi'kʉa'mʉ: —Mʉsanʉkona ũcuachi'a Dios chʉ̃'ʉ jo'kasi'ere jachajʉ rupʉ mʉsanʉkona cuasajʉ chʉ̃'ʉñechi'a cho'ojʉ pa'inaa'me. 4Dios aperʉmʉ ija'che chiiʉ chʉ̃'ʉ jo'kasi'kʉa'mʉ: Mʉja'kʉpãi ña, kʉkʉjʉ pa'ijʉ̃'ʉ mʉsanʉkona. Ũcuachi'a, Mʉja'kʉpãi cu'ache i'kamanejʉ̃'ʉ. Jã'aja'ñe i'kanare vanisõñe pa'imʉ, cu'ache i'kasi'e ro'i, chiiʉ chʉ̃'ʉ jo'kasi'kʉa'mʉ. 5Mʉsanʉkonata'ni chekʉnare ija'che chʉ̃'ʉnaa'me: “Mai ja'kʉpãire ija'che i'kato re'omʉ: ‘Ja'kʉpãi, mʉsanʉkonare kuirama'ñe chʉ'ʉ paache peore Dioni ĩsija'mʉ chʉ'ʉ. Jã'ajekʉna mʉsanʉkonare kuiracu'amʉ chʉ'ʉre’, chiito re'omʉ. Jã'aja'ñe i'kanare pʉka'kʉpãi kuirache peomʉ”, chiinaa'me mʉsanʉkona. Dios chʉ̃'ʉ jo'kasi'e jachanajejʉ pãipi rupʉ mʉsanʉkona cuasajʉ chʉ̃'ʉñechi'a cho'ojʉ paapʉ chini jã'aja'ñe i'kanaa'me mʉsanʉkona. 7Dios chʉ̃'ʉñe cho'ona cho'ocheja'che sẽ'sevʉchi'a cho'ojʉ pa'inaa'me mʉsanʉkona. Jã'ata'ni Repaʉ chʉ̃'ʉñe cuheme. Aperʉmʉ Dios chʉ'o kʉasi'kʉ Isaías mʉsanʉkona pa'ijachere masi kʉakʉ tocha jo'kasi'e ija'che i'kamʉ: 8Jã'ana Israel jojosina, “Mʉ'ʉni cuasajʉ vajʉchʉnaa'me chʉkʉna”, chiime chʉ'ʉre. Jã'ata'ni repana rekoñoã chʉ'ʉre cuasamanaa'me repana. 9Ũcuachi'a chʉ'ʉre cuasajʉ pojojʉ cho'ocheja'che sẽ'sevʉchi'a peoche cho'onaa'me repana. Rupʉ repana cuasajʉ chʉ̃'ʉñechi'a che'chonajejʉ chʉ'ʉni cuasamapʉ joreme jã'ana, chiimʉ —chiisi'kʉa'mʉ Jesús. 10Jã'aja'ñe i'kacuha Jesús, pãi soni rao ija'che i'kasi'kʉa'mʉ: —Chʉ'ʉ i'kache asa chẽa masijʉ̃'ʉ mʉsanʉkona. 11Pãi ãu ãiñeji repana rekoñoã cu'ache cho'oma'me. Ija'chea'me: Repanapi cu'ache cuasani rekoñoã cu'ache cho'ome pãi —chiisi'kʉa'mʉ repaʉ. 12Ũcuarʉmʉ chʉkʉna repaʉ neena na'a kueñe sani sẽesinaa'me repaʉ'te. —¿Mʉ'ʉ i'kasi'ere asa fariseopãi pe'ruche vesʉkʉ mʉ'ʉ? —chiisinaa'me. 13Chitena Jesús i'kasi'kʉa'mʉ. —Pãi repana chiño tãmanesiñʉã cu'ara'ñʉrʉã cuhejʉ ru'te sẽjosõme. Dios Cʉnaʉmʉ Pa'ikʉ ũcuaja'che Repaʉ chʉ'o masi che'chomana che'chocheji si'asõa'kʉ chini cuhekʉ chʉ̃'ʉja'mʉ. 14Repana fariseopãi pe'ruche cuasamanejʉ̃'ʉ mʉsanʉkona. Diore masi cuasamanajejʉ repana rekoñoã na'ava'naja'ñe pa'inapi chekʉnani che'chojʉ, na'ava'napi ũcuaja'che na'ava'nani juha sacheja'che cho'ome repana. Na'ava'ʉpi chekʉni ũcuaja'che na'ava'ʉni juha sani ũcuanʉko cojena tuã'ijanaa'me repana ñamava'najejʉ. Fariseopãi ũcuaja'che repana che'chosinana'me Diopi chʉ̃'ʉʉna na'ava'na ti'jñecojñoñeja'ñe rʉa cu'ache ti'jñecojñojanaa'me —chiisi'kʉa'mʉ repaʉ. 15Jã'aja'ñe i'kaʉna asa Pedro repaʉ'te i'kasi'kʉa'mʉ. —Mʉ'ʉ i'kasi'ere na'a masi kʉajʉ̃'ʉ chʉkʉna'te —chiisi'kʉa'mʉ. 16Chikʉna Jesús ija'che i'kasi'kʉa'mʉ: —¿Mʉsanʉkona ũcuaja'che chʉ'ʉ i'kasi'e asavesʉche? 17Ija'chea'me: Pãiʉ ãu ũcuaʉache'te ãni mevo cʉtapʉna jmamakarʉ paa sẽjosõmʉ. Rekocho kakamaʉ repaʉ rekochota'ni meno cho'oma'mʉ. 18Jã'ata'ni pãi cu'ache cutuna repana rekoñoã cuasache'te i'kame. Jã'ajekʉna repana rekoñoã cu'ache pa'imʉ. 19Pãi te'ena repana rekoñoã cu'ache cuasajʉ chekʉnare vanisõme. Chekʉna repana pa'imanare ja'me kãime. Chekʉna romineejʉ chekʉna ʉmʉneejʉ cu'ache cho'ome. Chekʉna põse ñaame. Chekʉna joreme. Chekʉna cu'ache cutume chekʉnare. Pãi cu'ache cuasana rʉa si'ache cu'ache cho'ome. 20Jã'aja'ñe cuasajʉ cho'ona Diopi ñato repana rekoñoã rʉa meno paame. Jã'ata'ni pãi ũcuaʉanapi rupʉ mai aipãi chʉ̃'ʉ jo'kasi'ere jʉ̃jña masi choache'te cho'omaneni Diopi ñato repana rekoñoã meno peome —chiisi'kʉa'mʉ Jesús. 21Ũcuarʉmʉ Jesús Genesaret chejapi eta Tiro vʉ'ejoopona'me Sidón vʉ'ejoopo pa'ichejana saisi'kʉa'mʉ, chʉkʉna repaʉ neenana'me. 22Sakʉna repacheja cako cananeapãio judío peokoji rani cuiko i'kasi'koa'mo repaʉ'te. —Pãi Ũcuanʉkore Paakʉ, aperʉmʉ pa'isi'kʉ David Jojocojñosi'kʉ, Dios Raosi'kʉjekʉ, oijʉ̃'ʉ chʉ'ʉva'ore. Chʉ'ʉ chĩiva'o vatini paako rʉarepa jũ'imo —chiisi'koa'mo. 23Jã'aja'ñe chiiko'teta'ni Jesús i'kamanesi'kʉa'mʉ. Ũcuarʉmʉ chʉkʉna repaʉ neena repaoji jã'aja'ñe i'kaona asa repaʉ'te kueñe tĩ'a rʉa i'kasinaa'me. —Jã'ore saosõjʉ̃'ʉ. Maini tuhako rʉarepa cuiko i'kamo jã'o —chiisinaa'me. 24Chitena Jesús i'kasi'kʉa'mʉ. —Dios chʉ'ʉre, Israel jojosina Repaʉ chʉ'ore vesʉjʉ ovejava'na kuirakʉ'te peova'naja'ñe pa'ijʉ chʉova'na pa'inani judíopãichi'a Repaʉ chʉ'ore kʉakʉ cho'okaaʉ chini raosi'kʉa'mʉ —chiisi'kʉa'mʉ. 25Jã'aja'ñe i'kakʉ'teta'ni Jesure ti'jñeñe ro're pʉʉ ñu'io i'kasi'koa'mo repao. —Pãi Ũcuanʉkore Paakʉ, chʉ'ʉva'ore cho'okaijʉ̃'ʉ —chiisi'koa'mo. 26Chikona Jesús i'kasi'kʉa'mʉ repao'te. —Pãipi chĩiva'na ãiñe'te ãure tʉa jamuchaire ãuto cu'amʉ —chiisi'kʉa'mʉ. 27Chikʉna repao i'kasi'koa'mo. —Ũcuarepaa'me jã'a. Jã'ata'ni jamuchai, mesako'a vʉ'evʉ'te pa'ijʉ pãi ãu ãijʉ pu'che to'jñomajñarʉãre ãime —chiisi'koa'mo repao. 28Chikona Jesús repao'te i'kasi'kʉa'mʉ. —Diore masi cuasamo mʉ'ʉ. Mʉ'ʉ chiiche cho'okaija'mʉ chʉ'ʉ —chiisi'kʉa'mʉ. Repaʉ jã'aja'ñe i'karʉmʉpi repao mamako teana vajʉasomo. 29Ũcuarʉmʉ Jesús ũcuachejapi eta sani Galilea chiara rʉ'tʉvana tĩ'asi'kʉa'mʉ. Jã'achejapi aikũtina mʉni pʉʉsi'kʉa'mʉ repaʉ. 30Pʉʉ ñu'iʉna pãi jainʉko repaʉ ñu'ichejana rani chi'isinaa'me. Chekʉnare cu'acũ'a paava'nare, na'ava'nare, nʉka ku'imava'nare, chʉ'o cutumava'nare, chekʉnare ravʉ jũ'iva'nare ra chi'i repava'nare ũcuaʉ ti'jñeñena jo'karena Jesús vasokaisi'kʉa'mʉ repanare. 31Ũcuarʉmʉ repana pãi chʉ'o cutumanesinapi cutujʉna, nʉka ku'imanesinapi nʉka ku'ijʉna, cu'acũ'are paajʉ ro'osiva'napi re'oja'che ku'ijʉna, na'ava'na pa'isinapi ñajʉna, ña jñano, “Maire Israelpãi Paakʉ Dios cho'osi'ea'me ie”, chiijʉ Diore pojosinaa'me. 32Ũcuarʉmʉ Jesús chʉkʉna'te repaʉ neenare soni rao i'kasi'kʉa'mʉ. —Inare pãi repana rasi'ere ãu ãni si'asõ ãiñejẽ'e peova'napi chʉ'ʉna'me choteumucujña pa'ijʉna oimʉ chʉ'ʉ. Ãu ãimava'nare repana vʉ'ñana saoche cuhemʉ chʉ'ʉ, saijʉ ãucuhana phã'pha ai jũ'ijʉ chini —chiisi'kʉa'mʉ repaʉ. 33Chikʉna chʉkʉna repaʉ neena i'kasinaa'me repaʉ'te. —Icheja pãi peochejajekʉ ãu ãiñejẽ'e peomʉ. ¿Je'se chʉkʉna jã'arepanʉkore ãu jñaa ãujanaa'ñe? —chiisinaa'me. 34Chitena Jesús i'kasi'kʉa'mʉ. —¿Jetopʉpʉã pã paache mʉsanʉkona? —chiisi'kʉa'mʉ. Chikʉna chʉkʉna repaʉ neena, —Pã sieterepapʉãna'me va'iva'nare te'eva'narechi'a paame chʉkʉna —chiisinaa'me. 35Ũcuarʉmʉ Jesús repanare pãi, chejana pʉʉa'jʉ chini chʉ̃'ʉsi'kʉa'mʉ. 36Pʉʉrena pãpʉã sieterepapʉãna'me va'iva'nare mini cãjikʉ Dioni, “Re'orepamʉ”, chini chʉkʉnani repaʉ neenani tʉ'se ĩsiʉna pãire ãusinaa'me chʉkʉna. Jmanʉkorʉ pa'isi'e ãu Ũcuaʉji Dioni sẽkʉna teana rʉa carũhisi'kʉa'mʉ. 37Pãi ũcuanʉko chajichechi'a ãisinaa'me repa. Jã'ata'ni repana ãijʉna cajejaisi'e sieterepajʉ'ña sia maña timusinaa'me chʉkʉna. 38Repa ãu ãisina pãi romijẽ'e chĩijẽ'e kuẽkuema'ñe chekʉrʉmʉ cuatro milrepana pa'icosome. 39Jã'a cho'o pi'nisirʉmʉ Jesús repanare pãi saosõ choovʉji tuni Magadán chejana jẽ'esi'kʉa'mʉ chʉkʉnana'me.

will be added

X\