San Marcos 11

1Ũcuarʉmʉ Jesús repaʉ neenana'me saijʉ Jerusalén vʉ'ejoopo kueñe cajoopoã Olivo aikũti pa'ijoopoã Betfagé vʉ'ejoopona'me Betania vʉ'ejoopo cachejñana tĩ'aasome. Tĩ'a Jesús repaʉ neenare te'eka'chapanarechi'a soniasomʉ. 2Soni repanare saora chini ija'che i'kaasomʉ repaʉ: —Jeejoopona kueñe cajoopona saijʉ̃'ʉ mʉsanʉkona. Sani tĩ'a burrova'ʉre quẽo sʉosiva'ʉre, pãi chuta'a tuhimava'ʉni ñajanaa'me mʉsanʉkona. Ña repava'ʉre jose ichejana rakaijʉ̃'ʉ. 3Pãi ũcuaʉakʉji mʉsanʉkonare, “¿Ʉ̃que cho'oñu chini mʉsanʉkona jã'ava'ʉre joseche?”, chiito, “Maire Paakʉ iva'ʉre chiimʉ. Na'mi co'choja'mʉ repaʉ iva'ʉre”, chiijʉ̃'ʉ —chiniasomʉ repaʉ. 4Chikʉna repana sani ñato burrova'ʉ pãi vʉ'e kakasa'aro kueñere, ma'a rʉ'tʉva'te quẽo sʉosiva'ʉ rʉ̃niasomʉ. Ũcuarʉmʉ repana repava'ʉre sani joseasome. 5Josejʉna ũcuacheja pa'ina ija'che i'kaasome repanare: —¿Ʉ̃quere mʉsanʉkona cho'oche? ¿Je'se pa'iʉna jã'ava'ʉre joseche? —chiniasome repana. 6Chitena repanare Jesús i'kakʉ chʉ̃'ʉ raosi'ere kʉaasome repana. Kʉarena repava'ʉre ʉ̃semaneasome repana. 7Ʉ̃semapʉna repava'ʉre Jesús pa'ichejana sa repava'ʉ sõkʉñʉna kãñapi tʉorena Jesús mʉni tuniasomʉ repava'ʉre. 8Tuni saiʉna repaʉ saima'ana pãi jainʉko kãña jaasome. Chekʉna ũcuaja'che sũki ka ja'o pa'ikare veri ũcuama'ana ũhaasome. 9Charo Jesure ja'me sainana'me repaʉ cho'je saina pojojʉ cuijʉ ija'che i'kaasome: —¡Dios peore masikʉ'mʉ! ¡Diopi ikʉre pãire chʉ̃'ʉa'kʉ chini Repaʉ Raosi'kʉre re'oja'che cho'okaaʉ! 10¡Aperʉmʉ pa'isi'kʉ mai majapãiʉ David chʉ̃'ʉsi'eja'che ikʉ Jesús re'oja'che chʉ̃'ʉja'mʉ! ¡Dios peore masikʉ'mʉ! —chiniasome repana. 11Jã'aja'ñe cho'ojʉna Jesús Jerusalén vʉ'ejoopo tĩ'a Dios vʉ'ena kaka pa'iʉ na'isokʉna peore si'ache repakã'jño ña pi'ni eta Betania vʉ'ejoopona co'iasomʉ, repaʉ neena docerepanana'me. 12Jo'e ñatato Jesús repaʉ neenana'me Betania vʉ'ejoopoji raijʉna Jesure ãucuhaasomʉ. 13Ãucuhakʉna so'opi ñato sũkiñʉ higoñʉ ja'o sã'sasi'ñʉ paniasomʉ. Jã'aja'ñe pa'iʉna Jesús na'a kueñe sani ñato higopʉã kʉ̃ima'ñʉ ja'ochi'a paniasomʉ. Kʉ̃irʉmʉ chuta'a tĩ'amaʉna repapʉã peoasomʉ repañʉ. 14Jã'aja'ñe pa'iʉna repañʉ ija'che i'kaasomʉ repaʉ: —Iñʉ sũkiñʉ jo'e kʉ̃imairo paaʉ —chiniasomʉ repaʉ. Jã'aja'ñe i'kakʉna repaʉ neena asaasome. 15Jã'aja'ñe cho'ocuha Jesús repaʉ neenana'me sani Jerusalenna tĩ'aasome. Tĩ'a Jesús Dios vʉ'ena kaka repavʉ'e põse koosinana'me ĩsisinare peore eto saoasomʉ. Eto saokʉ kuri sa'ñekaina mesako'ñana'me ũkupova'na ĩsina ñu'isaivʉãre jʉjo tajño ũhaasomʉ repaʉ. 16Ũcuaja'che chekʉna repana põsemajñarʉã ve'ejʉ repavʉ'epi kaka etajani sañu chiinare ʉ̃seasomʉ repaʉ repanare. 17Jã'aja'ñe cho'okʉ repanare che'chokʉ ija'che i'kaasomʉ: —Dios chʉ'o aperʉmʉ tocha jo'kasi'e ija'che kʉamʉ: Chʉ'ʉ vʉ'e pãi ũcuanʉko chʉ'ʉre pojojʉ sẽevʉ'ea'me, chiimʉ. Jã'ata'ni mʉsanʉkona põse ñaana cho'ocheja'che kaka cu'ache cho'ome —chiiʉ eto saoasomʉ Jesús repanare. 18Jã'aja'ñe cho'oʉna asa judío phairipãi chʉ̃'ʉnana'me judíopãi che'chona pe'rujʉ repaʉ'te vanisoche chʉ̃'ʉñu chiisinata'ni pãipi ũcuanʉko repaʉ che'choche'te asa jñanojʉna repaʉ'te vajʉchʉasome repana. 19Jã'aja'ñe cho'ocuha Jesús na'ito repaʉ neenana'me repajoopoji saniasome. 20Jo'e ñatato Jesús repaʉ neenana'me higoñʉ pa'icheja caraiʉ ñato repañʉ saivʉãjatʉ'ka jũnisosi'ñʉ paniasomʉ. 21Repañʉji jã'aja'ñe pa'iʉna Jesús i'kasi'e Pedro jo'e cuasakʉ i'kaasomʉ. —¡Ñakʉ, Masiʉ! Mʉ'ʉpi repañʉ'te cu'ache i'kaʉna peore jũnisõsi'ñʉa'me —chiniasomʉ repaʉ'te. 22Chikʉna Jesús repaʉ neenare i'kaasomʉ. —Diore cuasajʉ pa'ijʉ̃'ʉ mʉsanʉkona. 23Mʉsanʉkona ũcuaʉakʉji, “Diopi cho'okaiʉna chʉ'ʉ i'kache peore cho'ore'oja'mʉ”, chiiʉ cuasakʉ ikũtire, “Icheja kʉñʉ chiarana sʉ'a nʉkajʉ̃'ʉ”, chiito repakũti mʉsanʉkona chʉ̃'ʉñe cho'oja'mʉ. Ũcuarepaa'me jã'a. 24Jã'ajekʉna ija'che i'kamʉ chʉ'ʉ mʉsanʉkonare: Mʉsanʉkona, “Diopi chʉ'ʉ ũcuaʉache sẽeto cho'okaija'mʉ chʉ'ʉre”, chiijʉ cuasajʉ pa'ito mʉsanʉkona sẽeñe cho'okaija'mʉ Dios. 25Mʉsanʉkona Diore sẽñu chini chekʉna mʉsanʉkonare cu'ache cho'osi'e cavesʉsõ jo'e cuasamanejʉ̃'ʉ. Jo'e cuasama'to Dios ũcuaja'che mʉsanʉkona cu'ache cho'osi'e jo'e cuasamaneja'mʉ. 26Jã'ata'ni mʉsanʉkonapi chekʉna cu'ache cho'osi'ere cavesʉma'ñe ũcua cuasato Dios ũcuaja'che mʉsanʉkona cu'ache cho'osi'e cavesʉma'ñe ũcua rʉa cuasakʉ pa'ija'mʉ —chiniasomʉ Jesús repanare. 27Ũcuarʉmʉ Jesús repaʉ neenana'me Jerusalenna jo'e sani tĩ'aasome. Tĩ'a Jesús Dios vʉ'e kaka nʉka ku'iʉ ñakʉna judío phairipãi chʉ̃'ʉnana'me judíopãi che'chonana'me judío aina raniasome. 28Rani repaʉ'te ija'che sẽniasome repana: —¿Je'se cuasa pãi chʉ̃'ʉna cho'ocheja'che cho'okʉ mʉ'ʉ? ¿Neepi chʉ̃'ʉrena rani cho'okʉ mʉ'ʉ? —chiniasome. 29Chitena repanare sãiñe i'kaasomʉ repaʉ. —Chʉ'ʉ ũcuaja'che mʉsanʉkonani chʉ'o sẽniasara. Sẽeʉna kʉajʉ̃'ʉ chʉ'ʉre. Kʉaru chʉ'ʉ ũcuaja'che iere cho'oa'kʉ chini chʉ'ʉre chẽa raosi'kʉ mami kʉaja'mʉ mʉsanʉkonare. 30¿Neepi Juanre Pãi Okoro'vekʉ'te chẽa raore? ¿Diopi chẽa raoʉ? Jã'apãani, ¿pãipi chẽa raore repaʉ'te? Kʉajʉ̃'ʉ chʉ'ʉre —chiniasomʉ Jesús repanare. 31Sẽkʉna sãiñechi'a ija'che cutuasome repana: —¿Je'se mai ikʉre i'kajanaa'ñe? Maipi, “Juanre Dios chẽa raosi'kʉa'mʉ”, chiito ikʉ maire, “¿Je'se pa'iʉna mʉsanʉkona jã'aja'ñe cuasanata'ni Juan chʉ'vasi'e cuasamanere?”, chiija'mʉ. 32Ũcuaja'che, “Pãipi Juanre chẽa raosinaa'me”, chiicu'amʉ maire —chiniasome repana. Reparʉmʉ pãi rʉa jainʉko, “Juan Dios chʉ'o kʉakaikʉ pa'isi'kʉa'mʉ”, chiijʉ cuasajʉna i'kavajʉchʉasome repana, chekʉnapi asa pe'rujʉ chini. 33Vajʉchʉjʉ Jesure ija'che i'kaasome repana: —Juanre raosi'kʉ mami vesʉme chʉkʉna —chiniasome. Chitena Jesús i'kaasomʉ repanare. —Chʉ'ʉ ũcuaja'che mʉsanʉkonapi jã'aja'ñe i'karena chʉ'ʉre chʉ̃'ʉ raosi'kʉ mami kʉamaneja'mʉ —chiniasomʉ Jesús repanare.

will be added

X\