San Lucas 18

1Ũcuarʉmʉ Jesús repaʉ neenani chʉ'vaasomʉ. —Mʉsanʉkona Diore sẽeñe ũhamanejʉ̃'ʉ. Mʉsanʉkona chiiche cuhama'ñe Dioni sẽejʉ pa'ijʉ̃'ʉ —chiniasomʉ Jesús repaʉ neenare. 2Jã'aja'ñe chʉ'vacuha ija'chere cuasakʉ kʉaasomʉ repaʉ, repanapi si'arʉmʉ Dioni sẽejʉ paapʉ chini: —Diore cuasama'kʉ, pãi chẽañe chʉ̃'ʉkʉ vʉ'ejoopo'te paniasomʉ. Ũcuaja'che pãijẽ'e oima'kʉ paniasomʉ repaʉ. 3Ũcuarʉmʉ va'jeva'o ũcuajoopo pa'iva'o repaʉ'te pãi chẽañe chʉ̃'ʉkʉ'te si'arʉmʉ mʉa ija'chere kʉako paniasomo: “Pãiʉ chʉ'ʉni pe'rukʉ cu'ache cho'omʉ. Ʉ̃sekaijʉ̃'ʉ chʉ'ʉre repaʉ cu'ache cho'oche jo'e cho'omanea'kʉ”, chiniasomo repao repaʉ'te. 4Si'arʉmʉ sẽeko'teta'ni rupʉ asakʉ paniasomʉ repaʉ. Jã'ata'ni repaoji rʉarepa sẽeona ija'che cuasaasomʉ repaʉ: “Chʉ'ʉ Diore cuasama'kʉa'mʉ. Ũcuaja'che pãijẽ'e oima'kʉa'mʉ chʉ'ʉ. 5Jã'ata'ni repaoji chʉ'ʉni si'areparʉmʉ mʉta sẽeona asa ca'nasõ cho'okaija'mʉ chʉ'ʉ. Repao'te cho'okatu jo'e mʉtamaneja'mo repao”, chini repao sẽesi'e cho'okaniasomʉ repaʉ —Jã'aja'ñe kʉaasomʉ Jesús repaʉ neenare. 6Kʉa pi'ni repanare ija'che i'kaasomʉ repaʉ: —Pãi chẽañe chʉ̃'ʉkʉ cu'akʉ cho'osi'ere cuasa ñajʉ̃'ʉ mʉsanʉkona. 7Repaʉ pãi chẽañe chʉ̃'ʉkʉ pãi oima'kʉ paniasomʉ. Jã'ata'ni va'jeoji si'areparʉmʉ repaʉji cho'okaaʉ chini sẽeona cho'okaniasomʉ repaʉ. Diota'ni pãi chẽañe chʉ̃'ʉkʉ pa'icheja'che pa'ima'kʉa'mʉ. Jã'ajekʉna Repaʉ chẽa paanapi umucujñana'me ñami Repaʉji cho'okaaʉ chini si'arʉmʉ sẽeto, “Cha'ajʉ̃'ʉ. Na'a pani cho'okaija'mʉ chʉ'ʉ”, chiima'kʉa'mʉ Dios. Repana sẽeñe asa teana cho'okaikʉ'mʉ Dios. 8Repana chiiche na'mi cho'okaikʉ'mʉ Dios. Chʉ'ʉ Dios Raosi'kʉ ichejana jo'e cajeni, ¿Diore cuasajʉ si'arʉmʉ sẽenare ñaja'ñe chʉ'ʉ? —chiniasomʉ Jesús repaʉ neenare. 9Reparʉmʉ pãi, “Rʉa re'onaa'me chʉkʉna. Chekʉnata'ni cu'anaa'me”, chiijʉ cuasanapi Jesure ja'me paniasome. Jã'aja'ñe cuasajʉna repanani chʉ'vakʉ ija'chere cuasakʉ kʉaasomʉ Jesús: 10—Ʉmʉpãi te'eka'chapana fariseopãiʉna'me pãi chʉ̃'ʉnare kuri kookaikʉ Dios vʉ'ena mʉa kakaasome Dioni sẽeñu chini. 11Ũcuarʉmʉ fariseopãiʉ nʉkakʉ ija'che sẽniasomʉ: “Ãa, Ja'kʉ Dios, chekʉna pãi cu'ache cho'ome. Põse ñaame. Ũcuaja'che chekʉnare ũcuarepa cho'oma'me. Ũcuaja'che rʉ̃joromi peonare ja'me kãijʉ pa'ime. Chʉ'ʉta'ni chekʉna cho'ocheja'che cu'ache cho'oma'kʉa'mʉ. Ikʉ kuri kookaikʉ ũcuaja'che kuri cajejaiche sẽni koo kʉamairo paakʉ'mʉ. Chʉ'ʉta'ni jã'aja'ñe cho'oma'kʉa'mʉ. Re'okʉ'mʉ chʉ'ʉ. Re'okʉjekʉ mʉ'ʉni pojokʉ mʉ'ʉre re'orepamʉ chiiʉ pa'ikʉ'mʉ chʉ'ʉ. 12Te'esemana te'eka'chapañoã ãu ãimairo pa'ikʉ'mʉ chʉ'ʉ, mʉ'ʉni pojokʉ. Chʉ'ʉ cho'oche cho'osi'ere pãipi chʉ'ʉni ro'ito aperʉmʉ mʉ'ʉ ĩsijʉ̃'ʉ chiisinʉkorʉ kuẽkue ña karama'ñe ĩsikʉ'mʉ chʉ'ʉ mʉ'ʉre. Chekʉrʉmʉ kurire're dierepare're kooni te'ere'rerʉ ĩsikʉ'mʉ chʉ'ʉ. Chekʉrʉmʉ cienrepare'rerʉã kooni dierepare're ĩsikʉ'mʉ chʉ'ʉ mʉ'ʉre. Jã'aja'ñechi'a ĩsikʉ'mʉ chʉ'ʉ mʉ'ʉre”, chiiʉ sẽniasomʉ repaʉ fariseopãiʉ. Cu'ache cho'okʉta'ni re'oja'che cho'ochechi'a kʉaasomʉ repaʉ. 13Chekʉ kuri kookaikʉta'ni repaʉ cu'ache cho'osi'ere cuasa cʉnaʉmʉ Dios pa'ichejajekʉna ñavajʉchʉkʉ so'ore sʉmava'ʉ meñe sime nʉkakʉ paniasomʉ. Sʉmava'ʉ nʉkasi'kʉpi ã'capʉna vaiʉ Diore ija'che sẽniasomʉ repaʉ: “Ãa, Ja'kʉ Dios, cu'ache pa'ikʉ'mʉ chʉ'ʉ. Jã'ata'ni oijʉ̃'ʉ chʉ'ʉva'ʉre”, chiniasomʉ repaʉ —Jã'aja'ñe kʉaasomʉ Jesús repanare. 14Kʉacuha jo'e i'kaasomʉ repaʉ. —Asarepajʉ̃'ʉ mʉsanʉkona. Sẽni pi'ni eta repana vʉ'ñana co'iasome repana. Kuri kookaikʉji ũcuaʉji meñe, “Cu'ache pa'ikʉ'mʉ chʉ'ʉ”, chiiʉ Dioni sẽkʉna repaʉ cu'ache cho'osi'e tʉnosõkani, “Cu'ache cho'osi'e ro'iche peomʉ ikʉre”, chiniasomʉ Dios. Chekʉreta'ni repaʉji, “Re'oja'chechi'a cho'okʉ'mʉ chʉ'ʉ”, chikʉna repaʉ cu'ache cho'osi'e tʉnokaimaneasomʉ Dios. “Repaʉ cu'ache cho'oche kʉamanesi'e ro'iche pa'imʉ ikʉre”, chiniasomʉ Dios. Pãi te'ena, cu'ache cho'onata'ni, “Re'onaa'me chʉkʉna”, chiime, chekʉnapi asa, “Re'onaa'me jã'ana”, chiapʉ chini. Repana cu'ache cho'oche'te Dioni kʉamapʉna repana cu'ache cho'oche tʉnokaima'mʉ Dios. Diopi ñato cu'anaa'me repana. Jã'ata'ni chekʉna pãi, “Cu'ache cho'okʉ'mʉ chʉ'ʉ”, chini cuasa Dioni kʉajʉna repana cu'ache cho'oche tʉnokaimʉ Dios, repanani oiʉ. Diopi ñato re'onaa'me repana, cu'ache cho'oche tʉnosõcojñosinajejʉ —chiniasomʉ Jesús repanare. 15Ũcuarʉmʉ pãi Jesús pa'ichejana repana chĩiva'nare raasome, Repaʉji chẽsekʉ Dioni re'oja'chere sẽekaaʉ chini. Jã'aja'ñe rajʉna ña repaʉ neena ʉ̃seasome repanare. 16Ʉ̃sejʉna Jesús repaʉ neenare soni i'kaasomʉ. —Chĩiva'nare raiʉ̃semanejʉ̃'ʉ mʉsanʉkona chʉ'ʉni raapʉ. Iva'na chĩiva'naja'ñe pa'ijʉ chʉ'ʉre masi cuasanapi Dios chʉ'o asa chẽajanaa'me. 17Jã'ata'ni iva'na chĩiva'na chʉ'ʉre masi cuasacheja'che masi cuasamana Dios chʉ'o asa chẽamanejanaa'me. Ũcuarepaa'me jã'a —chiniasomʉ Jesús repaʉ neenare. 18Ũcuarʉmʉ judíopãi chʉ̃'ʉkʉ kuriʉ Jesuni chʉ'o sẽniasomʉ. —Masiʉ, re'okʉ'mʉ mʉ'ʉ. ¿Je'se cho'oni'te Dios pa'icheja saija'che chʉ'ʉ? —chiniasomʉ repaʉ repaʉ'te. 19Chikʉna Jesús i'kaasomʉ repaʉ'te. —¿Je'se cuasa, “Re'okʉ'mʉ mʉ'ʉ”, chiikʉ mʉ'ʉ chʉ'ʉre? Diochi'aa'mʉ Re'okʉ. Chekʉ pãiʉ re'okʉ peomʉ. 20Aperʉmʉ Dios chʉ̃'ʉ jo'kasi'e masicosomʉ mʉ'ʉ. Ija'che kʉamʉ repa: Mʉsanʉkona ʉmʉpãi romi paana chekʉnare romi ja'me kãimanejʉ̃'ʉ. Ũcuaja'che romi ʉmʉ pa'ina chekʉnare ʉmʉpãi ja'me kãimanejʉ̃'ʉ. Ũcuachi'a pãi vanisõmanejʉ̃'ʉ. Chekʉna nee ñaamanejʉ̃'ʉ. Chekʉna pa'iche'te kʉani joremanejʉ̃'ʉ. Ũcuaja'che mʉja'kʉpãi ña kʉkʉjʉ̃'ʉ. Jã'aja'ñe chʉ̃'ʉsi'kʉa'mʉ Dios —chiniasomʉ Jesús repaʉ'te kuriʉ'te. 21Chikʉna i'kaasomʉ repaʉ. —Chĩirʉmʉpi irʉmʉjatʉ'ka Dios chʉ̃'ʉ jo'kasi'e peore jã'a jachama'ñe cho'okʉ pa'ikʉ'mʉ chʉ'ʉ —chiniasomʉ repaʉ. 22Jã'aja'ñe i'kaʉna Jesús ija'che i'kaasomʉ repaʉ'te: —Ũcuarepa cho'okʉ'teta'ni karamʉ mʉ'ʉre. Mʉ'ʉ paache cu'amajñarʉãre peore ĩsisõ, kuri koo chʉova'na pa'iva'nani rupʉ ĩsijʉ̃'ʉ. Ĩsisõjani rani chʉ'ʉna'me ku'iʉ chʉ'ʉ chʉ̃'ʉñe'te cho'okʉ pa'ijʉ̃'ʉ. Jã'aja'ñe cho'oni'te Dios pa'ichejana sani re'oja'che pa'ija'mʉ mʉ'ʉ —chiniasomʉ Jesús repaʉ'te kuriʉ'te. 23Jesupi jã'aja'ñe i'kaʉna asa, ĩsicuhekʉ sʉmava'ʉ paniasomʉ repaʉ, rʉa kuriʉjekʉ. 24Sʉmava'ʉ pa'iʉna ña Jesús ija'che i'kaasomʉ repaʉ'te: —Pãi kurinare Dios pa'icheja saineenareta'ni saicu'aja'mʉ, repanapi kurire na'a rʉa cuasajʉ Dioni cuasama'to. 25Camellova'ʉre miuñakarʉ cojerʉ kaka etajaicu'acheja'che kuriʉ'te Dios pa'icheja saicu'aja'mʉ, repaʉji kurire na'a rʉa cuasakʉ pa'ito —chiniasomʉ Jesús repaʉ'te kuriʉ'te. 26Jesús i'kache asasina ija'che sẽniasome repaʉ'te: —Jã'a pa'ito, ¿je'se cho'onani Dios pa'icheja saire'oja'ʉ? —chiniasome. 27Chitena Jesús i'kaasomʉ. —Maichi'a te'ena cuasajʉna Dios pa'icheja saicu'amʉ maire pãi. Diopi cho'okaitota'ni Repaʉ pa'icheja saiche vesama'mʉ —chiniasomʉ repaʉ. 28Chikʉna Pedro i'kaasomʉ. —Chʉkʉna mʉ'ʉna'me pañu chini chʉkʉna paasimajñarʉã peore jo'kasõ rani mʉ'ʉna'me ku'ime —chiniasomʉ. 29Chikʉna Jesús i'kaasomʉ repaʉ'te. —Pãiʉ ũcuaʉakʉ Dios chʉ̃'ʉñe'te cho'okʉ pasa chiikʉ chekʉrʉmʉ repaʉ vʉ'ere jo'kasõmʉ. Chekʉrʉmʉ repaʉ rʉ̃joni jo'kasõmʉ. Chekʉrʉmʉ repaʉ majaa'chʉpãire jo'kasõmʉ. Chekʉrʉmʉ repaʉ cho'jechĩire jo'kasõmʉ. Chekʉrʉmʉ repaʉ pʉka'kʉpãire jo'kasõmʉ. Chekʉrʉmʉ repaʉ chĩire jo'kasõni repaʉ aperʉmʉ paasinʉko na'a rʉa jñaaja'mʉ repaʉ, icheja cheja pa'irʉmʉ. Ũcuaja'che jũnisõsirʉmʉ Dios pa'ichejare ai sani pa'ija'mʉ repaʉ. Ũcuarepaa'me jã'a —chiniasomʉ Jesús repanare. 31Ũcuarʉmʉ Jesús repaʉ neenare docerepanare soni ija'che kʉaasomʉ: —Jerusalén vʉ'ejoopona maijanaa'me mai chura. Aperʉmʉ Dios chʉ'o kʉana tocha jo'kasi'e chʉ'ʉ Dios Raosi'kʉ cho'ocojñojañere kʉame. Repana kʉajʉ tocha jo'kasi'e Jerusalenna ti'jñeja'mʉ chʉ'ʉre. 32Judíopãipi judío peonani jo'kajanaa'me chʉ'ʉre, repanapi cu'ache cho'oa'jʉ chini. Rʉa cu'ache cutujʉ pãisojʉ coo tutujanaa'me repana chʉ'ʉre. 33Ũcuachi'a suĩ'sue pi'ni vanisõjanaa'me repana chʉ'ʉre. Jã'ata'ni choteumucujñana vajʉraija'mʉ chʉ'ʉ —chiniasomʉ Jesús repaʉ neenare. 34Repaʉ kʉache asanata'ni jmamakarʉjẽ'e asa chẽamaneasome repana. Diopi repanani asa chẽañe'te ʉ̃sekʉna asavesʉasome repana. 35Repaʉ Jesús Jericó vʉ'ejoopo tĩ'acuhato na'ava'ʉ ma'a rʉ'tʉva'te ñu'iʉ kurire sẽeʉ paniasomʉ. 36Ñu'iʉna pãipi jainʉko ũcuachejapi caraijʉna asa, —¿Je'se cho'oche ina? —chiniasomʉ repaʉ. 37Chikʉna, —Jesús, Nazaret vʉ'ejoopo raisi'kʉpi caraimʉ —chiniasome pãi repaʉ'te ja'me saina. 38Chitena asa ʉjachʉ'opi ija'che cuikʉ i'kaasomʉ repaʉ: —Jesús, David aperʉmʉ pa'isi'kʉ Jojosi'kʉ, oijʉ̃'ʉ chʉ'ʉva'ʉre —chiniasomʉ. 39I'kaʉna asa charo saina, —Re'omʉ. Jo'e i'kamanejʉ̃'ʉ —chiniasome repaʉ'te. Jo'e i'kamanejʉ̃'ʉ chiinareta'ni na'a rʉa cuikʉ i'kaasomʉ repaʉ. —Jesús, David aperʉmʉ pa'isi'kʉ Jojosi'kʉ, oijʉ̃'ʉ chʉ'ʉva'ʉre —chiniasomʉ repaʉ. 40Jã'aja'ñe i'kakʉ cuikʉna asa canʉka, —Chʉ'ʉni rajʉ̃'ʉ repaʉ'te —chiniasomʉ Jesús repanare. Chikʉna repaʉni kueñe rarena Jesús ija'che sẽniasomʉ repaʉ'te: 41—¿Ʉ̃quere cho'okaaʉ chini sẽekʉ mʉ'ʉ chʉ'ʉre? —chiniasomʉ Jesús repaʉ'te. Chikʉna, —Pãi Ũcuanʉkore Paakʉ, chʉ'ʉ ñakocaã ñoa'kʉ chiimʉ chʉ'ʉ —chiniasomʉ repaʉ. 42Chikʉna Jesús i'kaasomʉ. —Mʉ'ʉ ñakocaã ñoa'kʉ mʉ'ʉre. “Jesús chʉ'ʉre vasoja'mʉ”, chini cuasasi'kʉjekʉ vajʉcuhamʉ mʉ'ʉ chura —chiniasomʉ Jesús repaʉ'te. 43Jesupi jã'aja'ñe i'kakʉna repaʉ ñakocaã teana care'osoasomʉ. Care'oʉna Jesuna'me saiʉ Dioni pojokʉ, “Rʉa re'okʉ'mʉ mʉ'ʉ”, chiniasomʉ repaʉ. Chekʉna ũcuaja'che repaʉ'te cho'osi'ere ña, “Dios peore masikʉ'mʉ”, chiniasome.

will be added

X\