San Lucas 14

1Ũcuarʉmʉ Jesupi pʉaumucusena fariseopãi chʉ̃'ʉkʉ vʉ'ena ãu ãsa chini mʉaʉna chekʉna fariseopãi, “¿Je'se cho'oja'ʉ ikʉ?”, chini ñajʉ cha'aasome, cho'oʉna ña repaʉni cu'ache cho'oñu chini. 2Ũcuavʉ'ere pãiʉ o'ro ravʉ jũ'iva'ʉ paniasomʉ. 3Ũcuarʉmʉ Jesús repanare ija'che sẽniasomʉ judíopãi che'chonana'me fariseopãi: —Diopi chʉ̃'ʉʉna tocha jo'kasi'e, ¿pʉaumucujñana jũ'iva'nare vasoche ʉ̃sekʉ? —chiniasomʉ Jesús repanare. 4Sẽekʉ'te i'kamaneasome repana. I'kamapʉna jũ'iva'ʉre chẽa vasoasomʉ repaʉ. Vasocuha, —Re'omʉ. Saijʉ̃'ʉ —chiniasomʉ repaʉ. 5Chini fariseopãire i'kaasomʉ repaʉ. —Mʉsanʉkona ũcuaʉakʉ te'eʉ chĩipi chekʉrʉmʉ bueyva'ʉpi pʉaumucusena cojena tuãnisõʉna ñani, ¿rutama'ñe? —chiniasomʉ Jesús repanare. 6Chikʉna i'kavesʉasome repana. 7Jesús chuta'a fariseo vʉ'e pa'itona fiesta'te ja'me cho'oa'jʉ chini soicojñosina rani kakaasome. Kaka repanare soisi'kʉni kueñe pʉʉñu chini ku'easome repana. Jã'aja'ñe cho'ojʉna ña Jesús ija'che chʉ'vaasomʉ repanare: 8—Mʉsanʉkonani pãi romi vejache'te ñaa'jʉ chini soito sani tĩ'a, soisi'kʉni kueñe pʉʉñu chini ku'emanejʉ̃'ʉ. Chekʉrʉmʉ mʉsanʉkonare na'a rʉa masinapi ratu mʉsanʉkonare soisi'kʉ, “Tĩichejana kʉñʉ pʉʉjʉ̃'ʉ mʉsanʉkona, inapi ichejana pʉʉa'jʉ”, chiija'mʉ. Chikʉna asa kʉkʉ vʉni sani, mesako'a chekʉchã'tiro casaivʉãna pʉʉjanaa'me mʉsanʉkona. 10Jã'ajekʉna ija'che cho'ojʉ̃'ʉ: Mʉsanʉkonare pãipi soito sani kaka, soisi'kʉre so'o pʉʉjʉ̃'ʉ, mesako'a chekʉchã'tiro casaivʉãna. Jã'aja'ñe cho'oto mʉsanʉkonare soisi'kʉ rani ña, “Chʉ'ʉre re'oja'che cho'ona, vʉni rani chʉ'ʉre na'a kueñe pʉʉjʉ̃'ʉ”, chiija'mʉ. Jã'aja'ñe i'kato chekʉna pãi repavʉ'e kaka pʉʉsina mʉsanʉkonare ña, “Rʉa masinacosome jã'ana”, chiijanaa'me. 11“Chekʉnare pãi na'a rʉa masime chʉkʉna”, chiijʉ cuasame pãi te'ena. Jã'aja'ñe cuasanare, “Rʉa vesʉnaa'me ina”, chiija'mʉ Dios, asa kʉkʉa'jʉ chini. Jã'ata'ni pãi chekʉna, “Chekʉnare pãi na'a rʉa vesʉnaa'me chʉkʉna”, chiijʉ cuasame. Jã'aja'ñe cuasanare, “Rʉa masinaa'me ina”, chiija'mʉ Dios, asa pojoa'jʉ chini —chiniasomʉ Jesús repanare. 12Chini repaʉ'te soisi'kʉre Jesús ija'che i'kaasomʉ: —Mʉ'ʉpi pãire ãure ãura chini, soni ija'che cuasamanejʉ̃'ʉ: “Chʉ'ʉre re'oja'che cho'onana'me chʉ'ʉ a'chʉpãina'me chʉ'ʉ majapãina'me kueñe pa'inare kurinarechi'a soni ãu ãuja'mʉ chʉ'ʉ. Jã'aja'ñe chʉ'ʉpi cho'oto chekʉrʉmʉ repanapi fiesta cho'oni chʉ'ʉ repanare soisi'eja'che sãiñe soijanaa'me chʉ'ʉre”, chiiʉ cuasamanejʉ̃'ʉ. 13Jã'ata'ni mʉ'ʉpi fiesta cho'oni chʉova'na pa'iva'nana'me nʉka ku'imava'nana'me ro'ocũ'ava'nana'me na'ava'nare soijʉ̃'ʉ. 14Repava'nata'ni mʉ'ʉre sãiñe soima'me. Jã'ajekʉna mʉ'ʉpi jã'aja'ñe pa'iva'nani ãure soni ãuto rʉa re'oja'che cho'okaija'mʉ Dios mʉ'ʉre. Na'a pa'isirʉmʉna pãi re'onapi jũ'isina jo'e vajʉraiumucuse tĩ'aru Dios mʉ'ʉre ro'ija'mʉ, chʉova'na pa'iva'nare re'oja'che cho'okaisi'e ro'i —chiniasomʉ Jesús repaʉ'te fariseopãiʉ'te. 15Jesupi jã'aja'ñe i'kaʉna asa, chekʉ ãu ãsa chini ũcuavʉ'e ñu'ikʉ ija'che i'kaasomʉ: —Pãi, Dios pa'icheja sani ãu ãijana rʉa pojojʉ pa'ijanaa'me —chiniasomʉ. 16Chikʉna Jesús ija'che i'kaasomʉ repaʉ'te: —Pãiʉ repaʉ chiinarechi'a pãi jainʉkore repaʉ ãu ãujañere kʉa, ãu ãurʉmʉ tĩ'aʉna repaʉ'te cho'oche cho'okaikʉ'te saoasomʉ, repaʉ chiinani ija'che sa kʉaa'kʉ chini: “Rani ãijʉ̃'ʉ. Mʉsanʉkona ãijañe ãu peore care'vacuhasi'ea'me.” 18Chini saoʉna sa kʉaʉna asa, “Saima'me chʉkʉna”, chiniasome repana. Charo soicojñosi'kʉ ija'che i'kaasomʉ: “Cheja koocuhasi'kʉa'mʉ chʉ'ʉ. Chʉ'ʉ koosichejare ñajasa chiimʉ chʉ'ʉ. Ãu ãura chini soisi'kʉreta'ni saimaneja'mʉ chʉ'ʉ. Pe'rumanejʉ̃'ʉ chʉ'ʉre”, chiniasomʉ repaʉ. 19Ũcuaja'che chekʉ soicojñosi'kʉ ija'che i'kaasomʉ: “Bueyva'nare dierepanare koocuhasi'kʉa'mʉ chʉ'ʉ. Chʉ'ʉ koosiva'nani bueyva'nani cho'oche'te cho'o ñara chiimʉ chʉ'ʉ. Saima'mʉ chʉ'ʉ. Pe'rumanejʉ̃'ʉ chʉ'ʉre”, chiniasomʉ repaʉ. 20Ũcuaja'che jo'e chekʉ ija'che i'kaasomʉ: “Chʉ'ʉ churepara romi vejasi'kʉa'mʉ. Chura chʉ'ʉre ãu ãi saicu'amʉ”, chiniasomʉ repaʉ. 21Ũcuanʉko jã'aja'ñe i'karena co'i, repaʉ'te paakʉni kʉaʉna asa pe'rukʉ ija'che chʉ̃'ʉasomʉ repaʉ: “Ivʉ'epi eta mʉa ijoopo callejoovʉã pa'inani, chʉova'na pa'iva'nana'me nʉka ku'imava'nana'me na'ava'nana'me ro'ocũ'ava'nare ku'e jñaa chʉ'ʉ vʉ'ena soni rajʉ̃'ʉ”, chiniasomʉ repaʉ. 22Chikʉna soijani rani, “Chʉ'ʉre paakʉ, mʉ'ʉ chʉ̃'ʉsi'e cho'ocuhasi'kʉa'mʉ chʉ'ʉ. Jã'ata'ni mʉ'ʉ vʉ'e chuta'a pãi timuma'me”, chiniasomʉ repaʉ. 23Chikʉna ija'che i'kaasomʉ repaʉ'te paakʉ: “Vʉ'ejoopo rʉ'tʉva pa'ima'ña ku'inani kʉajaijʉ̃'ʉ chʉ'ʉ vʉ'e timukʉ'te raapʉ. 24Chʉ'ʉ charo soisi'e raicuhesinare te'eʉ'terejẽ'e ãumaneja'mʉ chʉ'ʉ”, chiniasomʉ repaʉ, repaʉ'te cho'oche cho'okaikʉ'te —Jã'aja'ñe kʉaasomʉ Jesús repaʉ'te i'kasi'kʉre. 25Ũcuarʉmʉ Jesús pãipi jainʉko sʉni ku'ijʉna chʉri ña i'kaasomʉ. 26—Mʉsanʉkonapi chʉ'ʉni jovoʉato ija'che cho'ojʉ̃'ʉ chiimʉ chʉ'ʉ mʉsanʉkonare: Mʉja'kʉpãi pa'ichena'me mʉrʉ̃joromi pa'iche, mʉchĩiva'na pa'iche, mʉa'chʉpãi pa'iche, mʉa'choromi pa'iche, mʉche'ʉchĩi pa'ichena'me mʉsanʉkona pa'iche rʉarepa cuasama'ñe pa'ijʉ chʉ'ʉni na'a rʉa cuasajʉ pa'ijʉ̃'ʉ. Mʉsanʉkonapi jã'aja'ñe cho'omaneni chʉ'ʉ neena pa'imanejanaa'me. 27Mʉsanʉkonare chʉ'ʉ neenajejʉna chekʉna vanisõñu chiijanaa'me, chʉ'ʉre cho'oñu chiicheja'che. Jã'aja'ñe cho'oñu chiitojẽ'e chʉ'ʉre cuasache jmamakarʉjẽ'e ũhasõmanejʉ̃'ʉ. Mʉsanʉkonapi chʉ'ʉre cuasache'te ũhasõni chʉ'ʉ neena pa'imanejanaa'me. 28Chekʉrʉmʉ mʉsanʉkona te'eʉji vʉ'e ʉmʉ nʉkavʉ'e cho'ora chiimʉ. Cho'ora chini charo repavʉ'e cho'ojamajñarʉã ro'inʉkore cuasa masi kuẽkue ñamʉ, “Kuri karato cho'omanera”, chini. 29Charo jã'aja'ñe cuasama'ñe cho'oni repaʉni kuri karasõʉna cho'o pi'nicu'amʉ repaʉ'te repavʉ'e. Cho'o pi'nimaneʉna chekʉnapi ñani pãisojanaa'me repaʉ'te. 30“Vʉ'e cho'okʉta'ni cho'o pi'nimaneʉ ikʉ”, chiijanaa'me repana repaʉ'te. 31Chekʉrʉmʉ pãiʉ jainʉkore paakʉ chʉ̃'ʉkʉji chekʉnani cavapi'rakʉ te'eʉji charo ija'che cuasamʉ: “Sõtaopãi diez milrepanare paakʉ'mʉ chʉ'ʉ. Chekʉta'ni na'a jainʉkore paamʉ, veinte milrepanare. ¿Jã'anani maipi cavani cajejaijanaa'ñe?”, chiimʉ. “Chekʉrʉmʉ repanapi maire cajejaijanaa'me”, chiiʉ cuasani ija'che cho'omʉ repaʉ: Chekʉpi repaʉ neenana'me chuta'a so'ore pa'ijʉna repaʉ'te cho'oche cho'okainare saomʉ, “Cavamaneñu mai. Re'oja'che pañu”, chiapʉ chini. Jã'ata'ni chekʉrʉmʉ, “Maipi cajejaijacosome”, chini cuasani, repaʉ neenare, “Cavañu mai”, chiimʉ repaʉ. 33Mʉsanʉkona ũcuaja'che chʉ'ʉ neena pa'iʉato pãi chʉ̃'ʉkʉ cuasasi'eja'che charo ija'che cuasajʉ̃'ʉ: “¿Diore cuasaja'che chʉ'ʉ? Cuasato chʉ'ʉre cho'oʉache cu'a peore ũhasõ, Repaʉ chʉ̃'ʉñechi'a cuasakʉ cho'oche pa'ija'mʉ chʉ'ʉ. Jã'aja'ñe cho'oma'to Dios neekʉ pa'icu'aja'mʉ” —chiniasomʉ Jesús repanare. 34Ũcuarʉmʉ Jesús jo'e i'kaasomʉ repanare pãi. —Ũha sãijani rʉa re'omʉ. Jã'ata'ni ũhapi sãija'ñepi si'asõru, ¿je'se cho'ojanaa'ñe pãi, ũhapi sãijaaʉ chini? Jo'e sãija'ñe cho'ocu'amʉ. 35Sãija'ima'to cu'amʉ. Ũcuaja'che chio tãsimajñarʉãre ũha, sãija'ima'ñepi chu'chuto aineema'mʉ. Ũcuachi'a abonona ũha, sãija'ima'ñepi ja'meto na'a re'oja'ima'mʉ. Jã'ajekʉna ũhapi sãija'ima'to sẽjome pãi. Ũcuaja'che pãipi repana asa chẽasi'ere Dios chʉ'ore ũhasõni ũha sãija'imaʉ cu'acheja'che cu'ame. Jo'e re'oja'che pa'iche peomʉ repanare. Chʉ'ʉ i'kache asa chẽaʉana ũcuanʉko asa chẽajʉ̃'ʉ —chiniasomʉ Jesús repanare.

will be added

X\