San Juan 13

1Reparʉmʉ pascuarʉmʉ tĩ'aumucuse pa'isi'kʉa'mʉ. Reparʉmʉ Jesús repaʉ saijarʉmʉ tĩ'akʉna masiasomʉ icheja cheja pa'iche jo'ka Pʉka'kʉ pa'icheja saijachere. Chʉkʉna'te repaʉ neenare cheja pa'inare cuhama'ñe si'arʉmʉ rʉa cuasakʉ pa'isi'kʉa'mʉ repaʉ. 2Simón Iscariote mamakʉni Judare aperʉmʉ vati aipi repaʉ rekochona cu'ache chʉ̃'ʉasomʉ, Jesure cu'ache cho'ojanani jo'kaa'kʉ chini. Repaʉ Jesús Pʉka'kʉ Dios repaʉ'te raosi'ena'me repaʉ pa'icheja repaʉ jo'e saijachena'me pãi ũcuanʉkore chʉ̃'ʉa'kʉ chini Pʉka'kʉ repaʉ'te jo'kasi'e masiasomʉ. Jã'aja'ñe masikʉji chʉkʉna repaʉ neenana'me ãu ãiʉ ñu'isi'kʉpi vʉni repaʉ sẽ'sevʉ ju'ikãa tĩto repaʉ jiisaivʉna toalla kãapi quẽosi'kʉa'mʉ repaʉ. 5Quẽo pi'ni totore'avana oko ro chʉkʉna repaʉ neena cũ'are choa pi'ni ũcuakãapi jose tʉ'nesõkaisi'kʉa'mʉ repaʉ. 6Choakʉ saiʉ Simón Pedro cũ'a choapi'rakʉna ija'che i'kasi'kʉa'mʉ repaʉ: —Chʉ'ʉre Paakʉ, ¿chʉ'ʉ cũ'are choaja'ʉ mʉ'ʉ? —chiisi'kʉa'mʉ. 7Chikʉna Jesús i'kasi'kʉa'mʉ. —Chʉ'ʉ chura cho'oche vesʉmʉ mʉ'ʉ. Na'a pa'isirʉmʉ masija'mʉ mʉ'ʉ —chiisi'kʉa'mʉ repaʉ. 8Chikʉna Pedro jo'e i'kasi'kʉa'mʉ repaʉ'te. —Chʉ'ʉ cũ'a choache ʉ̃semʉ chʉ'ʉ —chiisi'kʉa'mʉ. Chikʉna Jesús i'kasi'kʉa'mʉ. —Mʉ'ʉ cũ'a choache ʉ̃seni chʉ'ʉ neekʉ pa'imaneja'mʉ mʉ'ʉ —chiisi'kʉa'mʉ. 9Jã'aja'ñe i'kaʉna i'kasi'kʉa'mʉ repaʉ. —Jã'a pa'ito, Chʉ'ʉre Paakʉ, chʉ'ʉre cũ'ana'me jʉ̃jña sĩjopʉ peore choajʉ̃'ʉ —chiisi'kʉa'mʉ. 10Chikʉna i'kasi'kʉa'mʉ repaʉ. —Pãiʉ cucha pi'nisi'kʉ jo'e cuchache chiima'mʉ ũcuare meno peoca'nivʉ cuchasi'kʉjekʉ. Cũ'achi'a choache chiimʉ cha'o cha'casicũ'ajekʉna. Ũcuaja'che mʉsanʉkona rekoñoã cuchasinaja'ñe cu'achejẽ'e peonaa'me. Jã'ata'ni mʉsanʉkonare ja'me pa'ikʉ te'eʉ repaʉ rekocho ũcua cu'ache cuasakʉ pa'imʉ —chiisi'kʉa'mʉ repaʉ. 11Repaʉ'te cu'ache cho'ojanare jo'kajaʉni masikʉ, “Mʉsanʉkonare ja'me pa'ikʉ te'eʉ repaʉ rekocho ũcua cu'ache cuasakʉ pa'imʉ”, chiisi'kʉa'mʉ repaʉ. 12Chʉkʉna cũ'a choa pi'ni repaʉ sẽ'sevʉ ju'ikãa sacha jo'e pʉʉ ñu'iʉ i'kasi'kʉa'mʉ repaʉ. —¿Chʉ'ʉ mʉsanʉkonare cho'osi'e masiche? 13Chʉ'ʉre mʉsanʉkona, “Masiʉ, Chʉkʉna'te Paakʉ”, chiinaa'me. Jã'aja'ñe i'kajʉ ũcuarepa i'kanaa'me mʉsanʉkona. Mʉsanʉkonare che'chokʉ paakʉ'mʉ chʉ'ʉ. 14Mʉsanʉkonare paakʉta'ni cũ'a choakaisi'kʉa'mʉ chʉ'ʉ. Jã'ajekʉna mʉsanʉkona ũcuaja'che chʉ'ʉ cho'osi'eja'che sãiñechi'a cho'okaijʉ pa'ijʉ̃'ʉ. 15Mʉsanʉkonapi ña chẽa cho'ojʉ paapʉ chini cho'o ñocuhasi'kʉa'mʉ chʉ'ʉ mʉsanʉkonare. 16Cho'oche'te rupʉ cho'okaaʉ chini chẽa paacojñokʉ repaʉ paakʉ'te na'a cajejaiche pa'ikʉma'mʉ. Saocojñosi'kʉ ũcuachi'a repaʉ'te saosi'kʉre na'a cajejaiche pa'ikʉma'mʉ. Ũcuarepaa'me jã'a. Mʉsanʉkona ũcuaja'che chʉ'ʉre na'a cajejaiche pa'inama'me. Jã'ajekʉna mʉsanʉkonare chʉ'ʉ cho'ocheja'che sãiñechi'a re'oja'che cho'okaijʉ pa'ijʉ̃'ʉ. 17Mʉsanʉkonapi chʉ'ʉ i'kasi'ere asa chẽa cho'ojʉ pani pojojʉ pa'ijanaa'me. 18’Jã'ata'ni mʉsanʉkona ũcuanʉkore i'kama'mʉ chʉ'ʉ. Chʉ'ʉ chẽasina pa'iche masimʉ chʉ'ʉ. Dios chʉ'o tocha jo'kasi'e ija'che kʉamʉ: Chʉ'ʉre ja'me ãu ãikʉji cu'ache cho'oja'mʉ chʉ'ʉre, chiimʉ. Repa tocha jo'kasi'e ũcuarepa ti'jñeja'mʉ. 19Chuta'a repa tocha jo'kasi'e ti'jñemarʉmʉna kʉamʉ chʉ'ʉ mʉsanʉkonare, asa repapi ti'jñeʉna, “Jesús Dios Raosi'kʉa'mʉ”, chiijʉ cuasaa'jʉ chini. 20Pãi chʉ'ʉ saosinare pojona chʉ'ʉre ũcuaja'che pojome. Pãi chʉ'ʉre pojona chʉ'ʉ Ja'kʉre ũcuaja'che pojome. Ũcuarepaa'me jã'a —chiisi'kʉa'mʉ repaʉ Jesús. 21Jã'aja'ñe i'ka pi'ni Jesús rʉa sʉmava'ʉ pa'iʉ ija'che i'kasi'kʉa'mʉ: —Mʉsanʉkonare ja'me pa'ikʉ chʉ'ʉni cu'ache cho'oa'jʉ chini chʉ'ʉre cuhenani jo'kaja'mʉ. Ũcuarepaa'me jã'a —chiisi'kʉa'mʉ repaʉ. 22I'kakʉna asa repaʉni vesʉjʉ sãiñechi'a ñasinaa'me chʉkʉna repaʉ neena. 23Chʉ'ʉ repaʉ neekʉ rʉa chiicojñokʉ repaʉ'te rʉ̃'ʉñe ñu'isi'kʉa'mʉ. 24Ũcuarʉmʉ Simón Pedro chʉ'ʉre Jesure rʉ̃'ʉñe ñu'ikʉjekʉna repaʉ'te jo'kajaʉni sẽniasa kʉaa'kʉ chini rupʉ vevosi'kʉa'mʉ. 25Vevoʉna sẽesi'kʉa'mʉ chʉ'ʉ Jesure. —Chʉkʉna'te Paakʉ, ¿kaʉni i'kakʉ mʉ'ʉ, mʉ'ʉre cu'ache cho'ojanare jo'kajaʉre? —chiisi'kʉa'mʉ chʉ'ʉ. 26Chikʉna i'kasi'kʉa'mʉ repaʉ. —Pãmakarʉ'te chũsa ĩsija'mʉ chʉ'ʉ repaʉ'te chʉ'ʉre jo'kajaʉre —chiisi'kʉa'mʉ. Chini pãmaka chũsa Simón Iscariote mamakʉni Judani ĩsisi'kʉa'mʉ repaʉ. 27Pãmakare ĩsiʉna koosirʉmʉ repaʉ'te vati ai teana kakaasomʉ. Kakaʉna Jesús repaʉ'te i'kasi'kʉa'mʉ. —Mʉ'ʉ cho'ojache pesa cho'ojaijʉ̃'ʉ —chiisi'kʉa'mʉ. 28Jesús repaʉ'te i'kasi'e ãu ãijʉ ñu'ina ũcuanʉko asavesʉsinaa'me. 29Asavesʉjʉ ija'che cuasaasome te'ena: “Chʉkʉna chi'isi'e kuri paakaikʉjekʉna Judare pascua cho'ojamajñarʉã koojaaʉ chini saocosomʉ Jesús”, chiisinaa'me. Chekʉna ija'che cuasaasome: “Judapi chʉova'na pa'iva'nare kurire ĩsia'kʉ chini saocosomʉ Jesús”, chiisinaa'me. 30Repaʉ Judas pãmaka koo ãni pi'ni vʉni eta sanisõsi'kʉa'mʉ. Reparʉmʉ ñami pa'isi'kʉa'mʉ. 31Repaʉ Judas etasirʉmʉ Jesús ija'che i'kasi'kʉa'mʉ: —Chura chʉ'ʉ Dios Raosi'kʉ peore Masiʉ pa'iche ñoja'mʉ Dios. Ũcuachi'a Repaʉ chiiche'te chʉ'ʉpi jachama'ñe cho'o ñoʉna Repaʉ peore masiche'te masijanaa'me pãi. 32Chʉ'ʉpi Repaʉ peore Masiʉ pa'iche'te cho'o ñoʉna Repaʉ ũcuaja'che chʉ'ʉ peore Masiʉ pa'iche cho'o ñoja'mʉ. Chura ñoja'mʉ Repaʉ. 33Asarepajʉ̃'ʉ, chʉ'ʉ chĩiva'na. Mʉsanʉkonare rʉa jeerʉmʉ ja'me pa'ima'ñe jo'ka sanisõja'mʉ chʉ'ʉ. Chʉ'ʉpi sanisõʉna ku'ejanaa'me mʉsanʉkona chʉ'ʉre. Jã'ajekʉna chura mʉsanʉkonani judíopãi chʉ̃'ʉnare i'kasi'eja'che i'kamʉ chʉ'ʉ: “Mʉsanʉkonare chʉ'ʉ saicheja saicu'amʉ.” 34Ie mamare chʉ̃'ʉ jo'kamʉ chʉ'ʉ mʉsanʉkonare: Sãiñechi'a oijʉ pa'ijʉ̃'ʉ. Chʉ'ʉ mʉsanʉkonare oicheja'che mʉsanʉkona ũcuaja'che sãiñechi'a oijʉ pa'ijʉ̃'ʉ. 35Mʉsanʉkonapi sãiñechi'a oijʉ pa'ito pãipi ñani ũcuanʉko, “Jesús neenaa'me ina”, chiijanaa'me —chiisi'kʉa'mʉ repaʉ Jesús chʉkʉna'te. 36Ũcuarʉmʉ Simón Pedro Jesure sẽesi'kʉa'mʉ. —Chʉkʉna'te Paakʉ, ¿jeechejana saija'ʉ mʉ'ʉ? —chiisi'kʉa'mʉ. Chikʉna Jesús i'kasi'kʉa'mʉ. —Chʉ'ʉ saicheja saicu'amʉ mʉ'ʉre chura. Na'a pa'isirʉmʉta'ni saire'oja'mʉ mʉ'ʉre —chiisi'kʉa'mʉ repaʉ. 37Chikʉna Pedro i'kasi'kʉa'mʉ. —Chʉkʉna'te Paakʉ, ¿je'se pa'iʉna mʉ'ʉna'me churana saicu'akʉ chʉ'ʉre? Pãipi mʉ'ʉni vanisõñu chiito chuenisõñejẽ'e vajʉchʉma'ñe mʉ'ʉni ʉ̃sechiiʉ chuenisõra chiimʉ chʉ'ʉ, mʉ'ʉpi chuenisõmanea'kʉ chini —chiisi'kʉa'mʉ repaʉ. 38Chikʉna Jesús i'kasi'kʉa'mʉ. —¿Chuenisõkairepaja'ʉ mʉ'ʉ chʉ'ʉre? Jã'aja'ñe i'kasi'kʉta'ni chuta'a kura chu'ima'tona pãipi sẽejʉna choteñoã, “Jesure ñama'kʉa'mʉ chʉ'ʉ”, chiija'mʉ mʉ'ʉ. Ũcuarepaa'me jã'a —chiisi'kʉa'mʉ Jesús.

will be added

X\