1 San Juan 5

1“Pãi ũcuanʉkore chʉ̃'ʉa'kʉ chini Dios Raosi'kʉa'mʉ Jesús”, chini cuasana Dios chĩia'me. Dios chĩi chekʉna Repaʉ'te cuasanare mai Ja'kʉ Dios chĩijejʉna cuasame. 2Maipi Dioni cuasajʉ Repaʉ chʉ̃'ʉñe cho'oni, “Chekʉnare Dios chĩi cuasame mai”, chiire'omʉ. 3Maipi Dios chʉ̃'ʉñe'te cho'oni Repaʉ'te masi cuasame. Ũcuaʉji maini cho'okaiʉna Repaʉ chʉ̃'ʉñe cho'ovesama'mʉ maire. 4Repaʉ chĩi, “Dios maire oiʉ cho'okaija'mʉ”, chiijʉ cuasanajejʉ Ũcuaʉji cho'okaiʉna vati chʉ̃'ʉñe cho'oma'ñe re'oja'chechi'a cho'ome. 5“Jesús Dios Mamakʉ'mʉ”, chiijʉ cuasanachi'a koka paajʉ vati chʉ̃'ʉñe cho'oma'ñe pa'ime. 6Jesucristo icheja chejare caje pa'iʉ okorocojñosi'kʉa'mʉ. Na'a pa'iʉ mai cu'ache cho'oche'te ro'ikaiʉ kurususẽ'verona jẽ'jo nʉkorena jũnisõ chie meosi'kʉa'mʉ. Dios Rekochoji ũcuarepare chʉ'o kʉakʉna Jesús pa'iche masime mai. 7Chotena cʉnaʉmʉ pa'ina, “Jesús Dios Mamakʉ'mʉ”, chiijʉ kʉame maire. Mai Ja'kʉ Dios Repaʉ chʉ'ore kʉamʉ maire. Repaʉ Mamakʉ ũcuachi'a kʉamʉ. Repaʉ Rekocho ũcuachi'a kʉamʉ maire. Chotena ũcuate'ere chʉ'o kʉame maire. Jã'aja'ñe kʉajʉna masime mai Jesús pa'iche. 8Ũcuachi'a chotemajña Repaʉ cheja pa'irʉmʉ cho'osi'ere cuasajʉ Repaʉ pa'iche masime mai. Repaʉ'te Jesure okoroumucuse Dios Rekocho ũkupoja'iʉ cajesi'kʉa'mʉ. Cajeʉna Dios cʉnaʉmʉpi ija'che i'kasi'kʉa'mʉ: “Chʉ'ʉ chĩia'mʉ mʉ'ʉ”, chiisi'kʉa'mʉ Dios. Na'a pa'iʉ Repaʉ Jesús Dios Mamakʉjekʉ Repaʉ chiepi mekʉna jũni ro'ikaisi'kʉa'mʉ maire. 9Pãipi ũcuaʉache i'kato repana i'kache'te asa cuasame mai. Jã'ajekʉna Dios na'a rʉa masikʉ i'kasi'e, “Ũcuarepaa'me”, chiijʉ na'a rʉa cuasañu mai, Repaʉ, “Chʉ'ʉ chĩia'mʉ Jesús”, chiisi'e. 10Dios Repaʉ Mamakʉ pa'iche kʉasi'e pãi te'ena asa jachama'ñe cuasajʉ pa'ime. Chekʉnata'ni Dios kʉasi'e asa jachajʉ, “Joremʉ Dios”, chini, cuasama'me. 11Dios Repaʉ Mamakʉ pa'iche'te kʉakʉ ija'che i'kaasomʉ: “Chʉ'ʉ chĩire cuasanachi'a jũnisõsirʉmʉ chʉ'ʉ pa'ichejare rani ai pa'ijanaa'me”, chiniasomʉ Dios. 12Dios Mamakʉ'te cuasana jũnisõsirʉmʉ Dios pa'ichejare ai sani re'oja'che pa'ijanaa'me. Repaʉ'te Dios Mamakʉ'te cuasamanata'ni vati toana ai sani uujʉ pa'ijanaa'me. 13Mʉsanʉkona Dios Mamakʉ'te cuasana jũnisõsirʉmʉ Dios pa'ichejare ai sani re'oja'che pa'ijanaa'me. Jã'are masia'jʉ chini mʉsanʉkonare ie chʉ'o tocha saomʉ chʉ'ʉ. 14Jã'ajekʉna, “Dios maire cho'okaija'mʉ”, chini masijʉ Repaʉ chʉ̃'ʉñe cho'ojʉ maire ʉache'te sẽeto asa, ĩsimʉ Dios mai Repaʉ'te sẽeñe. Jã'are masijʉ vajʉchʉma'ñe maire ʉache sẽeme mai Repaʉ'te. 15Dios mai sẽeñe peore asamʉ. Jã'are masijʉ, “Mai sẽeñe Dios cho'okaija'mʉ”, chiijʉ masime mai. 16Mʉsanʉkonapi chekʉna pãi cu'ache cho'oche'te ñani Dioni sẽekaijʉ̃'ʉ repanare. Dioni sẽekaito repanare re'oja'che pa'iche cho'okaija'mʉ Dios. Jã'ata'ni repanapi cu'ache cho'oche'te jmamakarʉjẽ'e ũhacuheto Dioni sẽekaijʉ̃'ʉ repanare chiima'mʉ chʉ'ʉ. Cu'ache cho'oche ũhamanare jũnisõsirʉmʉ vati toana saoja'mʉ Dios, repana cu'ache cho'osi'ere ro'ia'jʉ chini. 17Pãipi ũcuaʉache cu'ache cho'oto cu'amʉ. Dios rʉa cuhemʉ jã'aja'ñe cho'oche. Jã'ata'ni cu'ache cho'onapi repana cu'ache cho'oche'te ũhasõru Dios repana cu'ache cho'osi'e tʉnosõ jo'e cuasama'mʉ. 18Pãi Diore cuasana Repaʉ chĩijejʉ si'areparʉmʉ cu'ache cho'ojʉ pa'ima'me. Vati repanare Diore cuasanare cu'ache chʉ̃'ʉra chiimʉ, repanapi cu'ache cho'oa'jʉ chini. Jã'ata'ni Jesucristo Dios Mamakʉji ʉ̃sekaiʉna repana cu'ache cho'oma'ñe pa'ime. Jã'are masime mai. 19Pãi Diore cuhena vati chʉ̃'ʉñe'te cho'ojʉ pa'ime. Maita'ni Dios chʉ̃'ʉñe'te cho'ojʉ pa'inaa'me Repaʉ neenajejʉ. Jã'are masime. 20Jesucristo, Dios Mamakʉ chejare caje pa'iʉ Pʉka'kʉ pa'iche'te che'chosi'kʉa'mʉ, pãipi Diorepaʉ pa'iche'te masia'jʉ chini. Jã'are masime mai. Dios Mamarepakʉni Jesucristo'te masi cuasanajejʉ Dios pa'ichejare ai sani pa'ijanaa'me mai. 21Asarepajʉ̃'ʉ, chʉ'ʉ chĩijana. Vati chʉ̃'ʉñe cho'oma'ñe pa'ijʉ̃'ʉ. Re'omʉ.

will be added

X\