NÚMEROS 26

1Ayic ix lajviec' jun ilya to scham anima chi' yuuj, ix yalan Jehová d'a vin̈aj Moisés yed' d'a vin̈aj Eleazar sat sacerdote yuninal vin̈aj Aarón: 2--Iq'uecchaan̈ sb'isul eb' israel d'a junjun macan̈il yaj eb', tz'el yich d'a eb' 20 ab'il sq'uinal stiempo val sb'at d'a oval, xchi d'a eb' vin̈. 3Ix smolb'an masanil eb' vinac vin̈aj Moisés yed' vin̈aj Eleazar d'a yac'lical Moab, d'a sti' a' Jordán, d'a yichan̈cot Jericó, 4yic stz'ib'chaj masanil eb' 20 ab'il sq'uinal sb'eyn̈ejb'ati, icha val ix aj yalan Jehová d'a vin̈aj Moisés chi'. Aton masanil eb' ix elta d'a Egipto: 5A eb' yin̈tilalcan Rubén sb'ab'el yuninal vin̈aj Israel, ay 43 mil 730 eb' vinac d'a smasanil. A sb'i eb' yuninal vin̈ sb'inajcan d'a junjun macan̈ yin̈tilal, aton tic: Vin̈aj Enoc, vin̈aj Falú, vin̈aj Ezrón yed' vin̈aj Carmi. 8A vin̈aj Falú chi' ay yuninal vin̈aj Eliab, 9axo pax vin̈aj Eliab ay yuninal vin̈aj Nemuel, vin̈aj Datán yed' vin̈aj Abiram, yichamtac vinaquil chon̈ab' yaj eb'. Aton eb' junn̈ej ajnac slajti' yed' vin̈aj Coré. Meltzajnacoch eb' ajc'olal d'a Jehová, d'a vin̈aj Moisés yed' d'a vin̈aj Aarón. 10Palta paxnac levnaj lum luum, emnaccan eb' chavan̈ chi' d'a yol lum yed' vin̈aj Coré. Masanil eb' ochnac tzac'an yuj vin̈aj Coré chi' chamnac eb', aton eb' 250 chamnac yuj jun c'ac'. A juntzan̈ eb' chi' ochnac ch'oxnab'iloc d'a eb' israel smasanil. 11Axo pax eb' yin̈tilalcan vin̈aj Coré chi', maj satel-laj eb'. 12Axo pax eb' yin̈tilalcan Simeón, ay 22 mil 200 eb' vinac d'a smasanil. A sb'i eb' yuninal vin̈ sb'inajcan d'a junjun macan̈ yin̈tilal, aton tic: Vin̈aj Nemuel, vin̈aj Jamín, vin̈aj Jaquín, vin̈aj Zera yed' vin̈aj Saúl. 15A eb' yin̈tilalcan Gad, ay 40 mil 500 eb' vinac d'a smasanil. A sb'i eb' yuninal vin̈ sb'inajcan d'a junjun macan̈ yin̈tilal, aton tic: Vin̈aj Zefón, vin̈aj Hagui, vin̈aj Suni, vin̈aj Ozni, vin̈aj Eri, vin̈aj Arod yed' vin̈aj Areli. 19A eb' yin̈tilal Judá, ay 76 mil 500 eb' vinac d'a smasanil. A sb'i eb' yuninal vin̈ sb'inajcan d'a junjun macan̈ yin̈tilal, aton tic: Vin̈aj Sela, vin̈aj Fares yed' vin̈aj Zera. A eb' yuninal vin̈aj Fares sb'inajcan d'a yin̈tilal: Vin̈aj Hezrón yed' vin̈aj Hamul. A pax eb' yuninal vin̈aj Judá ix cham d'a lum Canaán aton vin̈aj Er yed' vin̈aj Onán. 23A eb' yin̈tilalcan Isacar, ay 64 mil 300 eb' vinac d'a smasanil. A sb'i eb' yuninal vin̈ sb'inajcan d'a junjun macan̈ yin̈tilal, aton tic: Vin̈aj Tola, vin̈aj Fúa, vin̈aj Jasub yed' vin̈aj Simrón. 26A eb' yin̈tilalcan Zabulón, ay 60 mil 500 eb' vinac d'a smasanil. A sb'i eb' yuninal vin̈ sb'inajcan d'a junjun macan̈ yin̈tilal, aton tic: Vin̈aj Sered, vin̈aj Elón yed' vin̈aj Jahleel. 28Axo pax d'a yin̈tilalcan José, chab' in̈tilal yaj eb', aton yic Manasés yed' yic Efraín. A eb' yin̈tilalcan Manasés chi', ay 52 mil 700 eb' vinac d'a smasanil. A eb' sb'inajcan d'a scal junjun macan̈ yin̈tilal vin̈: Aton vin̈aj Maquir yed' vin̈aj Galaad yuninal vin̈aj Maquir chi' yed' pax eb' yuninal vin̈aj Galaad chi', aton vin̈aj Jezer, vin̈aj Helec, vin̈aj Asriel, vin̈aj Siquem, vin̈aj Semida yed' vin̈aj Hefer. (A vin̈aj Zelofehad yuninal vin̈aj Hefer, malaj yuninal vin̈, an̈ej eb' ix yisil vin̈ ay: Aton ix Maala, ix Noa, ix Hogla, ix Milca yed' ix Tirsa.) 35Axo eb' yin̈tilalcan Efraín, ay 32 mil 500 eb' vinac d'a smasanil. A sb'i eb' yuninal vin̈ sb'inajcan d'a junjun macan̈ yin̈tilal, aton tic: Vin̈aj Sutela, vin̈aj Bequer yed' vin̈aj Tahán. Ay jun yuninal vin̈aj Sutela chi' sb'inajcan d'a yin̈tilal, aton vin̈aj Erán. 38A eb' yin̈tilalcan Benjamín, ay 45 mil 600 eb' vinac d'a smasanil. A sb'i eb' yuninal vin̈ sb'inajcan d'a junjun macan̈ yin̈tilal, aton tic: Vin̈aj Bela, vin̈aj Asbel, vin̈aj Ahiram, vin̈aj Sufam yed' vin̈aj Hufam. A eb' yuninal vin̈aj Bela sb'inajcan d'a yin̈tilal, aton vin̈aj Ard yed' vin̈aj Naamán. 42A pax eb' yin̈tilalcan Dan, ay 64 mil 400 eb' vinac d'a smasanil. A vin̈ sb'inajcan d'a yin̈tilal, aton vin̈aj Suham. 44Axo pax yin̈tilalcan Aser, ay 53 mil 400 eb' vinac d'a smasanil. A sb'i eb' yuninal vin̈ sb'inajcan d'a junjun macan̈ yin̈tilal, aton tic: Vin̈aj Imna, vin̈aj Isúi yed' vin̈aj Bería. A eb' yuninal vin̈aj Bería chi' sb'inajcan d'a yin̈tilal: Aton vin̈aj Heber yed' vin̈aj Malquiel. (A vin̈aj Aser chi' ay jun ix yisil vin̈ scuchan Sera). 48A eb' yin̈tilalcan Neftalí, ay 45 mil 400 eb' vinac d'a smasanil. A sb'i eb' yuninal vin̈ sb'inajcan d'a junjun macan̈ yin̈tilal, aton tic: Vin̈aj Jahzeel, vin̈aj Guni, vin̈aj Jezer yed' vin̈aj Silem. 51Yuj chi' a sb'isul masanil eb' vinac yic chon̈ab' Israel, ay 601 mil 730 eb' d'a smasanil. 52Ix lolon Jehová d'a vin̈aj Moisés, ix yalan icha tic: 53Pucchajocab'ec' lum luum d'a scal junjun in̈tilal ato syala' jantac sb'isul junjun ix q'ue vaan. 54D'a suerteal tz'aj spucchajec' luum d'a eb'. Nivan lum tzac' d'a eb' nivan sb'isul, quenn̈ej lum tzac' d'a eb' quenn̈ej sb'isul, xchi d'a vin̈. 57A eb' yuninal vin̈aj Leví sb'inajcan d'a yin̈tilal: Vin̈aj Gersón, vin̈aj Coat yed' vin̈aj Merari. 58A eb' yixchiquin vin̈aj Leví chi' sb'inajcan d'a yin̈tilal: Vin̈aj Libni, vin̈aj Hebrón, vin̈aj Mahli, vin̈aj Musi yed' vin̈aj Coré, aton eb' vin̈ tic yin̈tilalcan vin̈aj Leví. A vin̈aj Coat chi', aton vin̈ smam vin̈aj Amram. 59A vin̈aj Amram chi' ix yic' sb'a yed' jun ix yin̈tilalcan vin̈aj Leví chi', aton ix scuchan Jocabed. Ayic ayec' vin̈aj Leví chi' d'a Egipto ix alji ix. A vin̈aj Amram yed' ix Jocabed chi', aton eb' smam snun vin̈aj Aarón, vin̈aj Moisés yed' ix María. 60Axo eb' yuninal vin̈aj Aarón, aton vin̈aj Nadab, vin̈aj Abiú, vin̈aj Eleazar yed' vin̈aj Itamar. 61A vin̈aj Nadab yed' vin̈aj Abiú chi', ix cham eb' vin̈ yujto ix yac'och jun c'ac' eb' vin̈ man̈ smojoc icha ofrenda d'a yichan̈ Jehová. 62Masanil eb' vinac d'a yin̈tilalcan vin̈aj Leví, aton eb' jun ujal sq'uinal sb'eyn̈ejb'ati, ay 23 mil eb'. A eb' tic man̈ ayococh eb' sb'isuloc juntzan̈xo eb' yetisraelal, yujto a eb' levita tic malaj smacb'en eb' ol scha'a, ayic ol c'och eb' d'a lum Canaán. 63Icha val chi' ix aj yelc'och sb'isul eb' israel ix ic'jichaan̈ yuj vin̈aj Moisés yed' vin̈aj sacerdote Eleazar d'a ac'lic d'a yol yic Moab, d'a sti' a' Jordán d'a yichan̈cot Jericó. 64Masanil eb' chi', malaj junoc eb' ix b'isji yuj vin̈aj Moisés yed' vin̈aj Aarón ayic ix yic'anchaan̈ sb'isul eb' vin̈ d'a sb'ab'elal d'a tz'inan luum Sinaí, 65yujto ix yal Jehová to ol cham eb' d'a tz'inan luum chi'. Man̈xa junoc eb' chi' ix cani, axon̈ej vin̈aj Caleb yuninal vin̈aj Jefone yed' vin̈aj Josué yuninal vin̈aj Nun ix cani.

will be added

X\