2 REYES 1

1Ayic toxo ix cham vin̈aj rey Acab, ix yic'anel sb'a chon̈ab' Moab d'a yalan̈ smandar chon̈ab' Israel. 2Ay jun c'u ix cot sutnaj vin̈aj Ocozías yuninal vin̈aj Acab chi' d'a span̈anil yib'an̈ spat d'a Samaria. Te nivan ix aj vin̈ slajvi, yuj chi' ix schecb'at eb' schecab' vin̈ yic b'at sc'anb'ej yab' eb' d'a Baal-zebub sdiosal eb' aj Ecrón, tato olto b'oxoc vin̈. 3Palta a jun yángel Jehová ix alan d'a vin̈aj Elías aj Tisbe icha tic: Ixic, b'at cha eb' schecab' vin̈aj Ocozías sreyal Samaria, tzalan d'a eb' icha tic: ¿Tom malaj Dios d'a co chon̈ab' a on̈ israel on̈ tic, yuj chi' ato d'a Baal-zebub sdiosal Ecrón sb'at e c'anb'ej eyab'i? xa chi d'a eb'. 4Tzalanpaxi to a in Jehová in sval d'a vin̈ rey chi' icha tic: Man̈xo ol ach q'ue vaan, palta ol ach chamxon̈ej, xchi Jehová, xa chi, xchi yángel Jehová chi' d'a vin̈aj Elías chi'. Ix b'at vin̈aj Elías chi', ix sc'anab'ajan vin̈ icha tas ix alji chi' d'ay. 5Yuj chi' ix meltzaj eb' schecab' vin̈ rey chi', ix c'ochxi eb' d'a yichan̈ vin̈, ix sc'anb'an vin̈ d'a eb': --¿Tas yuj ix ex meltzaj d'a elan̈chamel? xchi vin̈ d'a eb'. 6Ix tac'vi eb': --Mamin rey, ay jun vin̈ vinac ix co cha d'a yol b'e. A vin̈ ix alan d'ayon̈ icha tic: Meltzajan̈ec d'a vin̈ ix ex checancot chi', tzeyalan d'a vin̈ icha tic: A Jehová tz'alan icha tic: ¿Tom malaj Dios d'a Israel tic, yuj chi' ato d'a Baal-zebub sdiosal Ecrón tza checb'at ab'chajoc? Yuj val jun tas ix a na' tic, man̈xo ol ach q'ue vaan, ol ach chamxon̈ej, xchi Jehová, xe chi, xchi jun vin̈ chi' d'ayon̈, xchi eb'. 7Ix sc'anb'an vin̈ rey chi' d'a eb' icha tic: --¿Chajtil yilji jun vin̈ ix alan chi' d'ayex? xchi vin̈. 8--Mamin rey, a jun vin̈ chi' ayoch jun pichul ay xiil yuj vin̈, aypaxoch jun tzec'ul tz'uum d'a snan̈al vin̈, xchi eb' d'a vin̈. --A jun vin̈ chi', aton vin̈aj Elías aj Tisbe, xchi vin̈ rey chi'. 9Ix lajvi chi' ix schecanb'at jun vin̈ capitán vin̈ rey chi' yed' 50 eb' vin̈ soldado yic b'at ic'joccot vin̈aj Elías chi'. Axo yic ix c'och eb' d'a vin̈, c'ojanem vin̈ d'a jun tzalan. Ix yalan vin̈ capitán chi' d'a vin̈: --Ach schecab' Dios, a vin̈ rey ix alancoti to tzach emta, xchi vin̈ capitán chi'. 10Ix tac'vi vin̈aj Elías chi' icha tic: --Tato schecab' in Dios, cotocab' c'ac' d'a satchaan̈ tzach tz'ab'at yed' 50 eb' vin̈ a soldado chi', xchi vin̈. A val d'a jun rato chi' ix emta c'ac', ix tz'ab'at eb' vin̈ smasanil. 11Ix lajvi chi' ix schecanxib'at junxo vin̈ capitán vin̈ rey chi' yed' 50-xo eb' vin̈ soldado, ix b'at yalan eb' vin̈ d'a vin̈aj Elías chi': --Ach schecab' Dios, eman̈cot d'a elan̈chamel yal vin̈ rey, xchi vin̈ capitán chi'. 12Ix tac'vi vin̈aj Elías chi': --Tato schecab' in Dios, cotocab' c'ac' d'a satchaan̈ tzach tz'ab'at yed' 50 eb' vin̈ a soldado chi', xchi vin̈. D'a val jun rato chi' ix emta c'ac' d'a satchaan̈, ix tz'ab'at eb' vin̈ smasanil. 13Ix lajvi chi' ix schecanxib'at junxo vin̈ capitán vin̈ rey chi' yed' 50-xo eb' vin̈ soldado d'a yoxelal. Palta a jun vin̈ capitán chi', ix q'uec'och vin̈ b'aj ayec' vin̈aj Elías chi', ix em cuman vin̈ d'a yichan̈ vin̈, ix yalan vin̈: --Mamin schecab' Dios, ac' val nivanc'olal d'a vib'an̈ yed' 50 eb' vin̈ soldado a checab' tic. 14Yujto a juntzan̈ eb' vin̈ capitán yed' soldado, eb' vin̈ ix b'ab'laj ja d'ayach, ix tz'ab'at eb' vin̈ yuj c'ac' ix cot d'a satchaan̈. A in tic tzin tevi d'ayach to tzon̈ ac' nivanc'olal yic max on̈ chami, xchi vin̈. 15Ix lajvi chi' ix yalan yángel Jehová chi' d'a vin̈aj Elías chi' icha tic: --Ixic yed' vin̈, man̈ ach xivoc, xchi d'a vin̈. Yuj chi' ix emta vin̈aj Elías chi', ix b'at vin̈ yed' vin̈ capitán chi', ix b'at vin̈ yil vin̈ rey chi'. 16Ix yalan vin̈ icha tic d'a vin̈ rey chi': --Icha val tic yalan Jehová: Yujto ix a checb'at eb' a checab' d'a Baal-zebub sdiosal Ecrón, yic b'at a c'anb'ej a b'a, ichato malaj Dios d'a Israel tic b'aj syal tza c'anb'ej ab'i, yuj chi' man̈xo ol ach q'ue vaan, palta to ol ach chamxon̈ej, xchi Jehová, xchi vin̈aj Elías chi'. 17Icha chi' ix aji, ix cham vin̈ rey chi', icha tas ix schec Jehová yal vin̈aj Elías chi'. Yujto malaj junoc yuninal vin̈aj Ocozías chi', yuj chi' a jun vin̈ yuc'tac vin̈ scuchan Joram, a vin̈ ix ochcan reyal sq'uexuloc, aton yic schab'ilxo ab'il yoch junxo vin̈aj Joram yuninal vin̈aj Josafat reyal d'a Judá. 18A jantacto yab'ixal vin̈aj rey Ocozías yed' juntzan̈xo tas ix sc'ulej vin̈, tz'ib'ab'ilcan b'aj aycan yab'ixal eb' vin̈ sreyal Israel.

will be added

X\