SAYIKEREEWA 12

1Na alekutura sa be ayo aŋgoro dɔ. Bara be awo dɔ, wɔ fa wiɛ akara ka tani dɛɛ su, na sara gusu awo i jaa bu, asarambaa buru ni nnyɔ butu i tii ka fɛmɛya kere dɛɛ su. 2I bita akunnu, na baawu yaari afa i na i subo awie. 3Na alekutura sa be gusu ayo aŋgoro dɔ, m ŋuuri woo tiɛ kɔkɔrɛ bambaka be, i tii ti nso wɔ, na i la mbiɛ buru, fɛmɛya kere nso butu atii nso kun kun n kɛrɛ su. 4Na wɔ fa i lɔ abaandi asarambaam kpaaki nu nsan buekun aji asiɛŋgu. Na wɔ ba ajina bara n nyunu, adena i wuuri baa n na i kaba fa baa n mi. 5Na bara n awu baabiɛsɔ, bo i bá niɛ daanfiɛ daanfiɛm kɛrɛ su, na i bíta bu kekereke kabo naŋkasi fa bulaari kɔrɔma tu bo i naanim barasu ni. Na ba fa baa n akɔ yiri Nyɛmɛ ni, i fɛmɛya tanaabiri n dɔ. 6Na bara n aŋmati akɔ boro kpantain awɔrɛ be nu, bo Nyɛmɛ asɛsɛ i su ama i na bu suniɛ i dika haari kɔ ju cɛɛn akpii kun ni yaa nnyɔ ni aburasɛn. 7Tɔ, na Nyɛmɛ mɛrɛkɛ Mikali ni i jamam, ni woo tiɛ ni i dɛɛ jamam sukun luɛ ni bu beŋgu aŋgoro. 8Ama, na Mikali ni i dɛɛ jamam n akunma woo tiɛ n ni i dɛɛ jamam ni, na ba fɔn bu afite aŋgoro, ba nya má woobiri dɔ kun. Na ba fa woo tiɛ bambaka n ni i dɛɛ jamam n kɛrɛ aji asiɛŋgu. Yiri ti dada dɛɛ woo tiɛ n a, yiri la Sitana, bu kaaki fere i ka Dadakafɔ, yiri dadaka durunya n nufɔm kɛrɛ n a. 10Na ma ti akonvi bambaka be ŋga ka i sutiɛn faŋga su aŋgoro. I ŋa, “Kisa, ya ŋu kabo ya Nyɛmɛ n la faŋga na i de i minɛm tii ji, na i di i fɛmɛya ni. Kisa, ye Kristo Tiidefɔ n akere i yiko a, dama ba fɔn ayi Sitana aŋgoro aji durunya n nu fɛn, yiri bo i ti saakifɔ na i jina Nyɛmɛ nyunu na i jaraki ya ninbaam kɔŋguɛ ni wiɛsu ni. 11Bɔmbaa n dɛɛ mbunja, ni bu daani diiwa ye bu fa kunmaari i a, ba soro má bu yiwee, bu soroori su wɔ, ka bu wu. 12Nyini ti, aŋgoro ni ambɛrɛ kɛrɛ bo am wo aŋgoro ni, am ma am ahore jɔ, dama Sitana la má am faŋga kun. Ama, ahoresaaki bá tɔ asiɛn n ni tieku n su, dama Sitana ajura am dɔ. Yaa ti i agaya, dama i si ka i saŋga sunnu má kun.” 13Saŋga bo woo tiɛ n ŋu ka ba yi i aŋgoro aji asiɛŋgu ni, na wɔ nya ŋmati afɔn bara n bo i wuuri baabiɛsɔ n ka i tara i. 14Ama, na Nyɛmɛ ama bara n kajiri bambaka laŋkpɛtɛ nnyɔ, adena i tu kɔ boro kpantain n awɔrɛ n bo wɔ sɛsɛ su ama i ni, na i niɛ i dika afɔ nsan ni kpaaki nu, na má woo tiɛ n tu i. 15Na woo tiɛ n apuuti nzue afite i nɔɔ nu ka wɔmbu nzue dɛɛ su, na má i sɔ bara n kɔ. 16Ama, na asiɛn n ade bara n aji, i kpaaki nu nnyɔ ɔ, na nzue n bo i soŋgi fiteeri woo tiɛ n nɔɔ nu n awura asiɛn bu, nyini ti, nzue n atu má bara ni. 17Woo tiɛ n atu má bara n dɛɛ ti, na yaa ati i agaya, na wɔ kaaki ka i kɔ kun luɛ ni bara n busu nufɔm, bo ba de Nyɛmɛ nɔaniɛ maawam n na bu di daani ni Yesu labari kpa n ni. 18Na woo tiɛ n akɔ ajina tieku n nɔɔ su.

will be added

X\