HIBURUFƆM 8

1Deke n bo m koro ka m se n kɛrɛ la ka, ya la ahin Nyɛmɛ sayoowa dɔŋguyofɔ kpiɛn n bo i tana aŋgoro, Micɛra Kpiri n saa fɔmbɔrɔ su. 2I yo i Nyɛmɛ sayoowa dɔŋguyofɔ kpiɛn juma n dika n nu wɔ, bo i ti Nyɛmɛ sereebiri nahɔrɛ su, Nyɛmɛ ni i tii taari nyini dika n a, má adamande taari i a. 3Nyɛmɛ sayoowa dɔŋguyofɔ kpiɛn kɛrɛ bo Nyɛmɛ yo yiiri i, i dɛɛ la ka, i de minɛm aceerim, ni bu yoowam na i fa ma Nyɛmɛ. Nyini dɛɛ ti ye wɔ yo daka ka ahin Nyɛmɛ sayoowa dɔŋguyofɔ kpiɛn n gusu la yoowa be bo i yo ma Nyɛmɛ n a. 4Nzɛn má Yesu wo durunya n nu, má i yo má Nyɛmɛ sayoowa dɔŋguyofɔ fieo, dama minɛm bo Nyɛmɛ adu mɔ ayi bu ka bu yo sayoowa n wo bɛrɛ wɔ, kabo Nyɛmɛ nɔaniɛ kpamaawa n kere lɛɛ. 5Juma n bo Nyɛmɛ sayoowa dɔŋguyofɔm yo i ni, i ti kabo i wo aŋgoro n wɔ, ama, i ti má kun. Moyisi dɛɛ n gusu yo ti sɔ ɔ, nyini ti ye saŋga bo i ŋa i bo Nyɛmɛ Sereebiri Nambue n ye Nyɛmɛ seeri i ka, “Si nu, na a yo deke n kɛrɛ kabo m kereeri u buka n su ka a yo i ni.” 6Ama, kisa, Yesu dɛɛ Nyɛmɛ sayoowa dɔŋguyofɔ juma n tara nyiŋgam dɛɛ ni. Sɔ ye sɛsɛsu fɔfɔrɛ n bo Yesu afa aba na i yo Nyɛmɛ ni minɛm afiɛn dɔŋgu n tara dawa dɛɛ n a. Dama sɛsɛsu fɔfɔrɛ n dɛɛ ti, ye Nyɛmɛ ŋa i fa deke n bo i ti kpa na i la má aŋusu n fa ma ya n a. 7Nzɛn má sɛsɛsu n bo Nyɛmɛ du mɔ diiri i di n koro yoori deke n kɛrɛ bo wɔ yo daka ka i yo ni, má i kaaki fa má sɛsɛsu fɔfɔrɛ na i di i di kun. 8Ama, na Nyɛmɛ aŋu i minɛm ni ŋgasi, na wɔ se bu ka, “Micɛra n ŋa o, saŋga suba bo m fá sɛsɛsu fɔfɔrɛ na m dí i di ni Yisarelifɔm ni Yudafɔm. 9I ti má ka dawa dɛɛ sɛsɛsu ni, bo m yo faari i na m diiri i di ni am nam ni, saŋga bo m yiiri bu fiteeri Ijipiti asiɛn n su ni. Ba yo abita má i kabo m yo seeri bu ni, nyini dɛɛ ti, ye m cɛcɛ awo má bu nu n a. Kabo Micɛra n seeri lɛɛ. 10Sɛsɛsu n bo m bá di i di ni Yisarelifɔm la ka, fa kɔ fa ba, m fá m nɔaniɛ n wura bu sunsunni nu, na bu bíta i bu ahore su, mini yó bu Nyɛmɛ a, na bu yó m minɛm. Kabo Nyɛmɛ seeri lɛɛ. 11Be wo má bɛrɛ bo i bá kere i lamɔkɔ ka i si Micɛra ni. Dama sɔnɔ kɛrɛ bá si m, fa i tarakam kɔ tu i nfaŋgafɔm kɛrɛ. 12M sí bu aŋunfɔ, na m fá bu satiɛ bo ba yo i n fa ce bu, na m téŋge má i su fieo.” 13Deke bo i ti na Nyɛmɛ yo kaanri sɛsɛsu fɔfɔrɛ be jɔrɛ ni, i bu la ka, ciciri su dɛɛ n ayo dawa. Deke kɛrɛ bo i nya yoori dawa wieeri, i cɛ má, i busu míni wɔ.

will be added

X\