HIBURUFƆM 3

1M ninbaam, ambɛrɛ bo Nyɛmɛ ayi am ni yɛrɛ ka matafɔ casim ni, am fa am sunsunni se Yesu ŋu, yiri bo Nyɛmɛ asunma i na i ti ya sayoowa dɔŋguyofɔm kpiɛn n ni. Ya su yiri su a, ye ya di i daani kere minɛm a. 2I yoori i juma n bo Nyɛmɛ yiiri i ka i yo i n ni nahɔrɛ su wɔ, kabo Moyisi mmɔɔ yo yoori i juma kɛrɛ Nyɛmɛ awuru n nu, bukaari Nyɛmɛ minɛm ni nahɔrɛ su n wɔ. 3Kabo sɔnɔ bo i ta awuru n la jirima tara awuru n ni i tii ni, sɔ ye Yesu la jirima tara Moyisi a. 4Awuru kɛrɛ la i tafɔ, ama, Nyɛmɛ ti deke n kɛrɛ tii a. 5Moyisi yo laari dabuŋu yoori i juma kɛrɛ Nyɛmɛ awuru n nu, bukaari Nyɛmɛ minɛm n ka amusuisufɔ ɔ, na wɔ kere bu deke bo Nyɛmɛ koroori ka i bá se bu ni. 6Ama, Kristo yiri ti Nyɛmɛ Wa a, yiri la dabuŋu Nyɛmɛ awuru n nu koro bita Nyɛmɛ minɛm a. Nzɛn ya bita ya tama n ni ahoresi, yɛrɛ ti i awuru n nufɔm a. 7Nyini dɛɛ ti, kabo Awiɛwiɛ Casi n se ni, “Nyuma, nzɛn am tiiri kabo Nyɛmɛ suse, 8má am ma am sui yo tantanantan, kabo am nam yo yoori bu sui tantanantan na bu yoori Nyɛmɛ na bu niɛ ni, saŋga bo bu wo boro kpantain n nu na bu keteeri i nɔaniɛ ni. 9Na Nyɛmɛ ase ka, ‘Dɔ ye am nam yo yoori m na bu niɛ a, haari ni bo bu ŋuuri sam bo m yoori bu, nyini afɔ aburana n kɛrɛ nu ni, bu yoori m wɔ na ba niɛ. 10Nyini dɛɛ ti ye m faari yaa bu ŋu a, ye m seeri ka, ba mini atin n a, dama ba yo má m sa koroowam ni. 11Na yaa ati m, na ma tan ndiɛ ka, bu ny má atin wura má asiɛn n bo má m ma bu nya ŋumiyi n nu ni.’” 12M ninbaam, am si am ŋu sa na má am be ahorembaa yo kekereke, na i kaaki i sin bo Nyɛmɛ, yiri bo i wo bɛrɛ saŋga kɛrɛ n dɛɛ atin ni. 13Cɛɛn kɛrɛ bo ale acin na bu fere i ka, “Nyuma,” am sutu am beŋgu fɔ, na má am ma be dadaka am na am yo satiɛ na am sui yo tantanantan. 14Nzɛn ya koro bitaari bumboori su nɔaniɛ n kenken haari kɔ juuri i awieeri, nyini n kere ka ya ni Kristo saŋga yo juma kun wɔ lɛɛ. 15Kabo ba kɛrɛ i Nyɛmɛ Jɔrɛ Kadasi n nu ni, ka, “Nyuma, nzɛn am tiiri kabo Nyɛmɛ suse, má am yo am sui tantanantan, kabo am nam yo yoori bu sui tantanantan.” 16Ŋmam yo tiiri Nyɛmɛ nɔaniɛ n ye bu yoori bu sui tantanantan n a? Má minɛm kɛrɛ bo Moyisi yo yiiri bu fiteeri Ijipiti asiɛn n su ni, nzɛn sɛ? 17Ye ŋmam ye Nyɛmɛ yo faari yaa bu ŋu afɔ aburana n a? Má bo bu yo yoori satiɛ na bu wuuri boro kpantain n nu ni? 18Ŋmam ye Nyɛmɛ yo taanri ndiɛ ka, “Bu nya má atin wura má asiɛn n bo má m ma bu nya ŋumiyi n nu n a?” Má bɛrɛ n bo bu yo keteeri i nɔaniɛ ni, nzɛn sɛ? 19Deke bo i ti na ya ŋu ka ba wura má asiɛn n su na bu nya ŋumiyi n la ka, ba yo má i yarada.

will be added

X\