Apocalipsis 7

1Y c'are' tak xe'ntz'at je caje' 'angeles. Y cada jun 'angel pa'al pa ru-esquina re ruch'ulef, y can che caje' esquina chin re ruch'ulef jec'o ja'jun 'angel, quik'aton re caje' rach cak'ik', chin che man que'bapon pa rue' re ruch'ulef, pa rue' re mar y chuka' pa quive' re che'. 2Y chuka' xintz'at che c'o jun 'angel re pitinak quire' pan oriente, ruc'amom-pa re sello chin re c'aslic Dios. Y re 'angel re' jun pa ruchi' xch'o-apo chique re je caje' 'angeles, re can yi'om-pa poder chique chin che ne'quibana' ch'a'oj pa rue' re ruch'ulef y chuka' pa rue' re mar. 3Y xubij re jun 'angel re' chique re je caje' chic 'angeles: Ma-na tiban ch'a'oj pa rue' re ruch'ulef, pa rue' re mar y chique chuka' re che', roma c'amaje-na que'kaban sellar nic'aj-quivach re rusamajela' re Dios. 4C'are' yen Juan xinc'axaj che je ciento cuarenta y cuatro mil israelitas re xe'ban sellar. Jare' re vinak re je'pitinak chiquicojol re je doce grupo israelitas. 5Je doce mil chique re je rey-rumam can re Jud'a. Je doce mil chique re je rey-rumam can re Rub'en. Je doce mil chique re je rey-rumam can re Gad. 6Je doce mil chique re je rey-rumam can re Aser. Je doce mil chique re je rey-rumam can re Neftal'i. Je doce mil chique re je rey-rumam can re Manas'es. 7Je doce mil chique re je rey-rumam can re Sime'on. Je doce mil chique re je rey-rumam can re Lev'i. Je doce mil chique re je rey-rumam can re Isacar. 8Je doce mil chique re je rey-rumam can re Zabul'on. Je doce mil chique re je rey-rumam can re Jos'e y je doce mil chique re je rey-rumam can re Benjam'in. Y ja conojel re' re xe'ban sellar nic'aj-quivach. 9Y c'are' yen xintz'at che camas je q'uiy vinak re man junan-ta naciones que'po-va, chuka' man junan-ta qui-raza, man junan-ta quitenemit y man junan-ta quich'abal. Conojel re vinak re' jec'o-apo chach re Jun tz'uyul chach re lok'olaj ch'acat y chuka' chach re Jesucristo re ancha'l oveja. Y re vinak re' can man jun nitiquir nijelan quichin, roma camas je q'uiy. Y je'quicusalon sak tak tziak, y chuka' je'quic'ualon ruxak tak palma pa quik'a'. 10Y conojel jun pa quichi' niquibij: Yoj re xojcolotaj chach re kamac, ja re Dios re tz'uyul chach re lok'olaj ch'acat re xbano chaka, y chuka' re Jesucristo re ancha'l oveja, ye'cha'. 11Y conojel re 'angeles je'pa'al quisutin rij re lugar re anche' tz'uyul-va re Dios, y chuka' quisutin quij re rejeta'k tak achi'a' y re je caje' re camas q'uiy quinak'avach c'o. Y chin che niquiya' ruk'ij re Dios, re nic'aj-quivach xquikasaj-ka c'a pan ulef. 12Y tak quibin chic am'en, c'are' xquibij: Can otz che nibixax rube' re Dios. Y can ruc'amon che nibex cha che camas nem. Reja' c'o runa'oj y ja chuka' cha reja' re otz che nitioxix. Reja' c'o ruk'ij, c'o ru-poder chin nojel tiempo, ronojel nitiquir nuban. Am'en, ye'cha'. 13Y c'are' jun chique re rejeta'k tak achi'a' xuc'utuj chua yen Juan: ??Ataman rat anchique che vinak la je'quicusalon sak tak tziak? ??Y anche' que'po-va? xcha' chua. 14Y yen ximbij cha: Ja rat re yat-atamayon anchique che vinak la', xincha' cha. Y reja' xubij chua: Jare' re je'elinak chic-pa chupan re namalaj tijoj-pokonal, y quich'ojersan y quisekresan-qui' chupan re ruq'uiq'uel re Jesucristo re ancha'l oveja. 15Y mare' can jec'o-apo riq'uin re Dios, y can ja pa rachoch re Dios jec'o-va, y che pak'ij che chak'a' niquiban rusamaj. Y re Dios tz'uyul chach re lok'olaj ch'acat je'ruchajin, roma quiq'uin c'o-va. 16Re vinak re' man chic xtich'umun-ta quipan, y man chic xtichake'j-ta quichi'. Man chic xque'c'at-ta chach re rach k'ij y chuka' ni xe-ta chic xtiquina' c'atan. 17Roma can ja re Jesucristo re ancha'l oveja, re c'o-apo chunakaj re anche' tz'uyul-va re Dios, ja reja' re nichajin quichin. Y can ye'ruchajij ancha'l ye'chajex re ovejas, y chuka' can ye'ruc'uaj chin nuya' quiya' re pa tak alaxbal tak ya' chin c'aslen. Y re Dios can xtuban chuka' chique che manak chic ok'ej y bis xtiquik'asaj.

will be added

X\