San Mateo 9

1C'are' re Jes'us y re can je'tzakatal-va chij, xquiya' can re lugar re'. Xe'oc-a pa canoa y xe'ba c'a juc'an chic-apo re ruchi-ya'. Y re Jes'us can xapon chupan re tenemit re anche' can tic'ue-va. 2Y tak reja' c'o chic pa tenemit, xquic'uaj-apo jun ache siquirnak ru-cuerpo chach re Jes'us, re ache re' quiliban-a chach jun camilla. Y tak re Jes'us xe'rutz'at che can riq'uin ronojel c'anma xe'bapon c'a riq'uin-apo, xpa re Jes'us xubij cha re ache siquirnak ru-cuerpo: Vajc'ual, tiqui'cot re av'anma roma re amac xe'cuyutaj. 3Y jare' tak jec'o nic'aj chique re achi'a' je'atamayon re ley kachin yoj re yoj israelitas re jec'o-apo chire', xquibij-ka pa tak c'anma chij re Jes'us: Re' jun itzel ache. Can nuban che ja reja' re Dios, roma nubij che can nucuy mac. 4Pero re Jes'us can rutaman re niquinojij pa tak c'anma re achi'a' re', mare' reja' xubij chique: ??Anchique roma xa ja re itzel tak nojebal xinojij cha'nin? 5Roma vo xa yen yintiquir nimban cha re jun ache re' re siquirnak ru-cuerpo, chin che nibiyin-a y niba, can yintiquir chuka' nimbij cha che nincuy rumac. 6Y vocame, chin che yex nitamaj che yen re xinalax chi'icojol can c'o poder pa nuk'a' chin che nincuy mac, titz'eta' c'a, xcha' chique. Y jare' tak re Jes'us xubij cha re ache siquirnak ru-cuerpo: Chava rat nimbij-va: Cayacataj, y tac'uaj-a la a-camilla y cabiyin cha'vachoch. 7Y can jare' tak re ache siquirnak ru-cuerpo xyacataj-a y xba charachoch. 8Re vinak re quimalon-apo-qui' chire', tak xquitz'at che re ache siquirnak xpa'e-a, xsatz quic'o'x, roma man jun bey quitz'eton che quire-ta nibanataj. Y re vinak re' xquiya' ruk'ij re Dios, re ya'yom-pa re namalaj poder re' chiquicojol re vinak. 9Y tak xk'ax re Jes'us re anche' nimban-va cobrar re impuestos, re Jes'us xinrutz'at yen re Mateo che yintz'uyul chach jun ch'acat, y ja chua yen re nitoj-va can re impuestos. Y re Jes'us xubij chua: Jo' chuij. Y can xe xinc'axaj quire' can ja xineyacataj-pa y can xintzekelbej re Jes'us. 10Y tak re Jes'us tz'uyul chic chach mesa chire' pa jay, je q'uiy chique re molay tak impuestos y chuka' re vinak re nibex aj-maqui' chique, xe'tz'uye-apo chach mesa riq'uin re Jes'us y re ru-disc'ipulos. 11Y re achi'a' fariseos re xe'tz'eto re', xquibij chique re ru-disc'ipulos re Jes'us: ??Anchique roma re Jes'us re i-Maestro niva' quiq'uin re molay tak impuestos y quiq'uin chuka' la aj-maqui'? xe'cha'. 12Tak re Jes'us xuc'axaj-pa re tzij re niquibila' re achi'a' fariseos, reja' xubij chique: Jun doctor mana-ta re je otz ye'ruk'omaj. Reja' ja re ye'yavaj jare' re ye'ruk'omaj. 13Yen man ximpa-ta chiquicanoxic vinak re choj quic'aslen. Yen ximpa chiquicanoxic re c'o quimac, re nic'atzin che nijalataj quic'aslen chach re Dios. Y yex man chak xaxe tal choj quire' titorola-pa re itzij nabey, xa quixbiyin chutz'etic y chutamaxic re andex ne'c'ulun-va che tzij re nubij re Dios: Re m'as nika chinoch yen ja-ta che yex nijoyovaj quivach re vinak, que chach ye'sujula' chicop je'quimisan chinoch. 14Y re ye'tzekelben chin re Juan Bautista xe'beka riq'uin re Jes'us, xquibij cha: Yoj can kacha'on k'ij chin nakaban ayuno. Y quire' chuka' niquiban re fariseos. ??Y anchique roma tak re a-disc'ipulos rat man quire-ta niquiban? 15Xpa re Jes'us xubij chique: Re je'banon invitar pa jun c'ulubic siempre ye'va', roma re ala' xc'ule' c'o quiq'uin, y quire' chuka' niquiban re nu-disc'ipulos, reje' ye'qui'cot roma yinc'o quiq'uin, pero xtapon re k'ij tak re ala' re' xtilisas-a chiquicojol, y c'ajare' tak xtiquiban ayuno. 16Y chuka' man jun vinak nicusan jun c'ojobal c'ac'a chin nuc'ajoj jun tziak re tzia'k chic. Roma jun c'ojobal c'ac'a man otz-ta nuban riq'uin re tziak re tzia'k chic, roma nuc'ol-ri', y mare' re tziak re tzia'k chic xa m'as niretzetaj-ka. 17Y quire' chuka' man jun vinak niyi'o vino c'ac'a chupan jun tz'um tzia'k chic chin nuyac-apo. Roma re tz'um tzia'k chic man chic nuyuk-ta-ri', mare' vo xa niyac vino chupan re tz'um re' nurokch'ij-ri' y nitix-a re vino c'o chupan. Y re tz'um re' manak chic ndoc-va. Pero chupan jun c'ac'a tz'um, otz niyac c'ac'a vino chupan, roma re tz'um re' nuyuk-ri' y man nurokch'ij-ta-ri'. Ja quire' nubij re ejemplo re xubij re Jes'us chique. 18Y tak re Jes'us c'a ntajin chutzijosic ronojel re' chiquivach re vinak, c'o jun ache camas ruk'ij xapon riq'uin y xbexuque' chach y c'are' xubij cha: Re numi'al can c'aja-oc nicom-ka, tabana' utzil natz'eta-ta ba' chin che na'ya' ak'a' pa rue' che nuna' chic rach, xcha' re ache cha re Jes'us. 19Xpa re Jes'us xyacataj-a je ruchibil re ru-disc'ipulos xe'ba chij re ache. 20Y c'o c'a jun ixok niyavaj. Re ixok re' doce juna' tuc'alvachij-va jun yabil, y re yabil re rubanon re ixok re' ja re nibiyin ruq'uiq'uel. Xpa re ixok re' xjelon-apo chij can re Jes'us, y xtiquir xbo'rtz'ama' can ba' ruchi-rutziak. 21Roma re ixok re' can rubim-pa pa r'anma che xa riq'uin xquintiquir xte'ntz'ama' can ba' ruchi-rutziak re Jes'us, can yinc'achoj. 22Pero re Jes'us cha'nin xunabej mare' xtzu'un can chij. Y tak xutz'at anchique xtz'amo ruchi-rutziak, c'are' xubij cha re ixok re': Numi'al, xac'achoj, roma xaban confiar-avi' viq'uin. Vocame man chic cabison, xcha' cha re ixok. Y can jare' xc'achoj re ixok cha re ruyabil ruc'alvachin. 23Y tak xoc-apo re Jes'us pa rachoch re ache camas ruk'ij, re Jes'us xutz'at che re vinak can je'elinak ch'o'j y chuka' jec'o chic re musiqueros chin ne'muk can re xtan. 24Xpa reja' xubij chique re vinak: Tibana' utzil quixel-a ba' y kojc'ue-na can kayon, roma re xtan xa man quiminak-ta, reja' xa nivar, xcha' chique. Pero reje' xa xe'tze'en chij re Jes'us, roma quitaman che quiminak chic re xtan. 25Y tak je'elinak chic-a re vinak, re Jes'us xoc-apo chupan re cuarto re anche' c'o-va re xtan quiminak. C'are' re Jes'us xutz'am ruk'a' re xtan, y re xtan can xc'astaj chic-pa. 26Y re xbanataj chire', can xba rutzijol pa tak tenemit re jec'o chupan re lugar re'. 27Y tak re Jes'us elinak chic-a chire', jec'o je ca'e' moyi' can je'tzakatal chij y cof ye'ch'o y niquibij cha: !!Tajoyovaj kavach y kojato', rat re yat rey-rumam can re Rey David! ye'cha'. 28Tak re Jes'us xapon pa jay, re je ca'e' moyi' can xe'bapon chuka' riq'uin. Y re Jes'us xuc'utuj chique: ??Y yex can ninimaj che yen yintiquir nimban chiva che yixtiquir yixtzu'un? Y re moyi' xquibij: Ja', Ajaf. Nakanimaj che quire' nibanataj. 29Xpa re Jes'us xutz'am re quinak'avach che je ca'e' y xubij chique: Roma yex ninimaj che yen yintiquir yixinc'achojsaj, can tibanataj re nirayij. 30Y jare' tak reje' xquina' che re quinak'avach can xjakataj, y xe'tzu'un. Pero re Jes'us camas xuchalabej-a chique: Can tic'axaj-a jabal re xtimbij-a chiva, che re xbanataj iviq'uin, can man-ta jun vinak xtic'axan. 31Pero tak reje' je'elinak chic-a chire' riq'uin re Jes'us, xa xquitz'am rutzijosic chupan ronojel re lugar re', re xuban re Jes'us quiq'uin. 32Y tak xe'el-pa re je ca'e' achi'a' re je moyi' rubanon can, jare' tak jec'o chic nic'aj vinak xe'oc can riq'uin re Jes'us, y re vinak re' quic'uan-apo jun ache re can mem rubanon pa ruk'a' jun itzel esp'iritu. 33Y re Jes'us can xulisaj-a re itzel esp'iritu riq'uin re ache. Re ache can jare' xch'o chic jun bey. Y re vinak re xe'tz'eto re xbanataj xsatz quic'o'x y xquibij: Man jun bey katz'eton che quire-ta banatajnak vova' pa naci'on Israel, ye'cha' c'a chiquivach. 34Pero re achi'a' fariseos niquibij che re Jes'us xa ja re quijoval re itzel tak esp'iritu re c'o riq'uin, mare' tak nitiquir ye'rulisaj-a re itzel tak esp'iritu, ye'cha'. 35Re Jes'us ronojel tenemit y aldea nibiyaj-va, ye'rutijoj re vinak riq'uin re ruch'abal re Dios, pa tak nema-jay re anche' nitzijos-va re ruch'abal re Dios re nibex sinagoga cha. Y chuka' nutzijoj re utzulaj ch'abal chin re Dios re nich'o chij tak re vinak ye'oc pa ruk'a' re Dios, re nibex evangelio cha. Y can ronojel rach yabil y k'axomal quic'uan re vinak ye'ruc'achojsaj. 36Y tak xe'rutz'at che je q'uiy vinak, reja' camas xujoyovaj quivach, roma can quion-oc jec'o y quiquiran-qui', can ancha'l niquiban re ovejas tak man jun nichajin quichin. 37Jare' tak re Jes'us xubij chaka yoj re yoj ru-disc'ipulos: Can katzij-va che re samaj chin nitzijos re ruch'abal re Dios, camas nem, jac'a re samajela' man je q'uiy-ta. 38Mare' tic'utuj cha re Rajaf re samaj, che que'rutaka-pa m'as samajela' chiquicojol re vinak re nic'atzin che niquic'axaj re ruch'abal.

will be added

X\