San Mateo 4

1Y jare' tak re Jes'us xban cha roma re Esp'iritu Santo che xba chupan jun lugar re anche' manak vinak re nibex desierto cha, chin che nitojtobex roma re itzel. 2Y reja' cuarenta k'ij y cuarenta ak'a' re man viynak-ta, y tak xe'k'ax-yan re k'ij re', c'are' xpa ch'umunic rupan. 3Y re itzel xjelon-apo riq'uin re Jes'us chin nutojtobej, y xubij cha: Rat nabij che yat Ruc'ajol re Dios y nich'umun apan, tabana' c'a chique re aboj re' che que'oc vay. 4Pero re Jes'us xubij cha: Tz'iban can chupan re ruch'abal re Dios, che re ache man xe-ta riq'uin re vay nuvel-va ruc'aslen, xa can nuvel chuka' ruc'aslen riq'uin re ruch'abal re Dios. 5Y jare' tak re itzel xuc'uaj-a re Jes'us c'a chupan re lok'olaj tenemit Jerusal'en, y xuban cha che xjote-a c'a pa rue' re rachoch re Dios roma camas naj jotal chicaj. 6C'are' re itzel xubij cha re Jes'us: Tatorij-ka-avi' vova', rat re yabin che yat Ruc'ajol re Dios. Roma chupan re ruch'abal re Dios re tz'iban can, nubij: Re Dios can xque'rutak re ru-'angeles chin yatquichajij. Y xcatquili'ej pa quik'a', chin quire' man xtasoc-ta avakan chach aboj. 7Pero re Jes'us xubij cha re itzel: Yen can man nintojtobej-ta re Dios. Roma chupan re ruch'abal re Dios re tz'iban can nubij che man takatojtobej re Kajaf Dios. 8Y re itzel xuc'uaj re Jes'us c'a pa rue' jun loma re camas naj jotal chicaj y can xuc'ut ronojel naciones chin re ruch'ulef chach, y ronojel re quibiyomal y re quik'ij re naciones re'. 9Y c'are' re itzel xubij cha re Jes'us: Can ronojel re xinc'ut chavach xtoc avichin, vo xa rat xcaxuque' chinoch y naya' nuk'ij. 10Pero re Jes'us jare' tak xubij cha: Rat Satan'as, man chic quinanak, mejor cabiyin. Yen mana-ta re najo' rat re nimban. Roma chupan re ruch'abal re Dios re tz'iban can, nubij: Xaxe re Kajaf Dios takaya' ruk'ij, y xaxe chuka' reja' re takasamajij, xcha' re Jes'us cha. 11Y jare' tak re itzel xba y xuya' can re Jes'us. Y re 'angeles xe'bapon riq'uin re Jes'us chin xquivilij. 12Y tak re Jes'us xuc'axaj che re Juan Bautista c'o pa c'arcel, jare' tak re Jes'us xtzolaj chic pa Galilea. 13Pero re Jes'us man xc'ue-ta chic chupan re aldea rubini'an Nazaret, sino que reja' xa chupan re tenemit rubini'an Capernaum chire' xbec'ue-va, y re jun tenemit re' chuchi' jun lago c'o-va. Re tenemit Capernaum chiquicojol re ca'e' lugar quibini'an Zabul'on y Neftal'i c'o-va. 14Re Jes'us xapon chupan re jun tenemit re', chin quire' can nibanataj re tz'iban can roma re Isa'ias rusamajel re Dios re xc'ue' ajuer can, re xbex profeta cha. Y ja quire' nubij re rutz'iban can: 15Re vinak re jec'o chupan re lugar rubini'an Zabul'on y re jec'o chupan re lugar rubini'an Neftal'i; re c'o chuchi' re jun lago, re c'o-apo juc'an ruchi' re rakan-ya' Jord'an. Chupan re Galilea re', xa can bama quion man je israelitas-ta jec'o. 16Re quic'aslen re vinak re' can pa k'oko'm c'o-va, pero can xapon re Namalaj Sakil quiq'uin. Y chuka' re vinak re' can c'o chic re rumuch'uch'il re camic pa quive', pero can xapon chuka' quiq'uin re nisekresan quichin. Quire' nubij re tz'iban can. 17Y tak re Jes'us xapon pa tenemit Capernaum, can jare' tak xutz'am rutzijosic re ruch'abal re Dios y nubij chique re vinak: Tijalataj re ic'aslen chach re Dios, roma xa can nakaj chic c'o-va-pa re k'ij chin che yixoc pa ruk'a' re Dios, xcha' re Jes'us chique. 18Y jun k'ij tak re Jes'us binak chuchi' re lago rubini'an Galilea, xe'rutz'at je ca'e' achi'a' quichak'-qui'. Re jun ja re Sim'on re nibex chuka' Pedro cha, y re jun chic ja re Andr'es. Y reje' je aj-tz'amoy-car, mare' tak niquiya-ka re quiya'l chapabal-car pa ya'. 19Y jare' tak re Jes'us xubij chique: Jo', jo' chuij, y xtinc'ut chivach andex niban chin ye'tz'am vinak chin che ye'tzake' chuij. 20Re je ca'e' achi'a' re', can jare' xquiya' can re quiya'l chin chapabal-car y xe'ba chij re Jes'us. 21Y c'a ba' c'a que'biyin che', tak re Jes'us xe'rutz'at chic je ca'e' achi'a' chuka' quichak'-qui'. Y re je ca'e' achi'a' re', ja re Jacobo y re Juan re je rajc'ual re jun ache rubini'an Zebedeo. Reje' can ja pa canoa ye'samaj-va riq'uin re quirta'. Ye'quic'ajoj re quiya'l chapabal-car. Y xpa re Jes'us xe'rayoj chin che ye'ba chij. 22Y can jare' tak re Jacobo y re Juan xquiya' can re quirta' y re canoa y xe'ba chij re Jes'us. 23Y re Jes'us ronojel tenemit chin re Galilea xbiyaj-va, ye'rutijoj re vinak riq'uin re ruch'abal re Dios pa tak nema-jay re anche' nitzijos-va re ruch'abal re Dios re nibex sinagoga cha. Y chuka' nutzijoj re utzulaj ch'abal chin re Dios re nich'o chij tak re vinak xque'oc pa ruk'a' re Dios, re nibex evangelio cha. Y can ronojel rach yabil y k'axomal quic'uan re vinak ye'ruc'achojsaj. 24Re Jes'us xapon rutzijol pa tak ronojel tenemit chin re Siria. Y re yava'i' xe'c'am-pa riq'uin re Jes'us. Re yava'i' re' man junan-ta rach yabil ndoc chique. Roma jec'o re ye'yavaj re camas nik'axo re quiyabilal. Jec'o ye'yavaj roma ja re itzel tak esp'iritu je'aconak quiq'uin. Jec'o re c'o ruyabil quijalom y jec'o chuka' re siquirnak qui-cuerpo. Y conojel re yava'i' re' xe'ruc'achojsaj-a. 25Y re Jes'us camas-va je q'uiy vinak re aj-chire' pa tak tenemit chin re Galilea xe'tzake' chij, chuka' re ye'pa pa tak tenemit re jec'o pa Dec'apolis, re ye'pa pa Jerusal'en y re jec'o pa tak nic'aj chic tenemit chire' pa Judea, y chibil chuka' re vinak re ye'pa c'a juc'an chic-apo ruchi' re rakan-ya' Jord'an, can conojel c'a re vinak re' can xe'tzake' chij re Jes'us.

will be added

X\