San Mateo 28

1Y tak xk'ax-yan re k'ij chin uxlanen, cumaj-yan cha re domingo re nabey k'ij chin re semana, re Mar'ia Magdalena y re jun chic ixok rubini'an chuka' Mar'ia, xe'ba c'a chuchi-jul re anche' xmuk-va can re Jes'us. 2Y xuban jun namalaj sananel tak c'amaje-na que'bapon re ixoki' chire' chuchi-jul, roma jun 'angel chin re Ajaf pitinak chila' chicaj, xka-pa re anche' xmuk-va can re Jes'us. Re 'angel xulisaj-a re jun aboj re anchok cha tz'apin-va can ruchi' re jul y xtz'uye-ka pa rue'. 3Re rusakil re 'angel re tz'uyul pa rue' re aboj, xa can junan riq'uin re sakil nuya' jun rel'ampago. Y re rusakil re rutziak can junan riq'uin re rusakil re hielo nika tak camas tef nuban. 4Y re soldados re ye'chajin, roma camas xquixibij-qui' chach re 'angel, mare' can ye'barbot. Can je quiminak roma quiximbire'. 5Y jac'a tak xe'bapon re ixoki' re', re 'angel xch'o quiq'uin y xubij chique: Man tixibij-ivi'. Roma yen can ntaman-va che yex ja re ru-cuerpo re Jes'us re xquimisas cho cruz re nicanoj. 6Re ru-cuerpo reja' xa manak chic vova', roma reja' xc'astaj-yan-a, ancha'l re rubin can chiva. Quixampa y titz'eta-na-pa' re anche' xc'ue-va re ru-cuerpo re Ajaf. 7Can quixtzolaj cha'nin, chin che ne'ibij chique conojel re ru-disc'ipulos re Jes'us che reja' xc'astaj-yan-a chiquicojol re anama'i'. Reja' can xtinabayaj-a chivach, chin che nic'ul-ivi' chila' pa Galilea. Y chire' xtitz'at-va ancha'l re nimbij-a chiva. 8Y re je ca'e' ixoki' re' can jare' xe'el-a chire' pa jul. Y astapa' can quixibin-qui', pero chuka' camas ye'qui'cot. Reje' can jonanin xe'ba chin che ne'quiya' rutzijol chique re ru-disc'ipulos re Jes'us. 9Y jare' tak re Jes'us xbec'ulum-pa chiquivach po bey y xubij chique: Can quixqui'cot. Quire' xubij chin che xuya' ruxnokil-quivach. Y re je ca'e' ixoki' re' xe'jelon-apo riq'uin y can jare' xe'xuque-ka charakan re Jes'us, xquik'etej re rakan y chuka' can xquiya' ruk'ij. 10Y re Jes'us can jare' tak xubij chique re ixoki' re': Man chic tixibij-ivi'. Vocame quixbiyin y te'iya' rutzijol chique re hermanos. Chin che can ye'ba c'a pa Galilea y chila' c'a xquinquitz'at-va. 11Re ixoki' re' can c'a quitz'amon bey. Y jare' tak jec'o nic'aj chique re soldados ye'chajin chire' chuchi-jul xe'ba c'a pa tenemit Jerusal'en. Re soldados re' xbequiya' rutzijol chique re principal tak sacerdotes ronojel re xbanataj chire' anche' xmuk-va re Jes'us. 12Xe'pa re principal tak sacerdotes xquimol-qui' quiq'uin re rejeta'k tak achi'a' re c'o quik'ij y xquiya' chiquivach che niquiya' q'uiy mero chique re soldados re xe'chajin. 13Y xquibij chique: Yex xaxe tibij chique re vinak che ja tak yixvar jare' tak xe'bapon re ru-disc'ipulos re Jes'us pa k'oko'm y xquilek'aj-a re ru-cuerpo. 14Y vo xa re gobernador nutamaj che xa xixvar-ka y man xichajij-ta re ancha'l bin chiva, yoj xkojch'o riq'uin y xkojrunimaj. Chin quire' can xquixkacol pa ruk'a'. 15Re soldados re xe'chajin chuchi-jul xquic'ul re mero, y ancha'l re xbex-a chique can ja quire' xquiban. Y ja tz'ucuj-tzij re' re xel rutzijol chiquicojol re vinak israelitas c'a chupan re tiempo vocame. 16Jac'a re yoj once ru-disc'ipulos re Jes'us, xojba c'a pa Galilea. Xojba pa rue' re loma re bin can chaka roma re Jes'us. 17Y tak xkatz'at rach re Jes'us, can xkaya' ruk'ij. Y jec'o chaka yoj re man niquinimaj-ta che ja re Jes'us jare' re c'o kaq'uin. 18Re Jes'us can xjelon-apo kaq'uin y xubij chaka: Ronojel jachon pa nuk'a' yen, re jec'o chila' chicaj y quire' chuka' re jec'o vova' chach re ruch'ulef. Can ronojel poder yi'on chua. 19Mare' vocame can nimbij-va chiva: Quixbiyin chach ronojel ruch'ulef y che re vinak yinquinimaj-ta chin yinquitzekelbej. Que'ibana' bautizar pa rube' re Dios re Tata'aj, pa nube' yen re Ruc'ajol re Dios y pa rube' re Esp'iritu Santo. 20Y tic'utu' chiquivach che tiquibana' obedecer ronojel re nbin can. Y yen can k'ij-k'ij c'a xquinc'ue' iviq'uin, y can xquinc'ue-va iviq'uin c'a pa ruq'uisibal k'ij chin re ruch'ulef. Am'en.

will be added

X\