San Mateo 27

1Y tak xsakar-ka, conojel re principal tak sacerdotes y re rejeta'k tak achi'a' re c'o quik'ij chakacojol yoj re yoj israelitas, xquimol-qui' chin niquinojij andex niquiban cha re Jes'us chin che niquimisas. 2Re Jes'us yach'on tak xquic'uaj-a y xbequijacha' pa ruk'a' re gobernador rubini'an Poncio Pilato. 3Y re Judas re xjacho chin re Jes'us, tak xutz'at che re Jes'us xc'uax-a chach re Pilato chin che nibex cha che niquimisas, jare' tak reja' xpa bis y k'axon riq'uin y xbo'rtzolij can re treinta fichas re banon cha sakapuak. Xbo'rtzolij can chique re principal tak sacerdotes y re rejeta'k tak achi'a' re c'o quik'ij. 4Re Judas ja quire' xubij can chique re achi'a' re': Yen can ximacun tak xinjach re Jes'us pan ik'a', roma reja' man jun rumac chin che niquimisas. Pero re principal tak sacerdotes y re rejeta'k tak achi'a' re c'o quik'ij, xquibij-pa cha: Yoj man jun chic ka-cuenta cha, che re Jes'us manak mac rubanon. Re' xaxe chavach rat. 5Y re Judas ja chire' pa rachoch re Dios xutorij-va can re treinta fichas re banon cha sakapuak, y xba. Y c'are' xbo'rjetz'aj-ri'. 6Y re principal tak sacerdotes xquimol-a re mero re xbo'rtzolij can re Judas y xquibij: Re mero re' man ruc'amon-ta che nakaxol-ka riq'uin re mero re niya' can vova' pa rachoch re Dios, roma re mero re' xa rajal jun ache re xtibiyin ruq'uiq'uel. 7Jac'a tak quiyi'on chic chiquivach re andex niquiban riq'uin re mero re', reje' xquilok' re jun juyu' chin re jun banoy-bojo'y. Re juyu' re' can xtic'atzin che ja chire' ye'muk-va re vinak re man je israelitas-ta. 8Y mare' re jun juyu' re' can c'a nibex Ulef chin Quic' cha, c'a chupan re tiempo re'. 9Riq'uin re' can xbanataj-va re rubin can re Jerem'ias, re jun rusamajel re Dios re xc'ue' ajuer can, re xbex profeta cha. Reja' ja quire' rubin can: Y re je rey-rumam can re ache xubini'aj Israel, xquilisaj-a treinta fichas re banon cha sakapuak, re mero re' xquiya' reje' roma xquibij che jare' re rajal re rusamajel re Dios. 10Y re mero re' jare' re xquiya' chin xquilok' re rujuyu' re banoy-bojo'y. Can ancha'l-va rubin re Ajaf chua. Ja quire' rubin can re Jerem'ias. 11Y re Jes'us pa'al-apo chach re gobernador rubini'an Poncio Pilato. Y re gobernador re' xuc'utuj cha re Jes'us: ??Ja rat re qui-Rey re israelitas? Y re Jes'us xubij: Ja', ja quire', can ancha'l re xabij. 12Y re principal tak sacerdotes y re rejeta'k tak achi'a' re c'o quik'ij, jun quichi' niquiban-apo chij re Jes'us, pero reja' can man jun tzij nubij. 13Re Pilato can jare' tak xubij cha re Jes'us: Y can man naya-ta pa cuenta re niquibij re vinak chavij chin yatquisujuj. Y rat man jun tzij nabij. 14Pero re Jes'us cama-va jun tzij xubij cha re Pilato. Y mare' re gobernador re' can anchique-la xuna', roma man jun bey rutz'eton che jun vinak quire-ta nuban. 15Y ronojel juna' tak napon re kanamak'ij yoj re yoj israelitas rubini'an pascua, can nilisas-a jun chique re presos re jec'o pa c'arcel roma ja quire' re costumbre, y re gobernador ja re preso re niquic'utuj re vinak cha jare' re nulisaj-a libre. 16Y chupan re tiempo re', c'o c'a jun ache rubini'an Barrab'as re kejnak pa c'arcel, y re jun ache re' can conojel je'atamayon rach che camas itzel ache. 17Y tak xbequimola-qui' re vinak chire', re Pilato xubij-pa chique: ??Y yex anchique chique reje' re nijo' che yen ninlisaj-a libre? ??Nijo' che ninlisaj-a re Barrab'as o ja re Jes'us re nibex chuka' Cristo cha? 18Re Pilato can quire-va xubij-pa, roma can rutaman-va che re vinak re' quiyi'on re Jes'us pa ruk'a', roma camas itzel niquina' cha che camas je q'uiy vinak re ye'tzekelben richin. 19Y re Pilato tz'uyul re anche' nuban-va juzgar, tak xapon rutzijol riq'uin re rubin-a re ruxayil cha. Y ja quire' re rutakon-a rubixic cha: Re Jes'us jun ache re man jun mac rubanon, mare' rat, man catoc quichibil re ye'jovan niquiquimisaj. Roma yen rutzij re Jes'us ximban jun itzel achic'. 20Y re principal tak sacerdotes y re rejeta'k tak achi'a' re c'o quik'ij, xquiya' quina'oj re vinak xaxe chin che tiquic'utuj-apo che ja re Barrab'as re tilisas-a libre y re Jes'us tiquimisas. 21Y tak re gobernador xuc'utuj chic jun bey chique re vinak re' che anchique chique re je ca'e' re' re xtulisaj-a libre, re vinak re' can jare' tak xquibij: Ja re Barrab'as nakajo' che talisaj-a libre. 22C'are' re Pilato xuc'utuj chique re vinak: ??Y andex nibij yex che yen nimban riq'uin re Jes'us, re nibex chuka' Cristo cha? Y jare' tak conojel xe'ch'o-apo y xquibij: Re Jes'us tiquimisas cho cruz. 23Xpa re gobernador xubij chique re vinak: ??Andex rumac rubanon chivach c'a? Pero re vinak man ye'tane-ta-ka. Xa m'as xquirak-apo quichi' y xquibij: Tiquimisas cho cruz. 24Y tak re Pilato xutz'at che man jun chic cosa nitiquir nuban y re vinak camas niquiban, xpa reja' xbo'rc'ama-pa ba' ya' y xuch'aj ruk'a' chiquivach conojel re vinak re', y xubij chique: Camanak-va numac yen cha re rucamic re jun ache re' re man jun rumac. Re' xa jac'a yex yixc'o-va. 25Xe'pa conojel re vinak xquibij: Pues pa kave' c'a yoj y pa quive' re kami'al-kajc'ual tika-va re rucamic re jun ache re', xe'cha'. 26Y jare' tak re gobernador can chiquivach re vinak xulisaj-a libre re Barrab'as, jac'a re Jes'us antes che nujach-a pa quik'a' re ye'quimisan richin cho cruz, re Pilato xutak ruch'ayic re Jes'us. 27Y re soldados chin re gobernador re' xquic'uaj-apo re Jes'us chupan re palacio. C'are' xe'cayoj conojel re nic'aj chic soldados, re quichibil-qui' quiq'uin. Can xe'quimol-apo chij re Jes'us. 28Xe'pa re soldados re' xquilisaj-a re rutziak re Jes'us, y c'are' xquiya-ka jun tziak quiak chij can ancha'l-va re ye'quicusala' re reyes. 29Reje' xquipach'uj chuka' jun k'ayis re camas ruq'uixal. Y xquiban ancha'l jun corona cha y c'are' xquiya' pa rujalom. Y chuka' xquiban cha re Jes'us che xutz'am jun aj, y re ruk'a' re xtz'amo re aj, ja re rajquik'a', y can ye'xuque' chach. Y xquiban saludar can ancha'l niban saludar jun Rey, pero tak quire' niquiban xa chin burla, roma niquibij cha che rat yat qui-Rey re israelitas. 30Niquichubaj chuka' rupalaj, y re aj re c'o pa ruk'a' niquilisaj-a chin niquich'ay pa rujalom. 31Y tak xe'tane' che tza'n chij, xquilisaj-a re tziak re quiyi'on-ka chij. C'are' xquiya-a re can rutziak-va, y xquic'uaj-a chin che ne'quibajij cho cruz. 32Y jac'a tak quitz'amon-a bey chin ne'quibajij re Jes'us cho cruz xquic'ul jun ache, y re ache re' rubini'an Sim'on y reja' aj pa tenemit Cirene. Y re soldados can xquiban cha re ache re' che tuc'uaj-a re ru-cruz re Jes'us. 33Y xe'bapon c'a chupan re jun lugar rubini'an G'olgota. Re lugar re', Calavera chuka' ye'cha' cha. 34Tak jec'o chic chire', xquiya' cha re Jes'us jun ch'amalaj ruyi'al-uva xalon jun ak'om camas c'ay riq'uin. Pero tak reja' xutaj retal, man xrajo-ta xukum. 35Y tak re soldados xquibajij-yan re Jes'us cho cruz, xquitz'am rubanic sortear re rutziak chin xquitz'at andex che tziak re nuban-a tocar cada jun. Y riq'uin re' can nibanataj re bin can roma re jun rusamajel re Dios re xc'ue' ajuer can, re xbex profeta cha. Re jun rusamajel re Dios can chij c'a re Cristo ch'ovenak-va can tak xubij: Xe'quijachala' re nutziak chiquivach y chuka' xquiban sortear. Quire' nubij re rutz'iban can. 36Re soldados je'tz'uyul c'a chire' quichajin-apo re Jes'us. 37Y pa rue' re cruz xquiya' jun tz'alam y chach re tz'alam re' tz'iban-va re andex rumac re Jes'us, y mare' niquimisas. Chach re tz'alam re' nubij: Re Jes'us jare' re qui-Rey re israelitas. 38Y ja chuka' re' tak jec'o je ca'e' elek'oma' re xe'quimisas cho cruz. Jun xya' pa rajquik'a' re Jes'us y re jun chic pa ruxocon. 39Re vinak re ye'k'ax re anche' c'o-va re Jes'us, niquisiloj-apo quijalom chach, roma can man niquinimaj-ta che ja reja' re Ruc'ajol re Dios. Y chuka' c'o tzij re ye'quibila' can cha. 40Y ja quire' re niquibij: Rat re yabin che navulaj re rachoch re Dios y pan oxe' k'ij napoba' chic jun bey, tacola' c'a-avi' ayon. Y vo xa ja rat re yat Ruc'ajol re Dios, caka-pa chach la a-cruz. 41Y ja chuka' quire' niquiban re principal tak sacerdotes, re je'atamayon re ley kachin yoj re yoj israelitas, re achi'a' fariseos y re rejeta'k tak achi'a' re c'o quik'ij, ye'tze'en chij re Jes'us y niquibila' chiquivach: 42Reja' can je q'uiy xe'rucol, pero vocame ni xe-ta reja' mismo man nitiquir-ta nucol-ri'. Y vo xa ja reja' re Rey kachin yoj re yoj israelitas, tika-pa chach la ru-cruz y yoj can xtakanimaj. 43Reja' can xuban confiar-ri' riq'uin re Dios, y vo xa re Dios can nrajo' re Jes'us, tucola' c'a. Roma re Jes'us rubin: Ja yen re Ruc'ajol re Dios. Can quire-va rubin, xe'cha' re achi'a' re'. 44Y re elek'oma' re junan je'bajin cho cruz riq'uin re Jes'us, can ja chuka' quire' niquiban, ancha'l re nic'aj chic. Roma c'o chuka' tzij re niquibila-apo cha re Jes'us. 45Y ja tak xapon re nic'aj k'ij, jare' tak che jun ruch'ulef xk'ukumataj rach. Y re k'oko'm re' xq'uis-a c'a pa tak a las tres re tak'ak'ij. 46Y como pa tak a las tres re tak'ak'ij chuka', jare' tak re Jes'us cof xch'o y xubij: El'i, El'i, ??lama sabactani? xcha'. Y re tzij re' ndel che tzij: Nu-Dios yen, nu-Dios yen, ??anchique c'a roma tak xinamalij can? 47Y jec'o re jec'o-apo chire' chunakaj re Jes'us, tak xquic'axaj re xubij, xquibila': Reja' xa ja re El'ias re nrayoj. 48Y can jare' tak c'o jun re jonanin xba y xbo'rc'ama-pa jun ancha'l bo'j re nibex esponja cha, xumuba' chupan vinagre. C'are' xuya' re esponja chutza'n jun aj, chin xuya' cha re Jes'us chin che otz ba' nuban-ka cha re nichake'j ruchi'. 49Pero re nic'aj chic re jec'o-apo chire' riq'uin re Jes'us, xquibij: Taya' k'ij cha, takatz'eta-na vo xa katzij che xtipa re El'ias chucolic. 50Pero re Jes'us xa can jare' tak cof chic xch'o, y xujach re r'anma pa ruk'a' re Dios, y xcom. 51Y jare' tak re utzulaj tziak re anchok cha tason-va rupan re rachoch re Dios xel ca'e'. Xutz'am-pa pa rue' c'a charakan-ka. Chuka' xuban jun namalaj sananel y re aboj can xquijakala-qui'. 52Re jul re anche' je'mukun-va re anama'i' xe'jakataj. Y je q'uiy chique re je rajc'ual re Dios re je quiminak chic-a, xe'c'astaj-pa, 53y xe'be'el-pa. Jac'a tak xc'astaj-yam-pa re Jes'us, jare' tak xe'tz'etetaj chuka' reje'. Reje' chuka' xe'bapon chupan re lok'olaj tenemit Jerusal'en. Can chiquivach je q'uiy xquic'utula-va-qui'. 54Re ache capit'an y conojel re ru-soldados quichajin-apo re Jes'us, y tak xquitz'at-yan re xuban re sananel, y chuka' xquitz'at-yan re nic'aj chic andex re xe'banataj, reje' camas xquixibij-qui' y xquibila': Can katzij-va che re jun ache re' Ruc'ajol re Dios. 55Y je q'uiy ixoki' re can je'tzakatal-va-pa chij re Jes'us tak xel-pa chire' pa Galilea chin niquivilij, reje' ye'tzu'um-pa chij re Jes'us tak c'o cho cruz, pero c'ac'anaj c'a jec'o-va-a. 56Y chiquicojol c'a conojel re ixoki' re' c'o-va re Mar'ia Magdalena, re Mar'ia re quite' re Jacobo y re Jos'e, y chuka' re ruxayil re ache rubini'an Zebedeo, re quite' re Jacobo y re Juan. 57Jac'a tak xk'ak'ij-yan-ka, c'o c'a jun re xtzekelben richin re Jes'us xapon. Re jun ache re' biyom y aj pa tenemit Arimatea, rubini'an Jos'e. 58Reja' xba riq'uin re Pilato re gobernador y xbo'rc'utuj re ru-cuerpo re Jes'us cha chin numuk. Y re Pilato xubij che tiya-a re ru-cuerpo re Jes'us cha. 59Y re Jos'e chin che xuc'uaj-a re ru-cuerpo re Jes'us, xbo'rc'ama-pa, y c'are' xupis-a pa jun s'abana ch'ajch'oj. 60Re Jos'e xbo'rya' c'a can re ru-cuerpo re Jes'us pa jun jul c'ac'a, re jun jul re' ja reja' re c'otoyon chach jun pe~na. Y tak reja' rutz'apin chic can ruchi' re jul riq'uin jun moma' aboj, c'ajare' tak xtzolaj. 61Pero re Mar'ia Magdalena y re jun chic ixok rubini'an chuka' Mar'ia, can c'a xe'tz'uye-na can chach re jul re anche' xmuk-va can re Jes'us. 62Re k'ij tak xmuk re Jes'us, ja k'ij chuka' re' tak re vinak niquibanala' chic rubanic ronojel re xtoc chique chin re ruca'n k'ij, roma jare' tak nitiquir-a re k'ij chin uxlanen. Y chupan re k'ij chin uxlanen, jare' tak re principal tak sacerdotes y re achi'a' fariseos xe'ba riq'uin re Pilato re gobernador. 63Reje' xbequibij cha: Yoj xbeka chakac'o'x che tak re Jes'us can c'a c'as che' xubij che pa rox k'ij xtic'astaj-pa chiquicojol re anama'i'. Can quire-va rubin can re jun aj-tz'ucuy-tzij re'. 64Y chin che man que'pa chak'a' re ru-disc'ipulos chin niquilek'aj-a re ru-cuerpo re Jes'us y c'are' niquibij chique re vinak: Re Jes'us can xc'astaj-va-a chiquicojol re anama'i', mare' vocame yoj yojpitinak chin nakac'utuj jun utzil chava che ca'taka-a soldados chin ne'quichajij re anche' xmuk-va can, y c'a titz'akater-na re oxe' k'ij. Y vo xa man xtakaban-ta quire' y xtisatz-a re ru-cuerpo, c'are' c'a m'as je q'uiy re xque'niman che can takon-va-pa roma re Dios. 65Y re Pilato xubij chique re achi'a' re': Quixbiyin y que'c'uaj-a la soldados la' chin ne'quichajij. Yex xa can jabal chic itaman andex rubanic re niban can cha, xe'cho'x-a. 66Re achi'a' re' can xe'ba anche' xmuk-va can re Jes'us y otz rubanic xbequibana' can cha chin che otz tichajex. Xbequibana' can sellar re aboj re anchok cha tz'apin-va can ruchi' re jul. Y xe'quiya' can chuka' re soldados chire' chin niquichajij.

will be added

X\