San Mateo 26

1Tak re Jes'us xuq'uis rubixic ronojel re tzij re', xubij chaka yoj re yoj ru-disc'ipulos: 2Yex itaman che xaxe chic ca'e' k'ij nrajo' che nitz'amataj-a re kanamak'ij rubini'an pascua. Chupan re namak'ij re' tak xquinjach yen re xinalax chi'icojol chin yimbajex cho cruz chin xquincom, xcha' chaka. 3Y can jare' tak re principal tak sacerdotes, re achi'a' re je'atamayon re ley kachin yoj re yoj israelitas y chuka' re rejeta'k tak achi'a' re c'o quik'ij chakacojol yoj re yoj israelitas, can quimalon-va-qui' chach rachoch re namalaj sacerdote rubini'an Caif'as. 4Reje' xquiya' chiquivach andex niquiban chin che nika re Jes'us pa quik'a', y c'are' niquiquimisaj. 5Y can xquiya' chiquivach, che man niquitz'am-ta chupan re namak'ij, chin che man que'yacataj-pa re vinak chiquij. 6Y re Jes'us c'o pa tenemit rubini'an Betania, chire' pa rachoch re jun ache rubini'an Sim'on re xc'achojsas cha re yabil rubini'an lepra. 7Y jare' tak xapon jun ixok riq'uin re Jes'us, ruc'uan-apo jun frasco re banon riq'uin jun aboj rubini'an alabastro, y c'o-a ak'om jubul-oc ruxla' chupan, re ak'om re' camas caro rajal. Y jare' re xbo'rk'aja' pa rujalom re Jes'us tak tz'uyul chach mesa, niva' chire' pa rachoch re Sim'on. 8Y tak yoj re yoj ru-disc'ipulos xkatz'at re xuban re ixok riq'uin re ak'om jubul-oc ruxla' che xuk'aj pa rujalom re Jes'us, xpa kayoval y xkabila': ??Anchique roma che xaxe tal choj quire' xtix-a la ak'om la'? 9Roma la ak'om la' caro rajal, y mare' xc'ayex-ta y re rajal xjach-ta chiquivach re vinak re camas je meba'. 10Pero re Jes'us cha'nin xk'ax pa rue', mare' reja' xubij chaka: ??Anchique roma tak yex man yixtane-ta-ka che tzij chij re ixok re'? Xa tiya' k'ij cha. Reja' jun cosa otz xuban viq'uin. 11Re vinak re camas je meba' can nojel tiempo jec'o iviq'uin, chin che xabanchique k'ij nijo' niban utzil chique. Jac'a yen man nojel-ta tiempo xquinc'ue' iviq'uin. 12Roma tak re ixok re' xuk'aj re ak'om re' chuij, can xuc'ut che c'o amor riq'uin. Reja' can xuban-yan-apo chua ancha'l niban chique re anama'i' tak ye'muk. 13Y can katzij nimbij chiva, che xabanchique lugar xtitzijos-va re utzulaj ch'abal chin re Dios re nibex evangelio cha, chire' chuka' xtitzijos-va re xuban viq'uin re jun ixok re'. Can che jun ruch'ulef xtitzijos-va, y man jun bey xtimistas, xcha' re Jes'us. 14Y jun chaka yoj re yoj doce ru-disc'ipulos re Jes'us, re rubini'an Judas Iscariote, xapon quiq'uin re principal tak sacerdotes. 15Reja' xbo'rbij chique: ??Andex niya' yex chua, xe-ta yen ninjach re Jes'us pan ik'a'? Y re principal tak sacerdotes xquibij che niquiya' treinta fichas re banon cha sakapuak. 16Y jare' tak re Judas Iscariote xutz'am runojexic andex xtuban chin quire' nujach re Jes'us pa quik'a' re achi'a' re'. 17Y chupan re nabey k'ij chin re namak'ij, kachin yoj re yoj israelitas, tak nitij re xcana-vay re manak levadura riq'uin, jare' tak yoj re yoj disc'ipulos xojelon-apo riq'uin re Jes'us, y xkac'utuj cha: ??Anche' c'a najo' naban-va re va'in chupan re jun pascua re' chin nakabana' can rubanic ronojel re ndoc? 18Y jec'o chaka yoj re xe'tak-a roma re Jes'us c'a pa tenemit Jerusal'en, pa rachoch jun ache, y reja' xubij-a chique: Tak xquixapon, tibij cha re ache re': Re ka-Maestro rubim-pa: Re nu-tiempo xa nakaj chic c'o-va-pa. Ja pan avachoch rat ninjo' nimban-va re namalaj va'in quiq'uin re nu-disc'ipulos, chupan re pascua re', xcha-a re Jes'us chique re xe'rutak-a. 19Y re disc'ipulos re xe'tak-a can xquiban-va ancha'l re bin-a chique roma re Jes'us. Reje' can xquiban-va rubanic ronojel re ndoc chin re va'in chin re pascua. 20Jac'a tak xoc-ka re ak'a' chupan re k'ij re', re Jes'us y re yoj doce disc'ipulos xojtz'uye-apo chach mesa chin re namalaj va'in. 21Y tak yojtajin che va'in, re Jes'us xubij chaka: Can katzij nimbij chiva, che jun chiva yex re xquinjacho-a pa quik'a' re vinak re ye'tzelan vichin. 22Y tak yoj xkac'axaj quire' camas bis xpa pa tak k'anma. Y c'are' can cada jun xojch'o-apo cha y xkac'utula' cha: Ajaf, ??la mana-ta como yen re quire' xquimbano? 23Y re Jes'us can jare' tak xubij chaka: Ja re anchique xtuquiak'-pa ruay viq'uin chupan re mismo lak, jare' re xtijacho vichin pa quik'a' re vinak. 24Can tic'axaj re xtimbij chiva, che yen re xinalax chi'icojol can xquinquimisas-va. Can xtibanataj-va ancha'l nubij chupan re ruch'abal re Dios re tz'iban can. Pero tivok'ex c'a rach re xtijacho vichin yen re xinalax chi'icojol. Re ache re xtijacho vichin m'as-ta otz che man-ta xalax, xcha' re Jes'us. 25Y can jare' tak xch'o-apo re Judas re xtijacho chin re Jes'us, y re Judas xubij: Maestro, ??ja como yen re xquinjacho-a avichin? Y re Jes'us xubij: Ja', ja rat. 26Y tak c'a yojtajin che va'in, re Jes'us xuc'am-apo jun xcana-vay y xutioxij cha re Dios. C'are' xupar re xcana-vay re' y xuya' chaka yoj re yoj ru-disc'ipulos. Y reja' xubij chaka: Tic'ama' y titija' re xcana-vay re'. Roma jare' re nu-cuerpo re xtapon chach re camic. 27Y re Jes'us xuc'am-apo chuka' re vaso re c'o ruyi'al-uva chupan, y tak rutioxin chic cha re Dios, xuya' chaka. Y reja' tak xuya' chaka xubij: Chiyixnojel c'a tikumu' re ruyi'al-uva c'o chupan re copa re'. 28Roma jare' re nuq'uiq'uel re xtibiyin tak xquincom. Can xtibiyin c'a re nuq'uiq'uel, chin che je q'uiy vinak nicuyutaj re quimac. Riq'uin re nuq'uiq'uel, can jare' xc'achoj re c'ac'a trato re rujovam-pa re Dios che nuban quiq'uin re vinak. 29Can katzij nimbij chiva che jac'a ruq'uisibal bey re' re xinkum-a re ruyi'al-uva re'. Y tak xtinkum chic jun bey, tak ja chic re Nata' Dios nibano gobernar. Y can iviq'uin chuka' yex xtinkum-va re ruyi'al-uva re'. Y re xtakakum chire' jun c'ac'a ruyi'al-uva, xcha' re Jes'us chaka. 30Y tak kabixan chic-ka re bix chin nakaya' ruk'ij re Dios, re Jes'us y yoj re yoj ru-disc'ipulos xojel-a chire' pa jay y xojba-apo chuxe' re loma rubini'an Olivos. 31Y tak katz'amon bey, re Jes'us xubij chaka: Chupan re ak'a' re' tak yex xtitz'at che yen xquinjach-a pa quik'a' re vinak, chiyixnojel yex xa xtitaluj-ivi' y nayon xquiniya' can. Roma re Dios can quire-va rubin chupan re ruch'abal re tz'iban can: Tak yen xtinya' k'ij che xtiquimisas re nichajin quichin re ovejas, re ovejas xa xtiquitaluj-a-qui'. Quire' nubij re tz'iban can. 32Pero yen re yinchajin quichin re ovejas, man jumul-ta xquincom, xa xquinc'astaj chic-pa. Y ja yen re xquinyaben ivichin chila' pa Galilea, xcha' re Jes'us. 33Y re Pedro can jare' tak xch'o-apo cha re Jes'us y xubij: Vo xa re nic'aj chic yatquiya' can ayon tak xtiquitz'at che c'o andex re man otz-ta niban chava, pero yen man jun bey xcatinya-ta can, xcha' re Pedro cha re Jes'us. 34Y re Jes'us xubij cha re Pedro: Yen can katzij nimbij chava, che chupan re ak'a' re', tak c'amaje-na titzirim-pa re moma', rat oxe-yan bey tabij chique re ye'c'utun chava, che man ataman-ta noch. 35Y re Pedro xubij cha: Astapa' can xtinvel nucamic aviq'uin, pero man jun bey xtimbij che man ntaman-ta avach. Y can konojel yoj re yoj ru-disc'ipulos quire' chuka' xkabij. 36Y c'are' re Jes'us y yoj re yoj ru-disc'ipulos xojapon chire' chupan re lugar rubini'an Getseman'i. Xpa re Jes'us xubij chaka: Yex quixtz'uye-na can ba' vova', y jac'a yen xa yimba chic-apo ba' quila-apo chin ne'mbana' orar. 37Reja' xaxe re Pedro y re je ca'e' ruc'ajol re ache rubini'an Zebedeo re xe'ruc'uaj-a. Jare' tak reja' can xuna-yan re xto'rc'alvachij. Mare' camas nem re bis xpa pa r'anma. 38Y jare' tak reja' xubij chique re je oxe' ru-disc'ipulos: Re bis c'o pa v'anma, camas nem. Y can yinruquimisaj nina' yen. Can quixc'ue-pa viq'uin, quixc'ase' y man quixvar-ka, xcha' chique. 39Reja' xbiyin chic-apo ba' y chire' xuque-va-ka, y re nic'aj-rach can xukasaj-ka pan ulef, chin xuban orar. Y ja quire' re tzij re xe'rubila': Nata' yen, can-ta naban che xaxe tal choj quire' nak'ax y man-ta nink'asaj re jun tijoj-pokonal re', pero man taban re ninjo' yen, xaxe roma yen quire' nimbij chava. Roma yen xa can ninjo' chuka' nimban re najo' rat, nicha' re Jes'us. 40Y tak reja' xuq'uis re ru-oraci'on, xpa quiq'uin re je oxe' ru-disc'ipulos, pero tak xbeka quiq'uin xa ye'var. Xpa reja' xubij cha re Pedro: Can man ba' xixtiquir xixc'ase' jun ch'et hora viq'uin. 41Man quixvar-ka, xa tibana' orar y tic'utuj cha re Dios chin che tak yixtojtobex, man quixtzak pa mac. Can ntaman-va che re iv'anma can nurayij nuban re nrajo' re Dios. Pero iyon man yixtiquir-ta, xcha' chique. 42Y re Jes'us xba chic-apo jun bey chin xbo'rbana' orar, y nubij: Nata' yen, vo xa c'o che nink'asaj re tijoj-pokonal re', tiene que nink'asaj, roma yen can ninjo' nimban re narayij rat. Quire' nubij chupan re ru-oraci'on. 43Y tak reja' xpa chic jun bey quiq'uin re je oxe' ru-disc'ipulos, xa ye'var chic jun bey xe'bo'rvila', roma re disc'ipulos re' can al rij re quinak'avach roma camas quivaran. 44Re Jes'us xe'ruya' chic can jun bey y ja-yan rox bey re' niba chubanic orar. Reja' xucamaluj chic rubixic re tzij re xe'rubij chupan re ru-oraci'on re c'a ba' tuban-va-ka. 45Y c'are' re Jes'us xpa quiq'uin re je oxe' ru-disc'ipulos, y xubij chique: Vocame quixvar. Titz'aktisaj re ivaran. Yen re xinalax chi'icojol can jac'a re nu-hora xbeka, can xquinjach-a pa quik'a' re itzel tak achi'a'. 46Cha'nin, quixyacataj. Ja la pitinak re anchique xquinjacho-a pa quik'a' re itzel tak achi'a', xcha' re Jes'us. 47Y re Jes'us can c'a ntajin che tzij kaq'uin yoj re yoj ru-disc'ipulos tak can jare' xbeka re Judas re jun chaka yoj re yoj doce disc'ipulos, y re Judas je q'uiy vinak je'ruc'uan-apo y re vinak re' je'quic'ualon che' y espada. Conojel re vinak re' je'takon-a coma re principal tak sacerdotes y coma chuka' re rejeta'k tak achi'a' re c'o quik'ij chakacojol yoj re yoj israelitas. 48Re Judas re nijacho-a chin re Jes'us can rubin chic chique re je'pitinak riq'uin, andex xtuban chin nuc'ut re Jes'us chiquivach. Reja' ja quire' rubin chique: Ja re anchique xtintz'ubaj chin xtimban saludar, jare' re Jes'us, y titz'ama'. 49Y re Judas can jare' xjelon-apo riq'uin re Jes'us y xubij: K'ok'a' c'a Maestro, xcha' cha. Y xutz'ubaj re Jes'us. 50Xpa re Jes'us xubij cha re Judas: ??Andex c'a re na'bana'? Y can jare' tak xe'jelon-apo re vinak re je'binak chutz'amic re Jes'us y xquitz'am-a. 51Y jun chaka yoj re yojc'o riq'uin re Jes'us chire', can jare' tak xulisaj ru-espada y xusoc re jun ru-mozo re namalaj sacerdote. Can xutzaq'uij-a re ruxquin cha re espada re xuya' cha. 52Y re Jes'us jare' tak xubij cha re xbano quire': Tayaca' la a-espada. Roma re anchique xtiquimisan cha espada, can cha espada chuka' xtiquimisas reja'. 53??Rat nanojij che yen man jun nita'o vichin? Xe-ta yen ninc'utuj cha re Nata' Dios che quinruto', reja' can ye'rutak-ta-pa m'as je setenta y dos mil 'angeles chinuto'ic. 54Pero xa can nibanataj-va re je'tz'iban can chupan re ruch'abal re Dios, mare' tak man nic'atzin-ta che ye'pa re 'angeles chinuto'ic, xcha' re Jes'us. 55Y chupan chuka' re hora re' re Jes'us xubij chique re vinak: ??Yex xinojij che yixpitinak chutz'amic jun elek'om y mare' ic'amom-pa che' y espada? Can k'ij-k'ij c'a xintz'uye' iviq'uin chire' pa rachoch re Dios, tak xinc'ut re ruch'abal chivach y man jun bey xinitz'am-ta. 56Ronojel re nibanataj vocame, xa can chin c'a che no'rbana' cumplir re je'tz'iban can chupan re ruch'abal re Dios coma re rusamajela' re Dios re xe'c'ue' ajuer can, re xbex profetas chique. Y can jare' tak yoj re yoj ru-disc'ipulos xkaya' can rion re Jes'us y xojnumaj. 57Re xe'betz'amo-pa chin re Jes'us chire' pa Getseman'i, c'a charachoch re Caif'as re namalaj sacerdote xquic'uaj-va, re anche' quimalon-va can-qui' re achi'a' re je'atamayon re ley kachin yoj re yoj israelitas y re rejeta'k tak achi'a' re c'o quik'ij. 58Y re Pedro c'ac'anaj c'a c'o-va can, tzakatal-a chiquij y chuka' xoc-apo chire' chach rachoch re namalaj sacerdote. Tak reja' c'o chic chire', xtz'uye-apo quiq'uin re polic'ias re jec'o-apo chire', chin che nutz'at andex kas xtiban cha re Jes'us. 59Y re principal tak sacerdotes, re rejeta'k tak achi'a' re c'o quik'ij y conojel re achi'a' re pa camon niquiban juzgar, niquicanola' che c'o-ta itzel tak banabal re ye'litaj chij re Jes'us, chin quire' niquimisas-ta. 60Y astapa' can je q'uiy re xe'bapon chin xquitz'uc tzij chij, pero can man jun chique re tz'ucuj-tzij re' xoc che ja-ta re' re xcusas. Xa c'a pa ruq'uisibal xe'bapon je ca'e' re can junan niquibij. 61Re je ca'e' re' xquibij: Re ache re' rubin: Yen yintiquir ninvulaj re rachoch re Dios y pan oxe' k'ij nimpoba' chic jun bey. 62Y c'are' re Caif'as re namalaj sacerdote, xbepa'e-pa y xubij cha re Jes'us: ??Katzij como re xquibij-ka chavij re je ca'e' re'? ??Andex nabij vocame? 63Pero re Jes'us man jun tzij xubij. Y jare' tak re namalaj sacerdote xubij cha: Can chach re c'aslic Dios tabij chaka vo xa ja rat re Cristo re Ruc'ajol re Dios. 64Y re Jes'us xubij cha: Ja', ja yen re Cristo y chuka' nimbij chiva che can xquinitz'at yen re xinalax chi'icojol, yintz'uyul pa rajquik'a' re Dios re nitiquir nuban ronojel. Y xquinitz'at tak xquinka-pa pa nube chila' chicaj, xcha' re Jes'us. 65Y can jare' tak re Caif'as re namalaj sacerdote xuratz re rutziak chij roma itzel xuc'axaj, y xubij: Manak tuk'aj che nipa-ta chic jun chin no'rbij chaka che re Jes'us can aj-mac-va. Chiyixnojel yex xic'axaj re c'aja-oc xubij-ka che ja reja' re Cristo. Can man otz-ta xuban chach re Dios. 66??Y andex nakaban cha vocame nibij yex? xcha' re Caif'as. Y re nic'aj chic re quimalon-qui' chire' xquibij: Can ruc'amon che tiquimisas. 67Y xquichubaj rupalaj re Jes'us y xquich'ay riq'uin c'olon-k'a' y jec'o chuka' re xquipak'ala' rupalaj. 68Chuka' xquibila' cha re Jes'us tak quitz'apin rupalaj: Rat re Cristo, tabij chaka anchique re ye'ch'ayo avichin. 69Re Pedro tz'uyul chach-jay. Y jare' tak c'o jun ixok raj-ic' re namalaj sacerdote re xapon-apo riq'uin y xubij cha: Rat chuka' yat ruchibil re Jes'us re aj-Galilea. 70Pero re Pedro can chiquivach conojel xutz'uc-va tzij roma xubij: Man nak'ax-ta pa nue' anchique roma tak quire' nabij chua, xcha' cha re aj-ic'. 71Y tak reja' nrajo' ndel-a pa puerta can jare' tak c'o chic jun ixok aj-ic' re xtz'eto-pa richin y xubij chique re jec'o-apo chire': Chuka' re jun ache re' can ruchibil re Jes'us re aj pa tenemit Nazaret, xcha' chique. 72Pero re Pedro can xutz'uc chic tzij jun bey. Roma reja' xubij: Can chach re Dios nimbij che yen man ntaman-ta rach re jun ache re'. 73Y xa c'a ba' chic che', ja chic re quimalon-qui' chire' xe'jelom-pa riq'uin re Pedro y xquibij cha: Can katzij-va che rat yat jun chique re ru-disc'ipulos re Jes'us. Xaxe riq'uin re a-forma yach'o nik'alajin che can yat ruchibil-va, roma re aj-Galilea can quire' niquiban ye'ch'o. 74Pero re Pedro xubij: Yen man ntaman-ta rach re ache re'. Can chach re Dios nimbij chiva che man ntaman-ta rach. Y vo xa man katzij-ta re nimbij, tika c'a re castigo pa nue'. Y can jare' tak xbetzirim-pa re moma'. 75Y jare' tak re Pedro xbeka chuc'o'x re tzij re je'rubin can re Jes'us cha, che tak c'amaje-na titzirim-pa re moma' tak rat oxe-yan bey tabij chique re ye'c'utun chava, che man ataman-ta noch. Y c'are' re Pedro xel-a chire' y can xujek'aj ok'ej.

will be added

X\