San Mateo 17

1Y tak k'axnak chic vaki' k'ij, re Jes'us xuc'uaj-a re Pedro, y xe'ruc'uaj-a chuka' re Jacobo y re Juan y re je ca'e' re' quichak'-qui', xaxe re je oxe' re' re xe'ruc'uaj-a c'a pa rue' jun nema-loma. 2Re Jes'us can xjalataj rutzubal chiquivach re je oxe' ru-disc'ipulos. Re rupalaj can niyiq'uiloj can ancha'l titzu'un re k'ij. Y re rutziak can ancha'l re sakil, roma camas sak xuban. 3Y can c'aja xquitz'at re je oxe' disc'ipulos, ye'tzijon-yan chic riq'uin re Jes'us re je ca'e' achi'a' quibini'an Mois'es y El'ias. Re achi'a' re' je rusamajela' re Dios re xe'c'ue' ajuer can. 4Y c'are' tak re Pedro xubij-apo cha re Jes'us: Ajaf, vova' otz kabanon. Vo xa rat najo', nakaban oxe' ch'utak jay. Jun avichin rat, jun chin re Mois'es y jun chin re El'ias. 5Tak re Pedro can c'a nich'o riq'uin re Jes'us, can jare' tak re disc'ipulos re' xquitz'at che c'o jun nube re camas sak y can nuchup pan avach re xpiso quichin. Y chupan re nube re' c'o Jun xch'o-pa y xubij: Jare' re Nuc'ajol y yen camas ninjo', yinqui'cot riq'uin y can tic'axaj c'a re rutzij. 6Y tak re je oxe' disc'ipulos xquic'axaj quire', xe'xuque' y re nic'aj tak quivach c'a pan ulef xka-va-ka. Y camas xquixibij-qui'. 7Y re Jes'us xjelon-apo quiq'uin re ru-disc'ipulos, xe'rutz'am y xubij chique: Quixyacataj y man tixibij-ivi'. 8Tak re disc'ipulos xe'tzu'um-pa, man jun chic xquitz'at, xa rion chic re Jes'us c'o. 9Y tak reje' je'xulam-pa chach re loma, re Jes'us xuchalabej chique re ru-disc'ipulos che man jun anchok cha tiquitzijoj-va re xquitz'at. Yex otz xtitzijoj pero tak yen re xinalax chi'icojol xinc'astaj-yam-pa chiquicojol re anama'i', c'ajare' tak ruc'amon che yex xtitzijoj, xcha' chique. 10Re je oxe' disc'ipulos re' can jare' tak xquibij cha re Jes'us: Yoj k'axnak pa kave' che can ja rat re Cristo re takom-pa roma re Dios. ??Pero anchique roma tak re achi'a' re je'atamayon re ley kachin yoj re yoj israelitas niquibij che nabey tiene que ne'ka re El'ias, y c'ajare' tak xte'ka re Cristo? 11Y re Jes'us xubij chique: Can katzij-va che re El'ias nipa nabey y can nuban rubiyal ronojel. 12Pero yen nimbij chiva che re El'ias re' xpa-yan y man xquinabej-ta anchique re'. Xa camas xquiban-a cha. Can andex xquijo' quire' xquiban-a cha. Y can quire' chuka' yen re xinalax chi'icojol, jec'o ye'bano chua che nink'asaj tijoj-pokonal, xcha' re Jes'us. 13Y c'ajare' tak re disc'ipulos xk'ax pa quive' che re Jes'us chij re Juan Bautista xch'o-va. 14Tak re Jes'us y re je oxe' ru-disc'ipulos xe'bapon-ka anche' camas je q'uiy vinak quimalon-qui', c'o c'a jun ache re xbeka riq'uin re Jes'us y xbexuque' chach. Re ache xubij cha re Jes'us: 15Ajaf, tajoyovaj rach re nuc'ajol, roma reja' camas nutaj pokan pa ruk'a' re jun yabil rubini'an ataque, y camas q'uiy bey tzekenak pa k'ak' y pa tak ya'. 16Xinc'am-yam-pa y xinya' chiquivach re a-disc'ipulos chin che niquic'achojsaj-ta, pero man xe'tiquir-ta xquic'achojsaj, xcha' re ache. 17Y re Jes'us jare' tak xubij: Man jun vinak chupan re tiempo re' re rubanon-ta confiar-ri' riq'uin re Dios. Xa conojel je'satzanak. Man tinojij che yen nojel tiempo xquinc'ue' iviq'uin. Y chuka' man tinojij che nojel tiempo xquixincoch'. Tic'ama-pa re ala' vova', xcha' re Jes'us. 18Re Jes'us chin che xuc'achojsaj re ala', cof xch'o cha re itzel esp'iritu chin che tel-a riq'uin re ala'. Y can ja chupan re hora re' tak xc'achoj-a re ala' cha re ruyabil roma xel-a re itzel esp'iritu riq'uin. 19Y tak re Jes'us y yoj re yoj ru-disc'ipulos kayon chic yojc'o, xojpa yoj xkac'utuj cha re Jes'us: ??Anchique roma yoj man xojtiquir-ta xkalisaj-a re itzel esp'iritu? 20Y re Jes'us xubij chaka: Man xixtiquir-ta xilisaj roma man can-ta ibanon confiar-ivi' riq'uin re Dios. Y can katzij nimbij chiva: Xa riq'uin-ta niban confiar-ivi' riq'uin re Dios, astapa' ancha'l-ta jun ch'et semilla chin mostaza, xa riq'uin re', yex can yixtiquir nibij cha re jun loma re' che tel-a vova' y tak'ax jun chic lugar, can xtak'ax-va. Can man jun cosa re man-ta xquixtiquir xtiban, xa riq'uin-ta ba' niban confiar-ivi' riq'uin re Dios. 21Jac'a re jun rach esp'iritu re' ndel, pero vo xa yex niban ayuno y oraci'on, xcha' chaka. 22Y tak re Jes'us y yoj re yoj ru-disc'ipulos xojapon-yan pa Galilea, xpa re Jes'us xubij chic jun bey chaka: Yen re xinalax chi'icojol, can xquinjach-va pa quik'a' re vinak. 23Can xquinquimisas-va, pero pa rox k'ij xquinc'astaj-pa chiquicojol re anama'i'. Y tak yoj xkac'axaj quire', camas xojbison. 24Y jac'a tak re Jes'us y yoj re yoj ru-disc'ipulos xojapon pa Capernaum, re ye'mola ruchi' re mero re nic'atzin pa rachoch re Dios, re tiene que niquitoj conojel achi'a', can xe'bapon chuka' riq'uin re Pedro y xquic'utuj cha: ??La nutoj como re i-Maestro re mero re nic'atzin pa rachoch re Dios? 25Y re Pedro xubij: Ja', reja' can nutoj. Y tak re Pedro xapon pa jay, ja re Jes'us jare' re xch'o-pa nabey y xubij cha: Sim'on Pedro ??andex nanojij rat? ??Re reyes vova' chach re ruch'ulef, anchok chique como niquic'utuj-va re impuesto? ??La ja como chique re cajc'ual-ka reje' o la ja como chique re xa man je cajc'ual-ta? xcha' re Jes'us. 26Xpa re Pedro xubij cha re Jes'us: Re reyes vova' chach re ruch'ulef xa ja chique re man je cajc'ual-ta niquic'utuj-va re impuestos, xcha'. Y re Jes'us can jare' xubij: Yen man ruc'amon-ta che nintoj re impuesto, roma yen can yin Ruc'ajol re Dios. 27Pero vo xa man nakatoj-ta, q'uiba' man nak'ax-ta pa quive' anchique roma tak man nakatoj-ta. Mare' mejor cabiyin-ka pa ya' chutz'amic car. Y re nabey car xtatz'am, tajaka' pa ruchi' y chire' xtavel re mero re ndoc chin che na'ya' can chique re molay-mero re ndoc pa rachoch re Dios. Re mero re' nuban chin che natoj can re avichin rat y re vichin yen chuka', xcha' re Jes'us cha re Pedro.

will be added

X\