San Mateo 14

1Chupan re tiempo re' re Herodes re nibano gobernar xuc'axaj che re Jes'us camas elinak rutzijol chiquicojol re vinak. 2Y re Herodes xubij chique re ye'samaj riq'uin: Re Jes'us xa ja re Juan Bautista re xc'astaj-pa chiquicojol re anama'i'. Mare' tak c'o poder pa ruk'a' chin q'uiy milagros nitiquir ye'rubanala'. 3Roma ja re Herodes re xbin che tiquitz'ama-pa re Juan. C'are' xuxim che cadena y xuya' pa c'arcel. Re Herodes quire' xuban roma re ixok rubini'an Herod'ias re c'o riq'uin, xa ruxayil re Felipe re ruch'alal re Herodes. 4Re Juan xtz'am roma rubin cha re Herodes: Man otz-ta abanon roma aconak-ka avxayil re Herod'ias re ruxayil re avch'alal rubini'an Felipe. 5Y xa roma re' re Herodes can rujovan-va che nuquimisaj-ta re Juan, pero can nuxibij-ri' chiquivach re vinak, roma re vinak can quitaman che re Juan Bautista can jun rusamajel re Dios re nibex profeta cha. 6Y chupan re k'ij tak re Herodes xtz'akater chic jun rujuna', xuban jun namak'ij, y chupan re namak'ij re' re xtan ral re Herod'ias xajo' chach re Herodes, y re Herodes camas xka chach re xajoj re xuban re xtan. 7Y mare' re Herodes can xuban jurar chach re ral re Herod'ias che xabandex re nrajo' can xtuya-va cha. 8Pero tak re xtan xya-yan-a runa'oj roma re rute' c'ajare' tak xubij cha re Herodes: Re ninjo' yen ja re rujalom re Juan Bautista, y naya-pa chinoch vova' chach jun plato. 9Y re Rey Herodes xbison-ka tak xuc'axaj quire', pero como can rubanon chic jurar cha, che xabandex xterajo' can xtuya-va y roma chuka' can chiquivach re jec'o riq'uin chach mesa tak xubij-va cha, reja' xubij che tic'am-pa re rujalom re Juan Bautista cha re xtan. 10Y mare' tak xutak-a rutzaq'uisic rujalom re Juan Bautista chire' pa c'arcel. 11Y c'are' xc'am-pa re rujalom cha re xtan chach jun plato, y re xtan xbo'rjacha' pa ruk'a' re rute'. 12Y c'are' xe'bapon re ye'tzekelben chin re Juan, chin xquic'uaj-a re ru-cuerpo y xbequimuku' can. Y re je tzekelbey chin re Juan xbequitzijoj cha re Jes'us re xbanataj. 13Y re Jes'us can xe xuc'axaj-a re xbanataj, xba, y chuka' yoj re yoj ru-disc'ipulos xojba. Xojoc-a pa jun canoa y xojak'ax c'a juc'an chic-apo ruchi-ya', y c'a pa jun lugar naj xojbo-va. Re jun lugar re' je manak vinak, pero tak re vinak xquic'axaj-a, chacakan c'a xe'el-a re pa tak tenemit chin che xe'bapon c'a chupan re lugar re anche' napon-va re Jes'us. 14Y tak re Jes'us xka can chupan re canoa chire' chuchi-ya', xutz'at che camas chic je q'uiy vinak re je'yabeyon richin y reja' camas xujoyovaj quivach re vinak re'. Y can xe'ruc'achojsaj re ye'yavaj re jec'o chiquicojol. 15Y tak xk'ak'ij-yan-ka chupan re jun k'ij re', yoj re yoj ru-disc'ipulos xojelon-apo riq'uin y xkabij cha: Vova' je manak vinak y xa xk'ak'ij-yan-ka. Ca'taka-a re vinak re' chin che ye'ba pa tak cocoj tenemit re jec'o nakaj chin te'quilok'o' quivay chire', xojcha' cha. 16Pero re Jes'us xubij chaka: Manak tuk'aj che ye'ba y c'aja-ta re' xtiquivel quivay, tiya' quivay yex. 17Y yoj xkabij cha: Yoj xe vo'o' vay y ca'e' car c'o kaq'uin, y re' man xque'ruban-ta, xojcha' cha. 18Pero re Jes'us xubij chaka: Tic'ama-pa vova'. 19Y jare' tak reja' xubij che que'tz'uye' conojel re vinak pa rue' re sabana. Y c'are' reja' xe'ruli'ej pa ruk'a' re vo'o' vay y re ca'e' car, xtzu'un chicaj y xutioxij cha re Dios. C'are' xe'rupar y xuya-a chaka yoj re yoj ru-disc'ipulos y yoj xkajachala' chiquivach re vinak. 20Can conojel jabal xe'va'. Can man jun re man-ta xva'. Y c'a c'o doce chacach nojnak re xuban sobra. 21Y re xe'va' jec'o la'k vo'o' mil achi'a', jac'a re ixoki' y re ac'ola' man xe'vejelax-ta. 22Y jare' tak re Jes'us xubij chaka yoj re yoj ru-disc'ipulos che kojoc-a chupan re canoa y kojba c'a juc'an-apo ruchi-ya', che yojnabayaj-a chach, roma reja' c'a ye'ruban-na can despedir re vinak. 23Y tak xe'ruban-yan can despedir re vinak, rion c'a xjote-a pa rue' re loma chubanic orar. Y chire' c'a c'o-va tak xoc-ka re ak'a'. 24Y re canoa re anche' yojbinak-va yoj re yoj ru-disc'ipulos pa nic'aj chic cha re ya' c'o-va, pero re ya' camas nubolk'otela-ri' y man nuya-ta k'ij che nibiyin re canoa. Roma camas cak'ik', mare' man nuya-ta k'ij cha che choj nibiyin, xa nutzalaba'. 25Y tak nisakar-yam-pa, re Jes'us binak charakan pa rue-ya', chin niba-apo kaq'uin. 26Pero tak yoj re yoj disc'ipulos xkatz'at che c'o jun pitinak charakan pa rue-ya', xsatz kac'o'x y xkabij: !!La' jun xibinel! xojcha'. Y cof xojsiq'uin roma camas kaxibin-ki'. 27Pero re Jes'us cha'nin xch'o-pa chaka, y xubij: Man tixibij-ivi'. Xa ja yen re Jes'us, xcha' chaka. 28Y tak re Jes'us pitinak pa rue' re ya', can jare' tak re Pedro xubij-apo cha re Ajaf: Vo xa ja rat, can tabana' c'a chuka' chua yen che yimbiyin pa rue-ya' chin yimba-apo c'a anche' yatc'o-va, xcha-apo re Pedro cha re Jes'us. 29Y re Jes'us xubij-pa cha re Pedro: Catampa c'a. Y re Pedro can jare' xka-ka pa canoa y nibiyin c'a pa rue' re ya' chin niba-apo c'a anche' c'o-va re Jes'us. 30Xa jac'a tak xutz'at che camas cak'ik', xuxibij-ri'. Y tak xuna' can niba-ka chuxe' re ya', c'are' cof xsiq'uin y xubij: !!Ajaf, quinacola'! 31Y re Jes'us can jare' cha'nin xutz'am re Pedro y xubij cha: ??Anchique roma man can-ta xaban confiar-avi' viq'uin? xcho'x re Pedro roma re Jes'us. 32Y tak reje' xe'jote-yan-apo chupan re canoa, re cak'ik' xtane-ka. 33Y konojel re yojbinak chire' pa canoa can jare' tak xkaya' ruk'ij re Jes'us y xkabij cha: C'aja vocame c'a xkatz'at che katzij che can ja-va rat re yat Ruc'ajol re Dios. 34Y c'are' xojak'ax pa rue' re lago re' y xojapon chupan re lugar rubini'an Genesaret. 35Y tak xtamax rach re Jes'us chire' coma re achi'a', reje' xquilisaj rutzijol cha'nin re pa tak lugar re jec'o chunakaj re quitenemit, y re vinak xe'quic'amala-pa re quiyava'i'. 36Y re yava'i' re' can niquic'utula' utzil cha re Jes'us che tuya' k'ij chique che astapa' xaxe ruchi-rutziak niquitz'am chin ye'c'achoj. Y can quire-va xbanataj. Conojel re yava'i' re xe'tz'amo ruchi-rutziak re Jes'us can xe'c'achoj cha re quiyabil.

will be added

X\