San Mateo 12

1Y chupan re tiempo re' pa jun k'ij chin uxlanen, re Jes'us y yoj re yoj ru-disc'ipulos xojak'ax chupan jun ulef ticon trigo chach. Y yoj re yoj disc'ipulos xe'kach'upula' rue-trigo chin xkataj, roma camas nich'umun kapan. 2Y re achi'a' fariseos xojquitz'at che quire' katz'amon rubanic, mare' xquibij cha re Jes'us: Ca'tz'eta' re a-disc'ipulos roma man otz-ta ye'tajin chubanic. Can man ruc'amon-ta che ye'samaj chupan jun k'ij chin uxlanen ancha'l re k'ij re'. 3Pero re Jes'us xubij chique: Yex can ibanon leer re tz'iban can chij re xquiban re David y re ruchibil ajuer can, tak camas xch'umun quipan. 4Re David xba chucanoxic vay chire' pa rachoch re Dios, y can ja re lok'olaj tak xcana-vay re xe'beya-pa cha. Y re xcana-vay re' xaxe re sacerdotes re ye'tijo richin. Pero reja' xutaj y chuka' re je'binak riq'uin can xquitaj. Pero astapa' reje' quire' xquiban manak quimac xel chach re Dios. 5Yen ninojij che yex can ibanon-va leer chuka' re nubij chupan re ley chin re Mois'es. Y chuka' can itaman che re sacerdotes can ye'samaj-va pa rachoch re Dios chupan re k'ij chin uxlanen y reje' man xajan-ta tak quire' niquiban. 6Y vocame, yex nitz'at che c'o Jun vova' re c'o m'as ruk'ij que chach re rachoch re Dios. 7Xe-ta yex itaman-ta andex ndel-va che tzij re nubij chupan re ruch'abal re Dios, man-ta xibij che re nu-disc'ipulos man otz-ta re ye'tajin chubanic. Roma chupan re ruch'abal re Dios nubij: Re m'as nika chinoch yen ja-ta che yex yixjoyovan, que chach ye'sujula' chicop je'quimisan chinoch. Quire' nubij re Dios. 8Y jac'a yen re xinalax chi'icojol re Rajaf re k'ij chin uxlanen, pa nuk'a' yen c'o-va chin nimbij andex otz che nimban chupan re k'ij re'. 9Y tak xtzolaj-yam-pa re Jes'us y chibil chuka' yoj re yoj ru-disc'ipulos, xojba chupan re nema-jay re anche' nitzijos-va re ruch'abal re Dios re nibex sinagoga cha. 10Y chire' chiquicojol re vinak re quimalon-qui', c'o jun ache chake'j jun ruk'a'. Xe'pa re vinak re' xquic'utuj cha re Jes'us: ??Ruc'amon como che nic'achojsas jun niyavaj pa jun k'ij chin uxlanen? Quire' re xquibij cha roma niquijo' ye'yacataj chij y c'are' niquisujuj. 11Xpa re Jes'us xubij chique: C'o-ta jun chiva yex achi'a' re c'o-ta jun ru-oveja y nitzak-ta pa jun pozo chupan jun k'ij chin uxlanen, ??andex-ta como nuban riq'uin? ??La xaxe-ta como tal quire' nuya' can chire'? ??Peja' que man xtuban-ta quire'? Xa can nutaj ruk'ij chin nulisaj-a chupan re pozo. 12C'alapa' jun vinak che man-ta otz niban jun utzil cha, roma camas-va ruk'ij que chach jun oveja. Xa mare' tak can ruc'amon-va che niban re otz tak banabal chupan jun k'ij chin uxlanen. 13Y c'ajare' tak re Jes'us xubij cha re ache chake'j ruk'a': Tayuku' la ak'a'. Y re ache can xe xuyuk re ruk'a', can jare' xc'achoj, y can ancha'l re jun chic ruk'a' quire' xuban. 14Y re achi'a' fariseos can xe xquitz'at can che quire' xuban riq'uin re ache niyavaj, xe'ba y xbequimola-qui' chin niquinojij andex niquiban, roma niquijo' niquiquimisaj re Jes'us. 15Y tak re Jes'us xunabej re niquinojij chij xel-a chire'. Y camas je q'uiy vinak xe'tzake-a chij. Y can ye'ruc'achojsaj conojel re ye'yavaj. 16Pero reja' camas nuchalabej-a chique re ye'ruc'achojsaj-a che man tiquilisaj rutzijol che ja reja' re xc'achojsan-a quichin cha re quiyabil. 17Chin quire' can nibanataj re rubin can re Dios cha re Isa'ias re rusamajel re xc'ue' ajuer can, re xbex profeta cha. Y re rutz'iban can reja' ja quire' nubij: 18Jare' re Nusamajel re ncha'on. Yen camas ninjo' reja', can niqui'cot-va re v'anma riq'uin. Can xtinya-pa chuka' re nu-Esp'iritu pa rue', y reja' xtutzijoj chiquivach re vinak re man yinquiniman-ta, y re xtutzijoj reja' ja re andex nic'atzin-va re c'aslen choj. 19Man xtuban-ta ayoval, man xturak-ta ruchi' roma ruyoval, y mana-ta chij reja' mismo xtuya-va rutzijol chiquivach re vinak pa tak calles. 20Y astapa' re ruc'aslen jun vinak ancha'l-ta jun aj cotoquic rij, reja' can man xtuk'aj-ta. Chuka' vo xa re ruc'aslen jun vinak ancha'l-ta jun rutza'n si' nibuku roma nichup-yan-ka, reja' can man xtuchup-ta. Y nojel tiempo quire' xtuban-apo, c'a jampa' xtapon re k'ij tak reja' xtuban che xtic'ue' re utzulaj ru-gobierno. 21Y re vinak re c'amaje-na quinquinimaj, can xtic'ue' qui-esperanza che ja reja' re xticola quichin. 22Y c'o c'a jun ache moy y mem ec'uan-apo chach re Jes'us, y reja' quire' rubanon roma c'o jun itzel esp'iritu riq'uin. Y re Jes'us xulisaj-a re itzel esp'iritu riq'uin re ache. Can xuban cha che xch'o y xtzu'un. 23Y mare' conojel re vinak can anchique-la xquina' tak xquitz'at y niquibila': ??Mana-ta como re' re Cristo re rey-rumam can re David re bin che nitak-pa roma re Dios? 24Pero tak re achi'a' fariseos xquic'axaj re niquibij re vinak chij re Jes'us, reje' xquibij: Re Jes'us ye'rulisaj itzel tak esp'iritu pero xa pa rube' re Beelzeb'u re quijoval re itzel tak esp'iritu. 25Pero re Jes'us can rutaman re andex niquinojela' re achi'a' fariseos pa tak c'anma, mare' reja' xubij chique: Vo xa re vinak chin jun naci'on man niquinojij-ta y ca'e' quivach niquiban, nipa ayoval chiquicojol. Y re' man otz-ta, roma nuban cha re naci'on che nitzak. Y quire' chuka' vo xa jun tenemit o vo xa jun familia pa jay, vo xa c'o ayoval chiquicojol y man chic otz-ta niquitz'at-qui', xa can xque'q'uis. 26Y quire' chuka' nibanataj riq'uin re Satan'as, vo xa ye'rukotaj-a re itzel tak esp'iritu re jec'o riq'uin, can ndel che tzij che rion reja' nic'ue' can, roma can chij reja' mismo niyacataj-va-ka, y vo xa rion xtic'ue' can, can man nitiquir-ta nuban gobernar. 27Yex nibij chuij, che yen pa rube' re Beelzeb'u tak yintiquir ye'nlisaj re itzel tak esp'iritu, yex quire' ninojij chuij ??y andex como nibij chiquij re ye'tzekelben ivichin? Roma reje' ye'tiquir chuka' ye'quilisaj re itzel tak esp'iritu. ??Anchique como ya'yon poder chique reje' chin ye'tiquir chuka' niquiban quire'? Mare' ja re ye'tzekelben ivichin jare' re ye'sekresan che man otz-ta re nibij yex. 28Yen yintiquir ye'nlisaj itzel tak esp'iritu roma can ja re ru-Esp'iritu re Dios re c'o viq'uin. Xa can xbeka-yan re k'ij che conojel can ruc'amon che niquinimaj rutzij re Dios y ye'c'ue' pa ruk'a' reja'. 29Y re vinak re nrajo' nelak'-a pa rachoch jun ache re camas ruchuk'a', nabey nuxim ruk'a-rakan re ache, y c'are' nitiquir nucanoj-a ronojel re nrajo' ye'ruc'uaj-a. 30Mare' re vinak re man nrajo-ta nic'ue' viq'uin, xa ja riq'uin re Satan'as nrajo' nic'ue-va. Y anchique vinak re man nuban-ta re nusamaj, xa nuyoj re nusamaj. 31Y mare' nimbij chiva: Re mac y re itzel tak tzij re ye'quibila' re vinak chin niquiyok' rube' re Dios, xa can ye'cuyutaj-va re quimac. Jac'a vo xa niquiyok' re Esp'iritu Santo, can man xque'cuyutaj-ta re quimac. 32Y xabanchique vinak re man otz-ta nich'o chuij yen re xinalax chi'icojol, can nicuyutaj re rumac. Jac'a re anchique man otz-ta nich'o chij re Esp'iritu Santo, can man xticuyutaj-ta rumac re tiempo yojc'o-va vocame, y ni xe-ta chupan re tiempo re chakavach-apo. 33Y tak jun che' otz, can otz re rach nuya', y re che' man otz-ta, can man otz-ta chuka' rach nuya'. Mare' jun che' ja tak nuya' rach jare' tak nik'alajin che otz o man otz-ta. 34Y yex xa yix ancha'l itzel tak cumatz, mare' man yixtiquir-ta ninojij y nibij cosas otz, roma xa ja re etzelal c'o iviq'uin. Roma jun vinak can ja re jec'o pa r'anma jare' re nuban y nubij. 35Jun utzulaj ache can ja re otz tak cosas jare' re nubij, roma can ja re otz nunojij pa r'anma. Jac'a re mal ache ja re itzel tak cosas nubij, roma jare' re nisamaj pa r'anma. 36Y yen nimbij chiva che chupan re k'ij tak re Dios xtuban juzgar, re vinak re xe'bin re tzij re manak rajkalen, ja reje' re xtika re castigo pa quive', quire' xtiban chique roma ronojel re tzij re manak rajkalen xe'quibila'. Jun che' ja tak nuya' rach jare' tak nik'alajin che otz o man otz-ta. 37Re vinak re ye'bin otz tak tzij, jare' re nibano chique che manak quimac ndel chach re Dios. Jac'a re ye'bin re tzij man otz-ta, jare' re nibano chique che c'o quimac ndel chach re Dios, tak reja' xque'ruban juzgar. 38Jec'o chique re achi'a' re je'atamayon re ley kachin yoj re yoj israelitas y jec'o chuka' chique re achi'a' fariseos xe'ch'o-apo cha re Jes'us, y xquibij: Maestro, nakac'utuj chava che tabana' jun se~nal chakavach. Chin quire' can nac'ut chakavach che can ja re Dios re takayom-pa avichin. 39Pero re Jes'us xubij chique: Yex re yixc'o chupan re tiempo vocame camas yix mal tak vinak, y can man ninimaj-ta re Dios. Can nijo' nitz'at che yen nimban-ta jun se~nal chin quire' yininimaj. Pero mana-ta re nijo' yex re xtibanataj. Xa can xe re xbanataj riq'uin re jun ache re xubini'aj Jon'as, re rusamajel re Dios re xc'ue' ajuer can re xbex profeta cha, xaxe re se~nal re' re niya' chiva yex. 40Roma re Jon'as oxe' k'ij y oxe' ak'a' xc'ue' chupan jun moma' car. Y quire' chuka' re se~nal re ninya' yen chivach. Yen re xinalax chi'icojol, xquinc'ue' chuka' oxe' k'ij y oxe' ak'a' chuxe' ulef. 41Y tak xtapon re k'ij tak re Dios xque'ruban juzgar re vinak re jec'o vocame, xque'c'astaj-pa re vinak re xe'c'ue' ajuer can pa tenemit N'inive y xtiquibij che man otz-ta xquiban re vinak re jec'o chupan re tiempo vocame, roma man xinquinimaj-ta. Roma re vinak re xe'c'ue' pa tenemit N'inive can xe xquic'axaj re ruch'abal re Dios re xutzijoj re Jon'as chique, can jare' tak xquinimaj y xjalataj quic'aslen chach re Dios. Y vocame yinc'o yen re c'o m'as nuk'ij que chach re Jon'as, y re vinak xa man yinquinimaj-ta, xcha' re Jes'us. 42Y chuka' tak xtapon re k'ij chin xque'ban juzgar re vinak re jec'o vocame, xte'c'astaj-pa re jun reina re xc'ue' pa Sab'a. Re reina re' xtubij che man otz-ta xquiban re vinak re jec'o chupan re tiempo vocame, roma man xinquinimaj-ta. Roma tak xc'ue' re jun ixok re', camas naj xbiyin chin quire' xbo'rtz'eta' y xbo'rc'axaj re namalaj na'oj re c'o riq'uin re Rey Salom'on. Y vocame yinc'o yen re c'o m'as nuk'ij que chach re Rey Salom'on re xc'ue' ajuer can, y xa man yinquinimaj-ta re vinak. 43Tak c'o jun itzel esp'iritu ndel-a riq'uin jun vinak, re itzel esp'iritu re' niba pa tak lugares re anche' manak vinak y manak ya', y chire' c'a nucanoj-va jun lugar chin nixulan. Y tak re jun itzel esp'iritu re' manak lugar nuvil chin nixulan, 44reja' nunojij y nubij: M'as otz yintzolaj chic anche' xinel-va-pa, nicha'. Y tak re jun itzel esp'iritu re' nitzolaj chic-apo pa r'anma re vinak anche' elinak-va-a, no'rvila' re r'anma re vinak re' ancha'l jun jay re man jun c'o chupan, y jabal meson rupan y jabal ruvekic banon. 45Y c'are' re itzel esp'iritu re' ye'bo'rc'ama-pa je vuku' chic ruchibil itzel tak esp'iritu re m'as je itzel, y conojel re' ye'oc pa r'anma re vinak. Y re vinak re anchok riq'uin ye'c'ue-va chic jun bey re itzel tak esp'iritu re', m'as c'ayef nuban re ruc'aslen que chach re xuban nabey. Y can quire' xtiquic'alvachij re vinak man otz-ta quic'aslen, re jec'o chupan re tiempo vocame. 46Y re Jes'us can c'a nitzijon quiq'uin re vinak tak xapon re rute' y re je ruch'alal. Reje' niquijo' ye'ch'o riq'uin, pero man xe'oc-ta-apo riq'uin. 47Y c'o jun xbin-apo cha re Jes'us: Re ate' y re je avch'alal yatquiyaben chach-jay. Reje' niquijo' ye'ch'o aviq'uin, xcha-apo cha. 48Pero re Jes'us xubij cha re xbin-apo quire': ??Anchique c'a re nte' y anchique c'a re je vach'alal nanojij rat? 49C'are' re Jes'us xojruc'ut yoj re yoj ru-disc'ipulos y xubij: Ja reje' re je'aconak nte' y je'aconak vach'alal. 50Roma can conojel re ye'bano re nurayij re Nata' Dios re c'o chila' chicaj, ja reje' re je nte', vana' y nchak', xcha' re Jes'us.

will be added

X\