San Marcos 9

1Y chuka' re Jes'us xubij chique re jec'o riq'uin: Can katzij nimbij chiva, che re Dios can xtic'ue' pa kave', chin xkojruban gobernar. Y can xtik'alajin re ru-poder. Y jec'o chiva yex re can man xque'com-ta, xa c'aja tak quitz'eton chic can ronojel re xtibanataj, xcha' re Jes'us. 2Y tak k'axnak chic vaki' k'ij, re Jes'us xaxe re Pedro, re Jacobo y re Juan re xe'ruc'uaj-a pa rue' jun nema-loma. Y re Jes'us xjalataj rutzubal chiquivach re je oxe' ru-disc'ipulos re'. 3Y chuka' re rutziak can xjalataj ru-color. Roma camas rusakil xuban, can ancha'l re sakboch nika pa rue-juyu' y hasta niyiq'uiloj. Y man jun ch'ajoy-tziak re nitiquir-ta nuban quire' rusakil cha re jun tziak re'. 4Y xe'bec'ulum-pa re je ca'e' achi'a' quibini'an El'ias y Mois'es, y ye'tzijon riq'uin re Jes'us. Re achi'a' re' je rusamajela' re Dios re xe'c'ue' ajuer can. 5Y c'are' tak re Pedro xubij-apo cha re Jes'us: Maestro, vova' otz kabanon. Takabana' oxe' ch'utak jay. Jun avichin rat, jun chin re Mois'es y jun chin re El'ias, xcha' cha re Jes'us. 6Re Pedro quire' xubij-apo y man rutaman-ta anchique roma tak xch'o-apo. Xa bin che man bin xe'rubila-apo. Can che je oxe' disc'ipulos camas quixibin-qui'. 7Y jare' tak c'o jun nube xpiso quichin. Y chupan re nube re' c'o Jun re xch'o-pa y xubij: Jare' re Nuc'ajol y yen camas ninjo'. Can tic'axaj c'a re rutzij. 8Pero tak re disc'ipulos xe'tzu'un chic-apo, xquitz'at che xa man jun chic c'o riq'uin re Jes'us. Xa rion chic c'o can. 9Y tak reje' je'xulam-pa chach re loma, re Jes'us xuchalabej chique re ru-disc'ipulos: Che man jun anchok cha titzijoj-va re xitz'at. Yex otz xtitzijoj pero tak yen re xinalax chi'icojol, xinc'astaj-yam-pa chiquicojol re anama'i', c'ajare' tak ruc'amon che yex xtitzijoj, xcha' chique. 10Y reje' can man xquitzijoj-ta re andex xquitz'at, pero niquic'utula' chiquivach andex xrajo' xubij re Jes'us tak xubij che xtic'astaj-pa chiquicojol re anama'i'. 11Y c'are' re je oxe' disc'ipulos xquibij cha re Jes'us: Yoj k'axnak pa kave' che can ja rat re Cristo re takom-pa roma re Dios. ??Pero anchique roma tak re achi'a' je'atamayon re ley kachin yoj re yoj israelitas niquibij che nabey tiene que ne'ka re El'ias, c'ajare' tak xte'ka re Cristo? 12Y re Jes'us xubij chique: Can katzij-va che re El'ias nipa nabey y nuban rubiyal ronojel. Mare' yex man tinojij che man xtibanataj-ta chuka' re je'tz'iban can chupan re ruch'abal re Dios, che yen re xinalax chi'icojol tiene que nink'asaj q'uiy tijoj-pokonal y can man jun nuk'ij xtiban chua. 13Pero yen nimbij chiva che re El'ias re' xpa-yan. Y camas xquiban-a cha. Can andex xquijo' xquiban-a cha. Can ancha'l nubij chupan re ruch'abal re Dios re tz'iban can, xcha' re Jes'us chique. Re El'ias re xunataj re Jes'us xa ja re Juan Bautista. 14Y tak re Jes'us y re je oxe' ru-disc'ipulos xe'bapon quiq'uin re nic'aj chic disc'ipulos, reja' xutz'at che camas je q'uiy vinak re quimalon-apo-qui' chiquij, y chuka' ca'e-oxe' achi'a' je'atamayon re ley kachin yoj re yoj israelitas quitz'amon-qui' che ch'abal quiq'uin re disc'ipulos. 15Conojel re vinak, tak xquitz'at che pitinak re Jes'us, xsatz quic'o'x, y jonanin xe'ba y xquic'utuj ruxnokil-rach. 16Y re Jes'us xuc'utuj chique re ru-disc'ipulos: ??Anchok chij itz'amon-va-ivi' quiq'uin reje'? xcha' chique. 17Pero jun chique re vinak xutz'am-apo rubixic cha re Jes'us: Maestro, xcha' cha. Yen nc'amom-pa re nuc'ajol chava, roma c'o jun itzel esp'iritu riq'uin. Y re itzel esp'iritu re' can mem rubanon cha. 18Y tak m'as nutz'am, xabanchique lugar c'o-va, nutorij pan ulef, y re ruchub can nicubub pa ruchi' y can nukach'ach'ej roray. Y camas chuka' rucojman chic roma quire' ruc'alvachin. Y mare' xinc'utuj utzil chique re a-disc'ipulos chin tiquilisaj re jun itzel esp'iritu re' riq'uin re nuc'ajol. Pero man xe'tiquir-ta, xcha' re ache. 19Y re Jes'us jare' xubij chique: Man jun vinak chupan re tiempo re' re rubanon-ta confiar-ri' riq'uin re Dios. Man tinojij che yen nojel tiempo xquinc'ue' iviq'uin y chuka' man tinojij che nojel tiempo xquixincoch'. Tic'ama-pa re ala' vova', xcha' chique. 20Y xc'am-pa re ala' chach re Jes'us. Pero tak re itzel esp'iritu xutz'at re Jes'us, riq'uin ruchuk'a' xuyiquiquej can re ala' y xutorij pan ulef. Y re ala' nubolk'otela-ri' y nicubub chuka' pa ruchi'. 21Y re Jes'us xuc'utuj cha rutota' re ala': ??Jenipa' tiempo tuc'alvachij-va-pa quire' re ala'? xcha' re Jes'us. Y re tata'aj xubij: Can c'a co'ol tak quire' ruc'alvachim-pa. 22Can q'uiy bey rutorin pa k'ak' y pa tak ya', chin nicom-ta. Pero vo xa rat yatiquir nato', tajoyovaj rach reja', tajoyovaj noch yen chuka' y kojato'. Quire' xubij re tata'aj cha re Jes'us. 23Pero re Jes'us xubij cha re tata'aj: Vo xa rat yatiquir naban confiar-avi' viq'uin che yintiquir ninto' re ac'ajol, can xtibanataj-va re narayij. Pero re' ja rat yatc'o-va, roma re can nuban confiar-ri' tak nuc'utuj, can nibanataj-va re andex nrajo', xcha' re Jes'us. 24Y re rutota' re ala' can jare' xubij: Nimban confiar-vi'. Y chuka' can quinato' chin che m'as-ta xtimban confiar-vi' aviq'uin. Y tak re tata'aj xubij re tzij re', can cof xubij, roma camas nem re bis c'o pa r'anma. 25Tak re Jes'us xutz'at che camas je q'uiy vinak re niquimol-apo-qui', reja' cof xch'o cha re itzel esp'iritu, y xubij cha: Rat re abanon cha re ala' re' che mem y tocon, catel-a y man chic catzolaj-pa riq'uin, xcha' cha. 26Y re itzel esp'iritu nurak ruchi' xel-a riq'uin re ala'. Pero camas xuyiquiquej can. Y re ala' xpune' can pan ulef, can ancha'l jun quiminak. Y mare' je q'uiy vinak xe'bin che re ala' xcom. 27Pero re Jes'us xutz'am ruk'a' y xuyac. Y re ala' can jare' xyacataj-pa. 28Y tak re disc'ipulos jec'o chic quion pa jay riq'uin re Jes'us, xquic'utuj cha: ??Anchique roma yoj man xojtiquir-ta xkalisaj-a re itzel esp'iritu? xe'cha' cha. 29Y re Jes'us xubij chique: Re jun rach esp'iritu re' ndel, pero vo xa yex niban ayuno y oraci'on, xcha' chique. 30Y tak reje' je'elinak chic-pa chire', xe'k'ax pa Galilea. Pero re Jes'us man nrajo-ta che ninabex che reja' nak'ax chire'. 31Roma reja' nrajo' che re ru-disc'ipulos niquitamaj can, mare' xubij chic jun bey chique: Yen re xinalax chi'icojol, can xquinjach-va pa quik'a' re vinak y xquinquiquimisaj. Jac'a tak yin quiminak chic, pa rox k'ij xquinc'astaj-pa chiquicojol re anama'i'. 32Pero re disc'ipulos man xk'ax-ta pa quive' re xbex chique roma re Jes'us. Y niquixibij-qui' niquic'utuj cha andex ndel-va che tzij. 33Y re Jes'us je ruchibil-a re ru-disc'ipulos xe'bapon pa tenemit Capernaum. Y tak c'o chic pa jay, reja' xuc'utuj chique re ru-disc'ipulos. Y yex ??andex re nich'ojela' chivach tak katz'amom-pa bey? xcha' chique. 34Pero re disc'ipulos man xe'k'ajan-ta-apo cha re Jes'us, roma tak je'pitinak po bey, xa xquich'ojela' chiquivach anchique chique reje' re c'o m'as ruk'ij. 35Y re Jes'us xtz'uye-ka. C'are' xe'rayoj-apo che je doce ru-disc'ipulos y xubij chique: Vo xa c'o jun nrajo' che ja reja' re c'o ruk'ij, can tuna-ka-ri' che xa manak ruk'ij y tusuju-ri' chin nuban xabanchique samaj quichin conojel. 36Y re Jes'us xbo'rc'ama-pa jun ch'et ac'ual y xuya' chire' pa quinic'ajal. C'are' xuch'ilej y xubij chique re ru-disc'ipulos: 37Re yacayon vichin pa r'anma y can niqui'cot nuc'ul jun ac'ual ancha'l re', man xe-ta xtuc'ul re ac'ual, xa can xquinruc'ul chuka' yen. Y re nic'ulu vichin yen, man xe-ta chuka' yen re xquinruc'ul, xa can xtuc'ul chuka' re takayom-pa vichin. 38Y re Juan xubij-apo cha re Jes'us: Maestro, yoj xkatz'at jun ache re pan abe' rat ye'rulisaj-va itzel tak esp'iritu, re man kachibil-ta, mare' xkabij cha che man chic tuban re ntajin chubanic. 39Y re Jes'us xubij: Man chic tibij quire' cha, roma vo xa pa nube' yen ye'rubanala' milagros, can nitiquir-va, y man xtijalataj-ta re nunojij y can ja-ta re' xtich'o-ka itzel tak tzij chuij. 40Roma re man ye'tzelan-ta kachin, can kachibil-va-ki' quiq'uin. 41Y re vinak re otz yixquitz'at roma viq'uin yen re Cristo yixc'o-va, astapa' xa ba' rax-ya' re xtiquiya' chiva, can katzij nimbij che can c'o rajal-ruq'uixel xtiquic'ul roma quire' niquiban. 42Vo xa c'o jun vinak re c'a ba-oc quinrunimaj-va y nipa-ta chic jun vinak y nuban cha che nitzak pa mac, re vinak re' man otz-ta re nuban. Y mare' antes che nuban re etzelal re', m'as-ta otz cha reja' che nixim-ta jun moma' aboj chukul y ne'torex can pa mar. 43Mare' vo xa jun ak'a' nibano chava che yamacun, m'as otz che nachoy-a. Roma m'as otz che manak jun ak'a' y yatoc chupan re c'aslen re man niq'uis-ta, que chach c'o-ta che ca'e' ak'a' y yaba pan infierno, anche' c'o-va re k'ak' re man nichup-ta. 44Re lugar re jec'o jut chin niquich'aculaj-ka re ach'acul re man ye'com-ta, y c'o chuka' k'ak' re man nichup-ta. 45Y vo xa jun avakan nibano chava che yamacun, m'as otz che nachoy-a. Roma m'as otz che manak jun avakan y yatoc chupan re c'aslen re man niq'uis-ta, que chach che ca'e' avakan c'o y ya'tetorex can pan infierno, anche' c'o-va re k'ak' re man nichup-ta. 46Re lugar re jec'o jut chin niquich'aculaj-ka re ach'acul re man ye'com-ta, y c'o chuka' k'ak' re man nichup-ta. 47Y vo xa jun anak'avach re nibano chava che yamacun, m'as otz che nalisaj-a. Roma m'as otz che manak jun anak'avach y yatapon chila' riq'uin re Dios, re anche' ja reja' re nibano gobernar, que chach c'o-ta che ca'e' anak'avach y ya'tetorex can pan infierno, 48re lugar re jec'o jut chin niquich'aculaj-ka re ach'acul re man ye'com-ta, y c'o chuka' k'ak' re man nichup-ta. 49Can ronojel chicop re ye'quimisas re ye'suj cha re Dios, ye'tzayex. Quire' chuka' conojel vinak xque'tzayex, pero man riq'uin-ta chic atz'am, xa riq'uin k'ak'. 50Re atz'am camas otz. Pero xe-ta re atz'am niq'uis-ta-a re rutzayil, ??andex como rubanic niban yex chin quire' nitzolaj-ta chic-pa re rutzayil? Man jun. Mare' yex tichajij re ic'aslen, chin quire' man quixoc ancha'l re atz'am re man nitzayin-ta chic, y chuka' manak-ta ayoval chi'icojol, quire' xubij re Jes'us.

will be added

X\