San Marcos 5

1Y re Jes'us y re ru-disc'ipulos xe'bapon juc'an-apo ruchi' re lago, chire' chupan jun lugar rubini'an Gadara. 2Y tak re Jes'us xka can chupan re canoa, can jare' tak xapon jun ache riq'uin, re ache re' elinak-pa anche' je'mukun-va re anama'i' roma c'o itzel esp'iritu riq'uin. 3Re ache re' ja re anche' je'mukun-va re anama'i' re aconak rachoch, y reja' hasta riq'uin cadena man je'tiquirnak-ta quitz'amon, roma camas ruchuk'a'. 4Can q'uiy c'a bey quiximon ruk'a-rakan che cadena, pero xa je'ruk'ajlon y je'rurokch'in can. Can man jun tiquirnak chij. 5Reja' nojel tiempo nibiyaj pa tak k'ayis y chiquicojol re anche' je'mukun-va anama'i', nurakala' ruchi' y nusocola-ri' riq'uin aboj. Can che pak'ij che chak'a' nubanala' quire' re ache re'. 6Y tak reja' xutz'at-pa re Jes'us, c'ac'anaj c'a c'o-va, pero re ache re' jonanin xpa y xbexuque' chach. 7Y jun pa ruchi' xch'o cha re Jes'us y xubij: Rat Jes'us re Ruc'ajol re namalaj Dios, ??anchique roma tak yinanak? Pa rube' re Dios ninc'utuj chava, che man quinach'ujersaj, xcha' cha re Jes'us. 8Re ache xubij quire' roma re Jes'us rubin chic cha re itzel esp'iritu re c'o riq'uin, che tel-a. 9Y xpa re Jes'us xuc'utuj cha: ??Andex abe'? Y reja' xubij-pa: Legi'on, jare' re nube', roma man nayon-ta yen, xa can je q'uiy chuka' re vichibil jec'o. 10Y camas c'a xuc'utuj utzil cha re Jes'us che man que'rulisaj-a chupan re lugar re'. 11Y chunakaj-apo re lugar rubini'an Gadara, c'o jun loma y chire' camas je q'uiy ak ye'va'. 12Y xe'pa conojel re itzel tak esp'iritu re jec'o riq'uin re ache, xquic'utuj utzil cha re Jes'us. Y xquibij cha: Taya' k'ij chaka che yoje'oc chiquipan la ak jec'o chila-apo. 13Re Jes'us can jare' xubij chique che otz. Y re itzel tak esp'iritu can jare' xe'el-a riq'uin re ache y xe'be'oc chiquipan re ak. Re ak camas je q'uiy. Jec'o la'k jun ca'e' mil. Y conojel re ak re' xquitz'am anin chach pe~na, y c'a chupan re lago xe'beka-va. Y conojel re ak re' xe'jik' y xe'com pa ya'. 14Jac'a re ye'chajin quichin re ak re', xe xquitz'at can re xbanataj, xe'numaj y xbequiyala' can rutzijol re pa tenemit y chuka' pa tak juyu'. Y re vinak can xe'pa chin ne'quitz'eta' re xbebex can chique. 15Y tak re vinak re' xe'beka riq'uin re Jes'us, xquitz'at che re ache re xe'c'ue' itzel tak esp'iritu riq'uin, tz'uyul, rucusan rutziak y man nuban-ta chic re ancha'l rubanom-pa. Pero re vinak re' xa xquixibij-qui' tak xquitz'at re ache re'. 16Re vinak re xe'tz'eto re xbanataj riq'uin re ache re xlisas itzel tak esp'iritu riq'uin y re xbanataj quiq'uin re ak, xquitzojola' chique re vinak re je'pitinak chutz'etic re xbanataj chire'. 17Mare' re vinak xquibij cha re Jes'us: Tabana' utzil catel-a chupan re ka-lugar. 18Y jac'a tak ndoc-a re Jes'us pa canoa, re ache re xe'c'ue' itzel tak esp'iritu riq'uin, xuc'utuj utzil cha re Jes'us che tuya' k'ij cha chin niba riq'uin. 19Pero re Jes'us man xrajo-ta. Xa xubij cha: Catzolaj cha'vachoch, y tatzijoj chique re avch'alal che xe'lisas re itzel tak esp'iritu aviq'uin, roma xjoyovax avach roma re Ajaf Dios. 20Y re ache xba y xutz'am rutzijosic re xuban re Jes'us riq'uin reja'. Reja' xutzijoj chique re vinak re jec'o chupan re lugar rubini'an Dec'apolis. Y re vinak camas niquinojela' chij ruc'aslen re jun ache re'. 21Y re Jes'us y re ru-disc'ipulos xe'oc chic-a pa canoa chin xe'k'ax c'a juc'an chic ruchi' re lago. Y tak xe'bapon la juc'an chic ruchi-lago, camas je q'uiy vinak re xquimol-apo-qui' riq'uin. Reja' chunakaj c'a re lago xc'ue-va. 22Xapon chuka' jun ache rubini'an Jairo. Re ache re' c'o jun rusamaj chupan re nema-jay re anche' nitzijos-va re ruch'abal re Dios re nibex sinagoga cha. Jac'a reja' re c'o m'as ruk'ij chire'. Y tak re Jairo xutz'at-apo re Jes'us, can jare' xbexuque' chach. 23Y c'are' reja' xubij cha re Jes'us: Re numi'al niyavaj, y nicom-yan. Tabana' utzil ta'ya' re ak'a' pa rue' chin nicolotaj chach re camic y nic'ase' can, xcha' re ache. Y re ache re' camas xuc'utuj utzil cha re Jes'us. 24Y re Jes'us xba chij. Y je q'uiy chuka' vinak xe'tzake-a chiquij. Y roma camas je q'uiy vinak, can man otz-ta ye'biyin. 25Y chiquicojol re vinak re' binak chuka' jun ixok re c'o jun ruyabil. Re ixok re' doce juna' re nibiyin ruq'uiq'uel y man tanal-ta. 26Reja' rutijon pokan roma binak chic quiq'uin q'uiy doctores y xuq'uis-yan chuka' ronojel ru-mero, chin che nic'achoj-ta, pero re ruyabil xa m'as niyori'. 27Re ixok re' c'o c'a ruc'axam-pa chij re Jes'us. Reja' binak chuka' chiquicojol re vinak re jec'o can chij re Jes'us, y jare' tak xbo'rtz'ama' can ba' rutziak re Jes'us. 28Roma re ixok re' can rubim-pa pa r'anma che xa riq'uin xquintiquir xte'ntz'ama' can ba' rutziak re Jes'us, can yinc'achoj, cha'inak pa r'anma re ixok re'. 29Y can jare' xtane' re nibiyin ruq'uiq'uel. Reja' can xuna' che xc'achoj cha re ruyabil re ruc'alvachin. 30Re Jes'us cha'nin c'a xuna' che c'o jun xuc'achojsaj riq'uin re poder c'o riq'uin. Mare' xtzu'un can chij y xubij chique re vinak: ??Anchique xtz'amo re nutziak? xcha'. 31Pero re disc'ipulos xquibij cha: Rat najo' natamaj anchique xtz'amo re atziak, pero re vova' c'ayef chin natamaj. Ya'tz'at che re vinak yatquipitz' y rat nac'utuj: ??Anchique re xintz'amo? xe'cha' re disc'ipulos cha re Jes'us. 32Pero re Jes'us ye'rutzula' re vinak, nucanoj re anchique xtz'amo re rutziak. 33Y re ixok ruxibin-ri' y nibarbot, roma xa ja reja' re xtz'amo re rutziak re Jes'us pan eval, y can xc'achoj-va cha re ruyabil. C'are' reja' xuque' chach re Jes'us y xubij nojel re andex xuban. 34Y re Jes'us xubij cha re ixok: Numi'al, xac'achoj, roma xaban confiar-avi' viq'uin. Vocame, catzolaj y ca'texulan, roma jumul xac'achoj cha re ayabil ac'alvachim-pa, xcha' cha. 35Y c'a nitzijon re Jes'us riq'uin re ixok, tak jec'o re xe'beka re je'pitinak charachoch re Jairo, re ache re c'o ruk'ij chire' pa nema-jay re anche' nitzijos-va re ruch'abal re Dios re nibex sinagoga cha. Re achi'a' re xe'beka xbequibij cha re Jairo: Re ami'al xa xcom-yan. Manak chic tuk'aj nac'uaj-a re Maestro Jes'us, xe'cha' cha. 36Jac'a tak re Jes'us xuc'axaj-pa, cha'nin xubij cha re Jairo: Man tuxibij-ri' re av'anma roma re xbebex chava. Tabana' confiar-avi' viq'uin, xcha' cha. 37Y re Jes'us xaxe re Pedro, re Jacobo y re Juan re ruch'alal re Jacobo, re xe'ruc'uaj-a. 38Y re Jes'us je ruchibil-a re je oxe' ru-disc'ipulos xe'ba charachoch re Jairo. Y tak xe'bapon, re Jes'us xe'rutz'at che re vinak can je'elinak ch'o'j pa jay, y xe'rutz'at chuka' che can nibiyin ruyi'al-quivach y can ye'siq'uin che ok'ej. 39Tak re Jes'us aconak chic-apo, xubij chique re vinak: ??Anchique roma yixok' y can yixelinak ch'o'j? Re ac'ual xa man quiminak-ta, reja' xa nivar, xcha' chique. 40Pero reje' xa xe'tze'en chij re Jes'us, roma quitaman che re ac'ual xa quiminak chic. Pero re Jes'us xubij chique re vinak che que'el-a. C'are' reja' xe'rucusaj-apo re rute-rutota' re xtan y re je oxe' chic re je'binak chij, chupan re jay re anche' c'o-va re ru-cuerpo re xtan. 41Reja' xutz'am ruk'a' re quiminak y xch'o pa kach'abal yoj re yoj israelitas, y xubij: Talita, cumi. Re ch'abal re' ndel che tzij: Xta, chava rat nimbij-va che cayacataj. 42Can xe xubij quire' re Jes'us, can jare' xyacataj y xbiyin-a re xtan, roma can doce chic rujuna'. Y re jec'o riq'uin, xsatz quic'o'x tak xquitz'at che xyacataj-a y xbiyin-a. 43Pero re Jes'us camas xuchalabej chique che man tiquitzijoj chique re vinak, y chuka' xubij che tiquisuju' ruay.

will be added

X\