San Marcos 3

1Y re Jes'us y re ru-disc'ipulos xe'bapon chic pa nema-jay re anche' nitzijos-va re ruch'abal re Dios re nibex sinagoga cha. Y chiquicojol re vinak re quimalon-qui' chire', c'o c'a jun ache chake'j jun ruk'a'. 2Pero jec'o re ye'tz'eto chin re Jes'us, vo xa nuc'achojsaj-a re ache, chin quire' niquisujuj che re Jes'us xsamaj chupan re jun k'ij chin uxlanen. 3Man riq'uin re' re Jes'us xubij cha re ache chake'j ruk'a': Catak'ax-pa vova' pa nic'aj, xcha' cha. 4Xpa re Jes'us xubij chique re vinak re jec'o chire', che chupan jun k'ij chin uxlanen ja re utzulaj tak banabal re m'as ruc'amon che niban y mana-ta re itzel tak banabal. Y chuka' re m'as ruc'amon ja che nacol jun vinak chach re camic y man naya-ta k'ij cha che nicom, xcha' chique. Pero conojel man jun tzij xquibij. 5C'are' re Jes'us xe'rutzu' conojel re quimalon-qui' chire', y xe'rutz'at che xa quicoversan re c'anma y man niquijo-ta niquinimaj. Mare' reja' camas xbison y itzel chuka' xuna'. C'are' reja' xubij cha re ache chake'j ruk'a': Tayuku' la ak'a'. Y re ache can xe xuyuk re ruk'a', can jare' xc'achoj. 6Y re achi'a' fariseos can xe xquitz'at re', can jare' xbequimola-qui' quiq'uin re ruvinak re Rey Herodes, chin niquinojij andex niquiban, roma niquijo' niquiquimisaj re Jes'us. 7Y re Jes'us xba chuchi' re lago, y chibil re ru-disc'ipulos. Re Jes'us can xtzekelbes coma je q'uiy vinak re jec'o pa tak tenemit chin re Galilea, y coma chuka' re vinak re jec'o pa tak tenemit chin re Judea. 8Reja' can xtzekelbes coma re vinak re xe'pa pa tenemit Jerusal'en. Jec'o re xe'pa pan Idumea, jec'o chuka' xe'pa c'a juc'an chic-apo ruchi' re rakan-ya' Jord'an. Xtzekelbes chuka' coma re vinak re xe'pa pa Tiro y Sid'on y re xe'pa chuka' chiquinakaj re ca'e' tenemit re'. Can conojel re vinak re xe'beka riq'uin re Jes'us, xe'pa roma quic'axam-pa re milagros re ye'rubanala' re Jes'us. 9Y roma can je q'uiy vinak re ye'beka riq'uin, re Jes'us xubij chique re ru-disc'ipulos che tiquibana' listo jun canoa nakaj-oc, che vo xa re vinak camas niquipitz', reja' ndoc chupan re canoa re'. 10Re Jes'us can je q'uiy re je'ruc'achojsan chic. Pero roma can conojel re je yava'i' niquijo' chuka' che ye'c'achojsas roma re Jes'us, mare' can ye'vich'o-qui' chij re Jes'us chin niquitz'am-apo re rutziak, chin quire' ye'c'achoj cha re quiyabil. 11Y re itzel tak esp'iritu tak niquitz'at re Jes'us, niquixucubala-qui' chach y jun pa quichi' niquibij: Ja rat re Ruc'ajol re Dios, ye'cha' cha. 12Pero re Jes'us nubila' chique: Man titzijoj che ja yen re Ruc'ajol re Dios. 13Re Jes'us xjote' c'a-a pa rue' re loma y xe'rayoj je q'uiy achi'a'. Y can ja reja' mismo re xvayon quichin, y re achi'a' re' can xe'ba riq'uin. 14Je doce re xe'rucha' chin ye'oc ruchibil y chin che ye'rutak-a chuka' chutzijosic re ruch'abal re Dios. 15Y can xuya-a chuka' poder chique chin ye'tiquir ye'quic'achojsala' yava'i', y che ye'quilesala' itzel tak esp'iritu. 16Re je doce ap'ostoles re xe'rucha' re Jes'us, ja re Sim'on re xubij chuka' Pedro cha. 17Re Jacobo y re Juan, re je ruc'ajol re Zebedeo, re xubij chuka' Boanerges chique; be'aj re ndel che tzij che cha'nin nipa quiyoval. 18Re Andr'es, re Felipe, re Bartolom'e, re Mateo, re Tom'as, y chuka' re Jacobo re ruc'ajol re Alfeo, y chuka' re Tadeo, y re jun Sim'on re c'o quiq'uin re achi'a' re je richin re jun partido re nibex cananista chique. 19Y re Judas Iscariote re xjacho chin re Jes'us. Y c'are' re Jes'us y re ru-disc'ipulos xe'ba pa jun jay. 20Pero roma camas je q'uiy vinak re xquimol chic-apo-qui' jun bey chiquij re Jes'us y re ru-disc'ipulos, can man ye'tiquir-ta ye'va'. 21Y re ruch'alal re Jes'us xquinabej-pa. Y xe'bapon chin ne'quic'ama-pa, roma reje' xquinojij che re Jes'us xch'ujer. 22Y re achi'a' re je'atamayon re ley kachin yoj re yoj israelitas re je'pitinak pa tenemit Jerusal'en, jec'o-apo re anche' c'o-va re Jes'us. Y niquitzojola' chiquivach che re Jes'us c'o re Beelzeb'u riq'uin, re quijoval re itzel tak esp'iritu. Y ja re Beelzeb'u re niyi'o poder cha, chin quire' nitiquir ye'rulisaj re itzel tak esp'iritu. 23Y mare' re Jes'us xe'rayoj che xtzijon quiq'uin, y riq'uin ejemplos xch'o-va chique. Reja' xubij: Re Satan'as man jun bey nuban che ja reja' mismo re nilisan-a quichin re rusamajela'. 24Roma vo xa re vinak chin jun naci'on man niquinojij-ta y ca'e' quivach niquiban, nipa ayoval chiquicojol. Y re' man otz-ta, roma nuban cha re naci'on che nitzak. 25Y quire' chuka' pa jun jay, vo xa c'o ayoval chiquicojol y man junan-ta quivach, can xque'q'uis. 26Y mare' re Satan'as man jun bey nuban-ka ayoval quiq'uin re rusamajela'. Man otz-ta che chij reja' mismo niyacataj-va re ayoval. Roma vo xa quire' nuban, rion nic'ue' can y cha'nin niq'uis. 27Quire' chuka' re nrajo' nelak'-a pa rachoch jun ache re camas ruchuk'a', nabey nuxim ruk'a-rakan re ache, y c'are' nitiquir nucanoj-a ronojel re nrajo' ye'ruc'uaj-a. 28Y tic'axaj jabal re ch'abal re xtimbij chiva vocame, che ronojel re mac re ye'quibanala' re vinak re je'alaxnak chach re ruch'ulef, y ronojel re itzel tak tzij re ye'quibila' re vinak chin niquiyok' rube' re Dios, xa can ye'cuyutaj-va re quimac. 29Pero re vinak re niyok'o chin re Esp'iritu Santo, can man xticuyutaj-ta rumac, xa can xtukalej re rumac chin nojel tiempo. 30Re Jes'us xubij quire' chique re achi'a' je'atamayon re ley kachin yoj re yoj israelitas, roma reje' niquibij chij re Jes'us che c'o itzel esp'iritu riq'uin. 31Y re rute' y re je ruch'alal re Jes'us xe'pa anche' c'o-va reja'. Pero man xe'oc-ta-apo riq'uin. Xaxe xquitak rubixic cha che niquijo' ye'ch'o riq'uin. 32Y re vinak re je'tz'uyul-apo riq'uin re Jes'us xquibij cha: Re ate' y re je avch'alal yatquiyaben chach-jay, y niquijo' ye'ch'o aviq'uin. 33Pero re Jes'us xubij chique re vinak re quimalon-qui' riq'uin: ??Anchique c'a re nte' y re je vach'alal ninojij yex? 34Y re Jes'us xe'rutzu' conojel re je'tz'uyul-apo riq'uin y xubij chique: Ja reje' re je'aconak nte' y je'aconak vach'alal. 35Roma can conojel re ye'bano re nrajo' re Dios, jare' re ye'oc nte', vana' y nchak', xcha' re Jes'us.

will be added

X\