1 Y tak xsakar-pa chupan re k'ij re', re principal tak sacerdotes xquimol-qui' je quichibil-a re rejeta'k tak achi'a' re c'o quik'ij y re achi'a' je'atamayon re ley kachin yoj re yoj israelitas. Y ja achi'a' re' re pa camon ye'bano juzgar, y can conojel reje' xquimol-qui' chin xquinojij andex niquiban cha re Jes'us, y yach'on tak xquic'uaj-a y xbequijacha' pa ruk'a' re ache nibano gobernar rubini'an Pilato. 2 Y jare' tak re Pilato xuc'utuj cha re Jes'us: ??Ja rat re qui-Rey re israelitas? Y re Jes'us xubij: Ja', ja quire', can ancha'l re xabij. 3 Y re principal tak sacerdotes, jun quichi' niquiban-apo cha re Pilato, chin niquisujuj re Jes'us. 4 Xpa re Pilato xch'o chic-apo cha re Jes'us y xubij cha: Reje' jun quichi' niquiban chin yatquisujuj, y rat ??man jun tzij nabij? xcha' re Pilato cha. 5 Pero re Jes'us cama-va jun tzij xubij. Y re Pilato can anchique-la xuna', roma man jun bey rutz'eton che jun vinak quire-ta nuban. 6 Y ronojel juna' tak napon re kanamak'ij yoj re yoj israelitas rubini'an pascua, re gobernador can nulisaj-a jun chique re presos re jec'o pa c'arcel. Y ja re preso re niquic'utuj re vinak re nulisaj-a libre. 7 Y re k'ij re', c'o pa c'arcel jun ache rubini'an Barrab'as, y jec'o chic nic'aj ruchibil. Conojel reje' jec'o pa c'arcel roma xe'yacataj chij re gobierno y chuka' xe'quimisan. 8 Y mare' re vinak re' can quitaman che re gobernador can nulisaj-va-a jun chique re presos re jec'o pa c'arcel, mare' xe'pa reje' xquic'utuj cha re Pilato che tulisaj-a jun chique re jec'o pa c'arcel. 9 Y re Pilato can jare' xubij-pa chique: ??Nijo' yex che ninlisaj-a libre re Rey ivichin yex re yix israelitas? xcha' chique. 10 Re Pilato quire' xubij-pa, roma reja' can rutaman-va che re principal tak sacerdotes quiyi'on re Jes'us pa ruk'a', roma itzel niquina' cha che camas je q'uiy vinak re ye'tzekelben richin. 11 Y re principal tak sacerdotes xquiban chique re vinak che tiquibij-apo cha re Pilato che xa ja re Barrab'as re tulisaj-a libre. Y re vinak quire' xquiban. 12 Y re Pilato jare' xuc'utuj chic chique: ??Andex nibij yex che nimban riq'uin re ache re nibij che i-Rey yex re yix israelitas? xcha' chique. 13 Y re vinak jun pa quichi' xquiban tak xquibij-apo: !!Tataka' ruquimisasic cho cruz! xe'cha' cha. 14 Mare' re Pilato xubij chique: ??Andex rumac rubanon chivach c'a? Pero reje' man ye'tane-ta-ka. Xa m'as xquirak-apo quichi' chin xquibij-apo: !!Tataka' ruquimisasic cho cruz! xe'cha'. 15 Y re Pilato xulisaj-a libre re Barrab'as, chin che ticukar quic'o'x re vinak. C'are' xutak ruch'ayic re Jes'us y xujach-a chin che tiquimisas cho cruz. 16 Xe'pa re soldados xquicusaj-apo re Jes'us chach re palacio. C'are' xe'cayoj conojel re nic'aj chic soldados, re je quichibil. Xe'quimol-apo chij re Jes'us. 17 Y re soldados re' xquiya' c'a jun tziak morado chij re Jes'us, can ancha'l re ye'quicusala' re reyes. Y chuka' xquipach'uj jun k'ayis re camas ruq'uixal. Xquiban jun corona cha, y c'are' xquiya' pa rujalom re Jes'us. 18 Y chuka' chin niquiban-apo saludar niquibila-apo cha: Caqui'cot rat re qui-Rey re israelitas, ye'cha'. Y tak quire' niquibij xa chin niquiban burlar. 19 Reje' niquich'ay pa rujalom re Jes'us riq'uin jun aj, y niquichubaj rupalaj chuka'. Can ye'xucuyaj chach. Can niquiban che niquiya' ruk'ij, pero xa ye'tze'en tak niquiban quire'. 20 Y tak reje' xe'tane' che tza'n chij, xquilisaj-a re tziak morado re quiyi'on-ka chij. C'are' xquiya-a re can rutziak-va, y xquic'uaj-a chin che ne'quibajij cho cruz. 21 Tak quitz'amon-a bey, xquic'ul jun ache aj-Cirene, jun ache pitinak pak'os. Re ache re', quirta' re achi'a' quibini'an Alejandro y Rufo. Y reja' rubini'an Sim'on. Y re soldados xquiban cha re ache re' che xuc'uaj-a re ru-cruz re Jes'us. 22 Y re soldados xquic'uaj-a re Jes'us pa jun lugar rubini'an G'olgota. Re be'aj re' ndel che tzij Calavera. 23 Y tak jec'o chic chire', xquisuj cha re Jes'us vino re xalon riq'uin ruyi'al jun che' rubini'an mirra. Pero reja' man xrajo-ta xukum. 24 Y tak re soldados quibajin chic re Jes'us cho cruz, xquiban sortear re rutziak re Jes'us chin xquitz'at andex che tziak re niquic'uala-a cada jun. 25 Las nueve re namak'a' tak xquibajij re Jes'us cho cruz. 26 Y pa rue' re ru-cruz tz'iban-va chach jun tz'alam re andex rumac re Jes'us chin niquimisas. Chach re tz'alam re' nubij: Jare' re qui-Rey re israelitas. 27 Y re soldados jec'o chuka' je ca'e' chic achi'a' re xe'quibajij cho cruz. Re je ca'e' achi'a' re' je elek'oma'. Jun re xya' pa rajquik'a' re Jes'us y jun pa ruxocon. 28 Y riq'uin re' can nibanataj ancha'l re tz'iban can chupan re ruch'abal re Dios tak nubij: Reja' can ancha'l chuka' jun aj-mac xban cha. Quire' re tz'iban can. 29 Re vinak re ye'k'ax re anche' c'o-va re Jes'us, niquisiloj-apo quijalom chach, roma cama-va niquinimaj-ta che ja reja' re Ruc'ajol re Dios. Y chuka' c'o tzij ye'quibila' can cha, y ja quire' re niquibij: !!Pobre-'ala! Rat re yabin che navulaj re rachoch re Dios y pan oxe' k'ij napoba' chic jun bey. 30 Tacola' c'a-avi' ayon y caka-pa chach la a-cruz, ye'cha' can cha. 31 Y ja chuka' quire' niquiban re principal tak sacerdotes y re je'atamayon re ley kachin yoj re yoj israelitas, ye'tze'en chij re Jes'us y niquibila' chiquivach: Reja' can je q'uiy xe'rucol, pero vocame ni xe-ta reja' mismo man nitiquir-ta nucol-ri'. 32 Can rubin che ja reja' re Cristo, re Rey chin re tenemit Israel. Vo xa quire', can tika-pa chach la ru-cruz, chin nakatz'at y nakanimaj, ye'cha'. Y re elek'oma' re je'bajin cho cruz riq'uin re Jes'us, c'o chuka' tzij qui tak re' re ye'quibila-apo cha. 33 Y tak xapon re nic'aj-k'ij, jare' tak che jun ruch'ulef xk'ukumataj rach. Y re k'oko'm re' xq'uis-a c'a pa tak a las tres re tak'ak'ij. 34 Y ja hora re' tak re Jes'us cof xch'o y xubij pa kach'abal yoj re yoj israelitas: Eloi, Eloi, ??lama sabactani? xcha'. Y re xubij ndel che tzij: Nu-Dios yen, nu-Dios yen, ??anchique roma tak xinamalij can? 35 Y jec'o re jec'o-apo chire' chunakaj re Jes'us, tak xquic'axaj re xubij, xquibila' chiquivach: ??Xic'axaj? Reja' ja re El'ias re nrayoj, xe'cha'. 36 Y jare' tak c'o jun re jonanin xbo'rc'ama-pa jun ancha'l bo'j re nibex esponja cha. Xumuba' chupan vinagre, xuya' chutza'n jun aj y xuya' cha re Jes'us chin che otz ba' nuna-ka cha re nichake'j ruchi', y xubij: Takayabej-na c'a, k'alaj re' vo xa xtipa re El'ias chukasasic, xcha'. 37 Can jare' tak re Jes'us cof xch'o y xcom. 38 Y re utzulaj tziak re anchok cha tason-va rupan re rachoch re Dios, ca'e' xel-va. Xutz'am-pa pa rue' c'a charakan-ka. 39 Y chire' chach re Jes'us c'o-apo re capit'an quichin re soldados. Reja' xuc'axaj tak re Jes'us cof xch'o, y jare' tak xcom, mare' re capit'an xubij: Can katzij-va che re ache re' Ruc'ajol re Dios. 40 Y jec'o chuka' ixoki' re ye'tzu'un-apo, pero c'ac'anaj jec'o-va-a. Chiquicojol re ixoki' re' c'o-va re Mar'ia Magdalena, re Mar'ia quite' re Jos'e y re Jacobo re m'as co'ol y c'o chuka' re jun ixok rubini'an Salom'e. 41 Re ixoki' re', can c'a c'o re Jes'us pa Galilea tak je'tzakatal chij y quivilim-pa. Y chuka' can jec'o nic'aj chic ixoki' je'tzakatal-apo chij re Jes'us pa Jerusal'en. 42 Re k'ij tak xcom re Jes'us, jare' tak re vinak niquibanala' chic rubanic ronojel re xtoc chique chupan re ruca'n k'ij, roma re ruca'n k'ij xa chin uxlanen. Y ja tak xk'ak'ij-yan-ka chupan re k'ij tak xcom re Jes'us, 43 jare' tak xapon jun ache rubini'an Jos'e, y reja' aj pa tenemit Arimatea. Reja' jun ache quichibil re achi'a' re pa camon ye'bano juzgar, y reja' camas ruk'ij chiquicojol reje'. Reja' jun ache re can ruyaben c'a jampa' tak re Dios xtuban gobernar. Y reja' xapon riq'uin re Pilato chupan re hora re', chuc'utuxic re ru-cuerpo re Jes'us chin numuk. Re Jos'e man xuxibij-ta-ri' tak xba chuc'utuxic re ru-cuerpo re Jes'us. 44 Pero re Pilato man nunimaj-ta che can cha'nin-yan xcom re Jes'us. Mare' reja' xrayoj re capit'an, y xuc'utuj cha vo xa katzij che quiminak chic re Jes'us. 45 Y tak re capit'an xubij che katzij xcom-yan re Jes'us, c'are' re Pilato xuya' k'ij cha re Jos'e che no'rmuku' can re ru-cuerpo re Jes'us. 46 Y re Jos'e xulok' jun s'abana. Y tak rukasan chic-pa re ru-cuerpo re Jes'us cho cruz, xupis chupan re s'abana re'. Y c'are' xba chumukic pa jun jul quichin anama'i' re c'oton chach jun pe~na. Y xutz'apij can ruchi' re jul cha jun aboj. 47 Y re Mar'ia Magdalena y re Mar'ia re quite' re Jos'e y re Jacobo, xquitz'at jabal anche' xmuk-va can re Jes'us.
Copyright ℗ 2004 Hosanna Grabado por Vina, Solola, Guatemala