San Marcos 14

1Xa ca'e' chic k'ij nrajo' che napon re ca'e' kanamak'ij yoj re yoj israelitas. Re jun kanamak'ij rubini'an pascua. Y re jun chic ja tak nakataj re xcana-vay re manak levadura riq'uin. Y jare' tak re principal tak sacerdotes y re achi'a' je'atamayon re ley kachin yoj re yoj israelitas niquinojela' andex niquiban chin che nika re Jes'us pa quik'a' y c'are' niquiquimisaj. 2Y niquibila' chiquivach: Man takatz'am chupan re namak'ij re', che man que'yacataj-pa re vinak chakij. 3Y re Jes'us c'o pa tenemit rubini'an Betania, chire' pa rachoch re jun ache rubini'an Sim'on re xc'achojsas cha re yabil rubini'an lepra. Re Jes'us tz'uyul niva' chach mesa, y jare' tak c'o jun ixok xoc-apo y ruc'uan-apo jun frasco re banon riq'uin jun aboj rubini'an alabastro y chupan re frasco re' c'o-a nardo, jun ak'om jubul-oc ruxla' y camas caro rajal. Y tak re ixok re' xulisaj-a re ch'et rukul re frasco, xuk'aj re ak'om pa rujalom re Jes'us. 4Y jec'o xpa quiyoval tak xquitz'at che quire' xuban re ixok cha re ak'om jubul-oc ruxla' y xquibila': ??Anchique roma la ixok la' chak xaxe tal quire' xutix la ak'om pa rujalom re Jes'us? 5Roma xc'ayex-ta y xba-ta che m'as oxe' ciento denarios, y re mero re' xjach-ta chiquivach re vinak re camas je meba', xe'cha'. Y niquich'olij re ixok. 6Pero re Jes'us xubij chique: ??Anchique roma tak man yixtane-ta-ka che tzij chij? Xa tiya' can. Reja' jun utzulaj banabal re xuban viq'uin. 7Re vinak re camas je meba' xa can nojel tiempo jec'o iviq'uin, y xabanchique k'ij nijo' ye'to', can tibana' utzil chique. Jac'a yen man nojel-ta tiempo xquinc'ue' iviq'uin. 8Reja' xuban re andex nitiquir nuban viq'uin. Can xuc'ut che camas yinrajo'. Astapa' c'amaje-na quincom, reja' can xuban-yan-apo re nrajo' nuban viq'uin tak xquinemuk can. 9Y can katzij re xtimbij chiva, che xabanchique lugar xtitzijos-va re utzulaj ch'abal chin re Dios re nibex evangelio cha, chire' chuka' xtitzijos-va re xuban viq'uin re jun ixok re'. Can che jun ruch'ulef xtitzijos-va, y man jun bey xtimistas, xcha' re Jes'us. 10Y jun chique re je doce ru-disc'ipulos re Jes'us re rubini'an Judas Iscariote, xapon quiq'uin re principal tak sacerdotes, chin xbo'rbij chique vo xa niquijo' che nujach re Jes'us pa quik'a'. 11Y tak reje' xquic'axaj quire', camas xe'qui'cot y xquisuj ru-mero. Mare' reja' xutz'am runojexic andex xtuban chin nujach re Jes'us pa quik'a' re achi'a' re'. 12Chupan re nabey k'ij chin re namak'ij kachin yoj re yoj israelitas tak nitij re xcana-vay re manak levadura riq'uin, ja chuka' k'ij re' tak ye'quimisas ch'utak ovejas chin re pascua, jare' tak re disc'ipulos xquic'utuj cha re Jes'us: ??Anche' najo' naban-va re va'in chupan re jun pascua re', chin nakabana' rubanic ronojel re ndoc? 13Y re Jes'us xe'rutak-a je ca'e' chique re ru-disc'ipulos, y xubij-a chique: Quixbiyin pa tenemit Jerusal'en, y chire' xtitz'at che c'o jun mozo re ruc'amom-pa ruya' pa jun cucu'. Ja reja' re xtic'uan-a ibey. 14Re jay re anche' xtoc-va reja', chire' chuka' quixoc-va yex y quixch'o riq'uin re rajaf jay y tibij cha: Re ka-Maestro rubim-pa: ??Anchique cuarto re vova' pan avachoch re otz chin nimban re namalaj va'in chin re pascua quiq'uin re nu-disc'ipulos? 15Y re rajaf jay xquixruc'uaj-a pa ruca'n piso chin re jay. Y chire' c'o jun cuarto nem re banon chic rubanic. Ja chire' tibana-va rubanic re xtakataj chin re pascua, xe'cho'x-a. 16Y re je ca'e' disc'ipulos xe'ba pa tenemit Jerusal'en. Y tak xe'bapon, can xbanataj-va ancha'l rubin-a re Jes'us chique. Y reje' can xquiban-va rubanic ronojel re ndoc chin re va'in chin re pascua. 17Jac'a tak xoc-ka re ak'a' chupan re k'ij re', jare' tak re Jes'us je ruchibil-a re je doce ru-disc'ipulos xe'bapon chire' pa jay. 18Y tak reje' je'tz'uyul chic chach mesa, y ye'tajin chic che va'in, jare' tak re Jes'us xubij chique re ru-disc'ipulos: Can katzij nimbij chiva, che jun chiva yex re xtijacho vichin. Jun re can niva' viq'uin, jare' xquinjacho pa quik'a' re vinak re ye'tzelan vichin, xcha' re Jes'us. 19Reje' can jare' tak xpa bis pa tak c'anma. Y niquic'utula-apo cha re Jes'us: ??Mana-ta como yen re xquimbano quire'? xe'cha'. Y can che ja'jun che ja'jun re quire' xquibij-apo cha re Jes'us. 20Y re Jes'us xubij chique: Jun chiva yex re yix doce, y ja re anchique nuquiak' ruay viq'uin chupan re mismo lak jare' re xtijacho vichin. 21Can tic'axaj re xtimbij chiva, che yen re xinalax chi'icojol can xquinquimisas-va. Can xtibanataj-va ancha'l nubij chupan re ruch'abal re Dios re tz'iban can. Pero tivok'ex c'a rach re xtijacho vichin yen re xinalax chi'icojol. Re ache re xtijacho vichin m'as-ta otz che man-ta xalax, xcha' re Jes'us. 22Y tak c'a ye'tajin che va'in, re Jes'us xuc'am-apo jun xcana-vay y xutioxij cha re Dios. C'are' xupar re xcana-vay re' y xuya' chique re ru-disc'ipulos. Reja' xubij chique: Tic'ama' can re xcana-vay re'. Roma jare' re nu-cuerpo re xtapon chach re camic. 23Y re Jes'us xuc'am-apo chuka' re vaso re c'o ruyi'al-uva chupan, y tak rutioxin chic cha re Dios, xuya' chique, y conojel xquikum re ruyi'al-uva. 24Y reja' xubij chique re ru-disc'ipulos: Jare' re nuq'uiq'uel re xtibiyin tak xquincom. Riq'uin re nuq'uiq'uel, can jare' xc'achoj re c'ac'a trato re rujovam-pa re Dios che nuban quiq'uin re vinak. Re nuq'uiq'uel xtibiyin, chin che je q'uiy vinak ye'colotaj. 25Can katzij nimbij chiva, che jac'a ruq'uisibal bey re' re xinkum-a re ruyi'al-uva. Y tak xtinkum chic jun bey, tak ja chic re Dios nibano gobernar. Y re ruyi'al-uva re xtinkum chire', jun c'ac'a ruyi'al-uva, xcha' re Jes'us chique. 26Y tak quibixan chic-ka re bix chin niquiya' ruk'ij re Dios, re Jes'us y re ru-disc'ipulos xe'el-a chire' pa jay y xe'ba-apo chuxe' re loma rubini'an Olivos. 27Y tak quitz'amon bey, re Jes'us xubij chique re ru-disc'ipulos: Chupan re ak'a' re' tak yex xtitz'at che yen xquinjach-a pa quik'a' re vinak, chiyixnojel yex xa xtitaluj-a-ivi' y nayon xquiniya' can. Roma re Dios can quire-va rubin can chupan re ruch'abal re tz'iban can: Tak yen xtinya' k'ij che xtiquimisas re nichajin quichin re ovejas, re ovejas xa xtiquitaluj-a-qui'. Quire' nubij re tz'iban can. 28Pero yen re yinchajin quichin re ovejas man jumul-ta xquincom, xa xquinc'astaj chic-pa. Y ja yen re xquinyaben ivichin chila' pa Galilea, xcha' re Jes'us chique re ru-disc'ipulos. 29Y re Pedro can jare' tak xch'o-apo cha re Jes'us y xubij: Vo xa re nic'aj chic yatquiya' can ayon tak xtiquitz'at che c'o andex re man otz-ta niban chava, pero yen man xcatinya-ta can, xcha' re Pedro cha re Jes'us. 30Y re Jes'us xubij cha re Pedro: Yen can katzij nimbij chava, che chupan re ak'a' re' tak c'amaje-na titzirim-pa re moma' ca'e' bey, tak rat oxe-yan bey tabij chique re ye'c'utun chava, che man ataman-ta noch, xcha' re Jes'us. 31Pero astapa' re Jes'us xubij quire', re Pedro xa xubij chic-apo jun bey cha re Jes'us: Astapa' can xtinvel nucamic aviq'uin, pero man jun bey xtimbij che man ntaman-ta avach. Y chuka' re nic'aj chic disc'ipulos can quire' niquibij. 32Re Jes'us y re ru-disc'ipulos xe'bapon chupan re lugar rubini'an Getseman'i. Xpa re Jes'us xubij chique re ru-disc'ipulos: Quixtz'uye' can ba' vova', y yen te'mbana-na orar. 33Y xaxe re Pedro, re Jacobo y re Juan xe'ruc'uaj-a re Jes'us. Jare' tak reja' can xuna-yan re xto'rc'alvachij. Mare' camas nem re bis xpa pa r'anma. 34Y xubij chique re je oxe' ru-disc'ipulos: Re bis c'o pa v'anma, camas nem. Y can yinruquimisaj nina' yen. Quixc'ue' can ba' vova', quixc'ase' y man quixvar-ka, xcha' chique. 35Reja' xbiyin chic-apo ba' y c'are' xuque-ka y xluque-ka pan ulef y xuban orar. Reja' xuc'utuj che can choj-ta quire' nak'ax re hora re', che man-ta nuk'asaj re tijoj-pokonal. 36Y ja ch'abal re' re xe'rubij pa ru-oraci'on: Nata', yen ntaman che rat yatiquir naban ronojel. Can-ta naban che xaxe tal choj quire' nak'ax y man-ta nink'asaj re jun tijoj-pokonal re', pero man taban re ninjo' yen, xaxe roma yen quire' nimbij chava. Roma yen xa can ninjo' chuka' nimban re najo' rat, xcha' re Jes'us. 37Y tak reja' xtane' cha re ru-oraci'on, xpa quiq'uin re je oxe' ru-disc'ipulos, pero tak xbeka quiq'uin xa ye'var. Xpa reja' xubij cha re Pedro: Sim'on, ??xa xavar la'k-ka? Can man ba' xatiquir xac'ase' jun ch'et hora viq'uin. 38Man quixvar-ka, xa tibana' orar y tic'utuj cha re Dios chin che tak yixtojtobex, man quixtzak pa mac. Can ntaman-va che re iv'anma can nurayij nuban re nrajo' re Dios. Pero iyon man yixtiquir-ta, xcha' chique. 39Y re Jes'us xba chic jun bey chin xbo'rbana' orar. Reja' xucamaluj rubixic re ch'abal re xe'rubij chupan re oraci'on re c'a ba' tuban-va-ka. 40Y tak xpa chic jun bey quiq'uin re je oxe' ru-disc'ipulos, xa ye'var chic jun bey xe'bo'rvila', roma reje' can al rij re quinak'avach roma camas quivaran. Y reje' man niquivel-ta andex niquibij, roma ye'var chic jun bey xe'belitaj. 41Y re Jes'us xba chic chubanic orar. Pero tak xpa pa rox bey, reja' xubij chique re je oxe' ru-disc'ipulos: Vocame quixvar y can titz'aktisaj re ivaran. Pero man chic xquixtiquir-ta. Yen re xinalax chi'icojol jac'a re nu-hora xbeka, can xquinjach-a pa quik'a' re itzel tak achi'a'. 42Cha'nin, quixyacataj. Ja la pitinak re anchique xquinjacho-a pa quik'a' re itzel tak achi'a', xcha' re Jes'us chique. 43Y re Jes'us can c'a ntajin che tzij quiq'uin re ru-disc'ipulos, tak can jare' xbeka re Judas re jun chique re doce ru-disc'ipulos re Jes'us, y q'uiy vinak je'ruc'uan-apo y re vinak re' je'quic'ualon che' y espada. Y conojel re vinak re' je'takon-a coma re principal tak sacerdotes, coma re achi'a' je'atamayon re ley kachin yoj re yoj israelitas y coma chuka' re rejeta'k tak achi'a' re c'o quik'ij. 44Re Judas re nijacho-a chin re Jes'us can rubin chic chique re je'pitinak riq'uin, andex xtuban chin nuc'ut re Jes'us chiquivach. Reja' ja quire' rubin chique: Ja re anchique xtintz'ubaj chin xtimban saludar, jare' re Jes'us. Titz'ama', y man tinumaj chivach. 45Y tak re Judas xapon, can choj xba-apo riq'uin re Jes'us y xubij cha: Maestro, Maestro, xcha' cha y c'are' xutz'ubaj. 46Y re vinak re je'binak chutz'amic re Jes'us, xquitz'am-a. 47Y jun chique re jec'o riq'uin re Jes'us chire', xulisaj ru-espada y xuya' cha re jun ru-mozo re namalaj sacerdote, y xutzaq'uij-a ruxquin cha re jun bic espada re xuya' cha. 48Y c'are' xpa re Jes'us xubij chique re vinak re je'binak chutz'amic: ??Yex xinojij che yixpitinak chutz'amic jun elek'om y mare' ic'amom-pa che' y espada? 49Yen can k'ij-k'ij xinc'ue' iviq'uin chire' pa rachoch re Dios, tak xinc'ut re ruch'abal re Dios chivach y man jun bey xinitz'am-ta. Pero re' tiene que nibanataj, can ancha'l re tz'iban can chupan re ruch'abal re Dios. 50Y can jare' tak re ru-disc'ipulos re Jes'us, xquiya' can rion y xe'numaj. 51Pero c'o jun ala' re can tzakatal-a chij re Jes'us y reja' pa jun tziak nem rucuchun-va-a-ri'. Y re je'tz'amayon-a chin re Jes'us xquitz'am re ala' re'. 52Pero reja' xel-a chupan re tziak re', y ja quire' manak rutziak xnumaj-a chiquivach. 53Y re vinak re je'tz'amayon-a chin re Jes'us xquic'uaj-a pa rachoch re namalaj sacerdote. Y chire' chuka' xquimol-va-qui' re principal tak sacerdotes, re rejeta'k tak achi'a' re c'o quik'ij y chuka' re achi'a' je'atamayon re ley kachin yoj re yoj israelitas. 54Y re Pedro c'ac'anaj c'a c'o-va can, pero tzakatal-a chij re Jes'us. Y tak re Jes'us xcusas-apo pa rachoch re namalaj sacerdote, chuka' re Pedro xoc-apo chire' chach-jay. Y xtz'uye-ka chiquicojol re polic'ias re jec'o-apo chire', quimek'on-qui' chuchi-k'ak'. 55Y re principal tak sacerdotes y conojel re achi'a' re pa camon ye'bano juzgar, niquicanola' che c'o-ta itzel tak banabal ye'litaj chij re Jes'us, chin quire' niquimisas, pero man jun xquivel chij. 56Roma astapa' can je q'uiy re xe'bapon chin xquitz'uc tzij chij re Jes'us, pero man ba' xquic'ul-qui' je ca'e' re can-ta junan niquibij chij re Jes'us. 57Y c'are' jec'o nic'aj chic re xe'bepa'e-pa y ja quire' xquibij chij re Jes'us: 58Yoj can kac'axan tak reja' rubin: Yen xtinvulaj re rachoch re Dios re banon coma achi'a', y pan oxe' k'ij xtimpoba' chic jun re man achi'a-ta xque'bano. 59Pero man riq'uin re', cama-va junan-ta re xquibila'. 60Y re Caif'as re namalaj sacerdote, xbepa'e-pa pa quinic'ajal y xuc'utuj cha re Jes'us: ??Katzij como re xquibij re xe'ch'o-ka chavij? ??Andex nabij vocame? xcha' cha. 61Pero re Jes'us man xch'o-ta, y man jun tzij xubij. Mare' xpa re namalaj sacerdote, xuban chic jun pregunta cha. Reja' xuc'utuj cha: ??Ja rat re Cristo re Ruc'ajol re Dios re nakaya' ruk'ij? xcha' cha. 62Y re Jes'us xubij: Ja', ja yen. Y xquinitz'at chuka' che yen re xinalax chi'icojol che yintz'uyul pa rajquik'a' re Dios re nitiquir nuban ronojel. Y xquinitz'at tak xquinka-pa pa nube chila' chicaj. 63Tak re namalaj sacerdote xuc'axaj re', xuratz re rutziak chij roma itzel xuc'axaj y xubij: Manak tuk'aj che nipa-ta chic jun chin no'rbij chaka che re Jes'us can aj-mac-va. 64Chiyixnojel yex xic'axaj che xubij che ja reja' re Cristo. Can man otz-ta xuban chach re Dios. ??Andex nibij vocame? xcha' reja'. Y conojel xquibij che can ruc'amon che niquimisas. 65Y jec'o xquichubaj rupalaj, chuka' xquitz'apij rach, xquich'ay y c'are' niquic'utula' cha: ??Anchique re xe'ch'ayo avichin? Tabij chaka, ye'cha' cha. Y re polic'ias re jec'o chire', xquiyala' k'a' chupalaj re Jes'us. 66Y tak re Pedro c'o chire' pa xulan-ka cha re jay, c'o jun ixok raj-ic' re namalaj sacerdote re xapon chire'. 67Re Pedro numak'-ri' chuchi-k'ak'. Y jare' tak xpa re aj-ic' nutzu-nutzu-apo rach re Pedro, y c'are' xubij cha: Rat chuka' yat ruchibil re Jes'us re aj-Nazaret, xcha' cha. 68Pero re Pedro xa xutz'uc tzij chach roma xubij: Yen man ntaman-ta rach re Jes'us. Man nak'ax-ta pa nue' anchique roma tak quire' nabij chua, xcha' cha re aj-ic'. Y re Pedro xel-a chire' chiquicojol y xba anche' c'o-va re puerta re anche' ye'el-va re vinak. Y jare' tak re moma' xtzirim-pa. 69Y tak re aj-ic' xutzu' chic jun bey re Pedro, xutz'am chic rubixic chique re jec'o chire': La ache la' jun chique re ru-disc'ipulos re Jes'us, xcha'. 70Pero re Pedro jun bey chic xutz'uc tzij. Y can c'a ba' tak'ax-va re', ja-yan chic re quimalon-qui' chire' xquibij chic jun bey cha: Can katzij-va che rat yat jun chique re ru-disc'ipulos re Jes'us. Roma rat pa Galilea yapo-va, y can junan yach'o quiq'uin, xe'cha' cha. 71Pero re Pedro xubij: Yen man ntaman-ta rach re ache nibij yex. Can chach re Dios nimbij chiva che yen man ntaman-ta rach. Y vo xa man katzij-ta re nimbij, tika c'a re castigo pa nue', xcha' chique. 72Y re moma' xbetzirim-pa pa ruca'n bey. Y re Pedro jare' tak xbeka chuc'o'x re tzij re je'rubin can re Jes'us cha, che c'amaje-na titzirim-pa re moma' ca'e' bey, tak rat oxe-yan bey tabij chique re ye'c'utun chava, che man ataman-ta noch. Y reja' can xujek'aj ok'ej tak xel-a chire', roma xbeka chuc'o'x re tzij re bin can cha.

will be added

X\