San Marcos 10

1Y c'are' re Jes'us je ruchibil-a re ru-disc'ipulos xel-a chire' y xba pa Judea. Y xk'ax chuka' juc'an chic-apo re rakan-ya' Jord'an. Chire' camas chuka' q'uiy vinak xquimol-qui' riq'uin. Y reja' xutz'am ruc'utic re ruch'abal re Dios chiquivach, can ancha'l-va rubanom-pa. 2Y jare' tak jec'o achi'a' fariseos xe'bapon riq'uin re Jes'us chin niquitojtobej y chin che nitzak-ta pa quik'a'. Y mare' xquic'utuj cha vo xa ruc'amon che jun ache nujach-ri' riq'uin re ruxayil. 3Y re Jes'us xubij chique re achi'a' re': ??Andex rubin can re Mois'es chiva che niban? xcha' chique. 4Y reje' xquibij: Re Mois'es can ruyi'on-va can k'ij cha re ache che nuban jun vuj anche' nubij-va che xujach-ri' riq'uin re ruxayil y tuya' can, xe'cha' reje'. 5Y re Jes'us can jare' xubij chique: Can ancha'l c'a icoversan re iv'anma yex chupan re etzelal, can quire' chuka' xbanataj ajuer can pa ru-tiempo re Mois'es. Xa mare' tak reja' xubij che can tiban quire'. 6Jac'a re xtiquir-va-pa xa man quire-ta. Re xtiquir-va-pa, tak re Dios xuban re ruch'ulef, can ache y ixok xuban. Can man rion-ta re ache y man rion-ta chuka' re ixok. 7Mare' re ache man chic xtic'ue-ta quiq'uin rute-rutota'. Xa xtic'ue' riq'uin re ruxayil, 8y che je ca'e' xa jun c'a xtiquiban. Roma tak quic'uan chic-qui', man chic je ca'e-ta vinak, xa jun chic quibanon. 9Mare' re xa jun chic rubanon re Dios chique, man tuban re vinak che ye'rujach, xcha' re Jes'us. 10Tak re Jes'us y re ru-disc'ipulos jec'o chic pa jay, xe'pa re disc'ipulos xquic'utula' cha re Jes'us che andex xrajo' xubij riq'uin re ch'abal re ye'rubij chique re achi'a' fariseos. 11Y re Jes'us xubij chique: Xabanchique ache re nujach-ri' riq'uin re ruxayil y c'are' nuc'am chic jun ixok, re ache re' nimacun chach re ruxayil. 12Y quire' chuka' re ixok re nujach-ri' riq'uin re ruchijil y niba chic riq'uin jun ache, re ixok re' can nimacun chuka'. Quire' xubij chique re disc'ipulos. 13Y re vinak ye'quic'amala-pa re ac'ola' riq'uin re Jes'us, chin che nuya-ta-a re ruk'a' pa quive'. Pero re disc'ipulos xa xquibij chique re vinak che man tiquiban quire'. 14Jac'a tak re Jes'us xutz'at re niquiban re ru-disc'ipulos, xpa ruyoval, roma man otz-ta xutz'at re ye'tajin chubanic, y xubij chique: Tiya' k'ij chique re ac'ola' che que'pa viq'uin, y man que'ik'at. Roma re xque'oc pa ruk'a' re Dios, xaxe re je ancha'l ac'ola'. 15Y can katzij nimbij chiva, che re man niquiban-ta ancha'l re ac'ola' chin niquijach-qui' pa ruk'a' re Dios, can man xque'oc-ta pa ruk'a' re Dios, xcha' chique re ru-disc'ipulos. 16Y reja' xe'ruch'ilej y xuyala' ruk'a' pa quive' re ac'ola' chin xe'ruban bendecir. 17Y tak re Jes'us xutz'am chic-a rubey je ruchibil-a re ru-disc'ipulos, c'o jun ache jonanin xbeka riq'uin, xuque' chach, y xubij cha: Rat utzulaj Maestro, ??andex re ruc'amon che nimban yen chin che ninvel-ta re c'aslen re man niq'uis-ta? xcha'. 18Y re Jes'us xubij cha: ??Anchique roma tak nabij chua che yen yin otz? Roma can man jun vinak re otz-ta, xa can xe c'a jun re otz y re' ja re Dios. 19Y yen nimbij che rat ataman re lajuj mandamientos re xuya' re Dios pa ruk'a' re Mois'es ajuer can, che rat ache re yatc'ulan man camacun riq'uin jun chic ixok, man caquimisan, man catelak', man tatz'uc tzij chij jun chic vinak, man tak'ol jun vinak chin che nalisaj chach re xa richin reja', taya' quik'ij re ate-arta', xcha' re Jes'us cha. 20Y re ache xubij cha re Jes'us: Maestro, c'a yin co'ol che' tak nbanom-pa ronojel re'. 21Y re Jes'us xutzu' rach re ache tak xubij quire', y camas xrajo', y c'are' xubij cha: C'a c'o jun cosa re man abanon-ta. Man ajachon-ta re abiyomal chiquivach re vinak re camas je meba'. Ta'c'ayij ronojel re c'o aviq'uin y re rajal tajacha' chiquivach re vinak camas je meba', chin quire' nic'ue' abiyomal chila' chicaj. Y catampa viq'uin y catzake' chuij, y man tapokonaj nak'asaj tijoj-pokonal nutzij yen, ancha'l xa can yatbinak chuxe' jun cruz, xcha' cha. 22Y tak re ache xuc'axaj re tzij re xubij re Jes'us cha, can k'alaj che xbison-ka pa r'anma, roma camas biyomal c'o riq'uin. Y can nibison tak xba roma man nrajo-ta che ndel re rubiyomal pa ruk'a'. 23Y re Jes'us xe'rutzu' re ru-disc'ipulos, y xubij chique: Re c'o quibiyomal, camas c'ayef che ye'oc pa ruk'a' re Dios. 24Y re ru-disc'ipulos re Jes'us can anchique-la xquina' tak xquic'axaj re tzij re xubij re Jes'us. Pero reja' xubij chic jun bey chique: Vajc'ual, xcha' chique. Re can quiyi'on c'anma riq'uin re quibiyomal, camas c'ayef che ye'oc pa ruk'a' re Dios. 25Mare' yen nimbij che man c'ayef-ta che nak'ax jun camello pa ch'et rujulil jun bak chin t'iso'n, que chach jun biyom ndoc-ta pa ruk'a' re Dios, xcha' re Jes'us. 26Pero tak re disc'ipulos xquic'axaj chic jun bey re tzij re xubij re Jes'us, xsatz quic'o'x y xquibila' chiquivach: Vo xa can ancha'l re nubij, quire', man jun xticolotaj, xe'cha'. 27Y re Jes'us xe'rutzu' chic re ru-disc'ipulos jun bey y xubij chique: Re vinak man ye'tiquir-ta niquicol-qui', jac'a re Dios can nitiquir-va ye'rucol, roma reja' ronojel nitiquir nuban, xcha' chique. 28Y jare' tak re Pedro xubij cha: Rat ataman che yoj kayi'on can ronojel re c'o kaq'uin, chin che yojtzakatal chavij. 29Pero re Jes'us can jare' xubij: Can katzij nimbij chiva, che xabanchique vinak can c'o q'uiy cosas xtuc'ul, vo xa nutzij yen y roma re utzulaj ch'abal chin re Dios ruyi'on can rachoch, ruch'alal alabo y xtani', rute-rutota', ruxayil, rajc'ual o rulef. 30Can q'uiy c'a xtuc'ul re nibano quire'. Can pa ciento c'a m'as re xtuc'ul-yan chupan re tiempo re katz'amon. Xtuc'ul-yan rachoch, ruch'alal alabo y xtani', rute', rajc'ual o rulef. Y astapa' riq'uin tijoj-pokonal roma xe'tzake' chuij yen, pero chupan re jun chic tiempo chakavach-apo, can xtuc'ul re ruc'aslen re man niq'uis-ta. 31Y je q'uiy re camas quik'ij vocame, pero xtapon re k'ij tak manak chic quik'ij xtic'ue'. Y je q'uiy re manak quik'ij vocame, pero xtapon re k'ij tak xtic'ue' quik'ij, xcha' re Jes'us. 32Re Jes'us y re ru-disc'ipulos y re nic'aj chic vinak, quitz'amon-a bey pa tenemit Jerusal'en. Y jac'a re Jes'us re nabey-a chiquivach, y mare' re ru-disc'ipulos y re vinak can anchique-la niquitz'at y quixibin-qui' je'tzakatal-a chij. C'are' re Jes'us xe'rujach-a ba' re je doce ru-disc'ipulos y xubij chic chique re andex che tijoj-pokonal xtuk'asaj. 33Reja' xubij chique: Yex itaman che pa tenemit Jerusal'en katz'amon-va-a bey, y ja chire' re xquinjach-va yen re xinalax chi'icojol. Xquinjach pa quik'a' re principal tak sacerdotes y pa quik'a' re achi'a' re je'atamayon re ley kachin yoj re yoj israelitas. Y reje' xtiquibij che quinquimisas. Y chuka' xquinquijach pa quik'a' vinak re man je israelitas-ta. 34Y re vinak re' xque'tze'en chuij, xquinquichubaj, xquinquich'ay y c'are' xquinquiquimisaj. Pero pa rox k'ij xquinc'astaj-pa chiquicojol re anama'i'. 35Y re Jacobo y re Juan, re je ruc'ajol re ache rubini'an Zebedeo, xe'jelon-apo riq'uin re Jes'us, y xquibij cha: Maestro, xe'cha' cha. Yoj nakajo' nakac'utuj jun utzil chava. Pero tabana' utzil can naban re xtakac'utuj chava, xe'cha' cha re Jes'us. 36Y reja' xubij chique: ??Andex che utzil re nijo' yex? 37Y reje' xquibij: Yoj nakajo' che tak ja chic rat re yabano gobernar, naban-ta chaka yoj che nic'ue' kak'ij, naya-ta k'ij chaka chin che yojtz'uye-ta-apo aviq'uin, jun-ta re nic'ue' pan avajquik'a' y jun-ta re pan axocon. 38Pero re Jes'us xubij chique: Yex man itaman-ta che can c'ayef nuban chiva re nic'utuj. Y mare' yen ninc'utuj chiva vocame: ??Nicoch' como yex re xtiban chua yen? ??Y nicoch' como chuka' yex jun tijoj-pokonal re ancha'l xtika pa nue' yen? xcha' re Jes'us chique. 39Reje' xquibij: Nakacoch', xe'cha' cha re Jes'us. Y re Jes'us xubij chic chique: Can katzij che yex xticoch' re ancha'l xtiban chua yen. Chuka' can xticoch' jun tijoj-pokonal re ancha'l xtika pa nue' yen. 40Jac'a re nic'utuj chua che jun nitz'uye' pa vajquik'a' y jun pa nuxocon, re' man pa nuk'a-ta yen c'o-va chin che ninya' chiva. Roma re nic'utuj yex, re' xa quichin chic re xtubij re Dios che otz che ye'tz'uye' chire', xcha' re Jes'us. 41Y re je lajuj chic disc'ipulos, tak xquic'axaj re niquijo' re Jacobo y re Juan, xpa quiyoval chique. 42Y jare' tak re Jes'us xe'rayoj re ru-disc'ipulos y xubij chique: Yen nimbij che yex jabal itaman che re banon chique che niquiban gobernar chach re ruch'ulef, ja reje' re ye'bano mandar pa quive' re vinak, mare' can niquina' che ja reje' re je cajaf. Xa can xe re c'o quik'ij jare' re ye'bin re andex niban. 43Pero chi'icojol yex man quire-ta. Roma vo xa c'o jun chiva yex re nrajo' nic'ue' ruk'ij, can tuna-ka-ri' che xa manak ruk'ij y tusuju-ri' chin nuban xabanchique samaj. 44Vo xa jun chiva yex can nrajo' che ja reja' re nabey y c'o-ta ruk'ij, can tuna-ka-ri' che xa manak ruk'ij y tusuju-ri' chin nuban xabanchique samaj quichin conojel. 45Y quire' yen re xinalax chi'icojol. Yen man nimpokonaj-ta yinsamaj pa qui-cuenta re vinak, roma can chubanic-va re' tak ximpa, y man ximpa-ta chin che jec'o chic nic'aj ye'bano-pa re nimbij chique. Can jac'a yen re yimbano re samaj, y can xtinya' chuka' re nuc'aslen chin quire' je q'uiy re ye'colotaj chach re quimac, xcha' re Jes'us. 46C'are' re Jes'us y re ru-disc'ipulos xe'bapon pa tenemit rubini'an Jeric'o. Y tak reje' niquiya' can re tenemit, camas je q'uiy vinak re je'tzakatal-a chiquij. Y chire' chuchi-bey c'o jun moy rubini'an Bartimeo, ruc'ajol jun ache rubini'an Timeo. Reja' tz'uyul chire', nuc'utula' c'a ru-limosna chique re vinak re ye'k'ax chire'. 47Y tak reja' xuc'axaj che nak'ax-yan chire' re Jes'us aj-Nazaret, reja' cof xch'o y xubij: Tajoyovaj noch rat Jes'us, re yat rey-rumam can re Rey David, xcha'. 48Y je q'uiy vinak xquibila' cha: Ch'oj-achi'. Pero reja' xa m'as cof nich'o y nubij: Rat re yat rey-rumam can re Rey David, tajoyovaj noch roma quire' nbanon, nicha'. 49Y re Jes'us xuc'axaj ruch'abal re ache moy. Mare' xpa'e-ka y xubij che tayox-pa. Y can jare' xbecayoj-pa y xquibij cha: Man taxibij-avi'. Jo'. Re Jes'us yarayoj, xe'cha' cha. 50Y re ache can xe xuc'axaj quire', can jare' xyacataj-pa. Xuya' can re ruk'u' chire' y xba-apo riq'uin re Jes'us. 51Y re Jes'us xuc'utuj cha: ??Andex najo'? Y re ache moy xubij cha: Maestro, yen ninjo' yintzu'un. 52Y re Jes'us can jare' xubij cha: Vocame otz yaba, roma yatzu'un chic. Y roma xaban confiar-avi' viq'uin, mare' xac'achoj. Y re moy can xtzu'un-va y xba chij re Jes'us.

will be added

X\