San Lucas 9

1Re Jes'us xe'rayoj c'a re je doce ru-disc'ipulos, y xuya-a poder chique chin ye'tiquir ye'quilisaj conojel itzel tak esp'iritu, y chin chuka' ye'quic'achojsaj re ye'yavaj. 2Y xe'rutak c'a-a re ru-disc'ipulos chin xe'ba chutzijosic che xbeka re k'ij chin andex rubanic tak re vinak ye'oc pa ruk'a' re Dios, y chin chuka' che ye'quic'achojsaj re ye'yavaj. 3Y re Jes'us xubij chuka' chique: Tak xquixba, man jun cosa tic'uaj-a. Man tic'uaj ch'ama'y, man tic'uaj iya'l, man tic'uaj vay, man tic'uaj mero. Y man tic'uaj jun chic c'ulaj itziak, xa can xe-va re icusan-a. 4Y re jay re anche' yixoc-va pa jun tenemit, chire' quixc'ue-va-ka. Xa c'aja tak yixel-pa chupan re tenemit re', otz niya' can re jay re anche' xixc'ue-va. 5Y vo xa re tenemit anche' yixapon-va man otz-ta ic'ulic niquiban, xa tiya' can, y titavaj can re pokolaj re c'o pan ivakan chiquivach re vinak, chin quire' tiquitamaj che man otz-ta re xquiban, xcha' re Jes'us. 6Y re disc'ipulos xe'ba. Xe'ba pa tak cocoj tenemit chin xbequitzijoj re utzulaj ch'abal chin re Dios re nibex evangelio cha. Y xe'quic'achojsaj re ye'yavaj ronojel lugar anche' xe'k'ax-va. 7Y re gobernador rubini'an Herodes chupan re tiempo re', xuc'axaj ronojel re ntajin chubanic re Jes'us. Pero man nuvel-ta anchique nunimaj, roma jec'o ye'bin che re nibano quire' ja re Juan Bautista re xc'astaj-pa chiquicojol re anama'i'. Roma re Juan quiminak chic. 8Jec'o nic'aj chic ye'bin che re Jes'us ja re El'ias re xbetzolaj chic-pa. Y nic'aj chic vinak niquibij che re Jes'us jun chique re je rusamajela' re Dios re xe'c'ue' ajuer can, re xbex profetas chique re xc'astaj-pa. 9Y re Herodes nubij: ??Anchique como che ache re Jes'us? Roma q'uiy cosas ye'nc'axaj chij re ye'ruban. Pero yen nimbij che mana-ta re Juan Bautista, roma re Juan ja yen mismo re ximbano mandar che xtzaq'uis rujalom, xcha'. Y re Herodes xucanola' formas chin quire' xutz'at-ta rach re Jes'us. 10Y re ru-ap'ostoles re Jes'us tak xe'tzolaj-pa banoy re rusamaj re Dios, xquitzijoj cha re Jes'us andex re xquibanala'. Y re Jes'us xe'ruc'uaj c'a-a chupan jun lugar anche' manak vinak re nibex desierto cha. Y re lugar re' chin re tenemit rubini'an Betsaida. 11Y tak re vinak xquinabej anche' xbo-va re Jes'us y re ru-disc'ipulos, xe'ba chuka' reje'. Y tak xe'bapon riq'uin re Jes'us, reja' xe'ruc'ul y xubij chuka' chique andex rubanic tak re vinak ye'oc pa ruk'a' re Dios. Y chuka' xe'ruc'achojsaj re ye'yavaj. 12Y tak xk'ak'ij-ka chupan re k'ij re', re je doce disc'ipulos xe'jelon-apo riq'uin re Jes'us y xquibij cha: Ca'taka-a re vinak re' pa tak cocoj tenemit y pa tak nic'aj chic lugar re jec'o nakaj, chin te'quicanoj quivay y chuka' anche' ye'bevar-va, roma re anche' yojc'o-va, xa je manak vinak, xe'cha' cha. 13Jac'a re Jes'us xubij chique re ru-disc'ipulos: Tiya' quivay yex. Y re disc'ipulos xquibij: Kaq'uin yoj xaxe-oc vo'o' vay y ca'e' ch'utak car c'o. Re vinak re' yojtiquir ye'katzuk, pero vo xa yojba chulok'ic vay, xe'cha'. 14Roma re vinak camas je q'uiy. Y xaxe achi'a' jec'o la'k vo'o' mil. Y re Jes'us xubij chique re ru-disc'ipulos: Tibij chique re vinak re' che que'tz'uye' y pa tak nic'aj ciento tiquic'uala-qui', xcha' chique. 15Y re disc'ipulos can ancha'l re xbex chique, can quire' xquiban. 16Y re Jes'us xe'ruli'ej pa ruk'a' re vo'o' xcana-vay y re ca'e' car, xtzu'un chicaj y xutioxij cha re Dios. Y re Jes'us xe'rupar re vay y re car, xuya-a chique re ru-disc'ipulos chin che niquijachala' chiquivach re vinak. 17Y conojel jabal xe'va'. Can man jun re man-ta xva'. Y c'a c'o doce chacach xuban sobra. 18Y c'o jun k'ij re Jes'us rujich'an-a-ri' chin nuban orar, y jec'o-apo re ru-disc'ipulos riq'uin. Y jare' tak re Jes'us xuc'utuj chique re ru-disc'ipulos: ??Yin anchique c'a yen niquinojij re vinak? 19Y reje' xquibij cha: Jec'o ye'bin che ja rat re Juan Bautista. Jec'o nic'aj chic ye'bin che ja rat re El'ias, re jun rusamajel re Dios re xc'ue' ajuer can, re xbex profeta cha. Y jec'o chuka' ye'bin che rat yat jun chique re rusamajela' re Dios re xe'c'ue' ajuer can, re xbex profetas chique, y vocame xac'astaj-pa chiquicojol re anama'i', xe'cha' cha re Jes'us. 20Y reja' xuc'utuj chique re ru-disc'ipulos: Y yex, ??andex ninojij chuij? Y re Pedro xubij cha re Jes'us: Ja rat re Cristo re yatcha'on roma re Dios. 21Pero re Jes'us camas xuchalabej chique re ru-disc'ipulos che man jun anchok cha tiquibij-va che ja reja' re Cristo. 22Y xubij chuka' chique: Yen re xinalax chi'icojol, tiene que nink'asaj q'uiy tijoj-pokonal. Y xquintzelas coma re rejeta'k tak achi'a' re c'o quik'ij, coma re principal tak sacerdotes y chuka' coma re achi'a' je'atamayon re ley kachin yoj re yoj israelitas. Y xquinquimisas, pero pa rox k'ij xquinc'astaj-pa chiquicojol re anama'i', xcha' re Jes'us. 23Y c'are' xubij chique conojel: Vo xa c'o jun re nrajo' yinrutzekelbej, can tubana' ancha'l jun re binak chuxe' ru-cruz. Man tuban re nurayij reja'. Man tupokonaj nuk'asaj tijoj-pokonal. Vo xa c'o jun ninojin che nitiquir nuban quire' k'ij-k'ij, otz che nipa viq'uin chin yinrutzekelbej. 24Roma vo xa camas nupokonaj re ruc'aslen vova' chach re ruch'ulef, xa man xtuvel-ta ruc'aslen re man niq'uis-ta. Jac'a re man nupokonaj-ta re ruc'aslen, astapa' xtiquimisas nutzij yen, jare' s'i can xtuvel-va ruc'aslen re man niq'uis-ta. 25Roma man jun cosa otz nuc'am-pa cha re vinak xe-ta nic'ue' ronojel re biyomal chin re ruch'ulef riq'uin, y re vinak re' xa man nicolotaj-ta. Xa rion reja' nunem-ri' chupan re camic chin jumul. 26Y vo xa c'o chuka' jun chiva yex niq'uex nutzijoj che yinruniman yen y re nuch'abal, yen re xinalax chi'icojol, chuka' xquinq'uex nimbij che re jun vinak re' vichin yen. Quire' xtimban tak xquimpa chic jun bey, tak xtik'alajin che can yin Rey-va, y chuka' junan chic nuk'ij riq'uin re Nata' y je vichibil-pa re lok'olaj tak 'angeles. 27Y can katzij nimbij chiva, che re Dios can xtic'ue' pa kave' chin xkojruban gobernar. Y jec'o chiva yex, c'aja tak quitz'eton chic che re Dios nuban chic gobernar, c'ajare' tak xque'com, xcha' re Jes'us. 28Y jun semana la'k tubij-va ronojel re' chiquivach re vinak, jare' tak xe'rucha' re Pedro, re Juan y re Jacobo chin che ye'oc-a ruchibil chin niba pa rue' jun loma chubanic orar. 29Y tak re Jes'us ntajin cha oraci'on, xjalataj re rutzubal, y can quire' chuka' re rutziak xjalataj. Y re ru-color re rutziak can bo'j xuban y niyiq'uiloj. 30Y tak re je oxe' disc'ipulos xquitz'at, je ca'e' achi'a' ye'tzijon riq'uin re Jes'us. Re je ca'e' achi'a' re' quibini'an Mois'es y El'ias, y ja achi'a' re' re xe'c'ue' ajuer can. 31Re je ca'e' achi'a' re' jec'o pa jun sakil y re sakil re' pitinak chila' chicaj, y ye'tzijon chij re andex rubanic tak re Jes'us xtiquimisas pa tenemit Jerusal'en. Roma ja samaj re' re yi'om-pa cha roma re Dios. 32Y re Pedro y re je ca'e' chic ruchibil, camas quivaran pero xquicoch' re varan, y mare' xquitz'at re namalaj ruk'ij re Jes'us, y xe'quitz'at chuka' re je ca'e' chic achi'a' re jec'o riq'uin re Jes'us. 33Y tak re je ca'e' achi'a' re' niquiya' can re Jes'us chin ye'ba, jare' tak re Pedro xubij-apo cha re Jes'us: Maestro, vova' otz kabanon. Takabana' oxe' ch'utak jay, jun avichin rat, jun chin re Mois'es y jun chin re El'ias. Re Pedro quire' xubij-apo y man rutaman-ta anchique roma tak xch'o-apo. Mare' bin che man bin xe'rubila-apo. 34Y c'a ntajin che tzij, jare' tak c'o jun nube xbeka y xupis quij. Y re disc'ipulos xquixibij-qui' tak xquina' che re nube xupis quij. 35Y jare' tak c'o Jun xch'o-pa chupan re nube y xubij: Jare' re Nuc'ajol y yen camas ninjo'. Can xe c'a reja' tic'axaj. 36Y jac'a tak re disc'ipulos quic'axan chic-ka re ch'abal re', tak xquitz'at, rion chic re Jes'us c'o chire'. Y re disc'ipulos re', q'uiy tiempo man jun anchok cha xquitzijoj-va re xquitz'at che xbanataj chire' pa rue' re loma. 37Y pa ruca'n k'ij tak re Jes'us y re je oxe' ru-disc'ipulos xe'ka-pa pa rue' re loma, camas c'a je q'uiy re vinak re xe'c'ulu-apo richin. 38Y c'o c'a jun ache chiquicojol re vinak, xch'o-apo cha re Jes'us y xubij: Maestro, yen xaxe jun vajc'ual c'o. Ninc'utuj c'a utzil chava che tatz'eta' ba', 39roma c'o jun itzel esp'iritu nitz'amo richin, y tak nutz'am nuban cha che nurak ruchi', nisiquic re ru-cuerpo y nicubub xe'ray. Re itzel esp'iritu re' c'a nuc'usaj-na can ruc'o'x chij, c'ajare' nuya' can. 40Mare' xinc'utuj-yan utzil chique re a-disc'ipulos che tiquilisaj-a jumul re itzel esp'iritu riq'uin re nuc'ajol, pero man xe'tiquir-ta, xcha' re ache. 41Y re Jes'us xubij: Man jun vinak chupan re tiempo re' re rubanon-ta confiar-ri' riq'uin re Dios. Xa conojel je'satzanak. Man tinojij che yen nojel tiempo xquinc'ue' iviq'uin. Y chuka' man tinojij che nojel tiempo xquixincoch'. Tac'ama-pa re ac'ajol vova', xcha' re Jes'us. 42Y tak re ala' napon-yan-apo riq'uin re Jes'us, re itzel esp'iritu riq'uin ruchuk'a' xuyiquiquej re ala' y xutorij pan ulef. Re Jes'us cof xch'o cha re itzel esp'iritu, chin che tel-a riq'uin re ala'. Y re Jes'us xucol re ala' re' chach re itzel esp'iritu, y xujach-a cha re rutota'. 43Y conojel c'a re vinak xsatz quic'o'x tak xk'alajin re ru-poder re Dios re ruyi'on pa ruk'a' re Jes'us. Y tak re vinak ye'tzijon chiquivach chij re ala' re xc'achojsas roma re Jes'us, re Jes'us xubij chique re ru-disc'ipulos: 44Tic'axaj jabal re xtimbij chiva, y man timistaj: Yen re xinalax chi'icojol, xquinjach pa quik'a' re vinak, xcha' chique. 45Y reje' man xk'ax-ta pa quive', roma evan chiquivach. Y niquixibij-qui' niquic'utuj cha re Jes'us andex ndel che tzij re xubij. 46Y re ru-disc'ipulos re Jes'us xquich'ojela' chiquivach re anchique chique reje' re m'as c'o ruk'ij. 47Pero re Jes'us can jabal-va rutaman y nutz'at re andex niquinojij pa tak c'anma. Mare' reja' xbo'rc'ama-pa jun ac'ual, y xbo'rpoba' riq'uin, 48y xubij chique: Re yacayon vichin pa r'anma y can niqui'cot nuc'ul jun ac'ual ancha'l re', man xe-ta re ac'ual xtuc'ul, xa can xquinruc'ul chuka' yen. Y re nic'ulu vichin yen, can nuc'ul chuka' re takayom-pa vichin. Y jac'a jun ivchibil re nitz'at yex che camanak ruk'ij, xa jare' re c'o m'as ruk'ij, xcha' re Jes'us. 49Y xpa re Juan xubij cha re Jes'us: Maestro, yoj xkatz'at jun ache re pan abe' rat ye'rulisaj itzel tak esp'iritu. Pero xkatz'at che man kachibil-ta, xkabij cha che man chic tuban re ntajin chubanic. 50Y re Jes'us xubij cha re Juan: Man chic tibij quire' cha. Roma re man ye'tzelan-ta kachin, can kachibil-va-ki' quiq'uin. 51Y tak napon-yan re k'ij che re Jes'us nitzolaj chila' chicaj, reja' can xuban-a preparar-ri' chin xba pa tenemit Jerusal'en, 52y jec'o xe'rutak-a nabey. Y re xe'tak-a, xe'ba pa jun aldea re c'o pa Samaria, chin xbequicanoj jun jay re anche' xte'xulan-va re Jes'us y re je'tzakatal-a chij. 53Pero re vinak chin re aldea re' man xquijo-ta xquic'ul re Jes'us, roma reja' xa pa Jerusal'en binak-va. 54Tak re je ca'e' disc'ipulos quibini'an Jacobo y Juan xquiya' cuenta cha che man nic'ul-ta coma re vinak, xquibij cha re Jes'us: Ajaf, ??najo' che nakac'utuj che tika-pa k'ak' chicaj, chin ye'ruq'uis re vinak re'? Ancha'l xuban re El'ias re rusamajel re Dios re xbex profeta cha, xe'cha'. 55Y re Jes'us xe'rutzu' y cof xch'o chique. Y xubij: Yex man itaman-ta che re Esp'iritu re ac'ayon ivichin camas nijovan. 56Roma yen re xinalax chi'icojol, man ximpa-ta vova' chach re ruch'ulef chin ye'nquimisaj vinak, yen ximpa chiquicolic chach re quimac, xcha' chique. Y re Jes'us y re ru-disc'ipulos xe'ba chic pa jun aldea. 57Y tak reje' quitz'amon bey, c'o c'a jun ache re xbec'ulum-pa, y xubij cha re Jes'us: Ajaf, yen ninjo' yatintzekelbej xabanche' xcabo-va. 58Xpa re Jes'us xubij cha re ache re': Re utif can c'o quijul anche' ye'c'ue-va, y quire' chuka' re ch'utak chicop c'o quixic' re ye'ba pa cak'ik', can c'o chuka' quisoc. Jac'a yen re xinalax chi'icojol, manak anche' yinc'ue-va, xcha' cha re ache re'. 59Y re Jes'us xubij cha jun chic ache: Jo' chuij. Pero re ache re' xubij: Ajaf, yen ninjo' yimba chavij. Pero nabey taya' k'ij chua che c'a timuku-na-a re nata', c'are' xquimba chavij. 60Pero re Jes'us xubij cha re ache re': Re vinak re ye'com, que'muk coma re vinak re je quiminak chupan re quimac. Jac'a rat cabiyin y ta'tzijoj che xbeka re k'ij chin re andex rubanic tak re vinak ye'oc pa ruk'a' re Dios. 61Y c'o chic jun ache xbin cha re Jes'us: Ajaf, yen ninjo' yimba chavij. Pero nabey taya' k'ij chua chin yine'ch'o-na can chique conojel re jec'o chupan re vachoch, xcha'. 62Pero re Jes'us xubij cha: Re ache re nisamaj riq'uin re arado chin nuposcolij re ulef, man otz-ta che nitzu'un can chij tak ntajin che samaj, roma man otz-ta ndel re rusamaj. Y quire' chuka' re vinak re niniman chin re Dios, man otz-ta che nitzu'un can chij chin ye'rutz'at can re andex ye'banataj. Roma vo xa quire' nuban, man ruc'amon-ta che nisamaj pa rusamaj re Dios y ye'ruto-ta re vinak chin ye'oc pa ruk'a' re Dios, xcha' re Jes'us.

will be added

X\