San Lucas 8

1Ca'e-oxe' k'ij tibanataj-va quire', re Jes'us xba pa tak nima'k y cocoj tenemit, je ruchibil-a re je doce ru-ap'ostoles. Y nutzijoj re utzulaj ruch'abal re Dios re nich'o chij tak re vinak ye'oc pa ruk'a' re Dios. 2Y jec'o chuka' ca'e-oxe' ixoki' je'tzakatal-a chij. Re ixoki' re', jare' re je'ruc'achojsan re Jes'us, rulisan itzel tak esp'iritu quiq'uin y nic'aj chic rach yabil. Chiquicojol re ixoki' re' binak re Mar'ia re nibex chuka' Magdalena cha. Y ja ixok re' re xe'lisas je vuku' itzel tak esp'iritu riq'uin, roma re Jes'us. 3Chiquicojol re ixoki' re je'tzakatal chij re Jes'us, binak re jun ixok rubini'an Juana, ruxayil re jun ache rubini'an Chuza. Y re ache re' nisamaj riq'uin re Herodes y c'o m'as ruk'ij que chiquivach re nic'aj chic ye'samaj riq'uin. Chuka' binak re jun ixok rubini'an Susana. Y jec'o chuka' nic'aj chic ixoki' re je'binak y xe'ta'on chin xe'quivilij re Jes'us y re ru-disc'ipulos. 4Y je q'uiy vinak xquimol-apo-qui' chij re Jes'us re je'pitinak nic'aj chic tenemit. Mare' chupan re k'ij re', tak camas chic je q'uiy vinak quimalon-qui' chij, reja' xubij jun ejemplo, chique: 5C'o c'a jun ache xbo'rjopij semilla pa jun juyu'. Y tak re ache ntajin chubanic re samaj re', c'o nic'aj cha re semilla xka po bey, mare' re vinak niquixak' can rue'. Y chuka' xe'pa ch'utak chicop re ye'ba pa cak'ik', xquitaj-a re semilla xka po bey. 6Y c'o nic'aj cha re semilla xka cojol tak aboj. Re semilla re' can xe'tz'uc-va-pa. Pero tak xpa rach k'ij, xe'chakij-ka, roma re ulef anche' xka-va re semilla xa chake'j. 7Y nic'aj chic semilla xka chucojol k'ayis c'o quiq'uixal. Y tak xe'tz'uc-pa, junan xe'q'uiy quiq'uin re q'uix. Pero re k'ayis c'o quiq'uixal camas xe'q'uiy, mare' re tico'n xe'jik' pa quik'a'. 8Y re nic'aj chic semilla xka pa jun utzulaj ulef, y jabal xe'q'uiy, y xquiyala' ja'jun ciento quivach. Y tak re Jes'us rubin chic-ka re ejemplo re', cof xch'o y xubij: Re c'o ruxquin chin nuc'axaj, can tuc'axaj c'a re ximbij, xcha' chique. 9Y re ru-disc'ipulos re Jes'us xquic'utuj cha, andex nrajo' nubij chique riq'uin re jun ejemplo re xutzijoj chique. 10Y re Jes'us xubij chique: Man jun bey can-ta bin can jabal chij tak re vinak ye'oc pa ruk'a' re Dios, pero chiva yex yi'on c'a k'ij chin nitamaj. Jac'a chique re vinak re man ye'niman-ta vichin, riq'uin ejemplos yinch'o-va chin quire' choj niquitzu' y man niquitz'at-ta jabal re niquitzu' y chin che choj niquic'axaj y man nak'ax-ta pa quive' re niquic'axaj. 11Y ja quire' re ndel che tzij re ejemplo chij re semilla: Re semilla jare' re ruch'abal re Dios. 12Re semilla re xe'ka po bey, junan riq'uin re ruch'abal re Dios tak nic'axax coma re vinak, y nipa re itzel y nulisaj-a re ruch'abal re Dios pa tak c'anma, chin quire' man tiquinimaj re Dios, y man que'colotaj chach re quimac. 13Y re semilla re xe'ka chucojol tak aboj, nich'o chij re ruch'abal re Dios re nic'axax coma re vinak. Re vinak re' camas c'a ye'qui'cot tak niquic'ul re ruch'abal re Dios pa tak c'anma. Pero man can-ta niquiban confiar-qui' riq'uin re Dios, roma tak ye'tojtobex, cha'nin niquiya' can re Dios. Mare' jun ca'e-oxe' k'ij re otz niquina' y niquiban confiar-qui' riq'uin re Dios y c'are' ye'tzak. 14Re semilla re xe'ka cojol tak k'ayis re c'o quiq'uixal, can nich'o-va chij re ruch'abal re Dios re niquic'axaj re vinak. Pero re vinak re' xa ja re ndoc chique chin re quic'aslen vova' chach re ruch'ulef, xa jare' re niquiban, mare' ne'jik' re ruch'abal re Dios pa tak c'anma. Ne'jik' pa ruk'a' re biyomal y q'uiy chuka' rach itzel tak rayibal c'o quiq'uin y mare' man nivachin-ta jabal re quic'aslen. 15Y re semilla re xe'ka pa jun utzulaj ulef, can nich'o-va chij re ruch'abal re Dios re niquic'axaj re vinak. Reje' riq'uin ronojel c'anma niquic'axaj y niquiban re nubij. Nojel tiempo quibanon confiar-qui' riq'uin re Dios, y nivachin jabal re quic'aslen. 16Y man jun vinak nutzaj jun l'ampara y c'are' nuvovaj o nuya-ta-apo chuxe' ruch'at. Re l'ampara re' can c'o-va anche' nitzekebas-va, chin quire' sakil nuban pa jay tak ye'oc-apo re vinak. 17Y man jun cosa re vovan can re man-ta xtik'alajim-pa. Y chuka' man jun cosa re tz'apin can rij re man-ta ne'el-pa pa sakil. 18Y quire' chuka' yex. Vo xa yex nic'axaj re ruch'abal re Dios, tiyaca-ka pa tak iv'anma. Roma re c'o cosas ruyacon pa r'anma, can xtuc'ul m'as. Jac'a re nic'axan re ruch'abal re Dios y xa man nuyac-ta-ka pa r'anma, re jenipa' ba' nunojij che c'o riq'uin, hasta re' nilisas-a chach, xcha' re Jes'us. 19Re rute' y re je ruch'alal re Jes'us xe'pa anche' c'o-va reja'. Pero man xe'tiquir-ta xe'oc anche' c'o-va, roma camas je q'uiy vinak quimalon-qui' anche' c'o-va re Jes'us. 20Y xbex-apo cha re Jes'us: Re ate' y re avch'alal yatquiyaben chach-jay roma xe'pa cha'tz'etic. 21Pero reja' xubij: Re vinak re ye'c'axan y niquiban re nubij re ruch'abal re Dios, jare' re nte' y re je vach'alal, xcha' re Jes'us. 22Y jun k'ij, re Jes'us je ruchibil-a re ru-disc'ipulos, xoc-a pa jun canoa. Y c'are' xubij chique: Jo' c'a juc'an-apo ruchi' re lago. Y xe'ba. 23Y tak je'binak pa rue' re lago, re Jes'us xvar-ka. Y chak c'ata' xpa jun cak'ik' camas ruchuk'a' chire' pa rue' re lago. Mare' re canoa anche' je'binak-va, ninoj-pa che ya', y quire' re canoa man c'ayef-ta niba chuxe' ya'. 24C'are' re disc'ipulos xquic'asoj re Jes'us, y xquibij cha: !!Ajaf! !!Ajaf! Vocame yojcom, xe'cha' cha. Y re Jes'us xyacataj-pa, y xubij: Tiq'uis-a re cak'ik' y titane-ka re nubolk'otela-ri' re ya'. Y ja quire' xbanataj. Re cak'ik' xq'uis-a, y re nubolk'otela-ri' re ya' xtane-ka. 25C'are' re Jes'us xubij chique re ru-disc'ipulos: ??Anchique roma tak man xiban-ta confiar-ivi' viq'uin? Pero re disc'ipulos camas quixibin-qui'. Can anchique-la xquina' tak xquitz'at re xbanataj, y xquic'utula' chiquivach: ??Anchique como che ache re'? Roma re cak'ik' y re ya' can niquinimaj rutzij, tak nich'o chique. 26Y re Jes'us y re ru-disc'ipulos xe'bapon c'a juc'an-apo ruchi-ya', chire' chupan jun lugar rubini'an Gadara, re c'o-apo chach re Galilea. 27Y tak re Jes'us xka can chupan re canoa, xapon jun ache aj pa tenemit Gadara riq'uin. Y re ache re' q'uiy-yan tiempo que'c'ue' itzel tak esp'iritu riq'uin. Manak rutziak nucusaj, ni xe-ta nic'ue' pa rachoch. Xa ja re anche' je'mukun-va re anama'i' chin re tenemit re', jare' re aconak rachoch. 28Y re ache re', can xe xutz'at re Jes'us, can jare' xbexuque' chach. Y jun pa ruchi' xch'o-apo cha re Jes'us, y xubij: Rat Jes'us re Ruc'ajol re namalaj Dios, ??anchique roma tak yinanak? Tabana' jun utzil man quinach'ujersaj, xcha' cha re Jes'us. 29Re ache xubij quire' roma re Jes'us xubij cha re itzel esp'iritu che tel-a riq'uin. Roma q'uiy tiempo tic'ue-va re itzel esp'iritu riq'uin. Y re vinak quitijlon quik'ij chin niquiyach', pero tak niquiyach' ruk'a-rakan, ye'rurokch'ij can y ye'ruk'ajla' can re cadenas roma camas ruchuk'a'. Mare' man ye'tiquir-ta chij, astapa' jenipa' xtiquiban cha. Y re itzel esp'iritu siempre nuc'uaj-a re ache chupan re lugar anche' manak vinak re nibex desierto cha. 30Y re Jes'us xuc'utuj cha re ache: ??Andex abe'? Y re ache xubij-pa: Legi'on, jare' re nube'. Quire' xubij re ache roma camas je q'uiy itzel tak esp'iritu jec'o riq'uin. 31Y re itzel tak esp'iritu xquic'utuj utzil cha re Jes'us che vo xa ye'rulisaj-a riq'uin re ache, man c'a que'rutak-a chupan re qui-lugar, xe'cha'. 32Y chire' chunakaj-apo re lugar re', pa rue' jun loma, camas je q'uiy ak ye'va', mare' re itzel tak esp'iritu xquic'utuj utzil cha re Jes'us che tuya' k'ij chique chin ye'be'oc chiquipan re ak re'. Y re Jes'us xubij chique che otz. 33Y re itzel tak esp'iritu can jare' xe'el-a riq'uin re ache, y xe'be'oc chiquipan re ak. Conojel c'a re ak xquitz'am anin chach pe~na, y c'a chupan re lago xe'beka-va. Y conojel re ak re' xe'jik' y xe'com. 34Y re ye'chajin quichin re ak, xe xquitz'at can quire', xe'numaj y xbequiya' rutzijol pa tenemit y pa tak juyu'. 35Y tak re vinak xquic'axaj re xbanataj, xe'pa chin ne'quitz'eta'. Tak re vinak re' xe'beka riq'uin re Jes'us, xquitz'at che re ache xe'lisas itzel tak esp'iritu riq'uin, tz'uyul-apo riq'uin re Jes'us, rucusan rutziak, y man nuban-ta chic re ancha'l rubanom-pa. Pero re vinak re' xa xquixibij-qui' tak xquitz'at re ache re'. 36Y xtzijos chique re vinak ronojel re xbanataj, coma re vinak re xquitz'at tak xe'lisas re itzel tak esp'iritu riq'uin re ache, roma re Jes'us. 37Y roma ronojel re xbanataj, re vinak re aj-chire' pa Gadara xquibij cha re Jes'us: Tabana' utzil catel-a vova' pa ka-lugar. Re vinak aj chire' xquibij quire' roma camas quixibin-qui'. Mare' re Jes'us y re ru-disc'ipulos xe'oc-a pa canoa, chin ye'ba. 38Y re ache re xe'lisas itzel tak esp'iritu riq'uin, nuc'utuj utzil cha re Jes'us che tuya' k'ij cha chin niba chij. Pero re Jes'us xubij cha che tic'ue' can, y chuka' xubij cha: 39Catzolaj cha'vachoch, y ta'tzijoj re xuban re Dios aviq'uin, xcho'x-a. Y re ache xtzolaj y xbo'rtzijoj ronojel chique re jec'o pa rachoch, y chuka' chique conojel re vinak re jec'o pa rutenemit, roma re Jes'us xuban jun milagro riq'uin. 40Y tak re Jes'us y re ru-disc'ipulos xe'tzolaj c'a juc'an chic-apo ruchi' re lago, re vinak jec'o chire' camas c'a ye'qui'cot xquic'ul-apo, roma re vinak re' can ja-va re Jes'us quiyaben. 41Xapon chuka' jun ache rubini'an Jairo. Re ache re' c'o jun rusamaj chupan re nema-jay re anche' nitzijos-va re ruch'abal re Dios re nibex sinagoga cha, jac'a reja' re c'o m'as ruk'ij chire'. Y tak re Jairo xutz'at-apo re Jes'us, can jare' xbexuque' chach, y xuc'utuj utzil cha che titzake-a chij c'a charachoch, 42roma nicom-yan re rumi'al y re ache re' can xe-va jun rumi'al y c'o la'k doce rujuna'. Y tak re Jes'us y re je'binak chij xquitz'am-a bey chin ye'ba charachoch re Jairo, camas je q'uiy vinak xe'tzake-a chiquij. Y roma camas je q'uiy vinak je'binak, man otz-ta chic ye'biyin. 43Chiquicojol re vinak, binak jun ixok niyavaj. Y re ruyabil re ixok re' ja re nibiyin ruq'uiq'uel y doce juna' tuc'alvachij-va quire'. Xuq'uis-yan ronojel ru-mero, roma binak chic quiq'uin q'uiy doctores, y man jun chique re doctores nitiquir-ta nuk'omaj re ruyabil re ixok. 44Re ixok re' xjelon-apo chij can re Jes'us, y ja re ruchi-rutziak xbo'rtz'ama' can ba'. Y can ja mismo rato re' xc'achoj-a re ruyabil. 45Y jare' chuka' tak re Jes'us xuc'utuj: ??Anchique xtz'amo re nutziak? Y roma conojel vinak niquibij che manak rutziak quitz'amon-apo, xpa re Pedro y re nic'aj chic disc'ipulos xquibij cha re Jes'us: Ajaf, rat najo' natamaj anchique xtz'amo re atziak. Pero vova' c'ayef chin natamaj, roma camas je q'uiy vinak niquipitz'-qui' je'binak y niquichocomila-qui' chavij, y rat nac'utuj chaka: ??Anchique xtz'amo re atziak? 46Y jare' tak re Jes'us xubij: C'o jun re xtz'amo re nutziak, roma can xina' che c'o jun re xinc'achojsaj cha re poder c'o viq'uin, xcha'. 47Y re ixok tak xutz'at che xnabex, roma ruximbire' can nibarbot xbexuque' chach re Jes'us. Y chiquivach conojel re vinak xubij-apo cha re Jes'us anchique roma tak xutz'am-apo ruchi-rutziak. Y xubij-apo chuka' cha re Jes'us che can xe xutz'am ruchi-rutziak, can jare' xuna' che xc'achoj cha re ruyabil. 48Re Jes'us xubij cha: Numi'al, xac'achoj, roma xaban confiar-avi' viq'uin. Vocame, catzolaj y ca'texulan, xcho'x-a. 49Y c'a ntajin che tzij re Jes'us riq'uin re ixok, tak c'o jun xbeka pitinak charachoch re Jairo, re ache re c'o ruk'ij chire' pa nema-jay re anche' nitzijos-va re ruch'abal re Dios re nibex sinagoga cha. Re jun re xbeka, xbo'rbij cha re Jairo: Man chic tac'uaj-a re Maestro, roma re ami'al xa xcom-yan. 50Jac'a tak re Jes'us xuc'axaj-pa re xbebex cha re Jairo, xubij cha: Man taxibij-avi' roma re xbebex chava. Tabana' confiar-avi' viq'uin, y re ami'al xtic'astaj, xcho'x. 51Y tak xe'bapon charachoch re Jairo, re Jes'us xaxe chique re Pedro, re Jacobo y re Juan re je ru-disc'ipulos, y chique re rute-rutota' re ac'ual quiminak xuya' k'ij chin xe'oc riq'uin. 52Conojel camas ye'ok' y ye'bison chij re xcom. Pero re Jes'us xubij chique: Man chic c'a quixok' chij re ac'ual re nibij yex che xcom, roma reja' xa man quiminak-ta, reja' xa nivar, xcha'. 53Pero re vinak xa xe'tze'en chij re Jes'us, roma quitaman che re xtan xa quiminak chic. 54Y re Jes'us xutz'am ruk'a' re xtan quiminak, y xubij cha: Xta, chava rat nimbij-va che cayacataj. 55Y re xtan xtzolaj chic-pa re r'anma, y ja mismo rato re' xyacataj-pa. Y re Jes'us xubij che tiquisuju' ruay. 56Y re te'ej-tata'aj xsatz quic'o'x tak xquitz'at re xbanataj riq'uin re cajc'ual. Y re Jes'us xubij chique che man tiquitzijoj chique re vinak re xbanataj chire'.

will be added

X\