San Lucas 7

1Tak re Jes'us xtane' che tzij chiquivach re vinak, xba pa tenemit Capernaum. 2Y chire' pa tenemit c'o jun ache capit'an. Y re ache re' c'o jun ru-mozo y camas nrajo', pero niyavaj, y nicom-yan. 3Y tak re capit'an xuc'axaj re ye'bilox chij re Jes'us, reja' xe'rutak jun ca'e-oxe' chique re rejeta'k tak achi'a' israelitas re c'o quik'ij, chin ne'quic'utuj utzil cha re Jes'us che tipa chin nuc'achojsaj re ru-mozo. 4Y tak xe'bapon re rejeta'k tak achi'a' riq'uin re Jes'us, xquic'utuj jun namalaj utzil cha, y xquibij: Can ruc'amon-va che rat naban re jun utzil re' cha re capit'an, 5roma reja' camas yojrajo' yoj re yoj israelitas, y chuka' xuban jun nema-jay rubini'an sinagoga re anche' nakamol-va-ki' chin nakac'axaj re ruch'abal re Dios, xe'cha' cha. 6Y re Jes'us xba chiquij re rejeta'k tak achi'a' re je'takom-pa roma re capit'an. Y tak re Jes'us y re je'tzakatal chij ye'bapon-yan charachoch re capit'an, re capit'an xe'rutak-pa jun ca'e-oxe' ru-amigos, chuc'ulic re Jes'us. Y re achi'a' re' xbequibij cha re Jes'us: Ajaf, re ache re yojtakayom-pa cha'c'ulic rubim-pa re tzij re' chaka: Ajaf, man c'a taban molestar-avi' nutzij yen, yen xa yin jun aj-mac y mare' man ruc'amon-ta che rat yatoc-apo c'a chupan re vachoch. 7Roma ja quire' nina' yen, mare' can man ruc'amon-ta che can ja yen mismo re xinapon-ta aviq'uin. Rat xaxe c'a tabij che nic'achoj re ache nisamaj viq'uin, y xtic'achoj. 8Y can ntaman-va che quire' xtibanataj, roma ancha'l nbanon yen can c'o jun re nibano mandar pa nue'. Y chuka' jec'o soldados je'yi'on pa nuk'a' chin nimban mandar pa quive'. Tak nimban mandar pa rue' jun soldado re c'o pa nuk'a' che tiba, can nibo-va, y tak nimban chic mandar pa rue' jun chique re soldado re jec'o pa nuk'a' che tipa, can nipo-va. Y tak nimban mandar pa rue' re nu-mozo che tubana' jun cosa, can nuban-va. Ja nojel tzij re' re rubim-pa re capit'an chaka, xe'cha' re achi'a' re' cha re Jes'us. 9Y re Jes'us can anchique-la xuna' tak xuc'axaj re rutakon-a rubixic re capit'an chiquij re achi'a'. Y re Jes'us can jare' xe'rutzu' re vinak re je'binak chij, y xubij chique: Can katzij nimbij chiva, che re ache re takayom-pa rubixic re tzij re', can rubanon confiar-ri' viq'uin. Y man jun nuvinak israelita nvilon re can rubanon-ta confiar-ri' viq'uin, ancha'l re jun ache re'. 10Y tak xe'tzolaj re achi'a' re je'takom-pa roma re capit'an, xquitz'at che re ru-mozo niyavaj, otz chic. 11Jun chic k'ij, re Jes'us xba pa jun tenemit rubini'an Na'in, y je'binak chuka' re ru-disc'ipulos chij. Y camas chuka' vinak je'tzakatal-a chiquij. 12Tak re Jes'us y re je'binak chij ye'oc-yan-apo pa tenemit Na'in, xquitz'at che c'amom-pa jun quiminak chin ne'muk can. Re quiminak re' jun c'ajol-ala', ral jun malca'n-ixok. Re malca'n-ixok re', xa can xe-oc jun ral-ala' c'o, y jare' re binak chumukic tak re Jes'us xapon. Y camas vinak je'binak mukunel, y re vinak re' niquicukuba' ruc'o'x re te'ej. 13Y tak re Ajaf Jes'us xutz'at rach re ixok re', xujoyovaj rach, y xubij cha: Man chic catok'. 14Y re Jes'us xutz'am-apo re ru-c'axa re quiminak, y re je'c'ayon-a richin re quiminak xe'pa'e-ka chire'. Y re Jes'us xubij cha re ala' quiminak: Chava rat nimbij-va, cayacataj. 15Y tak re Jes'us xubij quire', re quiminak xyacataj, y xutz'am tzij. Y re Jes'us xujach-a re ala' cha re rute'. 16Tak re vinak xquitz'at re xbanataj, camas xquixibij-qui'. Y xquiya' chuka' ruk'ij re Dios, y niquibila': Vocame xbec'ulum-pa jun namalaj ache chakacojol, rusamajel re Dios re nibex profeta cha. Vocame re Dios xutak-pa jun re nicola kachin yoj re yoj israelitas re rutenemit, xe'cha' re vinak. 17Y re xuban re Jes'us chupan re k'ij re', xnabex chire' pa Judea, y xnabex chuka' pa tak tenemit re jec'o chunakaj re Judea. 18Y re Juan Bautista xuc'axaj c'a ronojel re ntajin chubanic re Jes'us, roma ja re ru-disc'ipulos re xe'betzijon cha. Mare' reja' xe'rayoj je ca'e' chique re ru-disc'ipulos, 19y xe'rutak-a riq'uin re Jes'us chin xbequic'utuj cha: ??La ja como rat re Cristo re bin che nitak-pa roma re Dios? ??O jun chic-va, y c'amaje-na te'ka? Quire' xubij-a chique. 20Y re achi'a' re je'rutakon-a re Juan, xe'bapon riq'uin re Jes'us. Y reje' xquibij cha: Re Juan Bautista yojrutakom-pa aviq'uin, chin nakac'utuj chava: ??La ja como rat re Cristo re bin che nitak-pa roma re Dios? ??O jun chic-va y c'amaje-na te'ka? Quire' xquibij re achi'a', can ja re ancha'l bin-a chique. 21Y tak re achi'a' jec'o chire' riq'uin re Jes'us, chupan re mismo rato re' xe'ruc'achojsaj je q'uiy re relic yabil ndoc chique, y jec'o re c'o itzel tak yabil chiquij re c'ayef che ye'k'omax. Xe'rulisaj chuka' itzel tak esp'iritu, y xuban chuka' chique re moyi' che xe'tzu'un. 22Y c'are' re Jes'us xubij chique re je ca'e' achi'a' je'takon-a roma re Juan: Vocame quixtzolaj riq'uin re takayom-pa ivichin, y titzijoj cha re xitz'at y xic'axaj can vova'. Titzijoj cha andex rubanic tak re moyi' ye'tiquir ye'tzu'un-a, andex rubanic tak re vinak je cojos choj ye'biyin-a, y andex rubanic tak ye'c'achoj-a re c'o yabil rubini'an lepra chiquij. Titzijoj chuka' cha andex rubanic tak ye'c'achoj-a re je tocon, re je quiminak chic ye'c'astaj-a, y re vinak re meba' c'anma chach re Dios, nimbij re utzulaj ch'abal chin re Dios chique re nibex evangelio cha. 23Y tibij chuka' cha, che otz-rubanoj re jun vinak ancha'l reja', re rubanon confiar-ri' viq'uin y man jun bey yinrumalij-ta can, xe'cho'x-a. 24Y tak re je ca'e' achi'a' re je'rutakom-pa re Juan xe'tzolaj, re Jes'us xutz'am can tzij chij re Juan chiquivach re vinak re jec'o chire'. Y ja quire' re nubila': ??Andex re' re xbe'itz'eta' chupan re lugar anche' manak vinak re nibex desierto cha? Yex man xitz'at-ta jun ache chire', re ancha'l aj re niba quila niba quila pa ruk'a' re cak'ik'. 25??Andex re xbe'itz'eta' chire'? Yex chuka' man xitz'at-ta chire' jun ache re jabal ruvekon-ri'. Re achi'a' re jabal quivekon-qui', rion pa tak cachoch re reyes ye'c'ue-va. 26??Pero andex re xbe'itz'eta' chire' chupan re lugar re anche' manak vinak re nibex desierto cha? Yex xbe'itz'eta' jun ache rusamajel re Dios re nibex profeta cha. Re ache re xitz'at chire' can ja-va re' re rusamaj. Pero can c'o-va m'as ruk'ij que chach xabanchique profeta. 27Y chij c'a re Juan nich'o-va re Dios chupan re ruch'abal re tz'iban can, y nubij: Xtintak c'a jun ache nabey, chin che nuchojmersaj re bey anche' xtapon-va re Cristo. Quire' nubij re Dios chupan re ruch'abal. 28Y titamaj, che jenipa' rusamajela' re Dios re nibex profetas chique re je'alaxnak chach re ruch'ulef, man jun re c'o-ta m'as ruk'ij que chach re Juan Bautista. Can c'o-va m'as ruk'ij reja'. Jac'a vocame conojel re ye'oc pa ruk'a' re Dios, camas c'a nem quik'ij. Y re vinak re m'as ba-oc ruk'ij chiquicojol re ye'oc pa ruk'a' re Dios, jare' re m'as nem ruk'ij que chach re Juan. 29Y chire' jec'o-apo je q'uiy vinak y chuka' jec'o-apo re molay tak impuestos re je'banon bautizar roma re Juan. Y tak reje' xquic'axaj re xubij re Jes'us, xquiya' ruk'ij re Dios, y xquibij: Re xuban re Dios can choj-va. 30Y jac'a re achi'a' fariseos y re achi'a' re je'atamayon re ley quichin re israelitas man xquijo-ta xquic'ul re runojin re Dios che nuban quiq'uin. Reje' man xquijo-ta che xe'ban bautizar roma re Juan. 31Y re Ajaf xubij: Che re vinak chin re tiempo re', can xque'njonomaj quiq'uin re ac'ola'. 32Re vinak re' can je junan quiq'uin re ac'ola' re ye'tz'an pa tak q'uiybal. Y jun pa quichi' niquibila' chiquivach: Xkak'ojmaj xul chivach, pero man xixajo-ta. Xkabixaj bix re can nuyac abis, pero man xixok'-ta, quire' niquibila' re ac'ola' tak ye'tz'an. Y ja quire' quibanon re vinak chin re tiempo re', man jun re nika chiquivach. 33Roma tak xpa re Juan Bautista, reja' man nutaj-ta xcana-vay y man nukum-ta chuka' ruyi'al-uva. Y yex nibij che reja' c'o itzel esp'iritu riq'uin. 34Y tak xineka yen re xinalax chi'icojol, nintaj xcana-vay y ninkum chuka' ruyi'al-uva. Y yex nibij chua che xaxe va'in ninjo' nimban y chuka' nibij che yen xa yin jun k'abarel, y chuka' nibij che xa yin quichibil re molay tak impuestos y re vinak re nibex aj-maqui' chique. 35Pero re runa'oj re Dios can nik'alajin pa quic'aslen re vinak re ye'niman richin, xcha' re Jes'us. 36Y c'o c'a jun ache fariseo xuban invitar re Jes'us chin ne'va' charachoch. Y tak re Jes'us xapon charachoch re ache, xtz'uye-apo chach mesa, chin ye'va'. 37Y chupan re tenemit re', c'o jun ixok re ruc'uan jun itzel c'aslen. Y re ixok re' xunabej che re Jes'us c'o charachoch re jun ache fariseo, mare' reja' xapon chire'. Y reja' ruc'uan-apo jun frasco re banon riq'uin jun aboj rubini'an alabastro. Chupan re frasco re' c'o-a jun jubulaj ak'om. 38Y re ixok re' camas c'a ndok'. Y re ruyi'al tak rach re ixok re' ye'biyin-ka chij rakan re Jes'us. Y re ixok re' ye'rusula-a cha re rusumal-rue', y chuka' ye'rutz'ubaj rij rakan re Jes'us, y xuya' chuka' re jubulaj ak'om re' chij re rakan. 39Y re ache fariseo re xbano invitar chin re Jes'us, tak xutz'at re xuban re ixok, xunojij-ka: Xe-ta re Jes'us can katzij-va che reja' jun rusamajel re Dios re nibex profeta cha, nunabej-ta anchique che vinak re nitz'amo la rakan. Roma la ixok la' jun itzel c'aslen ruc'uan, xcha-ka pa r'anma. 40Y re Jes'us xubij cha re ache fariseo: Sim'on, c'o jun cosa re ninjo' nimbij chava. Re Sim'on xubij cha: Maestro, ??andex najo' nabij chua? 41Y re Jes'us xubij cha: Jec'o c'a je ca'e' achi'a' c'o quic'as riq'uin jun ache re niyi'o mero pa kajic. Jun chique re achi'a' re', vo'o' ciento denarios ruc'as, y re jun chic, nic'aj ciento denarios ruc'as. 42Pero como re achi'a' re' man ye'tiquir-ta niquitoj re quic'as, re ache re ya'yon mero pa kajic chique, xubij che man chic tiquitoj, xa tiq'uis quire', xcha' chique. Y re Jes'us xubij chuka' cha re Sim'on re fariseo: Vocame tabij chua, ??anchique chique re je ca'e' achi'a' re' re m'as nijovan chin re ache re niyi'o mero pa kajic? 43Re Sim'on xubij: Yen nimbij che ja re m'as q'uiy ruc'as. Ja', ja quire', xcha' re Jes'us cha re Sim'on. 44Y re Jes'us nutzu' rach re ixok tak xutz'am rubixic quire' cha re Sim'on re fariseo: Tatz'eta' re ixok re'. Tak yen xinoc-pa vova' pan avachoch, man xaya-ta nuya' ch'ajbal-vakan. Jac'a re ixok re' xe'ruch'aj vakan cha re ruyi'al-rach, y xe'ruchakejsaj riq'uin re rusumal tak rue'. 45Chuka' tak xinoc-pa, man xinatz'ubaj-ta. Jac'a re ixok re', desde que xinoc-pa ntajin chutz'ubaxic re vakan. 46Rat chuka' man xak'aj-ta aceite pa nue' tak xinoc-pa. Jac'a re ixok re', jun jubulaj ak'om xuya' chij re vakan. 47Mare' nimbij chava rat Sim'on, che re ixok re' camas nrajo' re xcuyu re rumac. Roma re jenipa' mac re je'rubanalon xe'cuyutaj-yan. Jac'a re man q'uiy-ta rumac re xe'cuy, xa man can-ta nrajo' re xcuyu re rumac. 48Y re Jes'us xubij cha re ixok: Re amac xe'cuyutaj. 49Y re vinak re je'banon invitar roma re Sim'on re jec'o-apo riq'uin re Jes'us chach mesa, niquibila' c'a chiquivach: ??Anchique como che ache re'? Roma hasta re mac ye'rucuy, ye'cha'. 50Y re Jes'us xubij cha re ixok: Xacolotaj, roma xaban confiar-avi' viq'uin. Vocame, catzolaj y ca'texulan.

will be added

X\