San Lucas 2

1Ja tiempo re' tak re ache rubini'an Augusto C'esar xulisaj jun orden chin niban jun tz'iban be'aj re nibex censo cha. 2Man jun bey banon quire'. Pero tak xban re nabey censo, ja re jun ache rubini'an Cirenio jare' re gobernador, chire' chupan re naci'on rubini'an Siria. Re Siria c'o pa ruk'a' re Augusto C'esar. 3Y re vinak re jec'o chupan re naci'on Israel tiene que ne'quitz'ibaj quibe' c'a pa tak quitenemit. 4Y chire' pa Galilea c'o jun tenemit rubini'an Nazaret. Y chire' pa Nazaret c'o jun ache rubini'an Jos'e. Y re Jos'e tiene que no'rtz'ibaj rube' c'a pa tenemit Bel'en, roma re rate't-rumoma' je aj-chire'. Re Bel'en c'a pa Judea c'o-va. Chire' c'a pa Bel'en xalax-va re Rey David, y re Jos'e rey-rumam can re Rey David. 5Y re Jos'e y chibil re Mar'ia re ruxayil chic, xe'ba pa Bel'en chin ne'quitz'ibaj quibe'. Y re Mar'ia xa niyavaj chic. 6Y chire' pa Bel'en jec'o-va tak xtz'akater ru-tiempo re Mar'ia chin nic'ue' ral. 7Y re nabey ac'ual xc'ue' riq'uin, ch'et ala'. Re Mar'ia jabal xubolk'otij re ac'ual pa tziak, y xuliba' anche' ye'va-va re chicop re nibex establo cha. Chire' xe'c'ue-va roma chupan re jay re anche' niya-va posada manak chic lugar anche' ye'c'ue-va. 8Y chupan re ak'a' re' jec'o achi'a' re niquichajij qui-ovejas pa tak k'os chunakaj-apo re tenemit Bel'en. 9Jare' tak xuc'ut-ri' jun 'angel chiquivach, pitinak chila' chicaj riq'uin re Ajaf. Y reje' camas xquixibij-qui' roma re 'angel, y roma chuka' re namalaj sakil chin re Ajaf re xtzu'un pa quive'. 10Y re 'angel xubij chique: Man tixibij-ivi'. Tic'axaj re xtinya' rutzijol chiva, can xtuban chiva che camas xquixqui'cot. Y man xe-ta yex quire' xtina', xa can quire' chuka' xtiquina' conojel vinak. 11Chire' pa Bel'en, re rutenemit can re Rey David, vocame xalax re nicola quichin re vinak chach re quimac, y re' ja re Cristo re Ajaf. 12Y chin che nitamaj che vo xa ja reja', k'alaj xtivel re ch'et ac'ual bolk'otin pa tziak y cotz'oban anche' ye'va-va re chicop re nibex establo cha, xcha' re 'angel. 13Can jare' tak m'as je q'uiy 'angeles xe'bec'ulum-pa je'pitinak chila' chicaj. Y reje' niquiya' c'a ruk'ij re Dios, y niquibij: 14!!Vocame, camas ruk'ij nuc'ul re Dios chila' chicaj! !!Y vova' chach re ruch'ulef re vinak otz xtuna' re c'anma roma xka-pa re utzil re rutakom-pa re Dios! 15Can xe xquibij can quire' re 'angeles, can jare' xe'tzolaj-a chila' chicaj. Y can xe xe'ba re 'angeles, re ye'chajin ovejas can jare' xquibila-ka chiquivach: Jo-apo pa Bel'en. Takatz'eta' re andex xbanataj. Roma re Ajaf can xutak-pa rutzijol chaka. 16Y can cha'nin xe'ba c'a pa tenemit. Y tak xe'bapon, can xe'quivel-va re Mar'ia y re Jos'e, y jac'a re ac'ual cotz'oban anche' ye'va-va re chicop. 17Y tak reje' xquitz'at re ac'ual, xquitz'am rutzijosic re xbex chique roma re 'angel, chij re ac'ual re'. 18Y conojel re vinak re ye'c'axan re niquitzijoj re ye'chajin re ovejas man niquivel-ta andex niquinojij, roma re nitzijos chiquivach. 19Y re Mar'ia can xe'ruyac pa r'anma ronojel re xtzijos chach, y nunojij andex ndel-va che tzij. 20Re ye'chajin ovejas, tak xe'tzolaj camas c'a niquiya' ruk'ij re Dios y chuka' niquibixaj rube'. Roma ronojel re xbanataj y xquitz'at, can ancha'l re xuya' rutzijol re 'angel chique. 21C'amaje-na rutzijol nic'ue' re ac'ual riq'uin re Mar'ia, tak jare' jun 'angel xubij cha che re ac'ual re xtic'ue' riq'uin xtubini'aj Jes'us. Y can ja-va quire' xubini'aj can re ac'ual tak c'aja vakxaki' k'ij talax-va. Y ja mismo k'ij re' tak xban re circuncisi'on cha, ancha'l nubij re ley chin re Dios che tiene que niban. 22Y tak xtz'akater re k'ij ancha'l nubij re ley chin re Dios re yi'on cha re Mois'es, che re ixoki' re xc'ue' ac'ual quiq'uin tiene que niquijosk'ij-qui', re Mar'ia tiene que xuban quire'. Y tak re Mar'ia xba chin no'rjosk'ij-ri' pa rachoch re Dios chire' pa Jerusal'en, re Mar'ia y re Jos'e xquic'uaj-a chuka' re Jes'us chin niquiban presentar pa rachoch re Dios. 23Quire' xquiban roma re ley chin re Ajaf Dios nubij: Vo xa ala' re nabey ac'ual nalax riq'uin jun ixok, can richin-va re Dios. 24Y re Mar'ia can xuya-va chuka' re ofrenda chin re najosk'ij-avi' ancha'l nubij chupan re ley chin re Ajaf Dios. Re ofrenda re xuya' reja' chach re Dios, je ca'e' palomas, roma re ley nubij: Re je meba' c'o modo niquiya' je ca'e' palomas je nima'k o je ca'e' cocoj. 25Y chire' pa tenemit Jerusal'en re tiempo re', c'o jun ache rubini'an Sime'on. Re jun ache re', choj ruc'aslen y can nuya-va ruk'ij re Dios. Re Sime'on, can c'o-va chuka' re Esp'iritu Santo riq'uin y chuka' reja' ruyaben re Cristo tak xtipa chin no'rcola-ka chupan re rumac y chiquicolic chuka' re nic'aj chic israelitas. 26Y re Esp'iritu Santo rubin chic cha re Sime'on, che c'aja tak rutz'eton chic can re Cristo, re xtutak-pa re Ajaf Dios, c'ajare' xticom. 27Y chupan re k'ij tak re te'ej-tata'aj xquic'uaj re ac'ual pa rachoch re Dios chin niquiban ancha'l nubij re ley, ja chuka' k'ij re' tak xapon re Sime'on pa rachoch re Dios, roma quire' xrajo' re Esp'iritu Santo. 28Re Sime'on xuli'ej re ac'ual, y chin xuya' ruk'ij re Dios, xubij: 29Ajaf, vocame xa can otz chic che yincom, roma re v'anma otz nuna', roma can ancha'l re abin chua, can quire' xbanataj. 30Vocame can xintz'at-yan re Jun re pitinak aviq'uin rat re ne'cola-ka kachin chach re kamac, 31re xaya-pa chin ye'rucol conojel re vinak chupan re quimac. 32Ja reja' chuka' re sakil quichin re vinak re man je israelitas-ta, roma ja reja' re xte'sekresan re abey chiquivach. Y yoj re yoj atenemit Israel, can chakacojol xalax-va reja', mare' q'uiy utzil xtakac'ul y xtic'ue' kak'ij, xcha' re Sime'on. 33Y re Jos'e y re Mar'ia, can anchique-la xquina' tak xquic'axaj re xubila' re Sime'on chij re ac'ual. 34Y jare' tak re Sime'on xuya' ru-bendici'on pa quive' re Jos'e y re Mar'ia. Tak re Sime'on rubanon chic-ka quire', xubij cha re Mar'ia: Tac'axaj re xtimbij chava, re ac'ual re', jun namalaj samaj yi'om-pa cha roma re Dios. Y roma reja', je q'uiy chique re kavinak israelitas xque'colotaj chach re quimac. Y je q'uiy chuka' re man xque'colotaj-ta, roma itzel xtiquitz'at. 35Y riq'uin re quire' xtiquiban cha reja', xtik'alajin andex che cosas re c'o pa tak c'anma. Y re Sime'on xubij chuka' cha re Mar'ia: Y tak xtatz'at ronojel re xtiban cha re Jes'us, re av'anma camas xtik'axo y can ancha'l jun espada re xtinim riq'uin re av'anma xtana', xcho'x re Mar'ia. 36Chire' pa rachoch re Dios c'o c'a jun ixok rubini'an Ana, re nutzijoj re nibex cha roma re Dios. Reja' rumi'al re jun ache xc'ue' ajuer can re xubini'aj Fanuel, y rey-rumam can re jun ache xubini'aj Aser re xc'ue' ajuer can. Re Ana c'a ba-oc rujuna' tak xc'ule'. Y xaxe vuku' juna' xquic'uaj-qui' riq'uin re ruchijil, roma xcom-a y vocame re Ana jun ixok malca'n y re'j chic, 37y man chic xc'ule-ta. Ochenta y cuatro chic rujuna', y nojel tiempo nic'ue' pa rachoch re Dios, che pak'ij che chak'a' nuya' ruk'ij re Dios chin nuban orar y chuka' nuban ayuno. 38Tak re Ana xutz'at re ac'ual Jes'us, reja' xba-apo riq'uin. Y camas xutioxij cha re Dios roma re ac'ual re'. Y c'are' xutz'am c'a rutzijosic chij re ac'ual re' chique re vinak re je'yabeyon chin re nicola kachin chupan re kamac chire' pa Jerusal'en. 39Re Jos'e y re Mar'ia xquiban ronojel re nubij chupan re ru-ley re Ajaf Dios, re tiene que niquiban tak c'a ba' talax jun ac'ual. C'are' xe'tzolaj pa Nazaret anche' c'o-va cachoch. Re tenemit re' chin re Galilea. 40Y re ac'ual niq'uiy y nic'ue' m'as ruchuk'a'. Reja' niq'uiy y nic'ue' m'as runa'oj, y re utzil re pitinak riq'uin re Dios c'o pa rue'. 41Re Mar'ia y re Jos'e re je rute-rutota' re Jes'us, ronojel juna' ye'ba pa tenemit Jerusal'en chin ne'quik'asaj re namak'ij rubini'an pascua. 42Y tak xtz'akater-yan doce rujuna' re Jes'us, jare' tak xe'ba-a pa Jerusal'en chin ne'quik'asaj re namak'ij. Reje' xe'ba roma can quire-va qui-costumbre re quivinak israelitas. 43Tak k'axnak chic re namak'ij, re Mar'ia y re Jos'e xe'tzolaj chacachoch. Pero reje' man c'a xquiya-ta cuenta cha che re ac'ual Jes'us xc'ue' can chire' pa tenemit Jerusal'en. 44Reje' xquinojij che re ac'ual binak chiquicojol re vinak, y quire' xe'biyin jun k'ij. Pero tak xquinabej che re ac'ual manak, c'ajare' tak xquic'utula' rutzijol chique re je quich'alal y chique re vinak re quitaman quivach. 45Pero tak man xquivel-ta re ac'ual chiquicojol re vinak, xe'tzolaj chic jun bey pa Jerusal'en chin ne'quicanoj. 46Y oxe' k'ij c'a tisatz-va can re ac'ual, c'ajare' tak xquivel. Y re anche' xquivel-va re ac'ual, ja pa rachoch re Dios chire' pa Jerusal'en, tz'uyul pa quinic'ajal re achi'a' re je'atamayon re ley quichin re israelitas nuc'axaj-apo re niquibij y c'o preguntas chuka' re ye'rubanala' chique. 47Y conojel re ye'c'axan-apo re nubij re ac'ual xsatz quic'o'x, roma ronojel re nic'utux-apo cha coma re achi'a' re je'atamayon re ley, re ac'ual can jabal nuban contestar chique. Re ac'ual can k'alaj che c'o na'oj riq'uin. 48Y tak re Mar'ia y re Jos'e xquivel re ac'ual chire', can anchique-la xquiban xquina' tak xquitz'at anche' c'o-va y camas xe'qui'cot roma xquivel. Y jare' tak re rute' xubij cha: Val, ??anchique roma tak xac'ue' can y man jun tzij xabij chaka? Re arta' y yen yatkacanoj y nik'axo re k'anma roma man yatkavel-ta. 49Y jare' tak reja' xubij chique: ??Anchique roma xitz'am pena chin yinicanoj? Pa nutzij yen che yex itaman che ja re nrajo' re Nata' Dios jare' re tiene que nimban. 50Jac'a re xubij re ac'ual chique re Jos'e y re Mar'ia, man xk'ax-ta pa quive'. 51Y c'are' re ac'ual xba chiquij chin xe'tzolaj chacachoch, c'a pa tenemit Nazaret. Roma re ac'ual can nunimaj-va quitzij re rute-rutota'. Y ronojel re xbanataj pa Jerusal'en riq'uin re ac'ual, re Mar'ia can xe'ruyac-ka pa r'anma. 52Y re tiempo binak, re Jes'us niq'uiy, y quire' chuka' re na'oj re c'o riq'uin niq'uiy. Y re Dios camas otz nutz'at y quire' chuka' re vinak.

will be added

X\