San Lucas 18

1Y re Jes'us xutzijoj jun ejemplo chique re ru-disc'ipulos, chin che nuc'ut chiquivach che can nic'atzin-va che can nojel tiempo tiquibana' orar y man jun bey tiquiya' can rubanic re oraci'on. 2Reja' xubij chique: C'o jun juez xc'ue' chupan jun tenemit re man nuxibij-ta-ri' chach re Dios, y camanak-va chuka' quijkalen re vinak chach. 3Y chupan re tenemit re', c'o chuka' jun malca'n-ixok. Y re malca'n-ixok re' ndel-ndoc riq'uin re juez re', chin nuc'utuj utzil cha che tuto' chin che nich'acon chij re banayon ch'a'oj cha. 4Y q'uiy k'ij xk'ax, y re juez re' man nrajo-ta nuto' re ixok malca'n. Pero jun k'ij re juez re' xunojij c'a-ka pa r'anma: Astapa' yen man niniman-ta re Dios, y man jun chuka' quijkalen re vinak chinoch, 5pero roma re ixok re' ndel-ndoc viq'uin, tinto-na. Roma vo xa man xtinto-ta, xtak'ax nuc'o'x pa ruk'a'. Ja ejemplo re' re xutzijoj re Jes'us. 6Y c'are' re Ajaf Jes'us xubij: Yen ntaman che yex otz xic'axaj re tzij re xe'rubij re itzel juez. 7C'alapa' re Dios che man-ta xque'ruto' re vinak re je'rucha'on chic reja' y che pak'ij che chak'a' niquiban orar. Re Dios can cha'nin xque'ruto-pa re vinak re je'rucha'on chic. 8Y tak yen re xinalax chi'icojol tak xquimpa chic jun bey vova' chach re ruch'ulef, ??la c'a jec'o como vinak re quibanon confiar-qui' riq'uin re Dios? xcha' re Jes'us. 9Y re Jes'us xubij chic jun ejemplo chiquivach re vinak, roma jec'o chique reje' re niquinojij che can xe reje' re camas je choj riq'uin re quic'aslen y niquibij chique re nic'aj chic vinak che man otz-ta quic'aslen. Mare' re Jes'us xubij: 10Jec'o je ca'e' achi'a' re xe'ba pa rachoch re Dios chin ne'quibana' orar. Re jun ache, jun chique re fariseos, y re jun chic jun chique re molay tak impuestos. 11Re ache fariseo pa'al nuban orar, y nubij chupan re ru-oraci'on: Dios, nintioxij chava roma yen man yin junan-ta quiq'uin re nic'aj chic vinak. Roma reje' je elek'oma', ye'quicanoj chic nic'aj ixoki', y man je choj-ta chupan re quic'aslen. Y man yin junan-ta chuka' riq'uin la jun ache la aj-molay-impuestos la nuban chuka' orar chila'. 12Roma yen ca'e' k'ij nimban ayuno pa jun semana, chin nimban orar. Y ronojel re ninch'ac, lajuj partes nimban cha, y jun cha re lajuj partes re ninya' chava rat, xcha' re fariseo pa ru-oraci'on. 13Y jac'a re molay-impuestos c'ac'anaj pa'al-va can chin nuban orar, pero jun-oc lucul-va, roma chach reja' can man ruc'amon-ta che nuban cha re nak'arach che nitzu'un chicaj y reja' ja re ruk'a' nuyala' chuc'o'x, quire' nuban roma reja' can nuna' che camas rumac, y nubij cha re Dios: Tajoyovaj noch, roma yen yin jun aj-mac chavach. 14Can katzij nimbij chiva, xcha' re Jes'us, che re ache molay-impuestos xtzolaj-a, y man jun rumac xel chach re Dios. Jac'a re ache fariseo man quire-ta xel chach re Dios. Roma xabanchique re nuban che camas ruk'ij, xtiban cha che xtikasas ruk'ij. Jac'a re nuban che manak ruk'ij, can xtic'ue' ruk'ij, xcha' re Jes'us. 15Y re vinak ye'quic'amala-pa re ac'ola' riq'uin re Jes'us, chin che nuya-ta-a ruk'a' pa quive'. Pero tak re disc'ipulos xquitz'at quire' xquibij chique re vinak che man que'quic'amala-pa re ac'ola' riq'uin re Jes'us. 16Pero re Jes'us xe'rayoj y xubij chique: Tiya' k'ij chique re ac'ola' che que'pa viq'uin, y man que'ik'at. Roma re xque'oc pa ruk'a' re Dios, xaxe re je ancha'l ac'ola'. 17Y can katzij nimbij chiva, che re man niquiban-ta ancha'l re ac'ola' chin niquijach-qui' pa ruk'a' re Dios, can man xque'oc-ta pa ruk'a' re Dios, xcha' chique re ru-disc'ipulos. 18Y c'o c'a jun ache re camas ruk'ij, xuc'utuj cha re Jes'us: Rat utzulaj Maestro, ??andex re ruc'amon che nimban yen chin quire' ninvel-ta re c'aslen re man niq'uis-ta? xcha'. 19Y re Jes'us xubij cha: ??Anchique roma tak nabij otz chua che yen yin otz? Roma can man jun vinak re otz-ta, xa can xe c'a re Jun re otz y re' ja re Dios. 20Y yen nimbij che rat ataman re lajuj mandamientos re xuya' re Dios pa ruk'a' re Mois'es ajuer can, che rat ache re yatc'ulan man camacun riq'uin jun chic ixok, man caquimisan, man catelak', man tatz'uc tzij chij jun chic vinak, taya' quik'ij re ate-arta', xcha' re Jes'us cha. 21Y re ache xubij cha re Jes'us: C'a yin co'ol che' tak nbanom-pa ronojel re'. 22Tak re Jes'us xuc'axaj quire', xubij: C'a c'o jun cosa re man abanon-ta. Man ajachon-ta re abiyomal chiquivach re vinak re camas je meba'. Tac'ayij ronojel re c'o aviq'uin y re rajal tajacha' chiquivach re vinak camas je meba', chin quire' nic'ue' abiyomal chila' chicaj. Y catampa viq'uin y catzake' chuij, xcha' re Jes'us cha re ache biyom. 23Y tak re ache xuc'axaj re xubij re Jes'us cha, camas xbison pa r'anma roma camas biyomal c'o riq'uin. 24Y tak re Jes'us xutz'at che camas bis xpa pa r'anma re ache, xubij: Re c'o quibiyomal, camas c'ayef chin che ye'oc pa ruk'a' re Dios. 25Mare' yen nimbij che man c'ayef-ta che nak'ax jun camello pa ch'et rujulil jun bak chin t'iso'n, que chach jun biyom ndoc-ta pa ruk'a' re Dios, xcha' re Jes'us. 26Re xe'c'axan re xubij re Jes'us, xquibila': Vo xa can quire' ancha'l nubij re Jes'us, camas c'ayef, roma man jun xticolotaj, xe'cha'. 27Y re Jes'us xubij chique: Chiquivach re vinak c'o cosas camas c'ayef chin che ye'ban. Pero chach re Dios man jun cosa c'ayef, xcha' chique. 28Jare' tak xpa re Pedro xubij: Rat ataman che yoj kayi'on can ronojel re c'o kaq'uin, chin yojtzakatal chavij. 29Y re Jes'us xubij chique: Can katzij nimbij chiva, che xabanchique vinak can c'o q'uiy cosas xtuc'ul, pero vo xa can ruyi'on can rachoch, rute-rutota', ruch'alal, ruxayil o rajc'ual, chin nuban re rusamaj re Dios y can ye'ruto' re nic'aj chic che ye'oc pa ruk'a' re Dios. 30Can q'uiy-yan cosas nuc'ul chupan re tiempo re katz'amon. Y chuka' chupan re jun chic tiempo re pitinak, can xtuc'ul c'a re ruc'aslen re man niq'uis-ta. 31Y re Jes'us xaxe c'a quiq'uin re je doce ru-disc'ipulos xch'o-va, y xubij: Yex itaman che pa tenemit Jerusal'en katz'amon-va-a bey, y chire' q'uiy c'a andex xtiban chua yen re xinalax chi'icojol. Can ronojel-va re tz'iban can chuij chupan re ruch'abal re Dios can xtibanataj-va, can ancha'l re quitz'iban can re rusamajela' re Dios re xe'c'ue' ajuer can, re xbex profetas chique. 32Xquinjach pa quik'a' vinak re man je israelitas-ta. Y re vinak re' xque'tze'en chuij, xtiquibila' itzel tak tzij chua y xque'chuban chuij, 33xquinquich'ay y c'are' xquinquiquimisaj. Pero pa rox k'ij xquinc'astaj-pa chiquicojol re anama'i', xcha' re Jes'us. 34Pero re disc'ipulos man xk'ax-ta pa quive' re xubij re Jes'us chique, roma can c'ayef xuban chique che xk'ax-ta otz pa quive', mare' xaxe tal choj quire' xquic'axaj y man quitaman-ta andex ndel-va che tzij. 35Tak re Jes'us ndoc-yan-apo pa tenemit rubini'an Jeric'o, chire' chuchi-bey tz'uyul c'a jun ache. Y re ache re' moy, y nuc'utula' limosna chique re vinak re ye'k'ax chire'. 36Y tak re moy re' xuc'axaj che sabalaj vinak ye'k'ax chire', xuc'utuj-apo chique andex xbanataj. 37Y re vinak xquibij cha che ja re Jes'us aj-Nazaret pitinak y nak'ax chire'. 38Y re ache moy cof xch'o, y xubij: Tajoyovaj noch rat Jes'us, re yat rey-rumam can re Rey David, xcha'. 39Y re vinak re je nabey chach re Jes'us, xquibila' cha re ache: Ch'oj-achi'. Pero reja' xa m'as cof xch'o, y xubij: Rat re yat rey-rumam can re Rey David, tajoyovaj noch roma quire' nbanon, xcha'. 40Y re Jes'us xuc'axaj re ruch'abal re ache. Mare' xpa'e' y xubij che tiquic'ama-pa. Y tak c'amon chic-pa re ache riq'uin, xuc'utuj cha: 41??Andex najo'? Y re ache moy xubij: Ajaf, yen ninjo' yintzu'un, xcha'. 42Y re Jes'us xubij cha: Catzu'un. Roma xaban confiar-avi' viq'uin, mare' xac'achoj. 43Y re ache moy can jare' tak xtzu'un y xtzake-a chij re Jes'us. Y can nuya' chuka' ruk'ij re Dios. Y conojel re vinak re xe'tz'eto che re moy xtzu'un, can xquiya' ruk'ij re Dios.

will be added

X\