Hebreos 7

1Re jun ache re rubini'an Melquisedec, jare' re Rey chin re tenemit Salem, y chuka' ru-sacerdote re namalaj Dios. Re Melquisedec xba chuc'ulic re kamoma' Abraham tak tzolojnak-pa pan ayoval, y re' ja tak je'ruch'acon chic can re reyes che' re anchok quiq'uin xuban-va ayoval, y mare' re Melquisedec can xuban-va bendecir re Abraham. 2Y re Abraham xuban lajuj partes cha ronojel cosa re xulisaj-pa chiquik'a' re reyes re xe'ruch'ac, y cha re lajuj partes re', jun parte xuya' cha re Melquisedec. Y re be'aj Melquisedec ndel che tzij che jun Rey re can choj-va re ruc'aslen. Y roma re Melquisedec Rey chin re tenemit Salem, ndel che tzij che Rey de paz, roma re be'aj Salem ndel che tzij paz. 3Re Melquisedec man k'alaj-ta vo xa xe'c'ue' rute-rutota', man k'alaj-ta chuka' vo xa xe'c'ue' rate't-rumoma'. Chuka' man k'alaj-ta vo xa xalax y chuka' man k'alaj-ta vo xa xcom. Mare' tak nik'alajin che reja' can nojel tiempo sacerdote, ancha'l re Ruc'ajol re Dios. 4Ronojel cosas re xulisaj-pa re kamoma' Abraham chiquik'a' re reyes, xuban lajuj partes cha, y jun parte xuya' cha re Melquisedec. Jare' re diezmo re xuya' re Abraham cha re Melquisedec. Y roma quire' xuban re Abraham riq'uin re Melquisedec, nik'alajin che re Melquisedec camas nem ruk'ij, astapa' re kamoma' Abraham can c'o-va ruk'ij, reja' can xuya-va re diezmo cha, 5roma re ley chin re Mois'es nubij che re je rey-rumam can re Lev'i re ye'oc sacerdotes, tiene que niya' re diezmo chique coma re quivinak, y re vinak re ye'yi'o re diezmo ja re rey-rumam can re Abraham, 6pero re ache rubini'an Melquisedec, astapa' man rey-rumam-ta can re Lev'i, can xuc'ul re diezmo chuk'a' re Abraham. Xuban bendecir chuka' re Abraham. Y re Abraham c'o ruk'ij, roma c'o cosas rusujun re Dios cha. 7Re Melquisedec camas-va ruk'ij. Roma kataman che re niyi'o re bendici'on, m'as nem ruk'ij que chach re nic'ulu re bendici'on. 8Re je rey-rumam can re Lev'i re anchok chique niya-va re diezmo, xa je vinak y xa ye'com-a chach ruch'ulef. Jac'a re Melquisedec re xya' re diezmo cha roma re Abraham, nibex che reja' can c'o-va ruc'aslen chin nojel tiempo. 9Y mare' can yojtiquir nakabij che tak re Abraham xuya' re ru-diezmo cha re Melquisedec, xuya-yan can pa qui-cuenta re sacerdotes re je rey-rumam re Lev'i. Astapa' reje' niya' re diezmo chique ancha'l nubij re ley. 10Y yojtiquir chuka' nakabij che re sacerdotes re', astapa' can c'amaje-na ca'lax tak re Melquisedec xba chuc'ulic re Abraham, can jare' tak xquitoj-yan re qui-diezmo cha re Melquisedec riq'uin re quimoma' Abraham. 11Re ley chin re Mois'es xjach pa quik'a' re kavinak xe'c'ue' ajuer can, chupan re qui-tiempo re sacerdotes re je rey-rumam can re Lev'i. Pero re sacerdotes re' man xe'tiquir-ta xquiban chique re kavinak re' che man jun quimac xel chach re Dios, y mare' xc'atzin che xpa jun chic Sacerdote ancha'l re Melquisedec, y man ancha'l-ta re Aar'on y ni xe-ta ancha'l re nic'aj chic sacerdotes re je rey-rumam can re Lev'i. 12Can xjalataj re nubij chupan re ley, roma tak xpa re jun chic Sacerdote, man junan-ta quiq'uin re nic'aj chic sacerdotes. 13Roma re jun Sacerdote re' man rey-rumam-ta can re Lev'i. Reja' rey-rumam can jun chic ache. Y re je rey-rumam can re ache re' man chin-ta che ye'oc sacerdotes. 14Re jun chic Sacerdote ja re Kajaf Jesucristo, y kataman che reja' rey-rumam can re ache rubini'an Jud'a. Y re ley chin re Mois'es man nubij-ta che ye'oc sacerdotes re je rey-rumam can re Jud'a. 15Re c'ac'a Sacerdote re xbeka, xa ancha'l re sacerdote rubini'an Melquisedec. Mare' can xk'alajin che re jun Sacerdote re', man junan-ta quiq'uin re sacerdotes re je rey-rumam can re Lev'i. 16Re ley nubij che can xe re je rey-rumam can re Lev'i jare' re ye'oc sacerdotes, y re Jesucristo xa man rey-rumam-ta can re Lev'i. Pero reja' can xtiquir xoc Sacerdote, roma re ruc'aslen man jun bey xtiq'uis. Can k'alaj che c'o ru-poder. 17Ancha'l xubij re Dios cha re Jesucristo: Ja rat re Sacerdote chin nojel tiempo, can ancha'l re Melquisedec re xc'ue' ajuer can. 18Y xya' can rubanic re nubij chupan re ley, roma manak ru-poder y man xtiquir-ta xe'rucol re vinak chupan re quimac. 19Roma re ley xa man xtiquir-ta xuban chique re vinak che man jun quimac xel chach re Dios, pero vocame c'o chic Jun m'as otz pa ru-lugar re ley re'. Riq'uin re Jun re' kabanon-va confiar-ki'. Y xaxe roma re Jun re', yoj yojtiquir yojelon-apo riq'uin re Dios. 20Re Dios xuban jurar chin xk'alajin che katzij che re Jes'us xoc Sacerdote. 21Jac'a re je rey-rumam can re Lev'i, tak xe'oc sacerdotes, re Dios man jun juramento xuban. Pero tak re Jes'us xoc Sacerdote, jare' tak re Dios xuban jurar. Ancha'l nubij chupan re ruch'abal re tz'iban can: Re Ajaf Dios xuban jurar y man xtujal-ta re nunojij. Chuka' xubij: Ja rat re Sacerdote chin nojel tiempo, can ancha'l re Melquisedec re xc'ue' ajuer can. Quire' xubij re Dios cha re Jes'us. 22Mare' ja re Jes'us xpa'e' can chach re trato re xuban re Dios kaq'uin. Y re trato re' m'as otz que chach re xban nabey quiq'uin re kavinak xe'c'ue' ajuer can. 23Re sacerdotes re je rey-rumam can re Lev'i je q'uiy, roma re sacerdotes re' xa ye'com. Y tak nicom-a jun chique re sacerdotes, can ndoc chic can jun pa ruq'uixel. 24Y ja re Jes'us re Sacerdote chin nojel tiempo. Reja' man jun bey xticom. 25Y mare' reja' can nitiquir ye'rucol chin nojel tiempo re ye'niman richin, chin che c'o modo ye'jelon-apo riq'uin re Dios. Roma reja' can nojel tiempo Sacerdote, mare' binak-rach nich'o pa qui-cuenta re vinak cha re Dios. 26Y ja re Jes'us re ruc'amon che xoc Kanamalaj Sacerdote, roma re ruc'aslen can lok'olaj-va. Man jun bey xmacun-ta, man jun itzel cosa xlitaj pa ruc'aslen, man junan-ta quiq'uin re vinak re ye'macun, y yi'on ruk'ij chila' chicaj. 27Reja' man ancha'l-ta re namalaj tak sacerdotes re je rey-rumam can re Lev'i. Reje' ronojel k'ij ye'quiquimisaj chicop y ye'quisuj cha re Dios. Quire' niquiban chin che nicuyutaj quimac reje' y chuka' quimac re quivinak. Jac'a re Jes'us man nic'atzin-ta che q'uiy bey xuban quire' cha re Dios. Reja' xa jun bey quire' xuban, y tak reja' xuban quire', ja re ru-cuerpo re xcom cho cruz. 28Re Jes'us man ancha'l-ta-oc re namalaj tak sacerdotes re je rey-rumam can re Lev'i. Roma reje' xa je vinak y manak qui-poder. Astapa' can je quire', re ley chin re Mois'es can xuban-va chique che xe'oc namalaj tak sacerdotes. Jac'a re Jes'us can Ruc'ajol-va re Dios. Y astapa' c'o chic re ley chire', re Dios can xuban jurar che re Jes'us ndoc Namalaj Sacerdote. Y re Jes'us aconak ka-Sacerdote chin nojel tiempo, y reja' can choj riq'uin ronojel.

will be added

X\