Hebreos 1

1Ajuer can tiempo, q'uiy bey xch'o re Dios quiq'uin re kavinak xe'c'ue' ajuer can. Y tak xch'o quiq'uin, xe'rucusaj re rusamajela' re xbex profetas chique. Y chin xusekresaj re ruch'abal chique re rusamajela' re', q'uiy formas xucusaj. 2Jac'a chupan re ka-tiempo yoj, re Dios can ja re Ruc'ajol Jesucristo xucusaj chin xusekresaj re ruch'abal chakavach. Re Dios pa ruk'a' re Ruc'ajol xujach-va ronojel chin che ja reja' re xoc Rajaf. Y chuka' pa ruk'a' reja' xuya-va chin xuban ronojel cosas. 3Riq'uin re Jesucristo nik'alajin re ruk'ij y ru-poder re Dios. Roma re Jesucristo je junan riq'uin re Dios. Y ja re Jesucristo re ac'ayon chin ronojel, y ja riq'uin ru-poder re ruch'abal re tz'amayon ronojel re c'o. Reja' xcom chin che xuch'aj re kamac, y xc'astaj, c'are' xbetz'uye' chila' chicaj pa rajquik'a' re namalaj Dios. 4Ja re Jesucristo re c'o m'as ruk'ij que chiquivach re 'angeles. Y roma re samaj xuban, re Dios xuya' m'as ruk'ij. Y chuka' re rube' camas-va rajkalen que chach re be'aj 'angel, 5roma re Dios man jun bey rubin cha jun 'angel: Ja rat re yat Nuc'ajol, y mare' ninya' ac'aslen. Y chuka' man jun bey rubin chij jun 'angel: Ja reja' re Nuc'ajol y ja yen re Rutota'. 6Y tak re Dios xutak-pa re Ruc'ajol chach re ruch'ulef, can xk'alajin-va che c'o ruk'ij, roma xubij chique conojel re ru-'angeles: Tiya' ruk'ij re Nuc'ajol. 7Y chiquij re 'angeles xaxe nubij: Re nu-'angeles camas ye'biyin chubanic re nusamaj, roma nimban chique che je ancha'l cak'ik' y je ancha'l rel'ampago. 8Jac'a cha re Ruc'ajol nubij: Rat yat Dios, can xtaban gobernar chin nojel tiempo, y choj naban gobernar. 9Can ajovan re choj y can atzelan re etzelal. Y mare' yen re a-Dios nbanon chava che yaqui'cot pan av'anma. Yen nbanon chava che m'as yaqui'cot que chiquivach re nic'aj chic, re nbanon chuka' chique che ye'qui'cot. 10Y chuka' re Dios xubij cha re Ruc'ajol: Ajaf, rat xabano re ruch'ulef, y chuka' re rocaj riq'uin re ak'a' xaban-va. 11Re ruch'ulef y re rocaj xque'q'uis. Pero rat man jun bey xcaq'uis. Re ruch'ulef y re rocaj xa can xque'tziakor, ancha'l nitziakor jun tziak, 12can xtabotz c'a-a ruchi' y xca'jal-a, ancha'l tijal jun tziak re man otz-ta chic. Jac'a rat man jun bey xcajalataj. Man jun bey xtiq'uis re ac'aslen. 13Y chuka' re Dios man jun bey xubij cha jun 'angel: Catz'uye' pa vajquik'a', y xque'nya' pan ak'a' re ye'tzelan avichin. 14Re 'angeles xa je esp'iritu y je rusamajela' re Dios. Y ja reje' re ye'tak roma re Dios chin ye'quito' re xque'colotaj chach re quimac.

will be added

X\