1 Corintios 2

1Hermanos, tak yen xinapon iviq'uin chin xintzijoj re ruch'abal re Dios chiva, man xincusaj-ta re na'oj chin re ruch'ulef y chuka' man xincusaj-ta ch'abal re camas otz rubixic. 2Roma yen can nbin-va pa v'anma che tak xquinapon iviq'uin, can xe re Jesucristo y re rucamic cho cruz re xtintzijoj chiva. 3Y tak xinc'ue' iviq'uin, xina' che nayon yen man jun cosa yintiquir nimban. Xa camas xinxibij-vi' roma q'uiba' man yintiquir-ta nimban re rusamaj re Dios chi'icojol. Y mare' hasta ximbarbot. 4Y tak xintzijoj re ruch'abal re Dios chiva, can man xincusaj-ta runa'oj jun vinak, y chuka' man xincusaj-ta tzij re camas otz rubixic, xa can ja re Esp'iritu Santo y re ru-poder re Dios re xsamaj pa v'anma. 5Chin quire' tak yex xinimaj re ruch'abal re Dios, can xk'alajin-va che ja re ru-poder re Dios re xbano quire' chiva y mana-ta re na'oj c'o riq'uin jun vinak. 6Yoj can c'o-va na'oj nakac'ut chiquivach re hermanos re can je'q'uiynak chic chupan re ruch'abal re Dios. Y re na'oj re' man chin-ta re ruch'ulef, y man quichin-ta chuka' re vinak camas quik'ij chach re ruch'ulef, roma re na'oj quichin re vinak re camas quik'ij chach re ruch'ulef xtapon re k'ij tak xtiq'uis. 7Re na'oj re nakac'ut yoj chiquivach re hermanos ja re na'oj chin re Dios. Na'oj re man jun bey can-ta jabal sekresan can. Can evan-va, pero can xsekresas chupan re ka-tiempo yoj. Xsekresas re runojin re Dios che nuban. Tak c'amaje-na tic'ue' re ruch'ulef, re Dios xunojij-yan che yoje'c'ue' chila' chicaj riq'uin reja' re c'o ruk'ij, y jabal xtakabana' riq'uin. 8Y re na'oj re' cama-va nak'ax-ta pa quive' re vinak camas quik'ij chach re ruch'ulef. Roma xe-ta xk'ax pa quive', cha'nin-ta xquitamaj che re Ajaf Jesucristo camas ruk'ij, man-ta xquitak ruquimisasic cho cruz. 9Can ancha'l nubij chupan re ruch'abal re Dios: Man jun tz'eteyon re rubanon preparar re Dios chin che nuya' chique re ye'jovan richin. Y chuka' man jun ac'axayon-ta y runojin-ta ba', che re Dios camas q'uiy cosas rubanon preparar chaka. Quire' nubij chupan re ruch'abal re Dios re tz'iban can. 10Jac'a yoj riq'uin re Esp'iritu Santo re rutakom-pa re Dios xkatamaj-va. Y re Esp'iritu Santo can rutaman-va ronojel, hasta re namalaj tak cosas re jec'o pa r'anma re nunojij re Dios rutaman. 11Man jun vinak atamayon re andex nunojij jun chic vinak. Roma xaxe re ru-esp'iritu reja' mismo atamayon re andex nunojij. Y chuka' man jun atamayon re nunojij re Dios, xa can xe re ru-Esp'iritu re Dios atamayon andex nunojij re Dios. 12Y yoj ja re Esp'iritu re' re kac'ulun, re pitinak riq'uin re Dios, y mana-ta re esp'iritu chin re ruch'ulef. Ja re Dios ya'yon re Esp'iritu re' chaka, chin che nakatamaj ronojel re andex nuya-pa re Dios chaka. 13Y tak yoj nakabij ronojel re' chique re hermanos re je'c'uan roma re Esp'iritu Santo, man ye'kacusaj-ta tzij re je'pitinak riq'uin runa'oj jun vinak. Xa can ye'kacusaj ch'abal re je'pitinak riq'uin re Esp'iritu Santo, chin che ye'kabij re ye'ruc'ut reja' chakavach. 14Re vinak manak re Esp'iritu Santo chin re Dios quiq'uin, man niquic'ul-ta re ense~nanzas re je'pitinak riq'uin re Esp'iritu Santo. Chiquivach reje' man jun nic'atzin-va roma man nak'ax-ta pa quive'. Roma xaxe re vinak re c'o re Esp'iritu Santo quiq'uin, xaxe pa quive' reje' nak'ax-va y quitaman che c'o rajkalen re ense~nanzas re'. 15Yoj re yoj-ec'uan roma re Esp'iritu Santo yojtiquir nakabij re andex c'o quijkalen y re andex manak quijkalen. Y man jun xtibin chaka che man otz-ta re nakaban. 16Ancha'l nubij chupan re ruch'abal re Dios re tz'iban can: Man jun vinak atamayon re andex nunojij re Ajaf Dios. Y chuka' man jun vinak re nitiquir nibin cha re Dios re andex otz che nuban. Quire' nubij re tz'iban can. Jac'a yoj re yoj-ec'uan roma re Esp'iritu Santo, c'o chic re runa'oj re Jesucristo kaq'uin.

will be added

X\