Tito 3

1Ta'ej chica ri hermanos chi ca'niman cha ri gobierno y chica ri nic'aj chic autoridades. Can riq'uin nojiel cánima tiquib'ana' nojiel utzulaj samaj ri ni'e'x chica. 2Y ta'ej je' chica chi man jun itziel kax tiqui'ej chirij jun chic vinak, y man tiqui'an je' ayoval. Xa otz quino'j tiquib'ana', y co'l-oc tiquib'ana' chiquivach quinojiel. 3Ruma ojier can, ojre' je' oj-nacanak xka'an-pa, man xojniman ta, can oj-sachnak, man xojtiquir ta xkak'il-ki' choch ri pecado, xa xka'an nojiel ri itziel tak kax ri xkarayij y altíra xojquicuot riq'uin ri kax ri ic'o choch-ulief. Can itziel ri kac'aslien xkuc'uaj, itziel xa'katz'at ri nic'aj chic ruma otz ic'o, itziel xojtz'iet ruma man otz ta ri kac'aslien y itziel xkatz'at-ki' chikib'il-ki'. 4Pero ri Dios ri Ka-Salvador (caloy-kichin) xuc'ut ri utzulaj runo'j chakavach, y xuc'ut chi quinojiel vinak nca'rajo', 5antok xojrucol chupan ri ka-pecados. Pero man ruma ta chi c'o otz kab'anun. Jaja' xojrucol ruma xujoyovaj kavach y xu'on chika chi inche'l xojalax chic jun b'ay ruma sak xu'on cha ri kánima. Y xu'on c'ac'ac' cha ri kac'aslien, ruma ri Espíritu Santo xuoc riq'uin kánima. 6Ri Dios xuya' ri Espíritu Santo chika, y man xuc'aq'uiej ta xuya' chika ruma ri Ka-Salvador (caloy-kichin) Jesucristo. 7Y rumare' xiel chi man jun chic ka-pecado choch ri Dios, y re' ruma ri favor ri xu'on jaja' chika. Rumare' vacame kata'n chi xtiyo'x chika ri utzulaj c'aslien ri man xtiq'uis ta, jare' ri ka-esperanza. 8Nojiel re' ketzij, can otz, y nic'atzin cha ri quic'aslien quinojiel. Rumare' nivajo' chi atre' man tamalij nca'tijuoj ri quiniman chic ri Dios riq'uin nojiel re', chi quire' tiquitija' quik'ij niqui'an ri otz. 9Pero ri tzij ri xa man jun quikalien, inche'l ri tzij ri nitzijos chiquij ri mámix y ri quimáma ri xa'c'ujie' ojier can, man ca'vaxaj. Y ri ayoval je' ri nca'qui'an ri vinak ri man junan ta niqui'an pensar chirij ri nu'ej ri ru-ley ri Moisés, man ca'vaxaj, ruma nojiel tzij inche'l re' man jun nca'c'atzin-ve. 10Y xa c'o jun ri nca'ruc'ut tzij ri man i-ketzij ta, y rumare' ri hermanos niqui'an división, ta'ej cha chi man chic tu'on quire'. Y xa ya xa'ej cha jun b'ay y man ncarunimaj ta, ta'ej chic jun b'ay cha. Y xa man niniman ta, tatarariej-el. 11Ruma jun ri nib'ano quire', can k'alaj chi xa c'axtajnak runo'j, can pecado ri nu'on, y rumare' ruyuon jaja' nrayuoj ru-castigo paro'. 12Y inre' xtintak-el ri hermano Artemas o ri hermano Tíquico aviq'uin. Y antok xti'ka aviq'uin jun chiquivach ijeje', tatija' ak'ij chi ncapa tanamet Nicópolis. Ruma nub'anun pensar chi nquib'ac'ujie' chire' pa ru-tiempo ri job'. 13Y ri hermano Zenas ri maestro richin ri ley y ri hermano Apolos, taya' nojiel ri nic'atzin chica richin ri quib'iey, chi quire' man jun xtu'on falta chiquivach. 14Y ri hermanos ticatamaj c'a niqui'an ri otz. Ca'quito' quinojiel ri c'o nic'atzin chica, chi quire' niq'uiy otz ri quic'aslien choch ri Dios. 15Quinojiel ri hermanos ri ic'o viq'uin niquitak-el jun saludo chava. Taya' jun saludo chica ri nkojcajo' ruma junan kacukub'an kac'u'x riq'uin ri Jesucristo. Ja ta ri ru-favor ri Dios tic'ujie' iviq'uin chi'ixvonojiel. Amén.

will be added

X\