Tito 2

1Pero atre', ja ri utzulaj tak tzij tac'utu' chiquivach ri hermanos. 2Ri ch'itak mámix can ta niqui'an pensar otz ri nca'qui'an, nic'atzin chi niquic'uaj jun utzulaj c'aslien chiquivach ri vinak, y niqui'an ta pensar otz ri niqui'an chi quire' man niquiya' ta lugar cha ri pecado, can choj ca'c'ujie' chupan ri cukb'al c'u'x, can tic'ujie' ri amor quiq'uin y tic'ujie' qui-paciencia. 3Ri ch'itak avala'i', can tiquic'utu-qui' chi quic'uan jun utzulaj c'aslien choch ri Dios, man tiquik'ab'aj tzij chiquij nic'aj chic, man ca'k'ab'ar, y tiquiya' jun otz ejemplo chiquivach ri nic'aj chic. 4Y tiquic'utu' je' chiquivach ri ixoki' ri c'a maja' más quijuna' chi ca'cajo' ri cachajil y ri cal, 5tiquib'ana' pensar otz ri niqui'an chi quire' man niquiya' ta lugar cha ri pecado, tiquic'uaj jun c'aslien sak, tiquib'ana' cuenta ri cachuoch, otz quino'j tiquib'ana' quiq'uin quinojiel, ca'niman chica ri cachajil, chi quire' man jun kax itziel xti'e'x chirij ri ruch'ab'al ri Dios. 6Ta'ej je' chica ri c'ajola' chi tiquib'ana' pensar otz ri niqui'an chi quire' man niquiya' ta lugar cha ri pecado. 7Y atre' Tito, nic'atzin je' chi siempre navuc'uaj jun c'aslien otz, chi quire' nac'ut chiquivach ri chica c'aslien otz chi niquic'uaj ijeje'. Y antok nca'tijuoj riq'uin ri ruch'ab'al ri Dios, can otz rub'ixic tab'ana' cha. Y tik'alajin chi c'o rakalien ri na'ej. 8Tab'ana' cuenta-avi' riq'uin ri tzij ri na'ej antok nac'ut ri utzulaj tzij y can otz rub'ixic tab'ana' cha, chi quire' man jun chica ni'e'x chirij. Y ri man nicajo' ta ri ruch'ab'al ri Dios, can xca'q'uix ruma man jun kax xca'tiquir xtiqui'ej chivij ixre'. 9Ta'ej chica ri esclavos chi ca'niman chica ri cajaf, y otz tiquib'ana' cha nojiel ri samaj ri ni'e'x chica. Y xa c'o nich'ojix chica, can tiquicach'o', man jun kax tiqui'ej. 10Ni man jun kax tiquilak'aj chica ri cajaf. Can otz tiquib'ana' cha nojiel, chi quire' otz nca'tz'iet cuma quinojiel ri vinak; y ri vinak xtiquiya' ruk'ij ri ruch'ab'al ri Dios, ri Dios ri nkojrucol. 11Ruma ri ru-favor ri Dios ri xuya' vave' ri choch-ulief, richin chi nkojcolotaj konojiel, 12nuc'ut je' chakavach chi nic'atzin nca'kaya' can nojiel ri man nika ta choch ri Dios y nojiel ri itziel tak kax ri ic'o choch-ulief ri nca'karayij. Nuc'ut chakavach chi mientras c'a ojc'o vave' choch-ulief, ka'na' pensar otz ri naka'an chi quire' man nakaya' ta lugar cha ri pecado, y kuc'uaj jun utzulaj c'aslien, jun c'aslien ri nika choch ri Dios. 13Quire' nic'atzin naka'an ruma kayo'ien ri utzulaj kax ri ranun prometer ri Dios chi nuya' chika. Can ja'al nkojquicuot kayo'ien-apa ri k'ij antok xtik'alajin ri ruk'ij ri Namalaj Ka-Dios y Ka-Salvador (caloy-kichin) Jesucristo. 14Jaja' xuya' ri ruc'aslien chi xquimisas pa ka-cuenta, chi xojrucol choch nojiel roch pecado y sak je' xu'on cha ri kac'aslien. Quire' xu'on chika chi xojuoc jun tanamet richin jaja', jun tanamet ri nurayij nu'on ri otz. 15Riq'uin nojiel re' ca'tijuoj y ta'ej chica ri otz quic'aslien quic'uan, chi man tiquiya' can. Y ri itziel quic'aslien, ta'ej chica chi tiquiya' can ri itziel c'aslien re'. Riq'uin autoridad ta'ej quire' chica. Man jun tib'ano chava chi man jun avakalien.

will be added

X\