Tito 1

1Inre' Pablo, in ru-siervo ri Dios y in ru-apóstol ri Jesucristo. Jaja' xirutak chi nca'nto' ri i-rucho'n chic ri Dios, chi quire' niquicukub'a' más quic'u'x riq'uin, y chi nicatamaj otz ri ketzij, ri nca'ruc'uaj chupan ri c'aslien ri nika choch ri Dios. 2Rumare' quiyo'ien ri c'aslien ri man xtiq'uis ta. Y ja c'aslien re' ri ranun prometer ri Dios chi nuya'. Re' xu'ej antok c'a maja' tu'on ri roch-ulief. Y can xtuya' ri c'aslien re', ruma jaja' man nutz'ak ta tzij. 3Y vacame xalka ri k'ij antok ri Dios ri nicalo kichin xk'alajin c'a ri ruch'ab'al y can xk'alajin ruma ri samaj ri ni'an inre' antok nitzijuoj ri ch'ab'al ri xu'on mandar chuva. 4Y nitz'ib'aj-el va carta va chava atre' Tito, ri can at inche'l nuc'ajuol ab'anun ruma junan kacukub'an kac'u'x riq'uin ri Jesucristo. Ja ta ri favor, ri misericordia y ri paz ri nuya' ri Katata' Dios y ri Kajaf Jesucristo ri nicalo kichin, tic'ujie' riq'uin avánima. 5Xanya' can chupan ri isla rub'inan Creta ruma xinvajo' chi nachojmij ri nu'on falta. Nojiel tanamet ri pache' ic'o hermanos, ca'cha' achi'a' chiquicajol chi nca'uoc ancianos, inche'l ri xan'an can mandar. 6Jun anciano richin ri iglesia nic'atzin chi ruc'uan jun utzulaj c'aslien, chi quire' man jun kax nilitaj chirij. Nic'atzin je' chi jo'c jun raxjayil c'o y ri ralc'ual can quiniman ta ri Jesucristo. Y man ta ni'e'x chiquij chi quic'uan jun itziel c'aslien y chi man niquinimaj ta tzij. 7Ruma jun anciano nic'atzin chi ruc'uan jun utzulaj c'aslien ruma rusamajiel ri Dios, chi quire' man jun kax nilitaj chirij. Nic'atzin je' chi man nuna' ta ri' nem, chi man cha'nin ta nipa royoval, man nik'ab'ar ta, man nu'on ta ayoval, y man nu'on ta itziel tak kax chi nuch'ec miera. 8Y nic'atzin je' chi ja'al nca'ru'on recibir ri hermanos pa rachuoch ri jun chic tanamet nca'pa-ve, chi b'anak ránima nu'on ri otz, chi nu'on pensar ja'al ri nca'ru'on, chi ruc'uan jun c'aslien choj, jun c'aslien otz choch ri Dios, y chi man nuya' ta lugar cha ri pecado. 9Nic'atzin je' chi ruyo'n ránima riq'uin ri ketzij ruch'ab'al ri Dios ri c'utun choch. Chi quire' jaja' nitiquir nuc'ut ri ketzij chiquivach ri hermanos, y nitiquir je' nu'ej pa ruchojmil chica ri vinak chi tiquiya' can ri man ketzij ta. 10Ruma ic'o iq'uiy ri man nca'niman ta tzij. Jo'c tzij ri man jun quikalien niquitzijuoj y nca'qui'an maña chica ri vinak. Y ri más nca'b'ano quire', ja ri nca'e'n chi ti'an ri circuncisión chica ri hermanos achi'a'. 11Y ri vinak re' nic'atzin chi nakatz'apij quichi', ruma iq'uiy ri nca'ka pa quik'a'. Y c'o jay intiera niqui'an maña chica ruma ri itziel tak kax ri nca'quic'ut. Y man jo'c ta re' niqui'an, xa niquic'utuj rajal ri niquic'ut y re' man otz ta. 12Ojier can, xc'ujie' jun ache aj-Creta ri altíra runo'j. Ri ache re' xu'ej can chiquij ri ruvanakil: Ri nuvanakil aj-Creta man jun b'ay ketzij ta nca'ch'o'. Can i-inche'l itziel tak chicop. Can ruyuon va'en nicajo' niqui'an, y i-k'ora'. Quire' xu'ej ri jun ache re'. 13Y can ketzij ri ru'e'n can. Rumare' ni'ej chava atre' Tito, chi cof cach'o' chica ri quire' niqui'an, ta'ej chica chi man chic tiqui'an itziel tak kax, xa choj ca'c'ujie' chupan ri cukb'al c'u'x. 14Ta'ej je' chica chi man chic tica'xaj tzij ri xa choj i-maluon-ka, ri niqui'ej ri nuvanakil israelitas. Y man tiquinimaj je' quitzij nic'aj chic vinak ri xa man nicajo' ta ri ketzij. 15Ri vinak ri ya sak quic'aslien, otz niquitz'at nojiel ri otz. Pero ri vinak ri man sak ta quic'aslien y ri man nicajo' ta niquinimaj ri Dios, can itziel niquitz'at nojiel ri otz, ruma c'axtajnak quino'j y man niquina' ta chi man otz ta ri quijaluon y ri cánima choch ri Dios. 16Niqui'ej chi cata'n roch ri Dios, pero ruma ri itziel tak kax ri niqui'an, k'alaj chi man ketzij ta ri niqui'ej. Man nca'niman ta. Ri Dios man nika ta choch nca'rutz'at ruma man jun otz niqui'an.

will be added

X\