Romanos 9

1Inre', ruma nuniman ri Cristo, can ketzij ni'ej y man nitz'ak ta tzij chivach. Ri nujaluon y ri vánima quire' niqui'ej chuva, chi can ketzij, ruma ri Espíritu Santo quire' je' nu'ej, chi ri ni'ej chiva can ketzij. 2Can altíra nquib'isuon y siempre nik'axo vánima. 3Ruma inre' nivajo' chi quinojiel ta nuvanakil israelitas niquinimaj ri Cristo. Xa ta inre' nquilasas-el riq'uin ri Cristo y nika ri castigo pano', y xa riq'uin re' nca'colotaj ri nuvanakil, niya' nutzij chi quire' ni'an chuva. 4Ri israelitas q'uiy ri xyo'x chica. Ri Dios xu'on ralc'ual chica, can xuc'ut ruk'ij chiquivach, y xu'on jun pacto quiq'uin. Chica ijeje' xuya-ve ri ru-ley, y xuc'ut chiquivach ri chica niqui'an chi niquiya' ruk'ij. Y c'o xu'on prometer chica. 5Ijeje' i-rumáma can ri Abraham, ri Isaac y ri Jacob. Y antok ri Cristo xpa vave' choch-ulief, chiquicajol ijeje' xalax-ve. Ri Cristo jare' ri Dios y c'o paro' nojiel. Y richin nojiel tiempo niyo'x ruk'ij. Amén. 6Man taka'an pensar chi ri Dios man rub'anun ta ri ru'e'n chupan ri ruch'ab'al. Ruma man quinojiel ta ri israelitas i-cho'n ruma ri Dios. 7Man quinojiel ta ri rumáma can ri Abraham i-cho'n ruma ri Dios. Inche'l nu'ej chupan ri ruch'ab'al ri Dios, antok x'e'x cha ri Abraham: Jo'c ri i-rumáma ri Isaac xtiquib'inaj chi i-ketzij i-amáma, xcha' ri Dios cha ri Abraham. 8Y rumare' nakatz'at chi man quinojiel ta ri rumáma can ri Abraham i-ralc'ual ri Dios. Jo'c ri i-rucho'n ri xtuya' chica ri ranun prometer, xa chica ijeje' ri ni'e'x ruma ri Dios chi i-ralc'ual chic. 9Inche'l antok ri Dios xu'on prometer cha ri Abraham: Xquipa chic jun b'ay aviq'uin antok xtalka ri k'ij, y ri Sara ri avaxjayil xtic'ujie' jun ral-ala'. Quire' xu'ej ri Dios cha ri Abraham. 10Y can quire-ve xb'anataj. Can xalax-ve ri Isaac ri kamama', ri ojier can tiempo. Y antok ri Isaac c'ulan chic, ri Rebeca ri raxjayil xc'ujie' encinta (embarazada) y xa'lax ica'ye' ral. 11Y ruma ri xb'anataj quiq'uin ri ica'ye' ral, can k'alaj chi ri Dios man nkurucha' ta ruma ri naka'an. Jaja' nca'rucha' ri can ranun-pa pensar chi nca'rucha'. Ruma antok maja' ca'alax ri ica'ye' ral re', y maja' k'alaj ri chica xtalquib'ana', xa otz o man otz ta, 12ri Dios xu'ej yan cha ri quitie': Ri nem xtuoc rusamajiel ri ruchak'. 13Y chupan ri ruch'ab'al ri Dios ri tz'ib'an can, nu'ej: Ri Jacob nivajo'. Pero ri Esaú man nivajo' ta. Quire' nu'ej ri tz'ib'an can. 14¿Chica xtaka'ej? ¿Man choj ta came xu'on ri Dios? Man quire' ta. 15Inche'l ri nu'ej ri ruch'ab'al ri Dios, antok x'e'x cha ri Moisés: Ri nivajo' nijoyovaj roch, can nijoyovaj-ve roch. Y ri nivajo' nito', can nito-ve. Quire' xu'ej ri Dios cha ri Moisés. 16Can k'alaj chi antok ri Dios c'o ri nuya' chika, quire' nu'on jo'c ruma nujoyovaj kavach, y man ruma ta jare' ri altíra nakajo' y nkojxulie-nkojjotie' chucunuxic. 17Inche'l nu'ej chupan ri ruch'ab'al ri Dios ri tz'ib'an can; ri Dios xu'ej cha ri Faraón: Xanpilisaj chi xk'alajin ri nu-poder aviq'uin. Ruma nivajo' chi nitzijos ri nub'e' nojiel tanamet ri ic'o choch-ulief. Quire' xu'ej ri Dios cha ri Faraón ojier can tiempo. 18Y rumare' nakatz'at chi ri Dios nujoyovaj roch jun vinak xa nrajo' nujoyovaj roch, o nu'on cof ránima cha ri nrajo' nu'on cof cha. 19Pero man ruma ta re' ixre' nti'an pensar: ¿Karruma oj pecadores nu'ej chika? Ruma ¿chica nitiquir nuk'at choch ri Dios ri chica nrajo' nu'on? 20Pero inre' ni'ej: Ojre' oj vinak man nkojtiquir ta naka'ej cha ri Dios chi man otz ta ri nu'on. ¿Otz came chi jun b'ajo'y nu'ej cha ri xb'ano richin: Karruma quire' xa'an chuva? 21Ruma riq'uin ri aj-b'anoy-b'ajo'y c'o-ve ri chica nrajo' nu'on cha ri barro. Ruma cha ri barro nitiquir nu'on jun b'ajo'y ri c'o rakalien y nu'on jun ri xa manak rakalien. 22Y quire' je' ri Dios, pa ruk'a' jaja' c'o-ve chi nuc'ut ri ru-poder y ri rayoval pa quive' ri vinak. Pero altíra i-rucach'uon, mesque otz ta chi xka yan ta ri rayoval pa quive' y xa'q'uis yan ta. 23Y chi nuc'ut chi altíra ruk'ij, xujoyovaj kavach, y xojrucha' yan chi xti'kila' jun utzulaj c'aslien riq'uin jaja', y nic'ujie' kak'ij. 24Quire' rub'anun kiq'uin ojre' ri xojrayuoj, chi israelitas y man israelitas ta. 25Inche'l nu'ej ri Dios chupan ri rutz'ib'an can ri Oseas: Ri vinak ri man i-nutanamit ta, xtin'an chica chi xca'uoc nutanamit. Ri man i-vajo'n ta pa, xca'nvajo'. 26Y ri lugar pache' x'e'x chica ri vinak: Ixre' man ix nutanamit ta, chire' chupan ri mismo lugar xti'e'x chica chi i-ralc'ual chic ri c'aslic Dios. 27Y chikij ojre' israelitas, c'o ri xu'ej can ri profeta Isaías. Jaja' can cof xch'o' y xu'ej: Ojre' ri oj rumáma can ri Israel, can oj q'uiy; can oj inche'l ri sanaye' chuchi' ri mar, ruma man jun nitiquir nijilan kichin. Pero man oj q'uiy ta ri xkojcolotaj. 28Ri Ajaf Dios can ru'e'n chi xtuya' ri castigo paro' ri roch-ulief. Y can inche'l ru'e'n, can pa ruchojmil xtu'on y can cha'nin xtib'anataj. 29Ri profeta Isaías ru'e'n can je': Ri Dios ri c'o nojiel poder riq'uin, xa ta jaja' xojruq'uis konojiel, man jun ta kamáma xa'c'ujie'. Can ta xb'anataj kiq'uin inche'l ri xb'anataj quiq'uin ri tanamet Sodoma y Gomorra ojier can tiempo. Quire' xu'ej ri Isaías. 30¿Chica c'a naka'ej chirij re'? Ri man israelitas ta, mesque man quitijuon ta pa quik'ij chi ntiel chi man jun chic qui-pecado choch ri Dios, pero xa ja yan chic ijeje' ri can ketzij chi xiel chi man jun chic qui-pecado choch ri Dios. Quire' ni'an chica quinojiel ri niquicukub'a' quic'u'x riq'uin ri Jesucristo. 31Pero ri kavanakil israelitas can nicajo' niqui'an ri nu'ej chupan ri ru-ley ri Moisés, chi quire' ntiel chi man jun chic qui-pecado choch ri Dios, pero man nca'tiquir ta. 32¿Y karruma? Ruma man quicukub'an ta quic'u'x riq'uin ri Jesucristo. Xa ja ri ru-ley ri Moisés ri altíra nicajo' niqui'an y man nicajo' ta niquinimaj ri Jesucristo; rumare' xquitupij cakan choch ri Ab'aj. 33Inche'l nu'ej ri Dios chupan ri tz'ib'an can: Inre' xtinya' jun Ab'aj pa tanamet Sion, y ic'o ri xtiquitupij cakan choch ri Ab'aj re' y xca'tzak paro'. Pero ri xtiquinimaj, man xca'q'uixb'ax ta. Quire' nu'ej chupan ri tz'ib'an can.

will be added

X\