Romanos 8

1Vacame c'a, man xtika ta chic ri nem castigo pa kave', ruma ojre' xa jun chic kab'anun riq'uin ri Cristo Jesús, y man oj-uc'uan ta chic ruma ri itziel tak kax ri nca'karayij, y xa ja yan chic ri Espíritu Santo ri oj-c'uayuon. 2Antok xojuoc chuxie' ri ru-ley ri Espíritu Santo richin c'aslien, ja xojcolotaj choch ri ru-ley ri pecado y ri camic, ruma ri Cristo Jesús. 3Ri ru-ley ri Moisés man xtiquir ta xojrucol, ruma ojre' man xka'an ta ri nu'ej. Pero chi nkojcolotaj, ri Dios xutak-pa ri Ruc'ajuol choch-ulief, chi xuoc vinak inche'l ojre'. Pero jaja' man jun ru-pecado, jaja' xcon ruma ka-pecado ojre', y riq'uin re' ri Dios xojrucol choch ri ru-poder ri pecado. 4Quire' xu'on chi quire' ojre' nakuc'uaj jun choj c'aslien inche'l ri b'e'n can chupan ri ru-ley ri Moisés. Man oj-uc'uan ta chic ruma ri itziel tak kax ri nca'karayij, ruma vacame xa ja ri Espíritu Santo ri c'uayuon kichin. 5Ri i-uc'uan cuma ri itziel tak kax ri nca'quirayij, can jo'c niqui'an pensar re'. Pero ri i-uc'uan ruma ri Espíritu Santo, can jo'c niqui'an pensar ri nrajo' ri Espíritu Santo. 6Ri jo'c niqui'an pensar ri itziel tak kax ri nca'quirayij, xa camic ri nuc'am-pa chica. Pero ri jo'c niqui'an pensar ri nrajo' ri Espíritu Santo, c'aslien y paz nuc'am-pa chica. 7Ri i-uc'uan cuma ri itziel tak kax ri nca'quirayij, can itziel niquitz'at ri Dios, man niquinimaj ta ri nu'ej ri ru-ley ri Dios, y man nca'tiquir ta nca'niman. 8Ri i-uc'uan cuma ri itziel tak kax ri nca'quirayij, man nca'tiquir ta niqui'an ri nika choch ri Dios. 9Pero ixre' man ix-uc'uan ta chic cuma ri itziel tak kax ri nca'irayij; ixre' xa ja ri Ru-Espíritu ri Dios ri c'uayuon ivichin. Can quire' ib'anun, si es que c'o ri Ru-Espíritu ri Dios pa tak ivánima. Xa jun manak ri Ru-Espíritu ri Dios riq'uin, man richin ta ri Cristo. 10Pero xa ri Cristo c'o pa tak ivánima, c'o iviq'uin ri c'aslien ri man niq'uis ta, ruma ntiel chi man jun chic i-pecado choch ri Dios. Y can ketzij chi ruma ri pecado nkucon-el choch-ulief, pero riq'uin ri Cristo c'o kac'aslien. 11Si es que c'o ri Ru-Espíritu ri Dios pa tak ivánima, ri xc'asuon-el richin ri Jesús chiquicajol ri quiminaki', ri Dios ri xc'asuon-el richin ri Cristo Jesús, xquixruc'asuoj je' el ixre' chiquicajol ri quiminaki', ruma c'o ri Espíritu Santo iviq'uin. 12Rumare' hermanos, ojre' c'o kac'as riq'uin ri Espíritu Santo, pero quiq'uin ri itziel tak kax ri nca'karayij manak kac'as, ruma man otz ta chi naka'an ri itziel tak kax ri nca'karayij. 13Ruma xa nca'ka'an ri itziel tak kax ri nca'karayij, xa camic nuc'am-pa chika. Pero xa riq'uin ri ru-poder ri Espíritu Santo nkojcovin chirij ri itziel tak kax ri nca'karayij, can xtic'ujie' kiq'uin ri c'aslien ri man niq'uis ta. 14Ruma quinojiel ri i-uc'uan ruma ri Ru-Espíritu ri Dios, can i-ralc'ual chic ri Dios. 15Antok xyo'x ri Espíritu chika, ja xojuoc ralc'ual ri Dios. Ruma ojier can, antok c'a ojc'o chuxie' ri pecado, altíra nakaxi'ij-ki'. Pero vacame, ruma c'o ri Espíritu Santo kiq'uin, man chic nakaxi'ij ta ki', y vacame Katata' naka'ej cha ri Dios. 16Ruma ja ri Espíritu Santo nib'ano chika chi nakana' riq'uin kánima chi ketzij chi oj ralc'ual ri Dios. 17Y ruma oj ralc'ual chic ri Dios, can c'o je' jun herencia ri xtiyo'x chika; junan xtiyo'x chika riq'uin ri Cristo. Pero xa nakacoch' ri sufrimiento, inche'l xu'on sufrir ri Cristo, xtic'ujie' kak'ij inche'l jaja' c'o ruk'ij. 18Vacame naka'an sufrir ruma ojc'o vave' choch-ulief; pero vata'n chi antok xkojb'ac'ujie' riq'uin ri Cristo, man junan ta riq'uin ri sufrimiento richin ri roch-ulief, ruma ri Cristo c'o ruk'ij y xtiyo'x kak'ij chicaj. 19Y ri roch-ulief y ri nic'aj chic kax ri i-rub'anun ri Dios, can quiyo'ien ri k'ij antok xca'k'alajin ri ralc'ual ri Dios. 20Ruma ri roch-ulief y ri nic'aj chic kax ri xa'ru'on ri Dios can i-otz, pero después xu'on chica chi man jun quikalien. Quire' xu'on ri Dios chica, y man ijeje' ta xa'rayin. Pero ri Dios mismo rub'anun chica chi quiyo'ien ri k'ij chi nca'chojmix chic. 21Ri pecado xu'on cha nojiel ri ranun ri Dios, chi xq'uis pa quive'. Pero xtalka jun k'ij chi xca'colotaj choch re'. Inche'l xtib'anataj kiq'uin ojre' ri oj ralc'ual chic ri Dios chupan ri k'ij antok xti'an chika chi xtic'ujie' kak'ij. 22Nojiel ri i-rub'anun ri Dios niqui'an sufrir y nca'jilo inche'l nu'on jun ixok antok xalka ri k'ij chi nic'ujie' ruxulu'. Quire' quib'anun-pa hasta vacame. 23Y quire' je' ojre'. Ri kánima nu'on sufrir y nijilo. Can altíra nakajo' chi nalka yan ri k'ij antok xtik'alajin chi oj ralc'ual ri Dios, y xtic'axtaj ri ka-cuerpo. Kata'n chi quire' xti'an chika, ruma yo'n chic ri Espíritu Santo pa tak kánima. 24Ya xojcolotaj chupan ri ka-pecado, pero c'a c'o nic'aj chic kax ri i-kayo'ien ri man nakatz'at ta. Xa ta c'o yan nojiel re' kiq'uin, man ta i-kayo'ien. Ruma man jun vinak c'a nroyo'iej jun kax ri xa c'o chic riq'uin. 25Pero xa kayo'ien ri man nakatz'at ta, c'o ka-paciencia kayo'ien. 26Y ri Espíritu Santo can nkojruto', ruma jaja' rata'n chi ojre' manak kachuk'a'. Can nkojruto' je' riq'uin ri ka-oraciones, ruma ojre' man kata'n ta chica ri otz chi nakac'utuj cha ri Dios. Jaja' nuc'utuj pa ka-cuenta ojre', y altíra nijilo antok nuc'utuj, y ri jiluoj ri nu'on man nkojtiquir ta naka'ej riq'uin tzij. 27Pero choch ri Dios, can k'alaj ri c'o pa tak kánima y choch jaja' je' can k'alaj ri nu'on pensar ri Espíritu Santo. Ruma ri Espíritu Santo rata'n ri nurayij ri Dios, y jare' ri nuc'utuj pa ka-cuenta ojre' ri can oj santos ralc'ual ri Dios. 28Ojre' ri nakajo' ri Dios y xojayox ruma jaja' chi xojuoc ralc'ual, ruma quire' ranun-pa pensar pa kave', can kata'n chi chica-na kax ri nakak'asaj pa kac'aslien, c'o otz nuc'am-pa chika. 29Ruma ri Dios ya rata'n kavach antok c'a maja' kojalax, y xojrucha' chi nkojuoc inche'l ri Ruc'ajuol. Ri Dios can nrajo' chi oj q'uiy ta ri nkojuoc ralc'ual y ja ri Ruc'ajuol ri na'ay chikacajol. 30Y ojre' ri xojrucha' ri Dios, can xojrayuoj; y ri oj-rayuon chic, xu'on chika chi manak chic ka-pecado choch; y ri manak chic ka-pecado choch, jo'c chic kayo'ien ri k'ij antok xtu'on chika chi xtic'ujie' kak'ij riq'uin. 31¿Chica c'a naka'ej chirij re'? Xa Dios c'o kiq'uin ojre', ¿chica came nicovin chikij? 32Ri Dios man xujoyovaj ta roch ri Ruc'ajuol chi xuya-pa chi xcon kuma konojiel ojre'. Y ruma xuya-pa ri Ruc'ajuol, can k'alaj chi xtuya-pa nojiel kax chika. 33¿Chica xca'b'ano acusar ri xa'rucha' ri Dios? Xa jaja' mismo xb'ano chica chi manak chic qui-pecado choch. 34Ri Cristo xcon kuma ojre', y xc'astaj-pa, y vacame c'o pa ru-derecha ri Dios y nich'o' pa ka-cuenta. Y ruma quire' rub'anun ri Cristo kuma ojre', ¿c'o came jun ri nitiquir nuc'utuj chi tika ri castigo pa kave'? 35¿C'o came ri nicovin nkojralasaj-el riq'uin ri ru-amor ri Cristo? ¿Nicovin came ri sufrimiento, o ri b'is, o ri itziel nkojtz'iet ruma rub'e' ri Cristo, o ri vi'jal, o ri manak katziak, o ri peligro, o ri camic? 36Chupan ri ruch'ab'al ri Dios ri tz'ib'an can, nu'ej: Ruma oj avalc'ual, ri nic'aj chic vinak nojiel tiempo nicajo' nkojquiquimisaj; chiquivach ijeje', ojre' xa oj inche'l ovejas ri can richin nca'quimisas. Quire' nu'ej ri tz'ib'an can. 37Chiquivach nojiel re', man jun xtitiquir ta xkojralasaj riq'uin ri Cristo, ruma ri Cristo can altíra nkojrajo', y ojre' can nkuch'acuon ruma jaja' c'o kiq'uin. 38Y inre' vata'n chi man jun ri xtitiquir xkojralasaj-el riq'uin ri Dios. Ni ri camic, ni ri nib'anataj chika vave' antok ojc'as choch-ulief, ni ri ángeles, ni ri itzal tak espíritus, ni ri autoridades, ni jun ri c'o vacame, ni man jun je' ri xtipa chakavach-apa, 39ni ri naj jatol chicaj, ni ri c'o chuxie' ka ri ulief, ni man jun chic kax b'anun ruma ri Dios ri nicovin nkojralasaj-el riq'uin ri ru-amor ri Dios, ruma xa jun kab'anun riq'uin ri Kajaf Jesucristo.

will be added

X\