Romanos 7

1Hermanos, ixre' ivata'n ri chica nu'ej ri ley, y ivata'n chi jo'c antok jun vinak c'as, c'o chuxie' ri ley re'. 2Inche'l nu'ej chupan ri ley, chi jun ixok c'ulan manak modo nujach-ri' riq'uin ri rachajil, antok ri ache xa c'a c'as. Pero xa nicon-el ri rachajil, ri ixok nic'ujie' can libre choch ri ru-ley ri c'ulub'ic. 3Pero xa nic'ujie' riq'uin jun chic ache antok c'a c'as ri rachajil, can pecado ri nu'on. Pero xa quiminak chic ri rachajil, nic'ujie' can libre, ri ixok c'o modo nic'ulie' riq'uin jun chic ache, y ri ley man nu'ej ta chi pecado nu'on xa nic'ulie' chic jun b'ay. 4Hermanos, quire' je' kab'anun ojre'. Inche'l can xojcon choch ri ru-ley ri Moisés antok ri Cristo xcon. Y rumare' man ojc'o ta chic chuxie' ri ley re', vacame oj richin chic ri Cristo, ri xc'astaj-pa chiquicajol ri quiminaki'. Y ruma oj richin chic ri Cristo, kuc'uaj jun otz kac'aslien; inche'l nrajo' ri Dios. 5Ri rub'anun-pa, xa'ka'an ri itziel tak kax ri xa'karayij, y ri ru-ley ri Moisés nu'ej chi man otz ta ri xka'an. Pero ri ley re' xu'on chika chi xkacusaj ri ka-cuerpo richin xa'ka'an ri pecado, y ri pecado xa camic xuc'am-pa pa kave'. 6Ojier can, xojc'ujie' chuxie' ri ru-ley ri Moisés; pero vacame inche'l xojcon yan choch ri ley re', y rumare' oj libres choch vacame. Vacame naka'an ri nrajo' ri Dios ruma ri c'ac'ac' c'aslien ri yo'n chika ruma ri Espíritu Santo, y man ruma ta chic ri nu'ej ri ley ri tz'ib'an can. 7Y vacame, ¿chica naka'ej? ¿Itziel came ri ru-ley ri Moisés? Man quire' ta. Xa man ta ri ley, inre' man ta vata'n chica ri pecado. Ri ley nu'ej: Man tarayij chi aviq'uin ta atre' c'o-ve ri c'o riq'uin jun chic. Y xa man ta ri ley, inre' man ta xinvatamaj chi pecado xa nirayij ri c'o riq'uin jun chic. 8Pero ruma ri ley nu'ej chi can pecado, xa'b'ak'alajin-pa ri pecado ri c'o pa vánima, y xu'on chuva chi más xa'nrayij nojiel quivach itziel tak kax. Pero xa man ta c'o ri ley, ri pecado quiminak ta. 9Antok c'a maja' nub'anun entender otz ri ley, xin'an pensar chi c'o nuc'aslien. Pero ri k'ij antok xi'ka pano' (xin'an entender) ri nu'ej ri ley, xc'astaj-pa ri pecado ri c'o pa vánima, y c'ajare' xinna'iej chi xa in-quiminak ruma ri pecado. 10Ri ru-ley ri Moisés nuc'ut ri chica modo nilitaj ri c'aslien. Pero inre' man xinvil ta c'aslien, ruma xa camic ri xinvil. 11Y quire' xb'anataj viq'uin ruma ri pecado ri c'o pa vánima xiru'on engañar, ruma ja ri ley ri xucusaj chi xiruquimisaj. 12Ri ley can santa, can otz y can choj nojiel ri nu'ej. 13Pero, ¿ni'ej came inre' chi ja ri utzulaj ley re' ri xu'on chuva chi xicon? Man quire' ta, ruma ri ley can otz, pero ja ri pecado ri xc'amo-pa ri camic pano', ruma xu'on chuva chi inre' man xinnimaj ta ri nu'ej ri ley. Y rumare' ri ley xuc'ut chinoch ri chica ri pecado; y riq'uin re', can k'alaj chi ri pecado can itziel. 14Kata'n chi ri ley riq'uin ri Dios patanak-ve. Pero inre' xa in vinak ri inc'o pa ruk'a' ri pecado. 15Inre' man ni'ka ta pano' (man ni'an ta entender) ri ni'an ruma nivajo' ni'an ri otz y man ni'an ta, y man nivajo' ta chic ni'an ri itziel tak kax, pero xa jare' ri ni'an. 16Y ri man nivajo' ta ni'an, xa jare' yan chic ni'an, riq'uin re' nik'alajin chi ri ley otz ri nu'ej. 17Y rumare' nquitiquir ni'ej chi man inre' ta ri nquib'ano ri man otz ta, xa ja ri pecado ri c'o pa vánima ri nib'ano chuva chi ni'an ri man otz ta. 18Inre' in jun vinak ri man jun otz c'o pa nuc'aslien. Nivajo' ni'an ri otz, pero man nquitiquir ta. 19Mesque ja ri otz ri nivajo' ni'an, man ni'an ta. Y ri itziel ri man nivajo' ta chic ni'an, xa jare' ri ni'an. 20Y xa ja ri man nivajo' ta ni'an, xa jare' ri ni'an, nik'alajin chi xa ja ri pecado ri c'o pa vánima ri nib'ano chuva chi ni'an ri man otz ta. 21Y inre' nitz'at chi siempre quire' nib'anataj viq'uin, ruma antok inre' nivajo' ni'an ri otz, man nquitiquir ta; ruma ri pecado ri c'o pa vánima. 22Ri vánima can altíra niquicuot riq'uin ri nu'ej ri ru-ley ri Dios. 23Pero vata'n chi c'o chic jun ley ri c'uayuon vichin. Y ri jun ley re' man nrajo' ta nu'on ri nurayij ri vánima. Ri ley re' ja ri pecado. Can inc'o pa ruk'a' y in-ximil. 24¡Juye' noch ruma ri nub'anun! ¿Chica nquicalo pa ruk'a' ri nu-cuerpo ri nquiruc'uaj pa camic? 25Xa tiox b'a' niya' cha ri Dios, ruma ri Kajaf Jesucristo xirucol. Ruma ri vánima can nrajo' nu'on ri ru-ley ri Dios. Pero cha ri nu-cuerpo ni'an itziel tak kax, rumare' c'a inc'o chuxie' ri ru-ley ri pecado.

will be added

X\