Romanos 6

1¿Chica xtaka'ej vacame? ¿C'a otz came naka'an pecado chi quire' más nik'alajin-pa ri ru-favor ri Dios pa kave'? 2Can man otz ta. Ojre' xa kayo'n chic can ri pecado. Can inche'l xojcon yan, y rumare' man otz ta chic chi c'a naka'an pecado. 3¿Man ivata'n ta c'a chi ri bautismo jare' ratal chi ojre' can xojcon yan junan riq'uin ri Cristo Jesús, y chi jo'c jun kab'anun riq'uin? 4Antok xoj'an bautizar, inche'l can xojcon riq'uin, y inche'l xojmuk je' junan riq'uin, y ri Cristo xc'astaj-pa ruma ri namalaj ru-poder ri Katata' Dios, mare' vacame kuc'uaj jun c'ac'ac' c'aslien. 5Y ruma can inche'l xojcon junan riq'uin ri Cristo antok xoj'an bautizar, can xkojc'astaj je' riq'uin, ruma jaja' can xc'astaj-pa. 6Ruma rub'anun-pa, xkuc'uaj jun itziel c'aslien. Pero can inche'l xojb'ajix riq'uin ri Jesucristo choch ri cruz, y rumare' ri itziel c'aslien re' xq'uis can y xojcolotaj-pa pa ruk'a' ri pecado. 7Quinojiel ri inche'l can xa'con riq'uin ri Cristo, ntiel chi manak chic qui-pecado choch ri Dios. 8Y ruma ojre' inche'l xojcon riq'uin ri Cristo antok jaja' xcon, rumare' nakanimaj chi xkojc'asie' je' riq'uin. 9Y kata'n chi ri Cristo xc'astaj-pa chiquicajol ri quiminaki', y vacame man chic xticon ta, ruma ri camic manak chic ruk'a' cha. 10Antok xcon jaja', ja xq'uis ruchuk'a' ri pecado. Jo'c jun b'ay xcon ruma nojiel pecado. Y vacame c'as y nuya' ruk'ij ri Dios. 11Y ojre' man takamastaj chi oj-quiminak chic choch ri pecado, pero vacame ojc'as chi nakaya' ruk'ij ri Dios, ruma jun kab'anun riq'uin ri Kajaf Jesucristo. 12Rumare' man takaya' lugar chi ntuoc chic pa ri pecado kiq'uin, chi nkuruc'uaj chupan ri itziel tak kax ri nurayij ri ka-cuerpo. 13Man ca'kacusaj ri kak'a-kakan chi naka'an ri pecado, xa kajacha-ki' pa ruk'a' ri Dios chi quire' jo'c ri otz naka'an, ruma ojier can oj-quiminak chupan ri pecado, pero vacame kuc'uan chic jun c'ac'ac' c'aslien. 14Ri pecado man jun chic ruk'a' chika. Ojre' man ojc'o ta chic chuxie' ri ru-ley ri Moisés, vacame ojc'o chuxie' ri ru-favor ri Dios. 15Rumare', ¿c'a otz came naka'an pecado, ruma ja ri ru-favor ri Dios ri nicalo kichin, y man ja ta ri ley? Man quire' ta. 16Ixre' ja'al ivata'n chi chica-na vinak ri nujach-ri' chi ntuoc ru-esclavo jun chic, can nic'ujie' chuxie' ri rutzij ri rajaf. Rumare' ojre' xa xtaka'an ri pecado, can xkojuoc inche'l jun ru-esclavo ri pecado y re' xkojruc'uaj pa camic. Pero xa naka'an ri nrajo' ri Dios, xkojuoc ru-esclavo jaja' y can xkojruc'uaj chupan ri choj c'aslien. 17Rub'anun-pa, ixre' xixc'ujie' pa ruk'a' ri pecado, pero vacame tiox b'a' cha ri Dios chi ixre' riq'uin nojiel ivánima iniman ri ruch'ab'al, ri c'utun chivach. 18Vacame man ixc'o ta chic pa ruk'a' ri pecado, xa ix ru-siervos chic ri Dios y ivuc'uan chic jun choj c'aslien. 19Y ruma ixre' xa cuesta ni'ka pan ive' (nti'an entender) nojiel ri nu'e'n, rumare' xincusaj ri ejemplo chirij jun esclavo; ruma ri rub'anun-pa, xicusaj ri ik'a-ivakan chi xi'an pecado y xi'an ri man otz ta y ri man sak ta. Pero vacame nic'atzin chi nticusaj ri ik'a-ivakan richin nti'an ri choj, chi quire' sak ri ic'aslien choch ri Dios. 20Ruma antok ixre' c'a ix esclavos richin ri pecado, man xi'an ta pensar jub'a' chi can nic'atzin ntivuc'uaj jun choj c'aslien. 21¿Y chica came xich'ec chirij nojiel ri itziel c'aslien ri xivuc'uaj? Y vacame nquixq'uix antok nalka pan ive' ri itziel tak kax ri xi'an, ri xa camic nuc'am-pa pa ruq'uisb'al. 22Pero vacame ya ix libres pa ruk'a' ri pecado, y vacame xa ix ru-siervos ri Dios, y yo'n chic chiva jun c'aslien sak, y ri c'aslien re' nuc'am-pa ri c'aslien ri man niq'uis ta. 23Ruma ri rajal ri nuya' ri pecado chika ja ri camic. Pero ri Dios ja ri c'aslien ri man niq'uis ta ri nusipaj chika, ruma xa jun kab'anun riq'uin ri Kajaf Jesucristo.

will be added

X\